Jeremiah 30 הדבר אשׁר היה אל ירמיהו מאת יהוה לאמר׃

HOT⁽ⁱ⁾ ¹ הדבר אשׁר היה אל ירמיהו מאת יהוה לאמר׃ ² כה אמר יהוה אלהי ישׂראל לאמר כתב לך את כל הדברים אשׁר דברתי אליך אל ספר׃ ³ כי הנה ימים באים נאם יהוה ושׁבתי את שׁבות עמי ישׂראל ויהודה אמר יהוה והשׁבתים אל הארץ אשׁר נתתי לאבותם וירשׁוה׃ ⁴ ואלה הדברים אשׁר דבר יהוה אל ישׂראל ואל יהודה׃ ⁵ כי כה אמר יהוה קול חרדה שׁמענו פחד ואין שׁלום׃ ⁶ שׁאלו נא וראו אם ילד זכר מדוע ראיתי כל גבר ידיו על חלציו כיולדה ונהפכו כל פנים לירקון׃ ⁷ הוי כי גדול היום ההוא מאין כמהו ועת צרה היא ליעקב וממנה יושׁע׃ ⁸ והיה ביום ההוא נאם יהוה צבאות אשׁבר עלו מעל צוארך ומוסרותיך אנתק ולא יעבדו בו עוד זרים׃ ⁹ ועבדו את יהוה אלהיהם ואת דוד מלכם אשׁר אקים להם׃ ¹⁰ ואתה אל תירא עבדי יעקב נאם יהוה ואל תחת ישׂראל כי הנני מושׁיעך מרחוק ואת זרעך מארץ שׁבים ושׁב יעקב ושׁקט ושׁאנן ואין מחריד׃ ¹¹ כי אתך אני נאם יהוה להושׁיעך כי אעשׂה כלה בכל הגוים אשׁר הפצותיך שׁם אך אתך לא אעשׂה כלה ויסרתיך למשׁפט ונקה לא אנקך׃ ¹² כי כה אמר יהוה אנושׁ לשׁברך נחלה מכתך׃ ¹³ אין דן דינך למזור רפאות תעלה אין׃ ¹⁴ כל מאהביך שׁכחוך אותך לא ידרשׁו כי מכת אויב הכיתיך מוסר אכזרי על רב עונך עצמו חטאתיך׃ ¹⁵ מה תזעק על שׁברך אנושׁ מכאבך על רב עונך עצמו חטאתיך עשׂיתי אלה׃ ¹⁶ לכן כל אכליך יאכלו וכל צריך כלם בשׁבי ילכו והיו שׁאסיך למשׁסה וכל בזזיך אתן לבז׃ ¹⁷ כי אעלה ארכה לך וממכותיך ארפאך נאם יהוה כי נדחה קראו לך ציון היא דרשׁ אין׃ ¹⁸ כה אמר יהוה הנני שׁב שׁבות אהלי יעקוב ומשׁכנתיו ארחם ונבנתה עיר על תלה וארמון על משׁפטו ישׁב׃ ¹⁹ ויצא מהם תודה וקול משׂחקים והרבתים ולא ימעטו והכבדתים ולא יצערו׃ ²⁰ והיו בניו כקדם ועדתו לפני תכון ופקדתי על כל לחציו׃ ²¹ והיה אדירו ממנו ומשׁלו מקרבו יצא והקרבתיו ונגשׁ אלי כי מי הוא זה ערב את לבו לגשׁת אלי נאם יהוה׃ ²² והייתם לי לעם ואנכי אהיה לכם לאלהים׃ ²³ הנה סערת יהוה חמה יצאה סער מתגורר על ראשׁ רשׁעים יחול׃ ²⁴ לא ישׁוב חרון אף יהוה עד עשׂתו ועד הקימו מזמות לבו באחרית הימים תתבוננו׃