Ezekiel 12

HOT(i) 1 ויהי דבר יהוה אלי לאמר׃ 2 בן אדם בתוך בית המרי אתה ישׁב אשׁר עינים להם לראות ולא ראו אזנים להם לשׁמע ולא שׁמעו כי בית מרי הם׃ 3 ואתה בן אדם עשׂה לך כלי גולה וגלה יומם לעיניהם וגלית ממקומך אל מקום אחר לעיניהם אולי יראו כי בית מרי המה׃ 4 והוצאת כליך ככלי גולה יומם לעיניהם ואתה תצא בערב לעיניהם כמוצאי גולה׃ 5 לעיניהם חתר לך בקיר והוצאת׃ 6 לעיניהם על כתף תשׂא בעלטה תוציא פניך תכסה ולא תראה את הארץ כי מופת נתתיך לבית ישׂראל׃ 7 ואעשׂ כן כאשׁר צויתי כלי הוצאתי ככלי גולה יומם ובערב חתרתי לי בקיר ביד בעלטה הוצאתי על כתף נשׂאתי לעיניהם׃ 8 ויהי דבר יהוה אלי בבקר לאמר׃ 9 בן אדם הלא אמרו אליך בית ישׂראל בית המרי מה אתה עשׂה׃ 10 אמר אליהם כה אמר אדני יהוה הנשׂיא המשׂא הזה בירושׁלם וכל בית ישׂראל אשׁר המה בתוכם׃ 11 אמר אני מופתכם כאשׁר עשׂיתי כן יעשׂה להם בגולה בשׁבי ילכו׃ 12 והנשׂיא אשׁר בתוכם אל כתף ישׂא בעלטה ויצא בקיר יחתרו להוציא בו פניו יכסה יען אשׁר לא יראה לעין הוא את הארץ׃ 13 ופרשׂתי את רשׁתי עליו ונתפשׂ במצודתי והבאתי אתו בבלה ארץ כשׂדים ואותה לא יראה ושׁם ימות׃ 14 וכל אשׁר סביבתיו עזרה וכל אגפיו אזרה לכל רוח וחרב אריק אחריהם׃ 15 וידעו כי אני יהוה בהפיצי אותם בגוים וזריתי אותם בארצות׃ 16 והותרתי מהם אנשׁי מספר מחרב מרעב ומדבר למען יספרו את כל תועבותיהם בגוים אשׁר באו שׁם וידעו כי אני יהוה׃ 17 ויהי דבר יהוה אלי לאמר׃ 18 בן אדם לחמך ברעשׁ תאכל ומימיך ברגזה ובדאגה תשׁתה׃ 19 ואמרת אל עם הארץ כה אמר אדני יהוה ליושׁבי ירושׁלם אל אדמת ישׂראל לחמם בדאגה יאכלו ומימיהם בשׁממון ישׁתו למען תשׁם ארצה ממלאה מחמס כל הישׁבים׃ 20 והערים הנושׁבות תחרבנה והארץ שׁממה תהיה וידעתם כי אני יהוה׃ 21 ויהי דבר יהוה אלי לאמר׃ 22 בן אדם מה המשׁל הזה לכם על אדמת ישׂראל לאמר יארכו הימים ואבד כל חזון׃ 23 לכן אמר אליהם כה אמר אדני יהוה השׁבתי את המשׁל הזה ולא ימשׁלו אתו עוד בישׂראל כי אם דבר אליהם קרבו הימים ודבר כל חזון׃ 24 כי לא יהיה עוד כל חזון שׁוא ומקסם חלק בתוך בית ישׂראל׃ 25 כי אני יהוה אדבר את אשׁר אדבר דבר ויעשׂה לא תמשׁך עוד כי בימיכם בית המרי אדבר דבר ועשׂיתיו נאם אדני יהוה׃ 26 ויהי דבר יהוה אלי לאמר׃ 27 בן אדם הנה בית ישׂראל אמרים החזון אשׁר הוא חזה לימים רבים ולעתים רחוקות הוא נבא׃ 28 לכן אמר אליהם כה אמר אדני יהוה לא תמשׁך עוד כל דברי אשׁר אדבר דבר ויעשׂה נאם אדני יהוה׃