Jeremiah 43:11 Cross References - HOT

¹¹ ובאה והכה את ארץ מצרים אשׁר למות למות ואשׁר לשׁבי לשׁבי ואשׁר לחרב לחרב׃

Job 20:29

²⁹ זה חלק אדם רשׁע מאלהים ונחלת אמרו מאל׃

¹ משׂא מצרים הנה יהוה רכב על עב קל ובא מצרים ונעו אלילי מצרים מפניו ולבב מצרים ימס בקרבו׃² וסכסכתי מצרים במצרים ונלחמו אישׁ באחיו ואישׁ ברעהו עיר בעיר ממלכה בממלכה׃³ ונבקה רוח מצרים בקרבו ועצתו אבלע ודרשׁו אל האלילים ואל האטים ואל האבות ואל הידענים׃⁴ וסכרתי את מצרים ביד אדנים קשׁה ומלך עז ימשׁל בם נאם האדון יהוה צבאות׃⁵ ונשׁתו מים מהים ונהר יחרב ויבשׁ׃⁶ והאזניחו נהרות דללו וחרבו יארי מצור קנה וסוף קמלו׃⁷ ערות על יאור על פי יאור וכל מזרע יאור ייבשׁ נדף ואיננו׃⁸ ואנו הדיגים ואבלו כל משׁליכי ביאור חכה ופרשׂי מכמרת על פני מים אמללו׃⁹ ובשׁו עבדי פשׁתים שׂריקות וארגים חורי׃¹⁰ והיו שׁתתיה מדכאים כל עשׂי שׂכר אגמי נפשׁ׃¹¹ אך אולים שׂרי צען חכמי יעצי פרעה עצה נבערה איך תאמרו אל פרעה בן חכמים אני בן מלכי קדם׃¹² אים אפוא חכמיך ויגידו נא לך וידעו מה יעץ יהוה צבאות על מצרים׃¹³ נואלו שׂרי צען נשׁאו שׂרי נף התעו את מצרים פנת שׁבטיה׃¹⁴ יהוה מסך בקרבה רוח עועים והתעו את מצרים בכל מעשׂהו כהתעות שׁכור בקיאו׃¹⁵ ולא יהיה למצרים מעשׂה אשׁר יעשׂה ראשׁ וזנב כפה ואגמון׃¹⁶ ביום ההוא יהיה מצרים כנשׁים וחרד ופחד מפני תנופת יד יהוה צבאות אשׁר הוא מניף עליו׃¹⁷ והיתה אדמת יהודה למצרים לחגא כל אשׁר יזכיר אתה אליו יפחד מפני עצת יהוה צבאות אשׁר הוא יועץ עליו׃¹⁸ ביום ההוא יהיו חמשׁ ערים בארץ מצרים מדברות שׂפת כנען ונשׁבעות ליהוה צבאות עיר ההרס יאמר לאחת׃¹⁹ ביום ההוא יהיה מזבח ליהוה בתוך ארץ מצרים ומצבה אצל גבולה ליהוה׃²⁰ והיה לאות ולעד ליהוה צבאות בארץ מצרים כי יצעקו אל יהוה מפני לחצים וישׁלח להם מושׁיע ורב והצילם׃²¹ ונודע יהוה למצרים וידעו מצרים את יהוה ביום ההוא ועבדו זבח ומנחה ונדרו נדר ליהוה ושׁלמו׃²² ונגף יהוה את מצרים נגף ורפוא ושׁבו עד יהוה ונעתר להם ורפאם׃²³ ביום ההוא תהיה מסלה ממצרים אשׁורה ובא אשׁור במצרים ומצרים באשׁור ועבדו מצרים את אשׁור׃²⁴ ביום ההוא יהיה ישׂראל שׁלישׁיה למצרים ולאשׁור ברכה בקרב הארץ׃²⁵ אשׁר ברכו יהוה צבאות לאמר ברוך עמי מצרים ומעשׂה ידי אשׁור ונחלתי ישׂראל׃

Jeremiah 15:2

² והיה כי יאמרו אליך אנה נצא ואמרת אליהם כה אמר יהוה אשׁר למות למות ואשׁר לחרב לחרב ואשׁר לרעב לרעב ואשׁר לשׁבי לשׁבי׃

Jeremiah 25:19

¹⁹ את פרעה מלך מצרים ואת עבדיו ואת שׂריו ואת כל עמו׃

Jeremiah 44:13

¹³ ופקדתי על היושׁבים בארץ מצרים כאשׁר פקדתי על ירושׁלם בחרב ברעב ובדבר׃

Jeremiah 46:1-26

¹ אשׁר היה דבר יהוה אל ירמיהו הנביא על הגוים׃² למצרים על חיל פרעה נכו מלך מצרים אשׁר היה על נהר פרת בכרכמשׁ אשׁר הכה נבוכדראצר מלך בבל בשׁנת הרביעית ליהויקים בן יאשׁיהו מלך יהודה׃³ ערכו מגן וצנה וגשׁו למלחמה׃⁴ אסרו הסוסים ועלו הפרשׁים והתיצבו בכובעים מרקו הרמחים לבשׁו הסרינת׃⁵ מדוע ראיתי המה חתים נסגים אחור וגבוריהם יכתו ומנוס נסו ולא הפנו מגור מסביב נאם יהוה׃⁶ אל ינוס הקל ואל ימלט הגבור צפונה על יד נהר פרת כשׁלו ונפלו׃⁷ מי זה כיאר יעלה כנהרות יתגעשׁו מימיו׃⁸ מצרים כיאר יעלה וכנהרות יתגעשׁו מים ויאמר אעלה אכסה ארץ אבידה עיר וישׁבי׃⁹ עלו הסוסים והתהללו הרכב ויצאו הגבורים כושׁ ופוט תפשׂי מגן ולודים תפשׂי דרכי קשׁת׃¹⁰ והיום ההוא לאדני יהוה צבאות יום נקמה להנקם מצריו ואכלה חרב ושׂבעה ורותה מדמם כי זבח לאדני יהוה צבאות בארץ צפון אל נהר פרת׃¹¹ עלי גלעד וקחי צרי בתולת בת מצרים לשׁוא הרביתי רפאות תעלה אין׃¹² שׁמעו גוים קלונך וצוחתך מלאה הארץ כי גבור בגבור כשׁלו יחדיו נפלו שׁניהם׃¹³ הדבר אשׁר דבר יהוה אל ירמיהו הנביא לבוא נבוכדראצר מלך בבל להכות את ארץ מצרים׃¹⁴ הגידו במצרים והשׁמיעו במגדול והשׁמיעו בנף ובתחפנחס אמרו התיצב והכן לך כי אכלה חרב סביביך׃¹⁵ מדוע נסחף אביריך לא עמד כי יהוה הדפו׃¹⁶ הרבה כושׁל גם נפל אישׁ אל רעהו ויאמרו קומה ונשׁבה אל עמנו ואל ארץ מולדתנו מפני חרב היונה׃¹⁷ קראו שׁם פרעה מלך מצרים שׁאון העביר המועד׃¹⁸ חי אני נאם המלך יהוה צבאות שׁמו כי כתבור בהרים וככרמל בים יבוא׃¹⁹ כלי גולה עשׂי לך יושׁבת בת מצרים כי נף לשׁמה תהיה ונצתה מאין יושׁב׃²⁰ עגלה יפה פיה מצרים קרץ מצפון בא בא׃²¹ גם שׂכריה בקרבה כעגלי מרבק כי גם המה הפנו נסו יחדיו לא עמדו כי יום אידם בא עליהם עת פקדתם׃²² קולה כנחשׁ ילך כי בחיל ילכו ובקרדמות באו לה כחטבי עצים׃²³ כרתו יערה נאם יהוה כי לא יחקר כי רבו מארבה ואין להם מספר׃²⁴ הבישׁה בת מצרים נתנה ביד עם צפון׃²⁵ אמר יהוה צבאות אלהי ישׂראל הנני פוקד אל אמון מנא ועל פרעה ועל מצרים ועל אלהיה ועל מלכיה ועל פרעה ועל הבטחים׃²⁶ ונתתים ביד מבקשׁי נפשׁם וביד נבוכדראצר מלך בבל וביד עבדיו ואחרי כן תשׁכן כימי קדם נאם יהוה׃

Ezekiel 5:12

¹² שׁלשׁתיך בדבר ימותו וברעב יכלו בתוכך והשׁלשׁית בחרב יפלו סביבותיך והשׁלישׁית לכל רוח אזרה וחרב אריק אחריהם׃

Ezekiel 29:19-20

¹⁹ לכן כה אמר אדני יהוה הנני נתן לנבוכדראצר מלך בבל את ארץ מצרים ונשׂא המנה ושׁלל שׁללה ובזז בזה והיתה שׂכר לחילו׃²⁰ פעלתו אשׁר עבד בה נתתי לו את ארץ מצרים אשׁר עשׂו לי נאם אדני יהוה׃

Ezekiel 30:1-26

¹ ויהי דבר יהוה אלי לאמר׃² בן אדם הנבא ואמרת כה אמר אדני יהוה הילילו הה ליום׃³ כי קרוב יום וקרוב יום ליהוה יום ענן עת גוים יהיה׃⁴ ובאה חרב במצרים והיתה חלחלה בכושׁ בנפל חלל במצרים ולקחו המונה ונהרסו יסודתיה׃⁵ כושׁ ופוט ולוד וכל הערב וכוב ובני ארץ הברית אתם בחרב יפלו׃⁶ כה אמר יהוה ונפלו סמכי מצרים וירד גאון עזה ממגדל סונה בחרב יפלו בה נאם אדני יהוה׃⁷ ונשׁמו בתוך ארצות נשׁמות ועריו בתוך ערים נחרבות תהיינה׃⁸ וידעו כי אני יהוה בתתי אשׁ במצרים ונשׁברו כל עזריה׃⁹ ביום ההוא יצאו מלאכים מלפני בצים להחריד את כושׁ בטח והיתה חלחלה בהם ביום מצרים כי הנה באה׃¹⁰ כה אמר אדני יהוה והשׁבתי את המון מצרים ביד נבוכדראצר מלך בבל׃¹¹ הוא ועמו אתו עריצי גוים מובאים לשׁחת הארץ והריקו חרבותם על מצרים ומלאו את הארץ חלל׃¹² ונתתי יארים חרבה ומכרתי את הארץ ביד רעים והשׁמתי ארץ ומלאה ביד זרים אני יהוה דברתי׃¹³ כה אמר אדני יהוה והאבדתי גלולים והשׁבתי אלילים מנף ונשׂיא מארץ מצרים לא יהיה עוד ונתתי יראה בארץ מצרים׃¹⁴ והשׁמתי את פתרוס ונתתי אשׁ בצען ועשׂיתי שׁפטים בנא׃¹⁵ ושׁפכתי חמתי על סין מעוז מצרים והכרתי את המון נא׃¹⁶ ונתתי אשׁ במצרים חול תחיל סין ונא תהיה להבקע ונף צרי יומם׃¹⁷ בחורי און ופי בסת בחרב יפלו והנה בשׁבי תלכנה׃¹⁸ ובתחפנחס חשׂך היום בשׁברי שׁם את מטות מצרים ונשׁבת בה גאון עזה היא ענן יכסנה ובנותיה בשׁבי תלכנה׃¹⁹ ועשׂיתי שׁפטים במצרים וידעו כי אני יהוה׃²⁰ ויהי באחת עשׂרה שׁנה בראשׁון בשׁבעה לחדשׁ היה דבר יהוה אלי לאמר׃²¹ בן אדם את זרוע פרעה מלך מצרים שׁברתי והנה לא חבשׁה לתת רפאות לשׂום חתול לחבשׁה לחזקה לתפשׂ בחרב׃²² לכן כה אמר אדני יהוה הנני אל פרעה מלך מצרים ושׁברתי את זרעתיו את החזקה ואת הנשׁברת והפלתי את החרב מידו׃²³ והפצותי את מצרים בגוים וזריתם בארצות׃²⁴ וחזקתי את זרעות מלך בבל ונתתי את חרבי בידו ושׁברתי את זרעות פרעה ונאק נאקות חלל לפניו׃²⁵ והחזקתי את זרעות מלך בבל וזרעות פרעה תפלנה וידעו כי אני יהוה בתתי חרבי ביד מלך בבל ונטה אותה אל ארץ מצרים׃²⁶ והפצותי את מצרים בגוים וזריתי אותם בארצות וידעו כי אני יהוה׃

Zechariah 11:9

⁹ ואמר לא ארעה אתכם המתה תמות והנכחדת תכחד והנשׁארות תאכלנה אשׁה את בשׂר רעותה׃