Psalms 139

HOT^{(i) 1} למנצח לדוד מזמור יהוה חקרתני ותדע׃ ² אתה ידעת שׁבתי וקומי בנתה לרעי מרחוק׃ ³ ארחי ורבעי זרית וכל דרכי הסכנתה׃ ⁴ כי אין מלה בלשׁוני הן יהוה ידעת כלה׃ ⁵ אחור וקדם צרתני ותשׁת עלי כפכה׃ ⁶ פלאיה דעת ממני נשׂגבה לא אוכל׃ ⁷ אנה אלך מרוחך ואנה מפניך אברח׃ ⁸ אם אסק שׁמים שׁם אתה ואציעה שׁאול הנך׃ ⁹ אשׂא כנפי שׁחר אשׁכנה באחרית ים׃ ¹⁰ גם שׁם ידך תנחני ותאחזני ימינך׃ ¹¹ ואמר אך חשׁך ישׁופני ולילה אור בעדני׃ ¹² גם חשׁך לא יחשׁיך ממך ולילה כיום יאיר כחשׁיכה כאורה׃ ¹³ כי אתה קנית כליתי תסכני בבטן אמי׃ ¹⁴ אודך על כי נוראות נפליתי נפלאים מעשׂיך ונפשׁי ידעת מאד׃ ¹⁵ לא נכחד עצמי ממך אשׁר עשׂיתי בסתר רקמתי בתחתיות ארץ׃ ¹⁶ גלמי ראו עיניך ועל ספרך כלם יכתבו ימים יצרו ולא אחד׃ ¹⁷ ולי מה יקרו רעיך אל מה עצמו ראשׁיהם׃ ¹⁸ אספרם מחול ירבון הקיצתי ועודי עמך׃ ¹⁹ אם תקטל אלוה רשׁע ואנשׁי דמים סורו מני׃ ²⁰ אשׁר יאמרך למזמה נשׂא לשׁוא עריך׃ ²¹ הלוא משׂנאיך יהוה אשׂנא ובתקוממיך אתקוטט׃ ²² תכלית שׂנאה שׂנאתים לאויבים היו׃ ²³ חקרני אל ודע לבבי בחנני ודע שׂרעפי׃ ²⁴ וראה אם דרך עצב בי ונחני בדרך עולם׃