Proverbs 9

HOT(i) 1 חכמות בנתה ביתה חצבה עמודיה שׁבעה׃ 2 טבחה טבחה מסכה יינה אף ערכה שׁלחנה׃ 3 שׁלחה נערתיה תקרא על גפי מרמי קרת׃ 4 מי פתי יסר הנה חסר לב אמרה׃ 5 לכו לחמו בלחמי ושׁתו ביין מסכתי׃ 6 עזבו פתאים וחיו ואשׁרו בדרך בינה׃ 7 יסר לץ לקח לו קלון ומוכיח לרשׁע מומו׃ 8 אל תוכח לץ פן ישׂנאך הוכח לחכם ויאהבך׃ 9 תן לחכם ויחכם עוד הודע לצדיק ויוסף לקח׃ 10 תחלת חכמה יראת יהוה ודעת קדשׁים בינה׃ 11 כי בי ירבו ימיך ויוסיפו לך שׁנות חיים׃ 12 אם חכמת חכמת לך ולצת לבדך תשׂא׃ 13 אשׁת כסילות המיה פתיות ובל ידעה מה׃ 14 וישׁבה לפתח ביתה על כסא מרמי קרת׃ 15 לקרא לעברי דרך המישׁרים ארחותם׃ 16 מי פתי יסר הנה וחסר לב ואמרה׃ 17 מים גנובים ימתקו ולחם סתרים ינעם׃ 18 ולא ידע כי רפאים שׁם בעמקי שׁאול קראיה׃