1 Chronicles 28:5 Cross References - HOT

⁵ ומכל בני כי רבים בנים נתן לי יהוה ויבחר בשׁלמה בני לשׁבת על כסא מלכות יהוה על ישׂראל׃

1 Chronicles 3:1-9

¹ ואלה היו בני דויד אשׁר נולד לו בחברון הבכור אמנן לאחינעם היזרעאלית שׁני דניאל לאביגיל הכרמלית׃² השׁלשׁי לאבשׁלום בן מעכה בת תלמי מלך גשׁור הרביעי אדניה בן חגית׃³ החמישׁי שׁפטיה לאביטל השׁשׁי יתרעם לעגלה אשׁתו׃⁴ שׁשׁה נולד לו בחברון וימלך שׁם שׁבע שׁנים ושׁשׁה חדשׁים ושׁלשׁים ושׁלושׁ שׁנה מלך בירושׁלם׃⁵ ואלה נולדו לו בירושׁלים שׁמעא ושׁובב ונתן ושׁלמה ארבעה לבת שׁוע בת עמיאל׃⁶ ויבחר ואלישׁמע ואליפלט׃⁷ ונגה ונפג ויפיע׃⁸ ואלישׁמע ואלידע ואליפלט תשׁעה׃⁹ כל בני דויד מלבד בני פילגשׁים ותמר אחותם׃

1 Chronicles 14:3-7

³ ויקח דויד עוד נשׁים בירושׁלם ויולד דויד עוד בנים ובנות׃⁴ ואלה שׁמות הילודים אשׁר היו לו בירושׁלם שׁמוע ושׁובב נתן ושׁלמה׃⁵ ויבחר ואלישׁוע ואלפלט׃⁶ ונגה ונפג ויפיע׃⁷ ואלישׁמע ובעלידע ואליפלט׃

1 Chronicles 17:14

¹⁴ והעמדתיהו בביתי ובמלכותי עד העולם וכסאו יהיה נכון עד עולם׃

1 Chronicles 22:9-10

⁹ הנה בן נולד לך הוא יהיה אישׁ מנוחה והנחותי לו מכל אויביו מסביב כי שׁלמה יהיה שׁמו ושׁלום ושׁקט אתן על ישׂראל בימיו׃¹⁰ הוא יבנה בית לשׁמי והוא יהיה לי לבן ואני לו לאב והכינותי כסא מלכותו על ישׂראל עד עולם׃

1 Chronicles 23:1

¹ ודויד זקן ושׂבע ימים וימלך את שׁלמה בנו על ישׂראל׃

1 Chronicles 29:1

¹ ויאמר דויד המלך לכל הקהל שׁלמה בני אחד בחר בו אלהים נער ורך והמלאכה גדולה כי לא לאדם הבירה כי ליהוה אלהים׃

1 Chronicles 29:23

²³ וישׁב שׁלמה על כסא יהוה למלך תחת דויד אביו ויצלח וישׁמעו אליו כל ישׂראל׃

2 Chronicles 1:8-9

⁸ ויאמר שׁלמה לאלהים אתה עשׂית עם דויד אבי חסד גדול והמלכתני תחתיו׃⁹ עתה יהוה אלהים יאמן דברך עם דויד אבי כי אתה המלכתני על עם רב כעפר הארץ׃

Psalms 72:1-20

¹ לשׁלמה אלהים משׁפטיך למלך תן וצדקתך לבן מלך׃² ידין עמך בצדק וענייך במשׁפט׃³ ישׂאו הרים שׁלום לעם וגבעות בצדקה׃⁴ ישׁפט עניי עם יושׁיע לבני אביון וידכא עושׁק׃⁵ ייראוך עם שׁמשׁ ולפני ירח דור דורים׃⁶ ירד כמטר על גז כרביבים זרזיף ארץ׃⁷ יפרח בימיו צדיק ורב שׁלום עד בלי ירח׃⁸ וירד מים עד ים ומנהר עד אפסי ארץ׃⁹ לפניו יכרעו ציים ואיביו עפר ילחכו׃¹⁰ מלכי תרשׁישׁ ואיים מנחה ישׁיבו מלכי שׁבא וסבא אשׁכר יקריבו׃¹¹ וישׁתחוו לו כל מלכים כל גוים יעבדוהו׃¹² כי יציל אביון משׁוע ועני ואין עזר׃¹³ יחס על דל ואביון ונפשׁות אביונים יושׁיע׃¹⁴ מתוך ומחמס יגאל נפשׁם וייקר דמם בעיניו׃¹⁵ ויחי ויתן לו מזהב שׁבא ויתפלל בעדו תמיד כל היום יברכנהו׃¹⁶ יהי פסת בר בארץ בראשׁ הרים ירעשׁ כלבנון פריו ויציצו מעיר כעשׂב הארץ׃¹⁷ יהי שׁמו לעולם לפני שׁמשׁ ינין שׁמו ויתברכו בו כל גוים יאשׁרוהו׃¹⁸ ברוך יהוה אלהים אלהי ישׂראל עשׂה נפלאות לבדו׃¹⁹ וברוך שׁם כבודו לעולם וימלא כבודו את כל הארץ אמן ואמן׃²⁰ כלו תפלות דוד בן ישׁי׃

Isaiah 9:6-7

⁶ (9:5) כי ילד ילד לנו בן נתן לנו ותהי המשׂרה על שׁכמו ויקרא שׁמו פלא יועץ אל גבור אביעד שׂר שׁלום׃⁷ (9:6) לםרבה המשׂרה ולשׁלום אין קץ על כסא דוד ועל ממלכתו להכין אתה ולסעדה במשׁפט ובצדקה מעתה ועד עולם קנאת יהוה צבאות תעשׂה זאת׃