2 Chronicles 8 ויהי מקץ עשׂרים שׁנה אשׁר בנה שׁלמה את בית יהוה ואת ביתו׃

HOT⁽ⁱ⁾ ¹ ויהי מקץ עשׂרים שׁנה אשׁר בנה שׁלמה את בית יהוה ואת ביתו׃ ² והערים אשׁר נתן חורם לשׁלמה בנה שׁלמה אתם ויושׁב שׁם את בני ישׂראל׃ ³ וילך שׁלמה חמת צובה ויחזק עליה׃ ⁴ ויבן את תדמר במדבר ואת כל ערי המסכנות אשׁר בנה בחמת׃ ⁵ ויבן את בית חורון העליון ואת בית חורון התחתון ערי מצור חומות דלתים ובריח׃ ⁶ ואת בעלת ואת כל ערי המסכנות אשׁר היו לשׁלמה ואת כל ערי הרכב ואת ערי הפרשׁים ואת כל חשׁק שׁלמה אשׁר חשׁק לבנות בירושׁלם ובלבנון ובכל ארץ ממשׁלתו׃ ⁷ כל העם הנותר מן החתי והאמרי והפרזי והחוי והיבוסי אשׁר לא מישׂראל המה׃ ⁸ מן בניהם אשׁר נותרו אחריהם בארץ אשׁר לא כלום בני ישׂראל ויעלם שׁלמה למס עד היום הזה׃ ⁹ ומן בני ישׂראל אשׁר לא נתן שׁלמה לעבדים למלאכתו כי המה אנשׁי מלחמה ושׂרי שׁלישׁיו ושׂרי רכבו ופרשׁיו׃ ¹⁰ ואלה שׂרי הנציבים אשׁר למלך שׁלמה חמשׁים ומאתים הרדים בעם׃ ¹¹ ואת בת פרעה העלה שׁלמה מעיר דויד לבית אשׁר בנה לה כי אמר לא תשׁב אשׁה לי בבית דויד מלך ישׂראל כי קדשׁ המה אשׁר באה אליהם ארון יהוה׃ ¹² אז העלה שׁלמה עלות ליהוה על מזבח יהוה אשׁר בנה לפני האולם׃ ¹³ ובדבר יום ביום להעלות כמצות משׁה לשׁבתות ולחדשׁים ולמועדות שׁלושׁ פעמים בשׁנה בחג המצות ובחג השׁבעות ובחג הסכות׃ ¹⁴ ויעמד כמשׁפט דויד אביו את מחלקות הכהנים על עבדתם והלוים על משׁמרותם להלל ולשׁרת נגד הכהנים לדבר יום ביומו והשׁוערים במחלקותם לשׁער ושׁער כי כן מצות דויד אישׁ האלהים׃ ¹⁵ ולא סרו מצות המלך על הכהנים והלוים לכל דבר ולאצרות׃ ¹⁶ ותכן כל מלאכת שׁלמה עד היום מוסד בית יהוה ועד כלתו שׁלם בית יהוה׃ ¹⁷ אז הלך שׁלמה לעציון גבר ואל אילות על שׂפת הים בארץ אדום׃ ¹⁸ וישׁלח לו חורם ביד עבדיו אוניות ועבדים יודעי ים ויבאו עם עבדי שׁלמה אופירה ויקחו משׁם ארבע מאות וחמשׁים ככר זהב ויביאו אל המלך שׁלמה׃