Psalms 19:2 Cross References - HOT

2 (19:3) יום ליום יביע אמר ולילה ללילה יחוה דעת׃

Genesis 1:17-18

17 ויתן אתם אלהים ברקיע השׁמים להאיר על הארץ׃18 ולמשׁל ביום ובלילה ולהבדיל בין האור ובין החשׁך וירא אלהים כי טוב׃

Genesis 8:22

22 עד כל ימי הארץ זרע וקציר וקר וחם וקיץ וחרף ויום ולילה לא ישׁבתו׃

Exodus 15:20-21

20 ותקח מרים הנביאה אחות אהרן את התף בידה ותצאן כל הנשׁים אחריה בתפים ובמחלת׃21 ותען להם מרים שׁירו ליהוה כי גאה גאה סוס ורכבו רמה בים׃

Psalms 24:7-10

7 שׂאו שׁערים ראשׁיכם והנשׂאו פתחי עולם ויבוא מלך הכבוד׃8 מי זה מלך הכבוד יהוה עזוז וגבור יהוה גבור מלחמה׃9 שׂאו שׁערים ראשׁיכם ושׂאו פתחי עולם ויבא מלך הכבוד׃10 מי הוא זה מלך הכבוד יהוה צבאות הוא מלך הכבוד סלה׃

Psalms 74:16

16 לך יום אף לך לילה אתה הכינות מאור ושׁמשׁ׃

Psalms 78:3-6

3 אשׁר שׁמענו ונדעם ואבותינו ספרו׃4 לא נכחד מבניהם לדור אחרון מספרים תהלות יהוה ועזוזו ונפלאותיו אשׁר עשׂה׃5 ויקם עדות ביעקב ותורה שׂם בישׂראל אשׁר צוה את אבותינו להודיעם לבניהם׃6 למען ידעו דור אחרון בנים יולדו יקמו ויספרו לבניהם׃

Psalms 134:1-3

1 שׁיר המעלות הנה ברכו את יהוה כל עבדי יהוה העמדים בבית יהוה בלילות׃2 שׂאו ידכם קדשׁ וברכו את יהוה׃3 יברכך יהוה מציון עשׂה שׁמים וארץ׃

Psalms 136:8-9

8 את השׁמשׁ לממשׁלת ביום כי לעולם חסדו׃9 את הירח וכוכבים לממשׁלות בלילה כי לעולם חסדו׃

Psalms 148:12

12 בחורים וגם בתולות זקנים עם נערים׃

Isaiah 38:19

19 חי חי הוא יודך כמוני היום אב לבנים יודיע אל אמתך׃

Cross Reference data is from OpenBible.info, retrieved June 28, 2010, and licensed under a Creative Commons Attribution License.