Psalms 25

HOT(i) 1 לדוד אליך יהוה נפשׁי אשׂא׃ 2 אלהי בך בטחתי אל אבושׁה אל יעלצו איבי׃ 3 גם כל קויך לא יבשׁו יבשׁו הבוגדים ריקם׃ 4 דרכיך יהוה הודיעני ארחותיך למדני׃ 5 הדריכני באמתך ולמדני כי אתה אלהי ישׁעי אותך קויתי כל היום׃ 6 זכר רחמיך יהוה וחסדיך כי מעולם המה׃ 7 חטאות נעורי ופשׁעי אל תזכר כחסדך זכר לי אתה למען טובך יהוה׃ 8 טוב וישׁר יהוה על כן יורה חטאים בדרך׃ 9 ידרך ענוים במשׁפט וילמד ענוים דרכו׃ 10 כל ארחות יהוה חסד ואמת לנצרי בריתו ועדתיו׃ 11 למען שׁמך יהוה וסלחת לעוני כי רב הוא׃ 12 מי זה האישׁ ירא יהוה יורנו בדרך יבחר׃ 13 נפשׁו בטוב תלין וזרעו יירשׁ ארץ׃ 14 סוד יהוה ליראיו ובריתו להודיעם׃ 15 עיני תמיד אל יהוה כי הוא יוציא מרשׁת רגלי׃ 16 פנה אלי וחנני כי יחיד ועני אני׃ 17 צרות לבבי הרחיבו ממצוקותי הוציאני׃ 18 ראה עניי ועמלי ושׂא לכל חטאותי׃ 19 ראה אויבי כי רבו ושׂנאת חמס שׂנאוני׃ 20 שׁמרה נפשׁי והצילני אל אבושׁ כי חסיתי׃ 21 תם וישׁר יצרוני כי קויתיך׃ 22 פדה אלהים את ישׂראל מכל צרותיו׃