Exodus 37 ויעשׂ בצלאל את הארן עצי שׁטים אמתים וחצי ארכו ואמה וחצי רחבו ואמה וחצי קמתו׃

HOT⁽ⁱ⁾ ¹ ויעשׂ בצלאל את הארן עצי שׁטים אמתים וחצי ארכו ואמה וחצי רחבו ואמה וחצי קמתו׃ ² ויצפהו זהב טהור מבית ומחוץ ויעשׂ לו זר זהב סביב׃ ³ ויצק לו ארבע טבעת זהב על ארבע פעמתיו ושׁתי טבעת על צלעו האחת ושׁתי טבעת על צלעו השׁנית׃ ⁴ ויעשׂ בדי עצי שׁטים ויצף אתם זהב׃ ⁵ ויבא את הבדים בטבעת על צלעת הארן לשׂאת את הארן׃ ⁶ ויעשׂ כפרת זהב טהור אמתים וחצי ארכה ואמה וחצי רחבה׃ ⁷ ויעשׂ שׁני כרבים זהב מקשׁה עשׂה אתם משׁני קצות הכפרת׃ ⁸ כרוב אחד מקצה מזה וכרוב אחד מקצה מזה מן הכפרת עשׂה את הכרבים משׁני קצוותו׃ ⁹ ויהיו הכרבים פרשׂי כנפים למעלה סככים בכנפיהם על הכפרת ופניהם אישׁ אל אחיו אל הכפרת היו פני הכרבים׃ ¹⁰ ויעשׂ את השׁלחן עצי שׁטים אמתים ארכו ואמה רחבו ואמה וחצי קמתו׃ ¹¹ ויצף אתו זהב טהור ויעשׂ לו זר זהב סביב׃ ¹² ויעשׂ לו מסגרת טפח סביב ויעשׂ זר זהב למסגרתו סביב׃ ¹³ ויצק לו ארבע טבעת זהב ויתן את הטבעת על ארבע הפאת אשׁר לארבע רגליו׃ ¹⁴ לעמת המסגרת היו הטבעת בתים לבדים לשׂאת את השׁלחן׃ ¹⁵ ויעשׂ את הבדים עצי שׁטים ויצף אתם זהב לשׂאת את השׁלחן׃ ¹⁶ ויעשׂ את הכלים אשׁר על השׁלחן את קערתיו ואת כפתיו ואת מנקיתיו ואת הקשׂות אשׁר יסך בהן זהב טהור׃ ¹⁷ ויעשׂ את המנרה זהב טהור מקשׁה עשׂה את המנרה ירכה וקנה גביעיה כפתריה ופרחיה ממנה היו׃ ¹⁸ ושׁשׁה קנים יצאים מצדיה שׁלשׁה קני מנרה מצדה האחד ושׁלשׁה קני מנרה מצדה השׁני׃ ¹⁹ שׁלשׁה גבעים משׁקדים בקנה האחד כפתר ופרח ושׁלשׁה גבעים משׁקדים בקנה אחד כפתר ופרח כן לשׁשׁת הקנים היצאים מן המנרה׃ ²⁰ ובמנרה ארבעה גבעים משׁקדים כפתריה ופרחיה׃ ²¹ וכפתר תחת שׁני הקנים ממנה וכפתר תחת שׁני הקנים ממנה וכפתר תחת שׁני הקנים ממנה לשׁשׁת הקנים היצאים ממנה׃ ²² כפתריהם וקנתם ממנה היו כלה מקשׁה אחת זהב טהור׃ ²³ ויעשׂ את נרתיה שׁבעה ומלקחיה ומחתתיה זהב טהור׃ ²⁴ ככר זהב טהור עשׂה אתה ואת כל כליה׃ ²⁵ ויעשׂ את מזבח הקטרת עצי שׁטים אמה ארכו ואמה רחבו רבוע ואמתים קמתו ממנו היו קרנתיו׃ ²⁶ ויצף אתו זהב טהור את גגו ואת קירתיו סביב ואת קרנתיו ויעשׂ לו זר זהב סביב׃ ²⁷ ושׁתי טבעת זהב עשׂה לו מתחת לזרו על שׁתי צלעתיו על שׁני צדיו לבתים לבדים לשׂאת אתו׃ ²⁸ ויעשׂ את הבדים עצי שׁטים ויצף אתם זהב׃ ²⁹ ויעשׂ את שׁמן המשׁחה קדשׁ ואת קטרת הסמים טהור מעשׂה רקח׃