2 Chronicles 34:1-35 בן שׁמונה שׁנים יאשׁיהו במלכו ושׁלשׁים ואחת שׁנה מלך בירושׁלם׃

HOT⁽ⁱ⁾ ¹ בן שׁמונה שׁנים יאשׁיהו במלכו ושׁלשׁים ואחת שׁנה מלך בירושׁלם׃ ² ויעשׂ הישׁר בעיני יהוה וילך בדרכי דויד אביו ולא סר ימין ושׂמאול׃ ³ ובשׁמונה שׁנים למלכו והוא עודנו נער החל לדרושׁ לאלהי דויד אביו ובשׁתים עשׂרה שׁנה החל לטהר את יהודה וירושׁלם מן הבמות והאשׁרים והפסלים והמסכות׃ ⁴ וינתצו לפניו את מזבחות הבעלים והחמנים אשׁר למעלה מעליהם גדע והאשׁרים והפסלים והמסכות שׁבר והדק ויזרק על פני הקברים הזבחים׃ ⁵ ועצמות כהנים שׂרף על מזבחותים ויטהר את יהודה ואת ירושׁלם׃ ⁶ ובערי מנשׁה ואפרים ושׁמעון ועד נפתלי בהר בתיהם סביב׃ ⁷ וינתץ את המזבחות ואת האשׁרים והפסלים כתת להדק וכל החמנים גדע בכל ארץ ישׂראל וישׁב לירושׁלם׃ ⁸ ובשׁנת שׁמונה עשׂרה למלכו לטהר הארץ והבית שׁלח את שׁפן בן אצליהו ואת מעשׂיהו שׂר העיר ואת יואח בן יואחז המזכיר לחזק את בית יהוה אלהיו׃ ⁹ ויבאו אל חלקיהו הכהן הגדול ויתנו את הכסף המובא בית אלהים אשׁר אספו הלוים שׁמרי הסף מיד מנשׁה ואפרים ומכל שׁארית ישׂראל ומכל יהודה ובנימן וישׁבי ירושׁלם׃ ¹⁰ ויתנו על יד עשׂה המלאכה המפקדים בבית יהוה ויתנו אתו עושׂי המלאכה אשׁר עשׂים בבית יהוה לבדוק ולחזק הבית׃ ¹¹ ויתנו לחרשׁים ולבנים לקנות אבני מחצב ועצים למחברות ולקרות את הבתים אשׁר השׁחיתו מלכי יהודה׃ ¹² והאנשׁים עשׂים באמונה במלאכה ועליהם מפקדים יחת ועבדיהו הלוים מן בני מררי וזכריה ומשׁלם מן בני הקהתים לנצח והלוים כל מבין בכלי שׁיר׃ ¹³ ועל הסבלים ומנצחים לכל עשׂה מלאכה לעבודה ועבודה ומהלוים סופרים ושׁטרים ושׁוערים׃ ¹⁴ ובהוציאם את הכסף המובא בית יהוה מצא חלקיהו הכהן את ספר תורת יהוה ביד משׁה׃ ¹⁵ ויען חלקיהו ויאמר אל שׁפן הסופר ספר התורה מצאתי בבית יהוה ויתן חלקיהו את הספר אל שׁפן׃ ¹⁶ ויבא שׁפן את הספר אל המלך וישׁב עוד את המלך דבר לאמר כל אשׁר נתן ביד עבדיך הם עשׂים׃ ¹⁷ ויתיכו את הכסף הנמצא בבית יהוה ויתנוהו על יד המפקדים ועל יד עושׂי המלאכה׃ ¹⁸ ויגד שׁפן הסופר למלך לאמר ספר נתן לי חלקיהו הכהן ויקרא בו שׁפן לפני המלך׃ ¹⁹ ויהי כשׁמע המלך את דברי התורה ויקרע את בגדיו׃ ²⁰ ויצו המלך את חלקיהו ואת אחיקם בן שׁפן ואת עבדון בן מיכה ואת שׁפן הסופר ואת עשׂיה עבד המלך לאמר׃ ²¹ לכו דרשׁו את יהוה בעדי ובעד הנשׁאר בישׂראל וביהודה על דברי הספר אשׁר נמצא כי גדולה חמת יהוה אשׁר נתכה בנו על אשׁר לא שׁמרו אבותינו את דבר יהוה לעשׂות ככל הכתוב על הספר הזה׃ ²² וילך חלקיהו ואשׁר המלך אל חלדה הנביאה אשׁת שׁלם בן תוקהת בן חסרה שׁומר הבגדים והיא יושׁבת בירושׁלם במשׁנה וידברו אליה כזאת׃ ²³ ותאמר להם כה אמר יהוה אלהי ישׂראל אמרו לאישׁ אשׁר שׁלח אתכם אלי׃ ²⁴ כה אמר יהוה הנני מביא רעה על המקום הזה ועל יושׁביו את כל האלות הכתובות על הספר אשׁר קראו לפני מלך יהודה׃ ²⁵ תחת אשׁר עזבוני ויקטירו לאלהים אחרים למען הכעיסני בכל מעשׂי ידיהם ותתך חמתי במקום הזה ולא תכבה׃ ²⁶ ואל מלך יהודה השׁלח אתכם לדרושׁ ביהוה כה תאמרו אליו כה אמר יהוה אלהי ישׂראל הדברים אשׁר שׁמעת׃ ²⁷ יען רך לבבך ותכנע מלפני אלהים בשׁמעך את דבריו על המקום הזה ועל ישׁביו ותכנע לפני ותקרע את בגדיך ותבך לפני וגם אני שׁמעתי נאם יהוה׃ ²⁸ הנני אספך אל אבתיך ונאספת אל קברתיך בשׁלום ולא תראינה עיניך בכל הרעה אשׁר אני מביא על המקום הזה ועל ישׁביו וישׁיבו את המלך דבר׃ ²⁹ וישׁלח המלך ויאסף את כל זקני יהודה וירושׁלם׃ ³⁰ ויעל המלך בית יהוה וכל אישׁ יהודה וישׁבי ירושׁלם והכהנים והלוים וכל העם מגדול ועד קטן ויקרא באזניהם את כל דברי ספר הברית הנמצא בית יהוה׃ ³¹ ויעמד המלך על עמדו ויכרת את הברית לפני יהוה ללכת אחרי יהוה ולשׁמור את מצותיו ועדותיו וחקיו בכל לבבו ובכל נפשׁו לעשׂות את דברי הברית הכתובים על הספר הזה׃ ³² ויעמד את כל הנמצא בירושׁלם ובנימן ויעשׂו ישׁבי ירושׁלם כברית אלהים אלהי אבותיהם׃ ³³ ויסר יאשׁיהו את כל התועבות מכל הארצות אשׁר לבני ישׂראל ויעבד את כל הנמצא בישׂראל לעבוד את יהוה אלהיהם כל ימיו לא סרו מאחרי יהוה אלהי אבותיהם׃