Psalms 48

HOT(i) 1 שׁיר מזמור לבני קרח׃ (48:2) גדול יהוה ומהלל מאד בעיר אלהינו הר קדשׁו׃ 2 (48:3) יפה נוף משׂושׂ כל הארץ הר ציון ירכתי צפון קרית מלך רב׃ 3 (48:4) אלהים בארמנותיה נודע למשׂגב׃ 4 (48:5) כי הנה המלכים נועדו עברו יחדו׃ 5 (48:6) המה ראו כן תמהו נבהלו נחפזו׃ 6 (48:7) רעדה אחזתם שׁם חיל כיולדה׃ 7 (48:8) ברוח קדים תשׁבר אניות תרשׁישׁ׃ 8 (48:9) כאשׁר שׁמענו כן ראינו בעיר יהוה צבאות בעיר אלהינו אלהים יכוננה עד עולם סלה׃ 9 (48:10) דמינו אלהים חסדך בקרב היכלך׃ 10 (48:11) כשׁמך אלהים כן תהלתך על קצוי ארץ צדק מלאה ימינך׃ 11 (48:12) ישׂמח הר ציון תגלנה בנות יהודה למען משׁפטיך׃ 12 (48:13) סבו ציון והקיפוה ספרו מגדליה׃ 13 (48:14) שׁיתו לבכם לחילה פסגו ארמנותיה למען תספרו לדור אחרון׃ 14 (48:15) כי זה אלהים אלהינו עולם ועד הוא ינהגנו על מות׃