Genesis 16:10 Cross References - HOT

10 ויאמר לה מלאך יהוה הרבה ארבה את זרעך ולא יספר מרב׃

Genesis 17:20

20 ולישׁמעאל שׁמעתיך הנה ברכתי אתו והפריתי אתו והרביתי אתו במאד מאד שׁנים עשׂר נשׂיאם יוליד ונתתיו לגוי גדול׃

Genesis 21:13

13 וגם את בן האמה לגוי אשׂימנו כי זרעך הוא׃

Genesis 21:16

16 ותלך ותשׁב לה מנגד הרחק כמטחוי קשׁת כי אמרה אל אראה במות הילד ותשׁב מנגד ותשׂא את קלה ותבך׃

Genesis 21:18

18 קומי שׂאי את הנער והחזיקי את ידך בו כי לגוי גדול אשׂימנו׃

Genesis 22:15-18

15 ויקרא מלאך יהוה אל אברהם שׁנית מן השׁמים׃16 ויאמר בי נשׁבעתי נאם יהוה כי יען אשׁר עשׂית את הדבר הזה ולא חשׂכת את בנך את יחידך׃17 כי ברך אברכך והרבה ארבה את זרעך ככוכבי השׁמים וכחול אשׁר על שׂפת הים וירשׁ זרעך את שׁער איביו׃18 והתברכו בזרעך כל גויי הארץ עקב אשׁר שׁמעת בקלי׃

Genesis 25:12-18

12 ואלה תלדת ישׁמעאל בן אברהם אשׁר ילדה הגר המצרית שׁפחת שׂרה לאברהם׃13 ואלה שׁמות בני ישׁמעאל בשׁמתם לתולדתם בכר ישׁמעאל נבית וקדר ואדבאל ומבשׂם׃14 ומשׁמע ודומה ומשׂא׃15 חדד ותימא יטור נפישׁ וקדמה׃16 אלה הם בני ישׁמעאל ואלה שׁמתם בחצריהם ובטירתם שׁנים עשׂר נשׂיאם לאמתם׃17 ואלה שׁני חיי ישׁמעאל מאת שׁנה ושׁלשׁים שׁנה ושׁבע שׁנים ויגוע וימת ויאסף אל עמיו׃18 וישׁכנו מחוילה עד שׁור אשׁר על פני מצרים באכה אשׁורה על פני כל אחיו נפל׃

Genesis 31:11-13

11 ויאמר אלי מלאך האלהים בחלום יעקב ואמר הנני׃12 ויאמר שׂא נא עיניך וראה כל העתדים העלים על הצאן עקדים נקדים וברדים כי ראיתי את כל אשׁר לבן עשׂה׃13 אנכי האל בית אל אשׁר משׁחת שׁם מצבה אשׁר נדרת לי שׁם נדר עתה קום צא מן הארץ הזאת ושׁוב אל ארץ מולדתך׃

Genesis 32:24-30

24 (32:25) ויותר יעקב לבדו ויאבק אישׁ עמו עד עלות השׁחר׃25 (32:26) וירא כי לא יכל לו ויגע בכף ירכו ותקע כף ירך יעקב בהאבקו עמו׃26 (32:27) ויאמר שׁלחני כי עלה השׁחר ויאמר לא אשׁלחך כי אם ברכתני׃27 (32:28) ויאמר אליו מה שׁמך ויאמר יעקב׃28 (32:29) ויאמר לא יעקב יאמר עוד שׁמך כי אם ישׂראל כי שׂרית עם אלהים ועם אנשׁים ותוכל׃29 (32:30) וישׁאל יעקב ויאמר הגידה נא שׁמך ויאמר למה זה תשׁאל לשׁמי ויברך אתו שׁם׃30 (32:31) ויקרא יעקב שׁם המקום פניאל כי ראיתי אלהים פנים אל פנים ותנצל נפשׁי׃

Genesis 48:15-16

15 ויברך את יוסף ויאמר האלהים אשׁר התהלכו אבתי לפניו אברהם ויצחק האלהים הרעה אתי מעודי עד היום הזה׃16 המלאך הגאל אתי מכל רע יברך את הנערים ויקרא בהם שׁמי ושׁם אבתי אברהם ויצחק וידגו לרב בקרב הארץ׃

Exodus 3:2-6

2 וירא מלאך יהוה אליו בלבת אשׁ מתוך הסנה וירא והנה הסנה בער באשׁ והסנה איננו אכל׃3 ויאמר משׁה אסרה נא ואראה את המראה הגדל הזה מדוע לא יבער הסנה׃4 וירא יהוה כי סר לראות ויקרא אליו אלהים מתוך הסנה ויאמר משׁה משׁה ויאמר הנני׃5 ויאמר אל תקרב הלם שׁל נעליך מעל רגליך כי המקום אשׁר אתה עומד עליו אדמת קדשׁ הוא׃6 ויאמר אנכי אלהי אביך אלהי אברהם אלהי יצחק ואלהי יעקב ויסתר משׁה פניו כי ירא מהביט אל האלהים׃

Judges 2:1-3

1 ויעל מלאך יהוה מן הגלגל אל הבכים ויאמר אעלה אתכם ממצרים ואביא אתכם אל הארץ אשׁר נשׁבעתי לאבתיכם ואמר לא אפר בריתי אתכם לעולם׃2 ואתם לא תכרתו ברית ליושׁבי הארץ הזאת מזבחותיהם תתצון ולא שׁמעתם בקלי מה זאת עשׂיתם׃3 וגם אמרתי לא אגרשׁ אותם מפניכם והיו לכם לצדים ואלהיהם יהיו לכם למוקשׁ׃

Judges 6:11

11 ויבא מלאך יהוה וישׁב תחת האלה אשׁר בעפרה אשׁר ליואשׁ אבי העזרי וגדעון בנו חבט חטים בגת להניס מפני מדין׃

Judges 6:16

16 ויאמר אליו יהוה כי אהיה עמך והכית את מדין כאישׁ אחד׃

Judges 6:21-24

21 וישׁלח מלאך יהוה את קצה המשׁענת אשׁר בידו ויגע בבשׂר ובמצות ותעל האשׁ מן הצור ותאכל את הבשׂר ואת המצות ומלאך יהוה הלך מעיניו׃22 וירא גדעון כי מלאך יהוה הוא ויאמר גדעון אהה אדני יהוה כי על כן ראיתי מלאך יהוה פנים אל פנים׃23 ויאמר לו יהוה שׁלום לך אל תירא לא תמות׃24 ויבן שׁם גדעון מזבח ליהוה ויקרא לו יהוה שׁלום עד היום הזה עודנו בעפרת אבי העזרי׃

Judges 13:16-22

16 ויאמר מלאך יהוה אל מנוח אם תעצרני לא אכל בלחמך ואם תעשׂה עלה ליהוה תעלנה כי לא ידע מנוח כי מלאך יהוה הוא׃17 ויאמר מנוח אל מלאך יהוה מי שׁמך כי יבא דבריך וכבדנוך׃18 ויאמר לו מלאך יהוה למה זה תשׁאל לשׁמי והוא פלאי׃19 ויקח מנוח את גדי העזים ואת המנחה ויעל על הצור ליהוה ומפלא לעשׂות ומנוח ואשׁתו ראים׃20 ויהי בעלות הלהב מעל המזבח השׁמימה ויעל מלאך יהוה בלהב המזבח ומנוח ואשׁתו ראים ויפלו על פניהם ארצה׃21 ולא יסף עוד מלאך יהוה להראה אל מנוח ואל אשׁתו אז ידע מנוח כי מלאך יהוה הוא׃22 ויאמר מנוח אל אשׁתו מות נמות כי אלהים ראינו׃

Psalms 83:6-7

6 (83:7) אהלי אדום וישׁמעאלים מואב והגרים׃7 (83:8) גבל ועמון ועמלק פלשׁת עם ישׁבי צור׃

Isaiah 63:9

9 בכל צרתם לא צר ומלאך פניו הושׁיעם באהבתו ובחמלתו הוא גאלם וינטלם וינשׂאם כל ימי עולם׃

Hosea 12:3-5

3 (12:4) בבטן עקב את אחיו ובאונו שׂרה את אלהים׃4 (12:5) וישׂר אל מלאך ויכל בכה ויתחנן לו בית אל ימצאנו ושׁם ידבר עמנו׃5 (12:6) ויהוה אלהי הצבאות יהוה זכרו׃

Zechariah 2:8-9

8 (2:12) כי כה אמר יהוה צבאות אחר כבוד שׁלחני אל הגוים השׁללים אתכם כי הנגע בכם נגע בבבת עינו׃9 (2:13) כי הנני מניף את ידי עליהם והיו שׁלל לעבדיהם וידעתם כי יהוה צבאות שׁלחני׃

Malachi 3:1

1 הנני שׁלח מלאכי ופנה דרך לפני ופתאם יבוא אל היכלו האדון אשׁר אתם מבקשׁים ומלאך הברית אשׁר אתם חפצים הנה בא אמר יהוה צבאות׃

Cross Reference data is from OpenBible.info, retrieved June 28, 2010, and licensed under a Creative Commons Attribution License.