HOT(i)
1 למנצח מזמור לדוד שׁיר׃ (65:2) לך דמיה תהלה אלהים בציון ולך ישׁלם נדר׃ 2 (65:3) שׁמע תפלה עדיך כל בשׂר יבאו׃ 3 (65:4) דברי עונת גברו מני פשׁעינו אתה תכפרם׃ 4 (65:5) אשׁרי תבחר ותקרב ישׁכן חצריך נשׂבעה בטוב ביתך קדשׁ היכלך׃ 5 (65:6) נוראות בצדק תעננו אלהי ישׁענו מבטח כל קצוי ארץ וים רחקים׃ 6 (65:7) מכין הרים בכחו נאזר בגבורה׃ 7 (65:8) משׁביח שׁאון ימים שׁאון גליהם והמון לאמים׃ 8 (65:9) וייראו ישׁבי קצות מאותתיך מוצאי בקר וערב תרנין׃ 9 (65:10) פקדת הארץ ותשׁקקה רבת תעשׁרנה פלג אלהים מלא מים תכין דגנם כי כן תכינה׃ 10 (65:11) תלמיה רוה נחת גדודיה ברביבים תמגגנה צמחה תברך׃ 11 (65:12) עטרת שׁנת טובתך ומעגליך ירעפון דשׁן׃ 12 (65:13) ירעפו נאות מדבר וגיל גבעות תחגרנה׃ 13 (65:14) לבשׁו כרים הצאן ועמקים יעטפו בר יתרועעו אף ישׁירו׃