Psalms 49

HOT(i) 1 למנצח לבני קרח מזמור׃ (49:2) שׁמעו זאת כל העמים האזינו כל ישׁבי חלד׃ 2 (49:3) גם בני אדם גם בני אישׁ יחד עשׁיר ואביון׃ 3 (49:4) פי ידבר חכמות והגות לבי תבונות׃ 4 (49:5) אטה למשׁל אזני אפתח בכנור חידתי׃ 5 (49:6) למה אירא בימי רע עון עקבי יסובני׃ 6 (49:7) הבטחים על חילם וברב עשׁרם יתהללו׃ 7 (49:8) אח לא פדה יפדה אישׁ לא יתן לאלהים כפרו׃ 8 (49:9) ויקר פדיון נפשׁם וחדל לעולם׃ 9 (49:10) ויחי עוד לנצח לא יראה השׁחת׃ 10 (49:11) כי יראה חכמים ימותו יחד כסיל ובער יאבדו ועזבו לאחרים חילם׃ 11 (49:12) קרבם בתימו לעולם משׁכנתם לדר ודר קראו בשׁמותם עלי אדמות׃ 12 (49:13) ואדם ביקר בל ילין נמשׁל כבהמות נדמו׃ 13 (49:14) זה דרכם כסל למו ואחריהם בפיהם ירצו סלה׃ 14 (49:15) כצאן לשׁאול שׁתו מות ירעם וירדו בם ישׁרים לבקר וצירם לבלות שׁאול מזבל׃ 15 (49:16) אך אלהים יפדה נפשׁי מיד שׁאול כי יקחני סלה׃ 16 (49:17) אל תירא כי יעשׁר אישׁ כי ירבה כבוד ביתו׃ 17 (49:18) כי לא במותו יקח הכל לא ירד אחריו כבודו׃ 18 (49:19) כי נפשׁו בחייו יברך ויודך כי תיטיב׃ 19 (49:20) תבוא עד דור אבותיו עד נצח לא יראו אור׃ 20 (49:21) אדם ביקר ולא יבין נמשׁל כבהמות נדמו׃