HOT(i)
1 שׁיר המעלות זכור יהוה לדוד את כל ענותו׃ 2 אשׁר נשׁבע ליהוה נדר לאביר יעקב׃ 3 אם אבא באהל ביתי אם אעלה על ערשׂ יצועי׃ 4 אם אתן שׁנת לעיני לעפעפי תנומה׃ 5 עד אמצא מקום ליהוה משׁכנות לאביר יעקב׃ 6 הנה שׁמענוה באפרתה מצאנוה בשׂדי יער׃ 7 נבואה למשׁכנותיו נשׁתחוה להדם רגליו׃ 8 קומה יהוה למנוחתך אתה וארון עזך׃ 9 כהניך ילבשׁו צדק וחסידיך ירננו׃ 10 בעבור דוד עבדך אל תשׁב פני משׁיחך׃ 11 נשׁבע יהוה לדוד אמת לא ישׁוב ממנה מפרי בטנך אשׁית לכסא׃ 12 אם ישׁמרו בניך בריתי ועדתי זו אלמדם גם בניהם עדי עד ישׁבו לכסא׃ 13 כי בחר יהוה בציון אוה למושׁב׃ 14 זאת מנוחתי עדי עד פה אשׁב כי אותיה׃ 15 צידה ברך אברך אביוניה אשׂביע לחם׃ 16 וכהניה אלבישׁ ישׁע וחסידיה רנן ירננו׃ 17 שׁם אצמיח קרן לדוד ערכתי נר למשׁיחי׃ 18 אויביו אלבישׁ בשׁת ועליו יציץ נזרו׃