Ezekiel 39 ואתה בן אדם הנבא על גוג ואמרת כה אמר אדני יהוה הנני אליך גוג נשׂיא ראשׁ משׁך ותבל׃

HOT⁽ⁱ⁾ ¹ ואתה בן אדם הנבא על גוג ואמרת כה אמר אדני יהוה הנני אליך גוג נשׂיא ראשׁ משׁך ותבל׃ ² ושׁבבתיך ושׁשׁאתיך והעליתיך מירכתי צפון והבאותך על הרי ישׂראל׃ ³ והכיתי קשׁתך מיד שׂמאולך וחציך מיד ימינך אפיל׃ ⁴ על הרי ישׂראל תפול אתה וכל אגפיך ועמים אשׁר אתך לעיט צפור כל כנף וחית השׂדה נתתיך לאכלה׃ ⁵ על פני השׂדה תפול כי אני דברתי נאם אדני יהוה׃ ⁶ ושׁלחתי אשׁ במגוג ובישׁבי האיים לבטח וידעו כי אני יהוה׃ ⁷ ואת שׁם קדשׁי אודיע בתוך עמי ישׂראל ולא אחל את שׁם קדשׁי עוד וידעו הגוים כי אני יהוה קדושׁ בישׂראל׃ ⁸ הנה באה ונהיתה נאם אדני יהוה הוא היום אשׁר דברתי׃ ⁹ ויצאו ישׁבי ערי ישׂראל ובערו והשׂיקו בנשׁק ומגן וצנה בקשׁת ובחצים ובמקל יד וברמח ובערו בהם אשׁ שׁבע שׁנים׃ ¹⁰ ולא ישׂאו עצים מן השׂדה ולא יחטבו מן היערים כי בנשׁק יבערו אשׁ ושׁללו את שׁלליהם ובזזו את בזזיהם נאם אדני יהוה׃ ¹¹ והיה ביום ההוא אתן לגוג מקום שׁם קבר בישׂראל גי העברים קדמת הים וחסמת היא את העברים וקברו שׁם את גוג ואת כל המונה וקראו גיא המון גוג׃ ¹² וקברום בית ישׂראל למען טהר את הארץ שׁבעה חדשׁים׃ ¹³ וקברו כל עם הארץ והיה להם לשׁם יום הכבדי נאם אדני יהוה׃ ¹⁴ ואנשׁי תמיד יבדילו עברים בארץ מקברים את העברים את הנותרים על פני הארץ לטהרה מקצה שׁבעה חדשׁים יחקרו׃ ¹⁵ ועברו העברים בארץ וראה עצם אדם ובנה אצלו ציון עד קברו אתו המקברים אל גיא המון גוג׃ ¹⁶ וגם שׁם עיר המונה וטהרו הארץ׃ ¹⁷ ואתה בן אדם כה אמר אדני יהוה אמר לצפור כל כנף ולכל חית השׂדה הקבצו ובאו האספו מסביב על זבחי אשׁר אני זבח לכם זבח גדול על הרי ישׂראל ואכלתם בשׂר ושׁתיתם דם׃ ¹⁸ בשׂר גבורים תאכלו ודם נשׂיאי הארץ תשׁתו אילים כרים ועתודים פרים מריאי בשׁן כלם׃ ¹⁹ ואכלתם חלב לשׂבעה ושׁתיתם דם לשׁכרון מזבחי אשׁר זבחתי׃ ²⁰ ושׂבעתם על שׁלחני סוס ורכב גבור וכל אישׁ מלחמה נאם אדני יהוה׃ ²¹ ונתתי את כבודי בגוים וראו כל הגוים את משׁפטי אשׁר עשׂיתי ואת ידי אשׁר שׂמתי׃ ²² וידעו בית ישׂראל כי אני יהוה אלהיהם מן היום ההוא והלאה׃ ²³ וידעו הגוים כי בעונם גלו בית ישׂראל על אשׁר מעלו בי ואסתר פני מהם ואתנם ביד צריהם ויפלו בחרב כלם׃ ²⁴ כטמאתם וכפשׁעיהם עשׂיתי אתם ואסתר פני מהם׃ ²⁵ לכן כה אמר אדני יהוה עתה אשׁיב את שׁבית יעקב ורחמתי כל בית ישׂראל וקנאתי לשׁם קדשׁי׃ ²⁶ ונשׂו את כלמתם ואת כל מעלם אשׁר מעלו בי בשׁבתם על אדמתם לבטח ואין מחריד׃ ²⁷ בשׁובבי אותם מן העמים וקבצתי אתם מארצות איביהם ונקדשׁתי בם לעיני הגוים רבים׃ ²⁸ וידעו כי אני יהוה אלהיהם בהגלותי אתם אל הגוים וכנסתים על אדמתם ולא אותיר עוד מהם שׁם׃ ²⁹ ולא אסתיר עוד פני מהם אשׁר שׁפכתי את רוחי על בית ישׂראל נאם אדני יהוה׃