Numbers 12 Cross References - HOT

¹ ותדבר מרים ואהרן במשׁה על אדות האשׁה הכשׁית אשׁר לקח כי אשׁה כשׁית לקח׃² ויאמרו הרק אך במשׁה דבר יהוה הלא גם בנו דבר וישׁמע יהוה׃³ והאישׁ משׁה ענו מאד מכל האדם אשׁר על פני האדמה׃⁴ ויאמר יהוה פתאם אל משׁה ואל אהרן ואל מרים צאו שׁלשׁתכם אל אהל מועד ויצאו שׁלשׁתם׃⁵ וירד יהוה בעמוד ענן ויעמד פתח האהל ויקרא אהרן ומרים ויצאו שׁניהם׃⁶ ויאמר שׁמעו נא דברי אם יהיה נביאכם יהוה במראה אליו אתודע בחלום אדבר׃⁷ לא כן עבדי משׁה בכל ביתי נאמן הוא׃⁸ פה אל פה אדבר בו ומראה ולא בחידת ותמנת יהוה יביט ומדוע לא יראתם לדבר בעבדי במשׁה׃⁹ ויחר אף יהוה בם וילך׃¹⁰ והענן סר מעל האהל והנה מרים מצרעת כשׁלג ויפן אהרן אל מרים והנה מצרעת׃¹¹ ויאמר אהרן אל משׁה בי אדני אל נא תשׁת עלינו חטאת אשׁר נואלנו ואשׁר חטאנו׃¹² אל נא תהי כמת אשׁר בצאתו מרחם אמו ויאכל חצי בשׂרו׃¹³ ויצעק משׁה אל יהוה לאמר אל נא רפא נא׃¹⁴ ויאמר יהוה אל משׁה ואביה ירק ירק בפניה הלא תכלם שׁבעת ימים תסגר שׁבעת ימים מחוץ למחנה ואחר תאסף׃¹⁵ ותסגר מרים מחוץ למחנה שׁבעת ימים והעם לא נסע עד האסף מרים׃¹⁶ ואחר נסעו העם מחצרות ויחנו במדבר פארן׃

Genesis 24:3

³ ואשׁביעך ביהוה אלהי השׁמים ואלהי הארץ אשׁר לא תקח אשׁה לבני מבנות הכנעני אשׁר אנכי יושׁב בקרבו׃

Genesis 24:37

³⁷ וישׁבעני אדני לאמר לא תקח אשׁה לבני מבנות הכנעני אשׁר אנכי ישׁב בארצו׃

Genesis 26:34-35

³⁴ ויהי עשׂו בן ארבעים שׁנה ויקח אשׁה את יהודית בת בארי החתי ואת בשׂמת בת אילן החתי׃³⁵ ותהיין מרת רוח ליצחק ולרבקה׃

Genesis 27:46

⁴⁶ ותאמר רבקה אל יצחק קצתי בחיי מפני בנות חת אם לקח יעקב אשׁה מבנות חת כאלה מבנות הארץ למה לי חיים׃

Genesis 28:6-9

⁶ וירא עשׂו כי ברך יצחק את יעקב ושׁלח אתו פדנה ארם לקחת לו משׁם אשׁה בברכו אתו ויצו עליו לאמר לא תקח אשׁה מבנות כנען׃⁷ וישׁמע יעקב אל אביו ואל אמו וילך פדנה ארם׃⁸ וירא עשׂו כי רעות בנות כנען בעיני יצחק אביו׃⁹ וילך עשׂו אל ישׁמעאל ויקח את מחלת בת ישׁמעאל בן אברהם אחות נביות על נשׁיו לו לאשׁה׃

Genesis 34:14-15

¹⁴ ויאמרו אליהם לא נוכל לעשׂות הדבר הזה לתת את אחתנו לאישׁ אשׁר לו ערלה כי חרפה הוא׃¹⁵ אך בזאת נאות לכם אם תהיו כמנו להמל לכם כל זכר׃

Genesis 41:45

⁴⁵ ויקרא פרעה שׁם יוסף צפנת פענח ויתן לו את אסנת בת פוטי פרע כהן אן לאשׁה ויצא יוסף על ארץ מצרים׃

Exodus 2:16

¹⁶ ולכהן מדין שׁבע בנות ותבאנה ותדלנה ותמלאנה את הרהטים להשׁקות צאן אביהן׃

Exodus 2:21

²¹ ויואל משׁה לשׁבת את האישׁ ויתן את צפרה בתו למשׁה׃

Exodus 34:16

¹⁶ ולקחת מבנתיו לבניך וזנו בנתיו אחרי אלהיהן והזנו את בניך אחרי אלהיהן׃

Leviticus 21:14

¹⁴ אלמנה וגרושׁה וחללה זנה את אלה לא יקח כי אם בתולה מעמיו יקח אשׁה׃

Genesis 29:33

³³ ותהר עוד ותלד בן ותאמר כי שׁמע יהוה כי שׂנואה אנכי ויתן לי גם את זה ותקרא שׁמו שׁמעון׃

Exodus 4:30

³⁰ וידבר אהרן את כל הדברים אשׁר דבר יהוה אל משׁה ויעשׂ האתת לעיני העם׃

Exodus 5:1

¹ ואחר באו משׁה ואהרן ויאמרו אל פרעה כה אמר יהוה אלהי ישׂראל שׁלח את עמי ויחגו לי במדבר׃

Exodus 7:10

¹⁰ ויבא משׁה ואהרן אל פרעה ויעשׂו כן כאשׁר צוה יהוה וישׁלך אהרן את מטהו לפני פרעה ולפני עבדיו ויהי לתנין׃

Exodus 15:20-21

²⁰ ותקח מרים הנביאה אחות אהרן את התף בידה ותצאן כל הנשׁים אחריה בתפים ובמחלת׃²¹ ותען להם מרים שׁירו ליהוה כי גאה גאה סוס ורכבו רמה בים׃

Numbers 11:1

¹ ויהי העם כמתאננים רע באזני יהוה וישׁמע יהוה ויחר אפו ותבער בם אשׁ יהוה ותאכל בקצה המחנה׃

Numbers 11:29

²⁹ ויאמר לו משׁה המקנא אתה לי ומי יתן כל עם יהוה נביאים כי יתן יהוה את רוחו עליהם׃

Numbers 16:3

³ ויקהלו על משׁה ועל אהרן ויאמרו אלהם רב לכם כי כל העדה כלם קדשׁים ובתוכם יהוה ומדוע תתנשׂאו על קהל יהוה׃

2 Samuel 11:27

²⁷ ויעבר האבל וישׁלח דוד ויאספה אל ביתו ותהי לו לאשׁה ותלד לו בן וירע הדבר אשׁר עשׂה דוד בעיני יהוה׃

2 Kings 19:4

⁴ אולי ישׁמע יהוה אלהיך את כל דברי רב שׁקה אשׁר שׁלחו מלך אשׁור אדניו לחרף אלהים חי והוכיח בדברים אשׁר שׁמע יהוה אלהיך ונשׂאת תפלה בעד השׁארית הנמצאה׃

Psalms 94:7-9

⁷ ויאמרו לא יראה יה ולא יבין אלהי יעקב׃⁸ בינו בערים בעם וכסילים מתי תשׂכילו׃⁹ הנטע אזן הלא ישׁמע אם יצר עין הלא יביט׃

Proverbs 13:10

¹⁰ רק בזדון יתן מצה ואת נועצים חכמה׃

Isaiah 37:4

⁴ אולי ישׁמע יהוה אלהיך את דברי רב שׁקה אשׁר שׁלחו מלך אשׁור אדניו לחרף אלהים חי והוכיח בדברים אשׁר שׁמע יהוה אלהיך ונשׂאת תפלה בעד השׁארית הנמצאה׃

Ezekiel 35:12-13

¹² וידעת כי אני יהוה שׁמעתי את כל נאצותיך אשׁר אמרת על הרי ישׂראל לאמר שׁממה לנו נתנו לאכלה׃¹³ ותגדילו עלי בפיכם והעתרתם עלי דבריכם אני שׁמעתי׃

Micah 6:4

⁴ כי העלתיך מארץ מצרים ומבית עבדים פדיתיך ואשׁלח לפניך את משׁה אהרן ומרים׃

Numbers 11:10-15

¹⁰ וישׁמע משׁה את העם בכה למשׁפחתיו אישׁ לפתח אהלו ויחר אף יהוה מאד ובעיני משׁה רע׃¹¹ ויאמר משׁה אל יהוה למה הרעת לעבדך ולמה לא מצתי חן בעיניך לשׂום את משׂא כל העם הזה עלי׃¹² האנכי הריתי את כל העם הזה אם אנכי ילדתיהו כי תאמר אלי שׂאהו בחיקך כאשׁר ישׂא האמן את הינק על האדמה אשׁר נשׁבעת לאבתיו׃¹³ מאין לי בשׂר לתת לכל העם הזה כי יבכו עלי לאמר תנה לנו בשׂר ונאכלה׃¹⁴ לא אוכל אנכי לבדי לשׂאת את כל העם הזה כי כבד ממני׃¹⁵ ואם ככה את עשׂה לי הרגני נא הרג אם מצאתי חן בעיניך ואל אראה ברעתי׃

Numbers 20:10-12

¹⁰ ויקהלו משׁה ואהרן את הקהל אל פני הסלע ויאמר להם שׁמעו נא המרים המן הסלע הזה נוציא לכם מים׃¹¹ וירם משׁה את ידו ויך את הסלע במטהו פעמים ויצאו מים רבים ותשׁת העדה ובעירם׃¹² ויאמר יהוה אל משׁה ואל אהרן יען לא האמנתם בי להקדישׁני לעיני בני ישׂראל לכן לא תביאו את הקהל הזה אל הארץ אשׁר נתתי׃

Psalms 106:32-33

³² ויקציפו על מי מריבה וירע למשׁה בעבורם׃³³ כי המרו את רוחו ויבטא בשׂפתיו׃

Psalms 147:6

⁶ מעודד ענוים יהוה משׁפיל רשׁעים עדי ארץ׃

Psalms 149:4

⁴ כי רוצה יהוה בעמו יפאר ענוים בישׁועה׃

Numbers 16:16-21

¹⁶ ויאמר משׁה אל קרח אתה וכל עדתך היו לפני יהוה אתה והם ואהרן מחר׃¹⁷ וקחו אישׁ מחתתו ונתתם עליהם קטרת והקרבתם לפני יהוה אישׁ מחתתו חמשׁים ומאתים מחתת ואתה ואהרן אישׁ מחתתו׃¹⁸ ויקחו אישׁ מחתתו ויתנו עליהם אשׁ וישׂימו עליהם קטרת ויעמדו פתח אהל מועד ומשׁה ואהרן׃¹⁹ ויקהל עליהם קרח את כל העדה אל פתח אהל מועד וירא כבוד יהוה אל כל העדה׃²⁰ וידבר יהוה אל משׁה ואל אהרן לאמר׃²¹ הבדלו מתוך העדה הזאת ואכלה אתם כרגע׃

Psalms 76:9

⁹ (76:10) בקום למשׁפט אלהים להושׁיע כל ענוי ארץ סלה׃

Exodus 34:5

⁵ וירד יהוה בענן ויתיצב עמו שׁם ויקרא בשׁם יהוה׃

Exodus 40:38

³⁸ כי ענן יהוה על המשׁכן יומם ואשׁ תהיה לילה בו לעיני כל בית ישׂראל בכל מסעיהם׃

Numbers 11:25

²⁵ וירד יהוה בענן וידבר אליו ויאצל מן הרוח אשׁר עליו ויתן על שׁבעים אישׁ הזקנים ויהי כנוח עליהם הרוח ויתנבאו ולא יספו׃

Psalms 99:7

⁷ בעמוד ענן ידבר אליהם שׁמרו עדתיו וחק נתן׃

Genesis 15:1

¹ אחר הדברים האלה היה דבר יהוה אל אברם במחזה לאמר אל תירא אברם אנכי מגן לך שׂכרך הרבה מאד׃

Genesis 20:7

⁷ ועתה השׁב אשׁת האישׁ כי נביא הוא ויתפלל בעדך וחיה ואם אינך משׁיב דע כי מות תמות אתה וכל אשׁר׃

Genesis 31:10-11

¹⁰ ויהי בעת יחם הצאן ואשׂא עיני וארא בחלום והנה העתדים העלים על הצאן עקדים נקדים וברדים׃¹¹ ויאמר אלי מלאך האלהים בחלום יעקב ואמר הנני׃

Genesis 46:2

² ויאמר אלהים לישׂראל במראת הלילה ויאמר יעקב יעקב ויאמר הנני׃

Exodus 7:1

¹ ויאמר יהוה אל משׁה ראה נתתיך אלהים לפרעה ואהרן אחיך יהיה נביאך׃

1 Kings 3:5

⁵ בגבעון נראה יהוה אל שׁלמה בחלום הלילה ויאמר אלהים שׁאל מה אתן׃

Job 4:13

¹³ בשׂעפים מחזינות לילה בנפל תרדמה על אנשׁים׃

Job 33:15

¹⁵ בחלום חזיון לילה בנפל תרדמה על אנשׁים בתנומות עלי משׁכב׃

Psalms 89:19

¹⁹ (89:20) אז דברת בחזון לחסידיך ותאמר שׁויתי עזר על גבור הרימותי בחור מעם׃

Psalms 105:15

¹⁵ אל תגעו במשׁיחי ולנביאי אל תרעו׃

Jeremiah 23:28

²⁸ הנביא אשׁר אתו חלום יספר חלום ואשׁר דברי אתו ידבר דברי אמת מה לתבן את הבר נאם יהוה׃

Ezekiel 1:1

¹ ויהי בשׁלשׁים שׁנה ברביעי בחמשׁה לחדשׁ ואני בתוך הגולה על נהר כבר נפתחו השׁמים ואראה מראות אלהים׃

Daniel 7:1

¹ בשׁנת חדה לבלאשׁצר מלך בבל דניאל חלם חזה וחזוי ראשׁה על משׁכבה באדין חלמא כתב ראשׁ מלין אמר׃

Daniel 8:2

² ואראה בחזון ויהי בראתי ואני בשׁושׁן הבירה אשׁר בעילם המדינה ואראה בחזון ואני הייתי על אובל אולי׃

Daniel 10:8

⁸ ואני נשׁארתי לבדי ואראה את המראה הגדלה הזאת ולא נשׁאר בי כח והודי נהפך עלי למשׁחית ולא עצרתי כח׃

Daniel 10:16-17

¹⁶ והנה כדמות בני אדם נגע על שׂפתי ואפתח פי ואדברה ואמרה אל העמד לנגדי אדני במראה נהפכו צירי עלי ולא עצרתי כח׃¹⁷ והיך יוכל עבד אדני זה לדבר עם אדני זה ואני מעתה לא יעמד בי כח ונשׁמה לא נשׁארה׃

Deuteronomy 18:18

¹⁸ נביא אקים להם מקרב אחיהם כמוך ונתתי דברי בפיו ודבר אליהם את כל אשׁר אצונו׃

Joshua 1:1

¹ ויהי אחרי מות משׁה עבד יהוה ויאמר יהוה אל יהושׁע בן נון משׁרת משׁה לאמר׃

Psalms 105:26

²⁶ שׁלח משׁה עבדו אהרן אשׁר בחר׃

Exodus 20:4

⁴ לא תעשׂה לך פסל וכל תמונה אשׁר בשׁמים ממעל ואשׁר בארץ מתחת ואשׁר במים מתחת לארץ׃

Exodus 24:10-11

¹⁰ ויראו את אלהי ישׂראל ותחת רגליו כמעשׂה לבנת הספיר וכעצם השׁמים לטהר׃¹¹ ואל אצילי בני ישׂראל לא שׁלח ידו ויחזו את האלהים ויאכלו וישׁתו׃

Exodus 33:11

¹¹ ודבר יהוה אל משׁה פנים אל פנים כאשׁר ידבר אישׁ אל רעהו ושׁב אל המחנה ומשׁרתו יהושׁע בן נון נער לא ימישׁ מתוך האהל׃

Exodus 33:19

¹⁹ ויאמר אני אעביר כל טובי על פניך וקראתי בשׁם יהוה לפניך וחנתי את אשׁר אחן ורחמתי את אשׁר ארחם׃

Exodus 33:23

²³ והסרתי את כפי וראית את אחרי ופני לא יראו׃

Exodus 34:5-7

⁵ וירד יהוה בענן ויתיצב עמו שׁם ויקרא בשׁם יהוה׃⁶ ויעבר יהוה על פניו ויקרא יהוה יהוה אל רחום וחנון ארך אפים ורב חסד ואמת׃⁷ נצר חסד לאלפים נשׂא עון ופשׁע וחטאה ונקה לא ינקה פקד עון אבות על בנים ועל בני בנים על שׁלשׁים ועל רבעים׃

Exodus 34:30

³⁰ וירא אהרן וכל בני ישׂראל את משׁה והנה קרן עור פניו וייראו מגשׁת אליו׃

Numbers 14:14

¹⁴ ואמרו אל יושׁב הארץ הזאת שׁמעו כי אתה יהוה בקרב העם הזה אשׁר עין בעין נראה אתה יהוה ועננך עמד עלהם ובעמד ענן אתה הלך לפניהם יומם ובעמוד אשׁ לילה׃

Deuteronomy 4:15

¹⁵ ונשׁמרתם מאד לנפשׁתיכם כי לא ראיתם כל תמונה ביום דבר יהוה אליכם בחרב מתוך האשׁ׃

Deuteronomy 34:10

¹⁰ ולא קם נביא עוד בישׂראל כמשׁה אשׁר ידעו יהוה פנים אל פנים׃

Psalms 17:15

¹⁵ אני בצדק אחזה פניך אשׂבעה בהקיץ תמונתך׃

Psalms 49:4

⁴ (49:5) אטה למשׁל אזני אפתח בכנור חידתי׃

Isaiah 40:18

¹⁸ ואל מי תדמיון אל ומה דמות תערכו׃

Isaiah 46:5

⁵ למי תדמיוני ותשׁוו ותמשׁלוני ונדמה׃

Ezekiel 17:2

² בן אדם חוד חידה ומשׁל משׁל אל בית ישׂראל׃

Ezekiel 20:49

⁴⁹ (21:5) ואמר אהה אדני יהוה המה אמרים לי הלא ממשׁל משׁלים הוא׃

Genesis 17:22

²² ויכל לדבר אתו ויעל אלהים מעל אברהם׃

Hosea 5:15

¹⁵ אלך אשׁובה אל מקומי עד אשׁר יאשׁמו ובקשׁו פני בצר להם ישׁחרנני׃

Exodus 4:6

⁶ ויאמר יהוה לו עוד הבא נא ידך בחיקך ויבא ידו בחיקו ויוצאה והנה ידו מצרעת כשׁלג׃

Exodus 33:7-10

⁷ ומשׁה יקח את האהל ונטה לו מחוץ למחנה הרחק מן המחנה וקרא לו אהל מועד והיה כל מבקשׁ יהוה יצא אל אהל מועד אשׁר מחוץ למחנה׃⁸ והיה כצאת משׁה אל האהל יקומו כל העם ונצבו אישׁ פתח אהלו והביטו אחרי משׁה עד באו האהלה׃⁹ והיה כבא משׁה האהלה ירד עמוד הענן ועמד פתח האהל ודבר עם משׁה׃¹⁰ וראה כל העם את עמוד הענן עמד פתח האהל וקם כל העם והשׁתחוו אישׁ פתח אהלו׃

Leviticus 13:2-46

² אדם כי יהיה בעור בשׂרו שׂאת או ספחת או בהרת והיה בעור בשׂרו לנגע צרעת והובא אל אהרן הכהן או אל אחד מבניו הכהנים׃³ וראה הכהן את הנגע בעור הבשׂר ושׂער בנגע הפך לבן ומראה הנגע עמק מעור בשׂרו נגע צרעת הוא וראהו הכהן וטמא אתו׃⁴ ואם בהרת לבנה הוא בעור בשׂרו ועמק אין מראה מן העור ושׂערה לא הפך לבן והסגיר הכהן את הנגע שׁבעת ימים׃⁵ וראהו הכהן ביום השׁביעי והנה הנגע עמד בעיניו לא פשׂה הנגע בעור והסגירו הכהן שׁבעת ימים שׁנית׃⁶ וראה הכהן אתו ביום השׁביעי שׁנית והנה כהה הנגע ולא פשׂה הנגע בעור וטהרו הכהן מספחת הוא וכבס בגדיו וטהר׃⁷ ואם פשׂה תפשׂה המספחת בעור אחרי הראתו אל הכהן לטהרתו ונראה שׁנית אל הכהן׃⁸ וראה הכהן והנה פשׂתה המספחת בעור וטמאו הכהן צרעת הוא׃⁹ נגע צרעת כי תהיה באדם והובא אל הכהן׃¹⁰ וראה הכהן והנה שׂאת לבנה בעור והיא הפכה שׂער לבן ומחית בשׂר חי בשׂאת׃¹¹ צרעת נושׁנת הוא בעור בשׂרו וטמאו הכהן לא יסגרנו כי טמא הוא׃¹² ואם פרוח תפרח הצרעת בעור וכסתה הצרעת את כל עור הנגע מראשׁו ועד רגליו לכל מראה עיני הכהן׃¹³ וראה הכהן והנה כסתה הצרעת את כל בשׂרו וטהר את הנגע כלו הפך לבן טהור הוא׃¹⁴ וביום הראות בו בשׂר חי יטמא׃¹⁵ וראה הכהן את הבשׂר החי וטמאו הבשׂר החי טמא הוא צרעת הוא׃¹⁶ או כי ישׁוב הבשׂר החי ונהפך ללבן ובא אל הכהן׃¹⁷ וראהו הכהן והנה נהפך הנגע ללבן וטהר הכהן את הנגע טהור הוא׃¹⁸ ובשׂר כי יהיה בו בערו שׁחין ונרפא׃¹⁹ והיה במקום השׁחין שׂאת לבנה או בהרת לבנה אדמדמת ונראה אל הכהן׃²⁰ וראה הכהן והנה מראה שׁפל מן העור ושׂערה הפך לבן וטמאו הכהן נגע צרעת הוא בשׁחין פרחה׃²¹ ואם יראנה הכהן והנה אין בה שׂער לבן ושׁפלה איננה מן העור והיא כהה והסגירו הכהן שׁבעת ימים׃²² ואם פשׂה תפשׂה בעור וטמא הכהן אתו נגע הוא׃²³ ואם תחתיה תעמד הבהרת לא פשׂתה צרבת השׁחין הוא וטהרו הכהן׃²⁴ או בשׂר כי יהיה בערו מכות אשׁ והיתה מחית המכוה בהרת לבנה אדמדמת או לבנה׃²⁵ וראה אתה הכהן והנה נהפך שׂער לבן בבהרת ומראה עמק מן העור צרעת הוא במכוה פרחה וטמא אתו הכהן נגע צרעת הוא׃²⁶ ואם יראנה הכהן והנה אין בבהרת שׂער לבן ושׁפלה איננה מן העור והוא כהה והסגירו הכהן שׁבעת ימים׃²⁷ וראהו הכהן ביום השׁביעי אם פשׂה תפשׂה בעור וטמא הכהן אתו נגע צרעת הוא׃²⁸ ואם תחתיה תעמד הבהרת לא פשׂתה בעור והוא כהה שׂאת המכוה הוא וטהרו הכהן כי צרבת המכוה הוא׃²⁹ ואישׁ או אשׁה כי יהיה בו נגע בראשׁ או בזקן׃³⁰ וראה הכהן את הנגע והנה מראהו עמק מן העור ובו שׂער צהב דק וטמא אתו הכהן נתק הוא צרעת הראשׁ או הזקן הוא׃³¹ וכי יראה הכהן את נגע הנתק והנה אין מראהו עמק מן העור ושׂער שׁחר אין בו והסגיר הכהן את נגע הנתק שׁבעת ימים׃³² וראה הכהן את הנגע ביום השׁביעי והנה לא פשׂה הנתק ולא היה בו שׂער צהב ומראה הנתק אין עמק מן העור׃³³ והתגלח ואת הנתק לא יגלח והסגיר הכהן את הנתק שׁבעת ימים שׁנית׃³⁴ וראה הכהן את הנתק ביום השׁביעי והנה לא פשׂה הנתק בעור ומראהו איננו עמק מן העור וטהר אתו הכהן וכבס בגדיו וטהר׃³⁵ ואם פשׂה יפשׂה הנתק בעור אחרי טהרתו׃³⁶ וראהו הכהן והנה פשׂה הנתק בעור לא יבקר הכהן לשׂער הצהב טמא הוא׃³⁷ ואם בעיניו עמד הנתק ושׂער שׁחר צמח בו נרפא הנתק טהור הוא וטהרו הכהן׃³⁸ ואישׁ או אשׁה כי יהיה בעור בשׂרם בהרת בהרת לבנת׃³⁹ וראה הכהן והנה בעור בשׂרם בהרת כהות לבנת בהק הוא פרח בעור טהור הוא׃⁴⁰ ואישׁ כי ימרט ראשׁו קרח הוא טהור הוא׃⁴¹ ואם מפאת פניו ימרט ראשׁו גבח הוא טהור הוא׃⁴² וכי יהיה בקרחת או בגבחת נגע לבן אדמדם צרעת פרחת הוא בקרחתו או בגבחתו׃⁴³ וראה אתו הכהן והנה שׂאת הנגע לבנה אדמדמת בקרחתו או בגבחתו כמראה צרעת עור בשׂר׃⁴⁴ אישׁ צרוע הוא טמא הוא טמא יטמאנו הכהן בראשׁו נגעו׃⁴⁵ והצרוע אשׁר בו הנגע בגדיו יהיו פרמים וראשׁו יהיה פרוע ועל שׂפם יעטה וטמא טמא יקרא׃⁴⁶ כל ימי אשׁר הנגע בו יטמא טמא הוא בדד ישׁב מחוץ למחנה מושׁבו׃

Deuteronomy 24:9

⁹ זכור את אשׁר עשׂה יהוה אלהיך למרים בדרך בצאתכם ממצרים׃

2 Kings 5:27

²⁷ וצרעת נעמן תדבק בך ובזרעך לעולם ויצא מלפניו מצרע כשׁלג׃

2 Kings 15:5

⁵ וינגע יהוה את המלך ויהי מצרע עד יום מתו וישׁב בבית החפשׁית ויותם בן המלך על הבית שׁפט את עם הארץ׃

2 Chronicles 26:19-21

¹⁹ ויזעף עזיהו ובידו מקטרת להקטיר ובזעפו עם הכהנים והצרעת זרחה במצחו לפני הכהנים בבית יהוה מעל למזבח הקטרת׃²⁰ ויפן אליו עזריהו כהן הראשׁ וכל הכהנים והנה הוא מצרע במצחו ויבהלוהו משׁם וגם הוא נדחף לצאת כי נגעו יהוה׃²¹ ויהי עזיהו המלך מצרע עד יום מותו וישׁב בית החפשׁות מצרע כי נגזר מבית יהוה ויותם בנו על בית המלך שׁופט את עם הארץ׃

Ezekiel 10:4-5

⁴ וירם כבוד יהוה מעל הכרוב על מפתן הבית וימלא הבית את הענן והחצר מלאה את נגה כבוד יהוה׃⁵ וקול כנפי הכרובים נשׁמע עד החצר החיצנה כקול אל שׁדי בדברו׃

Ezekiel 10:18-19

¹⁸ ויצא כבוד יהוה מעל מפתן הבית ויעמד על הכרובים׃¹⁹ וישׂאו הכרובים את כנפיהם וירומו מן הארץ לעיני בצאתם והאופנים לעמתם ויעמד פתח שׁער בית יהוה הקדמוני וכבוד אלהי ישׂראל עליהם מלמעלה׃

Hosea 9:12

¹² כי אם יגדלו את בניהם ושׁכלתים מאדם כי גם אוי להם בשׂורי מהם׃

Exodus 12:32

³² גם צאנכם גם בקרכם קחו כאשׁר דברתם ולכו וברכתם גם אתי׃

1 Samuel 2:30

³⁰ לכן נאם יהוה אלהי ישׂראל אמור אמרתי ביתך ובית אביך יתהלכו לפני עד עולם ועתה נאם יהוה חלילה לי כי מכבדי אכבד ובזי יקלו׃

1 Samuel 12:19

¹⁹ ויאמרו כל העם אל שׁמואל התפלל בעד עבדיך אל יהוה אלהיך ואל נמות כי יספנו על כל חטאתינו רעה לשׁאל לנו מלך׃

1 Samuel 15:24-25

²⁴ ויאמר שׁאול אל שׁמואל חטאתי כי עברתי את פי יהוה ואת דבריך כי יראתי את העם ואשׁמע בקולם׃²⁵ ועתה שׂא נא את חטאתי ושׁוב עמי ואשׁתחוה ליהוה׃

2 Samuel 19:19

¹⁹ (19:20) ויאמר אל המלך אל יחשׁב לי אדני עון ואל תזכר את אשׁר העוה עבדך ביום אשׁר יצא אדני המלך מירושׁלם לשׂום המלך אל לבו׃

2 Samuel 24:10

¹⁰ ויך לב דוד אתו אחרי כן ספר את העם ויאמר דוד אל יהוה חטאתי מאד אשׁר עשׂיתי ועתה יהוה העבר נא את עון עבדך כי נסכלתי מאד׃

1 Kings 13:6

⁶ ויען המלך ויאמר אל אישׁ האלהים חל נא את פני יהוה אלהיך והתפלל בעדי ותשׁב ידי אלי ויחל אישׁ האלהים את פני יהוה ותשׁב יד המלך אליו ותהי כבראשׁנה׃

2 Chronicles 16:9

⁹ כי יהוה עיניו משׁטטות בכל הארץ להתחזק עם לבבם שׁלם אליו נסכלת על זאת כי מעתה ישׁ עמך מלחמות׃

Psalms 38:1-5

¹ מזמור לדוד להזכיר׃ (38:2) יהוה אל בקצפך תוכיחני ובחמתך תיסרני׃² (38:3) כי חציך נחתו בי ותנחת עלי ידך׃³ (38:4) אין מתם בבשׂרי מפני זעמך אין שׁלום בעצמי מפני חטאתי׃⁴ (38:5) כי עונתי עברו ראשׁי כמשׂא כבד יכבדו ממני׃⁵ (38:6) הבאישׁו נמקו חבורתי מפני אולתי׃

Proverbs 30:32

³² אם נבלת בהתנשׂא ואם זמות יד לפה׃

Jeremiah 42:2

² ויאמרו אל ירמיהו הנביא תפל נא תחנתנו לפניך והתפלל בעדנו אל יהוה אלהיך בעד כל השׁארית הזאת כי נשׁארנו מעט מהרבה כאשׁר עיניך ראות אתנו׃

Job 3:16

¹⁶ או כנפל טמון לא אהיה כעללים לא ראו אור׃

Psalms 58:8

⁸ (58:9) כמו שׁבלול תמס יהלך נפל אשׁת בל חזו שׁמשׁ׃

Psalms 88:4-5

⁴ (88:5) נחשׁבתי עם יורדי בור הייתי כגבר אין איל׃⁵ (88:6) במתים חפשׁי כמו חללים שׁכבי קבר אשׁר לא זכרתם עוד והמה מידך נגזרו׃

Exodus 32:10-14

¹⁰ ועתה הניחה לי ויחר אפי בהם ואכלם ואעשׂה אותך לגוי גדול׃¹¹ ויחל משׁה את פני יהוה אלהיו ויאמר למה יהוה יחרה אפך בעמך אשׁר הוצאת מארץ מצרים בכח גדול וביד חזקה׃¹² למה יאמרו מצרים לאמר ברעה הוציאם להרג אתם בהרים ולכלתם מעל פני האדמה שׁוב מחרון אפך והנחם על הרעה לעמך׃¹³ זכר לאברהם ליצחק ולישׂראל עבדיך אשׁר נשׁבעת להם בך ותדבר אלהם ארבה את זרעכם ככוכבי השׁמים וכל הארץ הזאת אשׁר אמרתי אתן לזרעכם ונחלו לעלם׃¹⁴ וינחם יהוה על הרעה אשׁר דבר לעשׂות לעמו׃

Numbers 14:2

² וילנו על משׁה ועל אהרן כל בני ישׂראל ויאמרו אלהם כל העדה לו מתנו בארץ מצרים או במדבר הזה לו מתנו׃

Numbers 14:13-20

¹³ ויאמר משׁה אל יהוה ושׁמעו מצרים כי העלית בכחך את העם הזה מקרבו׃¹⁴ ואמרו אל יושׁב הארץ הזאת שׁמעו כי אתה יהוה בקרב העם הזה אשׁר עין בעין נראה אתה יהוה ועננך עמד עלהם ובעמד ענן אתה הלך לפניהם יומם ובעמוד אשׁ לילה׃¹⁵ והמתה את העם הזה כאישׁ אחד ואמרו הגוים אשׁר שׁמעו את שׁמעך לאמר׃¹⁶ מבלתי יכלת יהוה להביא את העם הזה אל הארץ אשׁר נשׁבע להם וישׁחטם במדבר׃¹⁷ ועתה יגדל נא כח אדני כאשׁר דברת לאמר׃¹⁸ יהוה ארך אפים ורב חסד נשׂא עון ופשׁע ונקה לא ינקה פקד עון אבות על בנים על שׁלשׁים ועל רבעים׃¹⁹ סלח נא לעון העם הזה כגדל חסדך וכאשׁר נשׂאתה לעם הזה ממצרים ועד הנה׃²⁰ ויאמר יהוה סלחתי כדברך׃

Numbers 16:41

⁴¹ (17:6) וילנו כל עדת בני ישׂראל ממחרת על משׁה ועל אהרן לאמר אתם המתם את עם יהוה׃

Numbers 16:46-50

⁴⁶ (17:11) ויאמר משׁה אל אהרן קח את המחתה ותן עליה אשׁ מעל המזבח ושׂים קטרת והולך מהרה אל העדה וכפר עליהם כי יצא הקצף מלפני יהוה החל הנגף׃⁴⁷ (17:12) ויקח אהרן כאשׁר דבר משׁה וירץ אל תוך הקהל והנה החל הנגף בעם ויתן את הקטרת ויכפר על העם׃⁴⁸ (17:13) ויעמד בין המתים ובין החיים ותעצר המגפה׃⁴⁹ (17:14) ויהיו המתים במגפה ארבעה עשׂר אלף ושׁבע מאות מלבד המתים על דבר קרח׃⁵⁰ (17:15) וישׁב אהרן אל משׁה אל פתח אהל מועד והמגפה נעצרה׃