Psalms 88

HOT(i) 1 שׁיר מזמור לבני קרח למנצח על מחלת לענות משׂכיל להימן האזרחי׃ (88:2) יהוה אלהי ישׁועתי יום צעקתי בלילה נגדך׃ 2 (88:3) תבוא לפניך תפלתי הטה אזנך לרנתי׃ 3 (88:4) כי שׂבעה ברעות נפשׁי וחיי לשׁאול הגיעו׃ 4 (88:5) נחשׁבתי עם יורדי בור הייתי כגבר אין איל׃ 5 (88:6) במתים חפשׁי כמו חללים שׁכבי קבר אשׁר לא זכרתם עוד והמה מידך נגזרו׃ 6 (88:7) שׁתני בבור תחתיות במחשׁכים במצלות׃ 7 (88:8) עלי סמכה חמתך וכל משׁבריך ענית סלה׃ 8 (88:9) הרחקת מידעי ממני שׁתני תועבות למו כלא ולא אצא׃ 9 (88:10) עיני דאבה מני עני קראתיך יהוה בכל יום שׁטחתי אליך כפי׃ 10 (88:11) הלמתים תעשׂה פלא אם רפאים יקומו יודוך סלה׃ 11 (88:12) היספר בקבר חסדך אמונתך באבדון׃ 12 (88:13) היודע בחשׁך פלאך וצדקתך בארץ נשׁיה׃ 13 (88:14) ואני אליך יהוה שׁועתי ובבקר תפלתי תקדמך׃ 14 (88:15) למה יהוה תזנח נפשׁי תסתיר פניך ממני׃ 15 (88:16) עני אני וגוע מנער נשׂאתי אמיך אפונה׃ 16 (88:17) עלי עברו חרוניך בעותיך צמתותני׃ 17 (88:18) סבוני כמים כל היום הקיפו עלי יחד׃ 18 (88:19) הרחקת ממני אהב ורע מידעי מחשׁך׃