Mark 13:14-26

Vulgate^{(i) 14} cum autem videritis abominationem desolationis stantem ubi non debet qui legit intellegat tunc qui in Iudaea sunt fugiant in montes ¹⁵ et qui super tectum ne descendat in domum nec introeat ut tollat quid de domo sua ¹⁶ et qui in agro erit non revertatur retro tollere vestimentum suum ¹⁷ vae autem praegnatibus et nutrientibus in illis diebus ¹⁸ orate vero ut hieme non fiant ¹⁹ erunt enim dies illi tribulationes tales quales non fuerunt ab initio creaturae quam condidit Deus usque nunc neque fient ²⁰ et nisi breviasset Dominus dies non fuisset salva omnis caro sed propter electos quos elegit breviavit dies ²¹ et tunc si quis vobis dixerit ecce hic est Christus ecce illic ne credideritis ²² exsurgent enim pseudochristi et pseudoprophetae et dabunt signa et portenta ad seducendos si potest fieri etiam electos ²³ vos ergo videte ecce praedixi vobis omnia ²⁴ sed in illis diebus post tribulationem illam sol contenebrabitur et luna non dabit splendorem suum ²⁵ et erunt stellae caeli decidentes et virtutes quae sunt in caelis movebuntur ²⁶ et tunc videbunt Filium hominis venientem in nubibus cum virtute multa et gloria