Luke 20:20-40

Vulgate^{(i) 20} et observantes miserunt insidiatores qui se iustos simularent ut caperent eum in sermone et traderent illum principatui et potestati praesidis ²¹ et interrogaverunt illum dicentes magister scimus quia recte dicis et doces et non accipis personam sed in veritate viam Dei doces ²² licet nobis dare tributum Caesari an non ²³ considerans autem dolum illorum dixit ad eos quid me temptatis ²⁴ ostendite mihi denarium cuius habet imaginem et inscriptionem respondentes dixerunt Caesaris ²⁵ et ait illis reddite ergo quae Caesaris sunt Caesari et quae Dei sunt Deo ²⁶ et non potuerunt verbum eius reprehendere coram plebe et mirati in responso eius tacuerunt ²⁷ accesserunt autem quidam Sadducaeorum qui negant esse resurrectionem et interrogaverunt eum ²⁸ dicentes magister Moses scripsit nobis si frater alicuius mortuus fuerit habens uxorem et hic sine filiis fuerit ut accipiat eam frater eius uxorem et suscitet semen fratri suo ²⁹ septem ergo fratres erant et primus accepit uxorem et mortuus est sine filiis ³⁰ et sequens accepit illam et ipse mortuus est sine filio ³¹ et tertius accepit illam similiter et omnes septem et non reliquerunt semen et mortui sunt ³² novissima omnium mortua est et mulier ³³ in resurrectione ergo cuius eorum erit uxor siquidem septem habuerunt eam uxorem ³⁴ et ait illis Iesus filii saeculi huius nubunt et traduntur ad nuptias ³⁵ illi autem qui digni habebuntur saeculo illo et resurrectione ex mortuis neque nubunt neque ducunt uxores ³⁶ neque enim ultra mori poterunt aequales enim angelis sunt et filii sunt Dei cum sint filii resurrectionis ³⁷ quia vero resurgant mortui et Moses ostendit secus rubum sicut dicit Dominum Deum Abraham et Deum Isaac et Deum Iacob ³⁸ Deus autem non est mortuorum sed vivorum omnes enim vivunt ei ³⁹ respondentes autem quidam scribarum dixerunt magister bene dixisti ⁴⁰ et amplius non audebant eum quicquam interrogare