Nehemiah 5 Cross References - HOT

1 ותהי צעקת העם ונשׁיהם גדולה אל אחיהם היהודים׃2 וישׁ אשׁר אמרים בנינו ובנתינו אנחנו רבים ונקחה דגן ונאכלה ונחיה׃3 וישׁ אשׁר אמרים שׂדתינו וכרמינו ובתינו אנחנו ערבים ונקחה דגן ברעב׃4 וישׁ אשׁר אמרים לוינו כסף למדת המלך שׂדתינו וכרמינו׃5 ועתה כבשׂר אחינו בשׂרנו כבניהם בנינו והנה אנחנו כבשׁים את בנינו ואת בנתינו לעבדים וישׁ מבנתינו נכבשׁות ואין לאל ידנו ושׂדתינו וכרמינו לאחרים׃6 ויחר לי מאד כאשׁר שׁמעתי את זעקתם ואת הדברים האלה׃7 וימלך לבי עלי ואריבה את החרים ואת הסגנים ואמרה להם משׁא אישׁ באחיו אתם נשׁאים ואתן עליהם קהלה גדולה׃8 ואמרה להם אנחנו קנינו את אחינו היהודים הנמכרים לגוים כדי בנו וגם אתם תמכרו את אחיכם ונמכרו לנו ויחרישׁו ולא מצאו דבר׃9 ויאמר לא טוב הדבר אשׁר אתם עשׂים הלוא ביראת אלהינו תלכו מחרפת הגוים אויבינו׃10 וגם אני אחי ונערי נשׁים בהם כסף ודגן נעזבה נא את המשׁא הזה׃11 השׁיבו נא להם כהיום שׂדתיהם כרמיהם זיתיהם ובתיהם ומאת הכסף והדגן התירושׁ והיצהר אשׁר אתם נשׁים׃12 ויאמרו נשׁיב ומהם לא נבקשׁ כן נעשׂה כאשׁר אתה אומר ואקרא את הכהנים ואשׁביעם לעשׂות כדבר הזה׃13 גם חצני נערתי ואמרה ככה ינער האלהים את כל האישׁ אשׁר לא יקים את הדבר הזה מביתו ומיגיעו וככה יהיה נעור ורק ויאמרו כל הקהל אמן ויהללו את יהוה ויעשׂ העם כדבר הזה׃14 גם מיום אשׁר צוה אתי להיות פחם בארץ יהודה משׁנת עשׂרים ועד שׁנת שׁלשׁים ושׁתים לארתחשׁסתא המלך שׁנים שׁתים עשׂרה אני ואחי לחם הפחה לא אכלתי׃15 והפחות הראשׁנים אשׁר לפני הכבידו על העם ויקחו מהם בלחם ויין אחר כסף שׁקלים ארבעים גם נעריהם שׁלטו על העם ואני לא עשׂיתי כן מפני יראת אלהים׃16 וגם במלאכת החומה הזאת החזקתי ושׂדה לא קנינו וכל נערי קבוצים שׁם על המלאכה׃17 והיהודים והסגנים מאה וחמשׁים אישׁ והבאים אלינו מן הגוים אשׁר סביבתינו על שׁלחני׃18 ואשׁר היה נעשׂה ליום אחד שׁור אחד צאן שׁשׁ בררות וצפרים נעשׂו לי ובין עשׂרת ימים בכל יין להרבה ועם זה לחם הפחה לא בקשׁתי כי כבדה העבדה על העם הזה׃19 זכרה לי אלהי לטובה כל אשׁר עשׂיתי על העם הזה׃

Exodus 3:7

7 ויאמר יהוה ראה ראיתי את עני עמי אשׁר במצרים ואת צעקתם שׁמעתי מפני נגשׂיו כי ידעתי את מכאביו׃

Exodus 22:25-27

25 (22:24) אם כסף תלוה את עמי את העני עמך לא תהיה לו כנשׁה לא תשׂימון עליו נשׁך׃26 (22:25) אם חבל תחבל שׂלמת רעך עד בא השׁמשׁ תשׁיבנו׃27 (22:26) כי הוא כסותה לבדה הוא שׂמלתו לערו במה ישׁכב והיה כי יצעק אלי ושׁמעתי כי חנון אני׃

Leviticus 25:35-37

35 וכי ימוך אחיך ומטה ידו עמך והחזקת בו גר ותושׁב וחי עמך׃36 אל תקח מאתו נשׁך ותרבית ויראת מאלהיך וחי אחיך עמך׃37 את כספך לא תתן לו בנשׁך ובמרבית לא תתן אכלך׃

Deuteronomy 15:7-11

7 כי יהיה בך אביון מאחד אחיך באחד שׁעריך בארצך אשׁר יהוה אלהיך נתן לך לא תאמץ את לבבך ולא תקפץ את ידך מאחיך האביון׃8 כי פתח תפתח את ידך לו והעבט תעביטנו די מחסרו אשׁר יחסר׃9 השׁמר לך פן יהיה דבר עם לבבך בליעל לאמר קרבה שׁנת השׁבע שׁנת השׁמטה ורעה עינך באחיך האביון ולא תתן לו וקרא עליך אל יהוה והיה בך חטא׃10 נתון תתן לו ולא ירע לבבך בתתך לו כי בגלל הדבר הזה יברכך יהוה אלהיך בכל מעשׂך ובכל משׁלח ידך׃11 כי לא יחדל אביון מקרב הארץ על כן אנכי מצוך לאמר פתח תפתח את ידך לאחיך לעניך ולאבינך בארצך׃

Job 31:38-39

38 אם עלי אדמתי תזעק ויחד תלמיה יבכיון׃39 אם כחה אכלתי בלי כסף ונפשׁ בעליה הפחתי׃

Job 34:28

28 להביא עליו צעקת דל וצעקת עניים ישׁמע׃

Isaiah 5:7

7 כי כרם יהוה צבאות בית ישׂראל ואישׁ יהודה נטע שׁעשׁועיו ויקו למשׁפט והנה משׂפח לצדקה והנה צעקה׃

Genesis 41:57

57 וכל הארץ באו מצרימה לשׁבר אל יוסף כי חזק הרעב בכל הארץ׃

Genesis 42:2

2 ויאמר הנה שׁמעתי כי ישׁ שׁבר במצרים רדו שׁמה ושׁברו לנו משׁם ונחיה ולא נמות׃

Genesis 43:8

8 ויאמר יהודה אל ישׂראל אביו שׁלחה הנער אתי ונקומה ונלכה ונחיה ולא נמות גם אנחנו גם אתה גם טפנו׃

Psalms 127:3-5

3 הנה נחלת יהוה בנים שׂכר פרי הבטן׃4 כחצים ביד גבור כן בני הנעורים׃5 אשׁרי הגבר אשׁר מלא את אשׁפתו מהם לא יבשׁו כי ידברו את אויבים בשׁער׃

Psalms 128:2-4

2 יגיע כפיך כי תאכל אשׁריך וטוב׃3 אשׁתך כגפן פריה בירכתי ביתך בניך כשׁתלי זיתים סביב לשׁלחנך׃4 הנה כי כן יברך גבר ירא יהוה׃

Malachi 2:2

2 אם לא תשׁמעו ואם לא תשׂימו על לב לתת כבוד לשׁמי אמר יהוה צבאות ושׁלחתי בכם את המארה וארותי את ברכותיכם וגם ארותיה כי אינכם שׂמים על לב׃

Genesis 47:15-25

15 ויתם הכסף מארץ מצרים ומארץ כנען ויבאו כל מצרים אל יוסף לאמר הבה לנו לחם ולמה נמות נגדך כי אפס כסף׃16 ויאמר יוסף הבו מקניכם ואתנה לכם במקניכם אם אפס כסף׃17 ויביאו את מקניהם אל יוסף ויתן להם יוסף לחם בסוסים ובמקנה הצאן ובמקנה הבקר ובחמרים וינהלם בלחם בכל מקנהם בשׁנה ההוא׃18 ותתם השׁנה ההוא ויבאו אליו בשׁנה השׁנית ויאמרו לו לא נכחד מאדני כי אם תם הכסף ומקנה הבהמה אל אדני לא נשׁאר לפני אדני בלתי אם גויתנו ואדמתנו׃19 למה נמות לעיניך גם אנחנו גם אדמתנו קנה אתנו ואת אדמתנו בלחם ונהיה אנחנו ואדמתנו עבדים לפרעה ותן זרע ונחיה ולא נמות והאדמה לא תשׁם׃20 ויקן יוסף את כל אדמת מצרים לפרעה כי מכרו מצרים אישׁ שׂדהו כי חזק עלהם הרעב ותהי הארץ לפרעה׃21 ואת העם העביר אתו לערים מקצה גבול מצרים ועד קצהו׃22 רק אדמת הכהנים לא קנה כי חק לכהנים מאת פרעה ואכלו את חקם אשׁר נתן להם פרעה על כן לא מכרו את אדמתם׃23 ויאמר יוסף אל העם הן קניתי אתכם היום ואת אדמתכם לפרעה הא לכם זרע וזרעתם את האדמה׃24 והיה בתבואת ונתתם חמישׁית לפרעה וארבע הידת יהיה לכם לזרע השׂדה ולאכלכם ולאשׁר בבתיכם ולאכל לטפכם׃25 ויאמרו החיתנו נמצא חן בעיני אדני והיינו עבדים לפרעה׃

Leviticus 25:35-39

35 וכי ימוך אחיך ומטה ידו עמך והחזקת בו גר ותושׁב וחי עמך׃36 אל תקח מאתו נשׁך ותרבית ויראת מאלהיך וחי אחיך עמך׃37 את כספך לא תתן לו בנשׁך ובמרבית לא תתן אכלך׃38 אני יהוה אלהיכם אשׁר הוצאתי אתכם מארץ מצרים לתת לכם את ארץ כנען להיות לכם לאלהים׃39 וכי ימוך אחיך עמך ונמכר לך לא תעבד בו עבדת עבד׃

Deuteronomy 15:7

7 כי יהיה בך אביון מאחד אחיך באחד שׁעריך בארצך אשׁר יהוה אלהיך נתן לך לא תאמץ את לבבך ולא תקפץ את ידך מאחיך האביון׃

Malachi 3:8-11

8 היקבע אדם אלהים כי אתם קבעים אתי ואמרתם במה קבענוך המעשׂר והתרומה׃9 במארה אתם נארים ואתי אתם קבעים הגוי כלו׃10 הביאו את כל המעשׂר אל בית האוצר ויהי טרף בביתי ובחנוני נא בזאת אמר יהוה צבאות אם לא אפתח לכם את ארבות השׁמים והריקתי לכם ברכה עד בלי די׃11 וגערתי לכם באכל ולא ישׁחת לכם את פרי האדמה ולא תשׁכל לכם הגפן בשׂדה אמר יהוה צבאות׃

Deuteronomy 28:47-48

47 תחת אשׁר לא עבדת את יהוה אלהיך בשׂמחה ובטוב לבב מרב כל׃48 ועבדת את איביך אשׁר ישׁלחנו יהוה בך ברעב ובצמא ובעירם ובחסר כל ונתן על ברזל על צוארך עד השׁמידו אתך׃

Joshua 16:10

10 ולא הורישׁו את הכנעני היושׁב בגזר וישׁב הכנעני בקרב אפרים עד היום הזה ויהי למס עבד׃

1 Kings 9:21

21 בניהם אשׁר נתרו אחריהם בארץ אשׁר לא יכלו בני ישׂראל להחרימם ויעלם שׁלמה למס עבד עד היום הזה׃

Ezra 4:13

13 כען ידיע להוא למלכא די הן קריתא דך תתבנא ושׁוריה ישׁתכללון מנדה בלו והלך לא ינתנון ואפתם מלכים תהנזק׃

Ezra 4:20

20 ומלכין תקיפין הוו על ירושׁלם ושׁליטין בכל עבר נהרה ומדה בלו והלך מתיהב׃

Ezra 7:24

24 ולכם מהודעין די כל כהניא ולויא זמריא תרעיא נתיניא ופלחי בית אלהא דנה מנדה בלו והלך לא שׁליט למרמא עליהם׃

Nehemiah 9:37

37 ותבואתה מרבה למלכים אשׁר נתתה עלינו בחטאותינו ועל גויתינו משׁלים ובבהמתנו כרצונם ובצרה גדולה אנחנו׃

Genesis 29:14

14 ויאמר לו לבן אך עצמי ובשׂרי אתה וישׁב עמו חדשׁ ימים׃

Genesis 37:27

27 לכו ונמכרנו לישׁמעאלים וידנו אל תהי בו כי אחינו בשׂרנו הוא וישׁמעו אחיו׃

Exodus 21:1-11

1 ואלה המשׁפטים אשׁר תשׂים לפניהם׃2 כי תקנה עבד עברי שׁשׁ שׁנים יעבד ובשׁבעת יצא לחפשׁי חנם׃3 אם בגפו יבא בגפו יצא אם בעל אשׁה הוא ויצאה אשׁתו עמו׃4 אם אדניו יתן לו אשׁה וילדה לו בנים או בנות האשׁה וילדיה תהיה לאדניה והוא יצא בגפו׃5 ואם אמר יאמר העבד אהבתי את אדני את אשׁתי ואת בני לא אצא חפשׁי׃6 והגישׁו אדניו אל האלהים והגישׁו אל הדלת או אל המזוזה ורצע אדניו את אזנו במרצע ועבדו לעלם׃7 וכי ימכר אישׁ את בתו לאמה לא תצא כצאת העבדים׃8 אם רעה בעיני אדניה אשׁר לא יעדה והפדה לעם נכרי לא ימשׁל למכרה בבגדו׃9 ואם לבנו ייעדנה כמשׁפט הבנות יעשׂה׃10 אם אחרת יקח לו שׁארה כסותה וענתה לא יגרע׃11 ואם שׁלשׁ אלה לא יעשׂה לה ויצאה חנם אין כסף׃

Leviticus 25:39-43

39 וכי ימוך אחיך עמך ונמכר לך לא תעבד בו עבדת עבד׃40 כשׂכיר כתושׁב יהיה עמך עד שׁנת היבל יעבד עמך׃41 ויצא מעמך הוא ובניו עמו ושׁב אל משׁפחתו ואל אחזת אבתיו ישׁוב׃42 כי עבדי הם אשׁר הוצאתי אתם מארץ מצרים לא ימכרו ממכרת עבד׃43 לא תרדה בו בפרך ויראת מאלהיך׃

2 Kings 4:1

1 ואשׁה אחת מנשׁי בני הנביאים צעקה אל אלישׁע לאמר עבדך אישׁי מת ואתה ידעת כי עבדך היה ירא את יהוה והנשׁה בא לקחת את שׁני ילדי לו לעבדים׃

Isaiah 58:7

7 הלוא פרס לרעב לחמך ועניים מרודים תביא בית כי תראה ערם וכסיתו ומבשׂרך לא תתעלם׃

Exodus 11:8

8 וירדו כל עבדיך אלה אלי והשׁתחוו לי לאמר צא אתה וכל העם אשׁר ברגליך ואחרי כן אצא ויצא מעם פרעה בחרי אף׃

Numbers 16:15

15 ויחר למשׁה מאד ויאמר אל יהוה אל תפן אל מנחתם לא חמור אחד מהם נשׂאתי ולא הרעתי את אחד מהם׃

Nehemiah 13:8

8 וירע לי מאד ואשׁליכה את כל כלי בית טוביה החוץ מן הלשׁכה׃

Nehemiah 13:25

25 ואריב עמם ואקללם ואכה מהם אנשׁים ואמרטם ואשׁביעם באלהים אם תתנו בנתיכם לבניהם ואם תשׂאו מבנתיהם לבניכם׃

Exodus 22:25

25 (22:24) אם כסף תלוה את עמי את העני עמך לא תהיה לו כנשׁה לא תשׂימון עליו נשׁך׃

Leviticus 19:15

15 לא תעשׂו עול במשׁפט לא תשׂא פני דל ולא תהדר פני גדול בצדק תשׁפט עמיתך׃

Leviticus 25:36

36 אל תקח מאתו נשׁך ותרבית ויראת מאלהיך וחי אחיך עמך׃

Deuteronomy 15:2-3

2 וזה דבר השׁמטה שׁמוט כל בעל משׁה ידו אשׁר ישׁה ברעהו לא יגשׂ את רעהו ואת אחיו כי קרא שׁמטה ליהוה׃3 את הנכרי תגשׂ ואשׁר יהיה לך את אחיך תשׁמט ידך׃

Deuteronomy 23:19-20

19 (23:20) לא תשׁיך לאחיך נשׁך כסף נשׁך אכל נשׁך כל דבר אשׁר ישׁך׃20 (23:21) לנכרי תשׁיך ולאחיך לא תשׁיך למען יברכך יהוה אלהיך בכל משׁלח ידך על הארץ אשׁר אתה בא שׁמה לרשׁתה׃

Deuteronomy 24:10-13

10 כי תשׁה ברעך משׁאת מאומה לא תבא אל ביתו לעבט עבטו׃11 בחוץ תעמד והאישׁ אשׁר אתה נשׁה בו יוציא אליך את העבוט החוצה׃12 ואם אישׁ עני הוא לא תשׁכב בעבטו׃13 השׁב תשׁיב לו את העבוט כבוא השׁמשׁ ושׁכב בשׂלמתו וברכך ולך תהיה צדקה לפני יהוה אלהיך׃

2 Chronicles 19:6-7

6 ויאמר אל השׁפטים ראו מה אתם עשׂים כי לא לאדם תשׁפטו כי ליהוה ועמכם בדבר משׁפט׃7 ועתה יהי פחד יהוה עליכם שׁמרו ועשׂו כי אין עם יהוה אלהינו עולה ומשׂא פנים ומקח שׁחד׃

2 Chronicles 28:9-13

9 ושׁם היה נביא ליהוה עדד שׁמו ויצא לפני הצבא הבא לשׁמרון ויאמר להם הנה בחמת יהוה אלהי אבותיכם על יהודה נתנם בידכם ותהרגו בם בזעף עד לשׁמים הגיע׃10 ועתה בני יהודה וירושׁלם אתם אמרים לכבשׁ לעבדים ולשׁפחות לכם הלא רק אתם עמכם אשׁמות ליהוה אלהיכם׃11 ועתה שׁמעוני והשׁיבו השׁביה אשׁר שׁביתם מאחיכם כי חרון אף יהוה עליכם׃12 ויקמו אנשׁים מראשׁי בני אפרים עזריהו בן יהוחנן ברכיהו בן משׁלמות ויחזקיהו בן שׁלם ועמשׂא בן חדלי על הבאים מן הצבא׃13 ויאמרו להם לא תביאו את השׁביה הנה כי לאשׁמת יהוה עלינו אתם אמרים להסיף על חטאתינו ועל אשׁמתינו כי רבה אשׁמה לנו וחרון אף על ישׂראל׃

Psalms 4:4

4 (4:5) רגזו ואל תחטאו אמרו בלבבכם על משׁכבכם ודמו סלה׃

Psalms 15:1

1 מזמור לדוד יהוה מי יגור באהלך מי ישׁכן בהר קדשׁך׃

Psalms 15:5

5 כספו לא נתן בנשׁך ושׁחד על נקי לא לקח עשׂה אלה לא ימוט לעולם׃

Psalms 27:8

8 לך אמר לבי בקשׁו פני את פניך יהוה אבקשׁ׃

Psalms 82:1-4

1 מזמור לאסף אלהים נצב בעדת אל בקרב אלהים ישׁפט׃2 עד מתי תשׁפטו עול ופני רשׁעים תשׂאו סלה׃3 שׁפטו דל ויתום עני ורשׁ הצדיקו׃4 פלטו דל ואביון מיד רשׁעים הצילו׃

Proverbs 27:5

5 טובה תוכחת מגלה מאהבה מסתרת׃

Ezekiel 22:12

12 שׁחד לקחו בך למען שׁפך דם נשׁך ותרבית לקחת ותבצעי רעיך בעשׁק ואתי שׁכחת נאם אדני יהוה׃

Ezekiel 45:9

9 כה אמר אדני יהוה רב לכם נשׂיאי ישׂראל חמס ושׁד הסירו ומשׁפט וצדקה עשׂו הרימו גרשׁתיכם מעל עמי נאם אדני יהוה׃

Exodus 21:16

16 וגנב אישׁ ומכרו ונמצא בידו מות יומת׃

Leviticus 25:47-49

47 וכי תשׂיג יד גר ותושׁב עמך ומך אחיך עמו ונמכר לגר תושׁב עמך או לעקר משׁפחת גר׃48 אחרי נמכר גאלה תהיה לו אחד מאחיו יגאלנו׃49 או דדו או בן דדו יגאלנו או משׁאר בשׂרו ממשׁפחתו יגאלנו או השׂיגה ידו ונגאל׃

Deuteronomy 24:7

7 כי ימצא אישׁ גנב נפשׁ מאחיו מבני ישׂראל והתעמר בו ומכרו ומת הגנב ההוא ובערת הרע מקרבך׃

Job 29:10

10 קול נגידים נחבאו ולשׁונם לחכם דבקה׃

Job 32:15

15 חתו לא ענו עוד העתיקו מהם מלים׃

Genesis 13:7-8

7 ויהי ריב בין רעי מקנה אברם ובין רעי מקנה לוט והכנעני והפרזי אז ישׁב בארץ׃8 ויאמר אברם אל לוט אל נא תהי מריבה ביני ובינך ובין רעי ובין רעיך כי אנשׁים אחים אנחנו׃

Genesis 20:11

11 ויאמר אברהם כי אמרתי רק אין יראת אלהים במקום הזה והרגוני על דבר אשׁתי׃

Genesis 42:18

18 ויאמר אלהם יוסף ביום השׁלישׁי זאת עשׂו וחיו את האלהים אני ירא׃

1 Samuel 2:24

24 אל בני כי לוא טובה השׁמעה אשׁר אנכי שׁמע מעברים עם יהוה׃

2 Samuel 12:14

14 אפס כי נאץ נאצת את איבי יהוה בדבר הזה גם הבן הילוד לך מות ימות׃

Nehemiah 4:4

4 (3:36) שׁמע אלהינו כי היינו בוזה והשׁב חרפתם אל ראשׁם ותנם לבזה בארץ שׁביה׃

Nehemiah 5:15

15 והפחות הראשׁנים אשׁר לפני הכבידו על העם ויקחו מהם בלחם ויין אחר כסף שׁקלים ארבעים גם נעריהם שׁלטו על העם ואני לא עשׂיתי כן מפני יראת אלהים׃

Proverbs 16:29

29 אישׁ חמס יפתה רעהו והוליכו בדרך לא טוב׃

Proverbs 17:26

26 גם ענושׁ לצדיק לא טוב להכות נדיבים על ישׁר׃

Proverbs 18:5

5 שׂאת פני רשׁע לא טוב להטות צדיק במשׁפט׃

Proverbs 19:2

2 גם בלא דעת נפשׁ לא טוב ואץ ברגלים חוטא׃

Proverbs 24:23

23 גם אלה לחכמים הכר פנים במשׁפט בל טוב׃

Ezekiel 36:20

20 ויבוא אל הגוים אשׁר באו שׁם ויחללו את שׁם קדשׁי באמר להם עם יהוה אלה ומארצו יצאו׃

Nehemiah 5:7

7 וימלך לבי עלי ואריבה את החרים ואת הסגנים ואמרה להם משׁא אישׁ באחיו אתם נשׁאים ואתן עליהם קהלה גדולה׃

Ezekiel 18:8

8 בנשׁך לא יתן ותרבית לא יקח מעול ישׁיב ידו משׁפט אמת יעשׂה בין אישׁ לאישׁ׃

Ezekiel 18:13

13 בנשׁך נתן ותרבית לקח וחי לא יחיה את כל התועבות האלה עשׂה מות יומת דמיו בו יהיה׃

Micah 2:1

1 הוי חשׁבי און ופעלי רע על משׁכבותם באור הבקר יעשׂוה כי ישׁ לאל ידם׃

Leviticus 6:4-5

4 (5:23) והיה כי יחטא ואשׁם והשׁיב את הגזלה אשׁר גזל או את העשׁק אשׁר עשׁק או את הפקדון אשׁר הפקד אתו או את האבדה אשׁר מצא׃5 (5:24) או מכל אשׁר ישׁבע עליו לשׁקר ושׁלם אתו בראשׁו וחמשׁתיו יסף עליו לאשׁר הוא לו יתננו ביום אשׁמתו׃

1 Samuel 12:3

3 הנני ענו בי נגד יהוה ונגד משׁיחו את שׁור מי לקחתי וחמור מי לקחתי ואת מי עשׁקתי את מי רצותי ומיד מי לקחתי כפר ואעלים עיני בו ואשׁיב׃

2 Samuel 12:6

6 ואת הכבשׂה ישׁלם ארבעתים עקב אשׁר עשׂה את הדבר הזה ועל אשׁר לא חמל׃

Nehemiah 5:3-4

3 וישׁ אשׁר אמרים שׂדתינו וכרמינו ובתינו אנחנו ערבים ונקחה דגן ברעב׃4 וישׁ אשׁר אמרים לוינו כסף למדת המלך שׂדתינו וכרמינו׃

Isaiah 58:6

6 הלוא זה צום אבחרהו פתח חרצבות רשׁע התר אגדות מוטה ושׁלח רצוצים חפשׁים וכל מוטה תנתקו׃

2 Kings 23:2-3

2 ויעל המלך בית יהוה וכל אישׁ יהודה וכל ישׁבי ירושׁלם אתו והכהנים והנביאים וכל העם למקטן ועד גדול ויקרא באזניהם את כל דברי ספר הברית הנמצא בבית יהוה׃3 ויעמד המלך על העמוד ויכרת את הברית לפני יהוה ללכת אחר יהוה ולשׁמר מצותיו ואת עדותיו ואת חקתיו בכל לב ובכל נפשׁ להקים את דברי הברית הזאת הכתבים על הספר הזה ויעמד כל העם בברית׃

2 Chronicles 6:22-23

22 אם יחטא אישׁ לרעהו ונשׁא בו אלה להאלתו ובא אלה לפני מזבחך בבית הזה׃23 ואתה תשׁמע מן השׁמים ועשׂית ושׁפטת את עבדיך להשׁיב לרשׁע לתת דרכו בראשׁו ולהצדיק צדיק לתת לו כצדקתו׃

2 Chronicles 15:13-14

13 וכל אשׁר לא ידרשׁ ליהוה אלהי ישׂראל יומת למן קטן ועד גדול למאישׁ ועד אשׁה׃14 וישׁבעו ליהוה בקול גדול ובתרועה ובחצצרות ובשׁופרות׃

2 Chronicles 28:14-15

14 ויעזב החלוץ את השׁביה ואת הבזה לפני השׂרים וכל הקהל׃15 ויקמו האנשׁים אשׁר נקבו בשׁמות ויחזיקו בשׁביה וכל מערמיהם הלבישׁו מן השׁלל וילבשׁום וינעלום ויאכלום וישׁקום ויסכום וינהלום בחמרים לכל כושׁל ויביאום ירחו עיר התמרים אצל אחיהם וישׁובו שׁמרון׃

Ezra 10:5

5 ויקם עזרא וישׁבע את שׂרי הכהנים הלוים וכל ישׂראל לעשׂות כדבר הזה וישׁבעו׃

Ezra 10:12

12 ויענו כל הקהל ויאמרו קול גדול כן כדבריך עלינו לעשׂות׃

Nehemiah 10:29

29 (10:30) מחזיקים על אחיהם אדיריהם ובאים באלה ובשׁבועה ללכת בתורת האלהים אשׁר נתנה ביד משׁה עבד האלהים ולשׁמור ולעשׂות את כל מצות יהוה אדנינו ומשׁפטיו וחקיו׃

Nehemiah 10:31

31 (10:32) ועמי הארץ המביאים את המקחות וכל שׁבר ביום השׁבת למכור לא נקח מהם בשׁבת וביום קדשׁ ונטשׁ את השׁנה השׁביעית ומשׁא כל יד׃

Jeremiah 34:8-10

8 הדבר אשׁר היה אל ירמיהו מאת יהוה אחרי כרת המלך צדקיהו ברית את כל העם אשׁר בירושׁלם לקרא להם דרור׃9 לשׁלח אישׁ את עבדו ואישׁ את שׁפחתו העברי והעבריה חפשׁים לבלתי עבד בם ביהודי אחיהו אישׁ׃10 וישׁמעו כל השׂרים וכל העם אשׁר באו בברית לשׁלח אישׁ את עבדו ואישׁ את שׁפחתו חפשׁים לבלתי עבד בם עוד וישׁמעו וישׁלחו׃

Numbers 5:22

22 ובאו המים המאררים האלה במעיך לצבות בטן ולנפל ירך ואמרה האשׁה אמן אמן׃

Deuteronomy 27:14-26

14 וענו הלוים ואמרו אל כל אישׁ ישׂראל קול רם׃15 ארור האישׁ אשׁר יעשׂה פסל ומסכה תועבת יהוה מעשׂה ידי חרשׁ ושׂם בסתר וענו כל העם ואמרו אמן׃16 ארור מקלה אביו ואמו ואמר כל העם אמן׃17 ארור מסיג גבול רעהו ואמר כל העם אמן׃18 ארור משׁגה עור בדרך ואמר כל העם אמן׃19 ארור מטה משׁפט גר יתום ואלמנה ואמר כל העם אמן׃20 ארור שׁכב עם אשׁת אביו כי גלה כנף אביו ואמר כל העם אמן׃21 ארור שׁכב עם כל בהמה ואמר כל העם אמן׃22 ארור שׁכב עם אחתו בת אביו או בת אמו ואמר כל העם אמן׃23 ארור שׁכב עם חתנתו ואמר כל העם אמן׃24 ארור מכה רעהו בסתר ואמר כל העם אמן׃25 ארור לקח שׁחד להכות נפשׁ דם נקי ואמר כל העם אמן׃26 ארור אשׁר לא יקים את דברי התורה הזאת לעשׂות אותם ואמר כל העם אמן׃

1 Samuel 15:28

28 ויאמר אליו שׁמואל קרע יהוה את ממלכות ישׂראל מעליך היום ונתנה לרעך הטוב ממך׃

1 Kings 11:29-31

29 ויהי בעת ההיא וירבעם יצא מירושׁלם וימצא אתו אחיה השׁילני הנביא בדרך והוא מתכסה בשׂלמה חדשׁה ושׁניהם לבדם בשׂדה׃30 ויתפשׂ אחיה בשׂלמה החדשׁה אשׁר עליו ויקרעה שׁנים עשׂר קרעים׃31 ויאמר לירבעם קח לך עשׂרה קרעים כי כה אמר יהוה אלהי ישׂראל הנני קרע את הממלכה מיד שׁלמה ונתתי לך את עשׂרה השׁבטים׃

2 Kings 23:3

3 ויעמד המלך על העמוד ויכרת את הברית לפני יהוה ללכת אחר יהוה ולשׁמר מצותיו ואת עדותיו ואת חקתיו בכל לב ובכל נפשׁ להקים את דברי הברית הזאת הכתבים על הספר הזה ויעמד כל העם בברית׃

1 Chronicles 16:36

36 ברוך יהוה אלהי ישׂראל מן העולם ועד העלם ויאמרו כל העם אמן והלל ליהוה׃

Nehemiah 8:6

6 ויברך עזרא את יהוה האלהים הגדול ויענו כל העם אמן אמן במעל ידיהם ויקדו וישׁתחו ליהוה אפים ארצה׃

Psalms 50:14

14 זבח לאלהים תודה ושׁלם לעליון נדריך׃

Psalms 76:11

11 (76:12) נדרו ושׁלמו ליהוה אלהיכם כל סביביו יובילו שׁי למורא׃

Psalms 119:106

106 נשׁבעתי ואקימה לשׁמר משׁפטי צדקך׃

Ecclesiastes 5:5

5 (5:4) טוב אשׁר לא תדר משׁתדור ולא תשׁלם׃

Zechariah 5:3-4

3 ויאמר אלי זאת האלה היוצאת על פני כל הארץ כי כל הגנב מזה כמוה נקה וכל הנשׁבע מזה כמוה נקה׃4 הוצאתיה נאם יהוה צבאות ובאה אל בית הגנב ואל בית הנשׁבע בשׁמי לשׁקר ולנה בתוך ביתו וכלתו ואת עציו ואת אבניו׃

Ezra 4:13-14

13 כען ידיע להוא למלכא די הן קריתא דך תתבנא ושׁוריה ישׁתכללון מנדה בלו והלך לא ינתנון ואפתם מלכים תהנזק׃14 כען כל קבל די מלח היכלא מלחנא וערות מלכא לא אריך לנא למחזא על דנה שׁלחנא והודענא למלכא׃

Nehemiah 2:1

1 ויהי בחדשׁ ניסן שׁנת עשׂרים לארתחשׁסתא המלך יין לפניו ואשׂא את היין ואתנה למלך ולא הייתי רע לפניו׃

Nehemiah 13:6

6 ובכל זה לא הייתי בירושׁלם כי בשׁנת שׁלשׁים ושׁתים לארתחשׁסתא מלך בבל באתי אל המלך ולקץ ימים נשׁאלתי מן המלך׃

1 Samuel 2:15-17

15 גם בטרם יקטרון את החלב ובא נער הכהן ואמר לאישׁ הזבח תנה בשׂר לצלות לכהן ולא יקח ממך בשׂר מבשׁל כי אם חי׃16 ויאמר אליו האישׁ קטר יקטירון כיום החלב וקח לך כאשׁר תאוה נפשׁך ואמר לו כי עתה תתן ואם לא לקחתי בחזקה׃17 ותהי חטאת הנערים גדולה מאד את פני יהוה כי נאצו האנשׁים את מנחת יהוה׃

1 Samuel 8:15

15 וזרעיכם וכרמיכם יעשׂר ונתן לסריסיו ולעבדיו׃

Nehemiah 5:9

9 ויאמר לא טוב הדבר אשׁר אתם עשׂים הלוא ביראת אלהינו תלכו מחרפת הגוים אויבינו׃

Job 31:23

23 כי פחד אלי איד אל ומשׂאתו לא אוכל׃

Psalms 112:1

1 הללו יה אשׁרי אישׁ ירא את יהוה במצותיו חפץ מאד׃

Psalms 147:11

11 רוצה יהוה את יראיו את המיחלים לחסדו׃

Proverbs 16:6

6 בחסד ואמת יכפר עון וביראת יהוה סור מרע׃

Proverbs 29:12

12 משׁל מקשׁיב על דבר שׁקר כל משׁרתיו רשׁעים׃

Ecclesiastes 12:13-14

13 סוף דבר הכל נשׁמע את האלהים ירא ואת מצותיו שׁמור כי זה כל האדם׃14 כי את כל מעשׂה האלהים יבא במשׁפט על כל נעלם אם טוב ואם רע׃

Isaiah 50:10

10 מי בכם ירא יהוה שׁמע בקול עבדו אשׁר הלך חשׁכים ואין נגה לו יבטח בשׁם יהוה וישׁען באלהיו׃

2 Samuel 9:7

7 ויאמר לו דוד אל תירא כי עשׂה אעשׂה עמך חסד בעבור יהונתן אביך והשׁבתי לך את כל שׂדה שׁאול אביך ואתה תאכל לחם על שׁלחני תמיד׃

2 Samuel 9:13

13 ומפיבשׁת ישׁב בירושׁלם כי על שׁלחן המלך תמיד הוא אכל והוא פסח שׁתי רגליו׃

1 Kings 18:19

19 ועתה שׁלח קבץ אלי את כל ישׂראל אל הר הכרמל ואת נביאי הבעל ארבע מאות וחמשׁים ונביאי האשׁרה ארבע מאות אכלי שׁלחן איזבל׃

Isaiah 32:8

8 ונדיב נדיבות יעץ והוא על נדיבות יקום׃

1 Kings 4:22-23

22 (5:2) ויהי לחם שׁלמה ליום אחד שׁלשׁים כר סלת ושׁשׁים כר קמח׃23 (5:3) עשׂרה בקר בראים ועשׂרים בקר רעי ומאה צאן לבד מאיל וצבי ויחמור וברברים אבוסים׃

Nehemiah 5:14-15

14 גם מיום אשׁר צוה אתי להיות פחם בארץ יהודה משׁנת עשׂרים ועד שׁנת שׁלשׁים ושׁתים לארתחשׁסתא המלך שׁנים שׁתים עשׂרה אני ואחי לחם הפחה לא אכלתי׃15 והפחות הראשׁנים אשׁר לפני הכבידו על העם ויקחו מהם בלחם ויין אחר כסף שׁקלים ארבעים גם נעריהם שׁלטו על העם ואני לא עשׂיתי כן מפני יראת אלהים׃

Psalms 37:21

21 לוה רשׁע ולא ישׁלם וצדיק חונן ונותן׃

Psalms 37:26

26 כל היום חונן ומלוה וזרעו לברכה׃

Genesis 40:14

14 כי אם זכרתני אתך כאשׁר ייטב לך ועשׂית נא עמדי חסד והזכרתני אל פרעה והוצאתני מן הבית הזה׃

Nehemiah 13:14

14 זכרה לי אלהי על זאת ואל תמח חסדי אשׁר עשׂיתי בבית אלהי ובמשׁמריו׃

Nehemiah 13:22

22 ואמרה ללוים אשׁר יהיו מטהרים ובאים שׁמרים השׁערים לקדשׁ את יום השׁבת גם זאת זכרה לי אלהי וחוסה עלי כרב חסדך׃

Nehemiah 13:31

31 ולקרבן העצים בעתים מזמנות ולבכורים זכרה לי אלהי לטובה׃

Psalms 18:23-25

23 (18:24) ואהי תמים עמו ואשׁתמר מעוני׃24 (18:25) וישׁב יהוה לי כצדקי כבר ידי לנגד עיניו׃25 (18:26) עם חסיד תתחסד עם גבר תמים תתמם׃

Psalms 25:6-7

6 זכר רחמיך יהוה וחסדיך כי מעולם המה׃7 חטאות נעורי ופשׁעי אל תזכר כחסדך זכר לי אתה למען טובך יהוה׃

Psalms 40:17

17 (40:18) ואני עני ואביון אדני יחשׁב לי עזרתי ומפלטי אתה אלהי אל תאחר׃

Psalms 106:4

4 זכרני יהוה ברצון עמך פקדני בישׁועתך׃

Jeremiah 29:11

11 כי אנכי ידעתי את המחשׁבת אשׁר אנכי חשׁב עליכם נאם יהוה מחשׁבות שׁלום ולא לרעה לתת לכם אחרית ותקוה׃

Cross Reference data is from OpenBible.info, retrieved June 28, 2010, and licensed under a Creative Commons Attribution License.