HOT(i)
1 למנצח שׁיר מזמור הריעו לאלהים כל הארץ׃ 2 זמרו כבוד שׁמו שׂימו כבוד תהלתו׃ 3 אמרו לאלהים מה נורא מעשׂיך ברב עזך יכחשׁו לך איביך׃ 4 כל הארץ ישׁתחוו לך ויזמרו לך יזמרו שׁמך סלה׃ 5 לכו וראו מפעלות אלהים נורא עלילה על בני אדם׃ 6 הפך ים ליבשׁה בנהר יעברו ברגל שׁם נשׂמחה׃ 7 משׁל בגבורתו עולם עיניו בגוים תצפינה הסוררים אל ירימו למו סלה׃ 8 ברכו עמים אלהינו והשׁמיעו קול תהלתו׃ 9 השׂם נפשׁנו בחיים ולא נתן למוט רגלנו׃ 10 כי בחנתנו אלהים צרפתנו כצרף כסף׃ 11 הבאתנו במצודה שׂמת מועקה במתנינו׃ 12 הרכבת אנושׁ לראשׁנו באנו באשׁ ובמים ותוציאנו לרויה׃ 13 אבוא ביתך בעולות אשׁלם לך נדרי׃ 14 אשׁר פצו שׂפתי ודבר פי בצר׃ 15 עלות מחים אעלה לך עם קטרת אילים אעשׂה בקר עם עתודים סלה׃ 16 לכו שׁמעו ואספרה כל יראי אלהים אשׁר עשׂה לנפשׁי׃ 17 אליו פי קראתי ורומם תחת לשׁוני׃ 18 און אם ראיתי בלבי לא ישׁמע אדני׃ 19 אכן שׁמע אלהים הקשׁיב בקול תפלתי׃ 20 ברוך אלהים אשׁר לא הסיר תפלתי וחסדו מאתי׃