Exodus 14:13-15:21 ויאמר משׁה אל העם אל תיראו התיצבו וראו את ישׁועת יהוה אשׁר יעשׂה לכם היום כי אשׁר ראיתם את מצרים היום לא תספו לראתם עוד עד עולם׃

HOT⁽ⁱ⁾ ¹³ ויאמר משׁה אל העם אל תיראו התיצבו וראו את ישׁועת יהוה אשׁר יעשׂה לכם היום כי אשׁר ראיתם את מצרים היום לא תספו לראתם עוד עד עולם׃ ¹⁴ יהוה ילחם לכם ואתם תחרשׁון׃ ¹⁵ ויאמר יהוה אל משׁה מה תצעק אלי דבר אל בני ישׂראל ויסעו׃ ¹⁶ ואתה הרם את מטך ונטה את ידך על הים ובקעהו ויבאו בני ישׂראל בתוך הים ביבשׁה׃ ¹⁷ ואני הנני מחזק את לב מצרים ויבאו אחריהם ואכבדה בפרעה ובכל חילו ברכבו ובפרשׁיו׃ ¹⁸ וידעו מצרים כי אני יהוה בהכבדי בפרעה ברכבו ובפרשׁיו׃ ¹⁹ ויסע מלאך האלהים ההלך לפני מחנה ישׂראל וילך מאחריהם ויסע עמוד הענן מפניהם ויעמד מאחריהם׃ ²⁰ ויבא בין מחנה מצרים ובין מחנה ישׂראל ויהי הענן והחשׁך ויאר את הלילה ולא קרב זה אל זה כל הלילה׃ ²¹ ויט משׁה את ידו על הים ויולך יהוה את הים ברוח קדים עזה כל הלילה וישׂם את הים לחרבה ויבקעו המים׃ ²² ויבאו בני ישׂראל בתוך הים ביבשׁה והמים להם חומה מימינם ומשׂמאלם׃ ²³ וירדפו מצרים ויבאו אחריהם כל סוס פרעה רכבו ופרשׁיו אל תוך הים׃ ²⁴ ויהי באשׁמרת הבקר וישׁקף יהוה אל מחנה מצרים בעמוד אשׁ וענן ויהם את מחנה מצרים׃ ²⁵ ויסר את אפן מרכבתיו וינהגהו בכבדת ויאמר מצרים אנוסה מפני ישׂראל כי יהוה נלחם להם במצרים׃ ²⁶ ויאמר יהוה אל משׁה נטה את ידך על הים וישׁבו המים על מצרים על רכבו ועל פרשׁיו׃ ²⁷ ויט משׁה את ידו על הים וישׁב הים לפנות בקר לאיתנו ומצרים נסים לקראתו וינער יהוה את מצרים בתוך הים׃ ²⁸ וישׁבו המים ויכסו את הרכב ואת הפרשׁים לכל חיל פרעה הבאים אחריהם בים לא נשׁאר בהם עד אחד׃ ²⁹ ובני ישׂראל הלכו ביבשׁה בתוך הים והמים להם חמה מימינם ומשׂמאלם׃ ³⁰ ויושׁע יהוה ביום ההוא את ישׂראל מיד מצרים וירא ישׂראל את מצרים מת על שׂפת הים׃ ³¹ וירא ישׂראל את היד הגדלה אשׁר עשׂה יהוה במצרים וייראו העם את יהוה ויאמינו ביהוה ובמשׁה עבדו׃¹⁵ ¹ אז ישׁיר משׁה ובני ישׂראל את השׁירה הזאת ליהוה ויאמרו לאמר אשׁירה ליהוה כי גאה גאה סוס ורכבו רמה בים׃ ² עזי וזמרת יה ויהי לי לישׁועה זה אלי ואנוהו אלהי אבי וארממנהו׃ ³ יהוה אישׁ מלחמה יהוה שׁמו׃ ⁴ מרכבת פרעה וחילו ירה בים ומבחר שׁלשׁיו טבעו בים סוף׃ ⁵ תהמת יכסימו ירדו במצולת כמו אבן׃ ⁶ ימינך יהוה נאדרי בכח ימינך יהוה תרעץ אויב׃ ⁷ וברב גאונך תהרס קמיך תשׁלח חרנך יאכלמו כקשׁ׃ ⁸ וברוח אפיך נערמו מים נצבו כמו נד נזלים קפאו תהמת בלב ים׃ ⁹ אמר אויב ארדף אשׂיג אחלק שׁלל תמלאמו נפשׁי אריק חרבי תורישׁמו ידי׃ ¹⁰ נשׁפת ברוחך כסמו ים צללו כעופרת במים אדירים׃ ¹¹ מי כמכה באלם יהוה מי כמכה נאדר בקדשׁ נורא תהלת עשׂה פלא׃ ¹² נטית ימינך תבלעמו ארץ׃ ¹³ נחית בחסדך עם זו גאלת נהלת בעזך אל נוה קדשׁך׃ ¹⁴ שׁמעו עמים ירגזון חיל אחז ישׁבי פלשׁת׃ ¹⁵ אז נבהלו אלופי אדום אילי מואב יאחזמו רעד נמגו כל ישׁבי כנען׃ ¹⁶ תפל עליהם אימתה ופחד בגדל זרועך ידמו כאבן עד יעבר עמך יהוה עד יעבר עם זו קנית׃ ¹⁷ תבאמו ותטעמו בהר נחלתך מכון לשׁבתך פעלת יהוה מקדשׁ אדני כוננו ידיך׃ ¹⁸ יהוה ימלך לעלם ועד׃ ¹⁹ כי בא סוס פרעה ברכבו ובפרשׁיו בים וישׁב יהוה עלהם את מי הים ובני ישׂראל הלכו ביבשׁה בתוך הים׃ ²⁰ ותקח מרים הנביאה אחות אהרן את התף בידה ותצאן כל הנשׁים אחריה בתפים ובמחלת׃ ²¹ ותען להם מרים שׁירו ליהוה כי גאה גאה סוס ורכבו רמה בים׃