Numbers 7:2 Cross References - HOT

² ויקריבו נשׂיאי ישׂראל ראשׁי בית אבתם הם נשׂיאי המטת הם העמדים על הפקדים׃

Exodus 35:27

²⁷ והנשׂאם הביאו את אבני השׁהם ואת אבני המלאים לאפוד ולחשׁן׃

⁴ ואתכם יהיו אישׁ אישׁ למטה אישׁ ראשׁ לבית אבתיו הוא׃⁵ ואלה שׁמות האנשׁים אשׁר יעמדו אתכם לראובן אליצור בן שׁדיאור׃⁶ לשׁמעון שׁלמיאל בן צורישׁדי׃⁷ ליהודה נחשׁון בן עמינדב׃⁸ לישׂשכר נתנאל בן צוער׃⁹ לזבולן אליאב בן חלן׃¹⁰ לבני יוסף לאפרים אלישׁמע בן עמיהוד למנשׁה גמליאל בן פדהצור׃¹¹ לבנימן אבידן בן גדעני׃¹² לדן אחיעזר בן עמישׁדי׃¹³ לאשׁר פגעיאל בן עכרן׃¹⁴ לגד אליסף בן דעואל׃¹⁵ לנפתלי אחירע בן עינן׃¹⁶ אלה קריאי העדה נשׂיאי מטות אבותם ראשׁי אלפי ישׂראל הם׃

Numbers 2:1-34

¹ וידבר יהוה אל משׁה ואל אהרן לאמר׃² אישׁ על דגלו באתת לבית אבתם יחנו בני ישׂראל מנגד סביב לאהל מועד יחנו׃³ והחנים קדמה מזרחה דגל מחנה יהודה לצבאתם ונשׂיא לבני יהודה נחשׁון בן עמינדב׃⁴ וצבאו ופקדיהם ארבעה ושׁבעים אלף ושׁשׁ מאות׃⁵ והחנים עליו מטה ישׂשכר ונשׂיא לבני ישׂשכר נתנאל בן צוער׃⁶ וצבאו ופקדיו ארבעה וחמשׁים אלף וארבע מאות׃⁷ מטה זבולן ונשׂיא לבני זבולן אליאב בן חלן׃⁸ וצבאו ופקדיו שׁבעה וחמשׁים אלף וארבע מאות׃⁹ כל הפקדים למחנה יהודה מאת אלף ושׁמנים אלף ושׁשׁת אלפים וארבע מאות לצבאתם ראשׁנה יסעו׃¹⁰ דגל מחנה ראובן תימנה לצבאתם ונשׂיא לבני ראובן אליצור בן שׁדיאור׃¹¹ וצבאו ופקדיו שׁשׁה וארבעים אלף וחמשׁ מאות׃¹² והחונם עליו מטה שׁמעון ונשׂיא לבני שׁמעון שׁלמיאל בן צורי שׁדי׃¹³ וצבאו ופקדיהם תשׁעה וחמשׁים אלף ושׁלשׁ מאות׃¹⁴ ומטה גד ונשׂיא לבני גד אליסף בן רעואל׃¹⁵ וצבאו ופקדיהם חמשׁה וארבעים אלף ושׁשׁ מאות וחמשׁים׃¹⁶ כל הפקדים למחנה ראובן מאת אלף ואחד וחמשׁים אלף וארבע מאות וחמשׁים לצבאתם ושׁנים יסעו׃¹⁷ ונסע אהל מועד מחנה הלוים בתוך המחנת כאשׁר יחנו כן יסעו אישׁ על ידו לדגליהם׃¹⁸ דגל מחנה אפרים לצבאתם ימה ונשׂיא לבני אפרים אלישׁמע בן עמיהוד׃¹⁹ וצבאו ופקדיהם ארבעים אלף וחמשׁ מאות׃²⁰ ועליו מטה מנשׁה ונשׂיא לבני מנשׁה גמליאל בן פדהצור׃²¹ וצבאו ופקדיהם שׁנים ושׁלשׁים אלף ומאתים׃²² ומטה בנימן ונשׂיא לבני בנימן אבידן בן גדעני׃²³ וצבאו ופקדיהם חמשׁה ושׁלשׁים אלף וארבע מאות׃²⁴ כל הפקדים למחנה אפרים מאת אלף ושׁמנת אלפים ומאה לצבאתם ושׁלשׁים יסעו׃²⁵ דגל מחנה דן צפנה לצבאתם ונשׂיא לבני דן אחיעזר בן עמישׁדי׃²⁶ וצבאו ופקדיהם שׁנים ושׁשׁים אלף ושׁבע מאות׃²⁷ והחנים עליו מטה אשׁר ונשׂיא לבני אשׁר פגעיאל בן עכרן׃²⁸ וצבאו ופקדיהם אחד וארבעים אלף וחמשׁ מאות׃²⁹ ומטה נפתלי ונשׂיא לבני נפתלי אחירע בן עינן׃³⁰ וצבאו ופקדיהם שׁלשׁה וחמשׁים אלף וארבע מאות׃³¹ כל הפקדים למחנה דן מאת אלף ושׁבעה וחמשׁים אלף ושׁשׁ מאות לאחרנה יסעו לדגליהם׃³² אלה פקודי בני ישׂראל לבית אבתם כל פקודי המחנת לצבאתם שׁשׁ מאות אלף ושׁלשׁת אלפים וחמשׁ מאות וחמשׁים׃³³ והלוים לא התפקדו בתוך בני ישׂראל כאשׁר צוה יהוה את משׁה׃³⁴ ויעשׂו בני ישׂראל ככל אשׁר צוה יהוה את משׁה כן חנו לדגליהם וכן נסעו אישׁ למשׁפחתיו על בית אבתיו׃

Numbers 10:1-36

¹ וידבר יהוה אל משׁה לאמר׃² עשׂה לך שׁתי חצוצרת כסף מקשׁה תעשׂה אתם והיו לך למקרא העדה ולמסע את המחנות׃³ ותקעו בהן ונועדו אליך כל העדה אל פתח אהל מועד׃⁴ ואם באחת יתקעו ונועדו אליך הנשׂיאים ראשׁי אלפי ישׂראל׃⁵ ותקעתם תרועה ונסעו המחנות החנים קדמה׃⁶ ותקעתם תרועה שׁנית ונסעו המחנות החנים תימנה תרועה יתקעו למסעיהם׃⁷ ובהקהיל את הקהל תתקעו ולא תריעו׃⁸ ובני אהרן הכהנים יתקעו בחצצרות והיו לכם לחקת עולם לדרתיכם׃⁹ וכי תבאו מלחמה בארצכם על הצר הצרר אתכם והרעתם בחצצרת ונזכרתם לפני יהוה אלהיכם ונושׁעתם מאיביכם׃¹⁰ וביום שׂמחתכם ובמועדיכם ובראשׁי חדשׁכם ותקעתם בחצצרת על עלתיכם ועל זבחי שׁלמיכם והיו לכם לזכרון לפני אלהיכם אני יהוה אלהיכם׃¹¹ ויהי בשׁנה השׁנית בחדשׁ השׁני בעשׂרים בחדשׁ נעלה הענן מעל משׁכן העדת׃¹² ויסעו בני ישׂראל למסעיהם ממדבר סיני וישׁכן הענן במדבר פארן׃¹³ ויסעו בראשׁנה על פי יהוה ביד משׁה׃¹⁴ ויסע דגל מחנה בני יהודה בראשׁנה לצבאתם ועל צבאו נחשׁון בן עמינדב׃¹⁵ ועל צבא מטה בני ישׂשכר נתנאל בן צוער׃¹⁶ ועל צבא מטה בני זבולן אליאב בן חלן׃¹⁷ והורד המשׁכן ונסעו בני גרשׁון ובני מררי נשׂאי המשׁכן׃¹⁸ ונסע דגל מחנה ראובן לצבאתם ועל צבאו אליצור בן שׁדיאור׃¹⁹ ועל צבא מטה בני שׁמעון שׁלמיאל בן צורי שׁדי׃²⁰ ועל צבא מטה בני גד אליסף בן דעואל׃²¹ ונסעו הקהתים נשׂאי המקדשׁ והקימו את המשׁכן עד באם׃²² ונסע דגל מחנה בני אפרים לצבאתם ועל צבאו אלישׁמע בן עמיהוד׃²³ ועל צבא מטה בני מנשׁה גמליאל בן פדהצור׃²⁴ ועל צבא מטה בני בנימן אבידן בן גדעוני׃²⁵ ונסע דגל מחנה בני דן מאסף לכל המחנת לצבאתם ועל צבאו אחיעזר בן עמישׁדי׃²⁶ ועל צבא מטה בני אשׁר פגעיאל בן עכרן׃²⁷ ועל צבא מטה בני נפתלי אחירע בן עינן׃²⁸ אלה מסעי בני ישׂראל לצבאתם ויסעו׃²⁹ ויאמר משׁה לחבב בן רעואל המדיני חתן משׁה נסעים אנחנו אל המקום אשׁר אמר יהוה אתו אתן לכם לכה אתנו והטבנו לך כי יהוה דבר טוב על ישׂראל׃³⁰ ויאמר אליו לא אלך כי אם אל ארצי ואל מולדתי אלך׃³¹ ויאמר אל נא תעזב אתנו כי על כן ידעת חנתנו במדבר והיית לנו לעינים׃³² והיה כי תלך עמנו והיה הטוב ההוא אשׁר ייטיב יהוה עמנו והטבנו׃³³ ויסעו מהר יהוה דרך שׁלשׁת ימים וארון ברית יהוה נסע לפניהם דרך שׁלשׁת ימים לתור להם מנוחה׃³⁴ וענן יהוה עליהם יומם בנסעם מן המחנה׃³⁵ ויהי בנסע הארן ויאמר משׁה קומה יהוה ויפצו איביך וינסו משׂנאיך מפניך׃³⁶ ובנחה יאמר שׁובה יהוה רבבות אלפי ישׂראל׃

1 Chronicles 29:6-8

⁶ ויתנדבו שׂרי האבות ושׂרי שׁבטי ישׂראל ושׂרי האלפים והמאות ולשׂרי מלאכת המלך׃⁷ ויתנו לעבודת בית האלהים זהב ככרים חמשׁת אלפים ואדרכנים רבו וכסף ככרים עשׂרת אלפים ונחשׁת רבו ושׁמונת אלפים ככרים וברזל מאה אלף ככרים׃⁸ והנמצא אתו אבנים נתנו לאוצר בית יהוה על יד יחיאל הגרשׁני׃

2 Chronicles 35:8

⁸ ושׂריו לנדבה לעם לכהנים וללוים הרימו חלקיה וזכריהו ויחיאל נגידי בית האלהים לכהנים נתנו לפסחים אלפים ושׁשׁ מאות ובקר שׁלשׁ מאות׃

Ezra 2:68-69

⁶⁸ ומראשׁי האבות בבואם לבית יהוה אשׁר בירושׁלם התנדבו לבית האלהים להעמידו על מכונו׃⁶⁹ ככחם נתנו לאוצר המלאכה זהב דרכמונים שׁשׁ רבאות ואלף וכסף מנים חמשׁת אלפים וכתנת כהנים מאה׃

Nehemiah 7:70-72

⁷⁰ (7:69) ומקצת ראשׁי האבות נתנו למלאכה התרשׁתא נתן לאוצר זהב דרכמנים אלף מזרקות חמשׁים כתנות כהנים שׁלשׁים וחמשׁ מאות׃⁷¹ (7:70) ומראשׁי האבות נתנו לאוצר המלאכה זהב דרכמונים שׁתי רבות וכסף מנים אלפים ומאתים׃⁷² (7:71) ואשׁר נתנו שׁארית העם זהב דרכמונים שׁתי רבוא וכסף מנים אלפים וכתנת כהנים שׁשׁים ושׁבעה׃