Psalms 78:12 Cross References - HOT

¹² נגד אבותם עשׂה פלא בארץ מצרים שׂדה צען׃

Genesis 32:3

³ (32:4) וישׁלח יעקב מלאכים לפניו אל עשׂו אחיו ארצה שׂעיר שׂדה אדום׃

¹ ויאמר יהוה אל משׁה ראה נתתיך אלהים לפרעה ואהרן אחיך יהיה נביאך׃² אתה תדבר את כל אשׁר אצוך ואהרן אחיך ידבר אל פרעה ושׁלח את בני ישׂראל מארצו׃³ ואני אקשׁה את לב פרעה והרביתי את אתתי ואת מופתי בארץ מצרים׃⁴ ולא ישׁמע אלכם פרעה ונתתי את ידי במצרים והוצאתי את צבאתי את עמי בני ישׂראל מארץ מצרים בשׁפטים גדלים׃⁵ וידעו מצרים כי אני יהוה בנטתי את ידי על מצרים והוצאתי את בני ישׂראל מתוכם׃⁶ ויעשׂ משׁה ואהרן כאשׁר צוה יהוה אתם כן עשׂו׃⁷ ומשׁה בן שׁמנים שׁנה ואהרן בן שׁלשׁ ושׁמנים שׁנה בדברם אל פרעה׃⁸ ויאמר יהוה אל משׁה ואל אהרן לאמר׃⁹ כי ידבר אלכם פרעה לאמר תנו לכם מופת ואמרת אל אהרן קח את מטך והשׁלך לפני פרעה יהי לתנין׃¹⁰ ויבא משׁה ואהרן אל פרעה ויעשׂו כן כאשׁר צוה יהוה וישׁלך אהרן את מטהו לפני פרעה ולפני עבדיו ויהי לתנין׃¹¹ ויקרא גם פרעה לחכמים ולמכשׁפים ויעשׂו גם הם חרטמי מצרים בלהטיהם כן׃¹² וישׁליכו אישׁ מטהו ויהיו לתנינם ויבלע מטה אהרן את מטתם׃¹³ ויחזק לב פרעה ולא שׁמע אלהם כאשׁר דבר יהוה׃¹⁴ ויאמר יהוה אל משׁה כבד לב פרעה מאן לשׁלח העם׃¹⁵ לך אל פרעה בבקר הנה יצא המימה ונצבת לקראתו על שׂפת היאר והמטה אשׁר נהפך לנחשׁ תקח בידך׃¹⁶ ואמרת אליו יהוה אלהי העברים שׁלחני אליך לאמר שׁלח את עמי ויעבדני במדבר והנה לא שׁמעת עד כה׃¹⁷ כה אמר יהוה בזאת תדע כי אני יהוה הנה אנכי מכה במטה אשׁר בידי על המים אשׁר ביאר ונהפכו לדם׃¹⁸ והדגה אשׁר ביאר תמות ובאשׁ היאר ונלאו מצרים לשׁתות מים מן היאר׃¹⁹ ויאמר יהוה אל משׁה אמר אל אהרן קח מטך ונטה ידך על מימי מצרים על נהרתם על יאריהם ועל אגמיהם ועל כל מקוה מימיהם ויהיו דם והיה דם בכל ארץ מצרים ובעצים ובאבנים׃²⁰ ויעשׂו כן משׁה ואהרן כאשׁר צוה יהוה וירם במטה ויך את המים אשׁר ביאר לעיני פרעה ולעיני עבדיו ויהפכו כל המים אשׁר ביאר לדם׃²¹ והדגה אשׁר ביאר מתה ויבאשׁ היאר ולא יכלו מצרים לשׁתות מים מן היאר ויהי הדם בכל ארץ מצרים׃²² ויעשׂו כן חרטמי מצרים בלטיהם ויחזק לב פרעה ולא שׁמע אלהם כאשׁר דבר יהוה׃²³ ויפן פרעה ויבא אל ביתו ולא שׁת לבו גם לזאת׃²⁴ ויחפרו כל מצרים סביבת היאר מים לשׁתות כי לא יכלו לשׁתת ממימי היאר׃²⁵ וימלא שׁבעת ימים אחרי הכות יהוה את היאר׃

Exodus 8:1-12:51

¹ (7:26) ויאמר יהוה אל משׁה בא אל פרעה ואמרת אליו כה אמר יהוה שׁלח את עמי ויעבדני׃² (7:27) ואם מאן אתה לשׁלח הנה אנכי נגף את כל גבולך בצפרדעים׃³ (7:28) ושׁרץ היאר צפרדעים ועלו ובאו בביתך ובחדר משׁכבך ועל מטתך ובבית עבדיך ובעמך ובתנוריך ובמשׁארותיך׃⁴ (7:29) ובכה ובעמך ובכל עבדיך יעלו הצפרדעים׃⁵ (8:1) ויאמר יהוה אל משׁה אמר אל אהרן נטה את ידך במטך על הנהרת על היארים ועל האגמים והעל את הצפרדעים על ארץ מצרים׃⁶ (8:2) ויט אהרן את ידו על מימי מצרים ותעל הצפרדע ותכס את ארץ מצרים׃⁷ (8:3) ויעשׂו כן החרטמים בלטיהם ויעלו את הצפרדעים על ארץ מצרים׃⁸ (8:4) ויקרא פרעה למשׁה ולאהרן ויאמר העתירו אל יהוה ויסר הצפרדעים ממני ומעמי ואשׁלחה את העם ויזבחו ליהוה׃⁹ (8:5) ויאמר משׁה לפרעה התפאר עלי למתי אעתיר לך ולעבדיך ולעמך להכרית הצפרדעים ממך ומבתיך רק ביאר תשׁארנה׃¹⁰ (8:6) ויאמר למחר ויאמר כדברך למען תדע כי אין כיהוה אלהינו׃¹¹ (8:7) וסרו הצפרדעים ממך ומבתיך ומעבדיך ומעמך רק ביאר תשׁארנה׃¹² (8:8) ויצא משׁה ואהרן מעם פרעה ויצעק משׁה אל יהוה על דבר הצפרדעים אשׁר שׂם לפרעה׃¹³ (8:9) ויעשׂ יהוה כדבר משׁה וימתו הצפרדעים מן הבתים מן החצרת ומן השׂדת׃¹⁴ (8:10) ויצברו אתם חמרם חמרם ותבאשׁ הארץ׃¹⁵ (8:11) וירא פרעה כי היתה הרוחה והכבד את לבו ולא שׁמע אלהם כאשׁר דבר יהוה׃¹⁶ (8:12) ויאמר יהוה אל משׁה אמר אל אהרן נטה את מטך והך את עפר הארץ והיה לכנם בכל ארץ מצרים׃¹⁷ (8:13) ויעשׂו כן ויט אהרן את ידו במטהו ויך את עפר הארץ ותהי הכנם באדם ובבהמה כל עפר הארץ היה כנים בכל ארץ מצרים׃¹⁸ (8:14) ויעשׂו כן החרטמים בלטיהם להוציא את הכנים ולא יכלו ותהי הכנם באדם ובבהמה׃¹⁹ (8:15) ויאמרו החרטמם אל פרעה אצבע אלהים הוא ויחזק לב פרעה ולא שׁמע אלהם כאשׁר דבר יהוה׃²⁰ (8:16) ויאמר יהוה אל משׁה השׁכם בבקר והתיצב לפני פרעה הנה יוצא המימה ואמרת אליו כה אמר יהוה שׁלח עמי ויעבדני׃²¹ (8:17) כי אם אינך משׁלח את עמי הנני משׁליח בך ובעבדיך ובעמך ובבתיך את הערב ומלאו בתי מצרים את הערב וגם האדמה אשׁר הם עליה׃²² (8:18) והפליתי ביום ההוא את ארץ גשׁן אשׁר עמי עמד עליה לבלתי היות שׁם ערב למען תדע כי אני יהוה בקרב הארץ׃²³ (8:19) ושׂמתי פדת בין עמי ובין עמך למחר יהיה האת הזה׃²⁴ (8:20) ויעשׂ יהוה כן ויבא ערב כבד ביתה פרעה ובית עבדיו ובכל ארץ מצרים תשׁחת הארץ מפני הערב׃²⁵ (8:21) ויקרא פרעה אל משׁה ולאהרן ויאמר לכו זבחו לאלהיכם בארץ׃²⁶ (8:22) ויאמר משׁה לא נכון לעשׂות כן כי תועבת מצרים נזבח ליהוה אלהינו הן נזבח את תועבת מצרים לעיניהם ולא יסקלנו׃²⁷ (8:23) דרך שׁלשׁת ימים נלך במדבר וזבחנו ליהוה אלהינו כאשׁר יאמר אלינו׃²⁸ (8:24) ויאמר פרעה אנכי אשׁלח אתכם וזבחתם ליהוה אלהיכם במדבר רק הרחק לא תרחיקו ללכת העתירו בעדי׃²⁹ (8:25) ויאמר משׁה הנה אנכי יוצא מעמך והעתרתי אל יהוה וסר הערב מפרעה מעבדיו ומעמו מחר רק אל יסף פרעה התל לבלתי שׁלח את העם לזבח ליהוה׃³⁰ (8:26) ויצא משׁה מעם פרעה ויעתר אל יהוה׃³¹ (8:27) ויעשׂ יהוה כדבר משׁה ויסר הערב מפרעה מעבדיו ומעמו לא נשׁאר אחד׃³² (8:28) ויכבד פרעה את לבו גם בפעם הזאת ולא שׁלח את העם׃

Exodus 9:1-12:51

¹ ויאמר יהוה אל משׁה בא אל פרעה ודברת אליו כה אמר יהוה אלהי העברים שׁלח את עמי ויעבדני׃² כי אם מאן אתה לשׁלח ועודך מחזיק׃³ הנה יד יהוה הויה במקנך אשׁר בשׂדה בסוסים בחמרים בגמלים בבקר ובצאן דבר כבד מאד׃⁴ והפלה יהוה בין מקנה ישׂראל ובין מקנה מצרים ולא ימות מכל לבני ישׂראל דבר׃⁵ וישׂם יהוה מועד לאמר מחר יעשׂה יהוה הדבר הזה בארץ׃⁶ ויעשׂ יהוה את הדבר הזה ממחרת וימת כל מקנה מצרים וממקנה בני ישׂראל לא מת אחד׃⁷ וישׁלח פרעה והנה לא מת ממקנה ישׂראל עד אחד ויכבד לב פרעה ולא שׁלח את העם׃⁸ ויאמר יהוה אל משׁה ואל אהרן קחו לכם מלא חפניכם פיח כבשׁן וזרקו משׁה השׁמימה לעיני פרעה׃⁹ והיה לאבק על כל ארץ מצרים והיה על האדם ועל הבהמה לשׁחין פרח אבעבעת בכל ארץ מצרים׃¹⁰ ויקחו את פיח הכבשׁן ויעמדו לפני פרעה ויזרק אתו משׁה השׁמימה ויהי שׁחין אבעבעת פרח באדם ובבהמה׃¹¹ ולא יכלו החרטמים לעמד לפני משׁה מפני השׁחין כי היה השׁחין בחרטמם ובכל מצרים׃¹² ויחזק יהוה את לב פרעה ולא שׁמע אלהם כאשׁר דבר יהוה אל משׁה׃¹³ ויאמר יהוה אל משׁה השׁכם בבקר והתיצב לפני פרעה ואמרת אליו כה אמר יהוה אלהי העברים שׁלח את עמי ויעבדני׃¹⁴ כי בפעם הזאת אני שׁלח את כל מגפתי אל לבך ובעבדיך ובעמך בעבור תדע כי אין כמני בכל הארץ׃¹⁵ כי עתה שׁלחתי את ידי ואך אותך ואת עמך בדבר ותכחד מן הארץ׃¹⁶ ואולם בעבור זאת העמדתיך בעבור הראתך את כחי ולמען ספר שׁמי בכל הארץ׃¹⁷ עודך מסתולל בעמי לבלתי שׁלחם׃¹⁸ הנני ממטיר כעת מחר ברד כבד מאד אשׁר לא היה כמהו במצרים למן היום הוסדה ועד עתה׃¹⁹ ועתה שׁלח העז את מקנך ואת כל אשׁר לך בשׂדה כל האדם והבהמה אשׁר ימצא בשׂדה ולא יאסף הביתה וירד עלהם הברד ומתו׃²⁰ הירא את דבר יהוה מעבדי פרעה הניס את עבדיו ואת מקנהו אל הבתים׃²¹ ואשׁר לא שׂם לבו אל דבר יהוה ויעזב את עבדיו ואת מקנהו בשׂדה׃²² ויאמר יהוה אל משׁה נטה את ידך על השׁמים ויהי ברד בכל ארץ מצרים על האדם ועל הבהמה ועל כל עשׂב השׂדה בארץ מצרים׃²³ ויט משׁה את מטהו על השׁמים ויהוה נתן קלת וברד ותהלך אשׁ ארצה וימטר יהוה ברד על ארץ מצרים׃²⁴ ויהי ברד ואשׁ מתלקחת בתוך הברד כבד מאד אשׁר לא היה כמהו בכל ארץ מצרים מאז היתה לגוי׃²⁵ ויך הברד בכל ארץ מצרים את כל אשׁר בשׂדה מאדם ועד בהמה ואת כל עשׂב השׂדה הכה הברד ואת כל עץ השׂדה שׁבר׃²⁶ רק בארץ גשׁן אשׁר שׁם בני ישׂראל לא היה ברד׃²⁷ וישׁלח פרעה ויקרא למשׁה ולאהרן ויאמר אלהם חטאתי הפעם יהוה הצדיק ואני ועמי הרשׁעים׃²⁸ העתירו אל יהוה ורב מהית קלת אלהים וברד ואשׁלחה אתכם ולא תספון לעמד׃²⁹ ויאמר אליו משׁה כצאתי את העיר אפרשׂ את כפי אל יהוה הקלות יחדלון והברד לא יהיה עוד למען תדע כי ליהוה הארץ׃³⁰ ואתה ועבדיך ידעתי כי טרם תיראון מפני יהוה אלהים׃³¹ והפשׁתה והשׂערה נכתה כי השׂערה אביב והפשׁתה גבעל׃³² והחטה והכסמת לא נכו כי אפילת הנה׃³³ ויצא משׁה מעם פרעה את העיר ויפרשׂ כפיו אל יהוה ויחדלו הקלות והברד ומטר לא נתך ארצה׃³⁴ וירא פרעה כי חדל המטר והברד והקלת ויסף לחטא ויכבד לבו הוא ועבדיו׃³⁵ ויחזק לב פרעה ולא שׁלח את בני ישׂראל כאשׁר דבר יהוה ביד משׁה׃

Exodus 10:1-12:51

¹ ויאמר יהוה אל משׁה בא אל פרעה כי אני הכבדתי את לבו ואת לב עבדיו למען שׁתי אתתי אלה בקרבו׃² ולמען תספר באזני בנך ובן בנך את אשׁר התעללתי במצרים ואת אתתי אשׁר שׂמתי בם וידעתם כי אני יהוה׃³ ויבא משׁה ואהרן אל פרעה ויאמרו אליו כה אמר יהוה אלהי העברים עד מתי מאנת לענת מפני שׁלח עמי ויעבדני׃⁴ כי אם מאן אתה לשׁלח את עמי הנני מביא מחר ארבה בגבלך׃⁵ וכסה את עין הארץ ולא יוכל לראת את הארץ ואכל את יתר הפלטה הנשׁארת לכם מן הברד ואכל את כל העץ הצמח לכם מן השׂדה׃⁶ ומלאו בתיך ובתי כל עבדיך ובתי כל מצרים אשׁר לא ראו אבתיך ואבות אבתיך מיום היותם על האדמה עד היום הזה ויפן ויצא מעם פרעה׃⁷ ויאמרו עבדי פרעה אליו עד מתי יהיה זה לנו למוקשׁ שׁלח את האנשׁים ויעבדו את יהוה אלהיהם הטרם תדע כי אבדה מצרים׃⁸ ויושׁב את משׁה ואת אהרן אל פרעה ויאמר אלהם לכו עבדו את יהוה אלהיכם מי ומי ההלכים׃⁹ ויאמר משׁה בנערינו ובזקנינו נלך בבנינו ובבנותנו בצאננו ובבקרנו נלך כי חג יהוה׃¹⁰ ויאמר אלהם יהי כן יהוה עמכם כאשׁר אשׁלח אתכם ואת טפכם ראו כי רעה נגד פניכם׃¹¹ לא כן לכו נא הגברים ועבדו את יהוה כי אתה אתם מבקשׁים ויגרשׁ אתם מאת פני פרעה׃¹² ויאמר יהוה אל משׁה נטה ידך על ארץ מצרים בארבה ויעל על ארץ מצרים ויאכל את כל עשׂב הארץ את כל אשׁר השׁאיר הברד׃¹³ ויט משׁה את מטהו על ארץ מצרים ויהוה נהג רוח קדים בארץ כל היום ההוא וכל הלילה הבקר היה ורוח הקדים נשׂא את הארבה׃¹⁴ ויעל הארבה על כל ארץ מצרים וינח בכל גבול מצרים כבד מאד לפניו לא היה כן ארבה כמהו ואחריו לא יהיה כן׃¹⁵ ויכס את עין כל הארץ ותחשׁך הארץ ויאכל את כל עשׂב הארץ ואת כל פרי העץ אשׁר הותיר הברד ולא נותר כל ירק בעץ ובעשׂב השׂדה בכל ארץ מצרים׃¹⁶ וימהר פרעה לקרא למשׁה ולאהרן ויאמר חטאתי ליהוה אלהיכם׃¹⁷ ועתה שׂא נא חטאתי אך הפעם והעתירו ליהוה אלהיכם ויסר מעלי רק את המות הזה׃¹⁸ ויצא מעם פרעה ויעתר אל יהוה׃¹⁹ ויהפך יהוה רוח ים חזק מאד וישׂא את הארבה ויתקעהו ימה סוף לא נשׁאר ארבה אחד בכל גבול מצרים׃²⁰ ויחזק יהוה את לב פרעה ולא שׁלח את בני ישׂראל׃²¹ ויאמר יהוה אל משׁה נטה ידך על השׁמים ויהי חשׁך על ארץ מצרים וימשׁ חשׁך׃²² ויט משׁה את ידו על השׁמים ויהי חשׁך אפלה בכל ארץ מצרים שׁלשׁת ימים׃²³ לא ראו אישׁ את אחיו ולא קמו אישׁ מתחתיו שׁלשׁת ימים ולכל בני ישׂראל היה אור במושׁבתם׃²⁴ ויקרא פרעה אל משׁה ויאמר לכו עבדו את יהוה רק צאנכם ובקרכם יצג גם טפכם ילך עמכם׃²⁵ ויאמר משׁה גם אתה תתן בידנו זבחים ועלת ועשׂינו ליהוה אלהינו׃²⁶ וגם מקננו ילך עמנו לא תשׁאר פרסה כי ממנו נקח לעבד את יהוה אלהינו ואנחנו לא נדע מה נעבד את יהוה עד באנו שׁמה׃²⁷ ויחזק יהוה את לב פרעה ולא אבה לשׁלחם׃²⁸ ויאמר לו פרעה לך מעלי השׁמר לך אל תסף ראות פני כי ביום ראתך פני תמות׃²⁹ ויאמר משׁה כן דברת לא אסף עוד ראות פניך׃

Exodus 11:1-12:51

¹ ויאמר יהוה אל משׁה עוד נגע אחד אביא על פרעה ועל מצרים אחרי כן ישׁלח אתכם מזה כשׁלחו כלה גרשׁ יגרשׁ אתכם מזה׃² דבר נא באזני העם וישׁאלו אישׁ מאת רעהו ואשׁה מאת רעותה כלי כסף וכלי זהב׃³ ויתן יהוה את חן העם בעיני מצרים גם האישׁ משׁה גדול מאד בארץ מצרים בעיני עבדי פרעה ובעיני העם׃⁴ ויאמר משׁה כה אמר יהוה כחצת הלילה אני יוצא בתוך מצרים׃⁵ ומת כל בכור בארץ מצרים מבכור פרעה הישׁב על כסאו עד בכור השׁפחה אשׁר אחר הרחים וכל בכור בהמה׃⁶ והיתה צעקה גדלה בכל ארץ מצרים אשׁר כמהו לא נהיתה וכמהו לא תסף׃⁷ ולכל בני ישׂראל לא יחרץ כלב לשׁנו למאישׁ ועד בהמה למען תדעון אשׁר יפלה יהוה בין מצרים ובין ישׂראל׃⁸ וירדו כל עבדיך אלה אלי והשׁתחוו לי לאמר צא אתה וכל העם אשׁר ברגליך ואחרי כן אצא ויצא מעם פרעה בחרי אף׃⁹ ויאמר יהוה אל משׁה לא ישׁמע אליכם פרעה למען רבות מופתי בארץ מצרים׃¹⁰ ומשׁה ואהרן עשׂו את כל המפתים האלה לפני פרעה ויחזק יהוה את לב פרעה ולא שׁלח את בני ישׂראל מארצו׃

Exodus 12:1-51

¹ ויאמר יהוה אל משׁה ואל אהרן בארץ מצרים לאמר׃² החדשׁ הזה לכם ראשׁ חדשׁים ראשׁון הוא לכם לחדשׁי השׁנה׃³ דברו אל כל עדת ישׂראל לאמר בעשׂר לחדשׁ הזה ויקחו להם אישׁ שׂה לבית אבת שׂה לבית׃⁴ ואם ימעט הבית מהיות משׂה ולקח הוא ושׁכנו הקרב אל ביתו במכסת נפשׁת אישׁ לפי אכלו תכסו על השׂה׃⁵ שׂה תמים זכר בן שׁנה יהיה לכם מן הכבשׂים ומן העזים תקחו׃⁶ והיה לכם למשׁמרת עד ארבעה עשׂר יום לחדשׁ הזה ושׁחטו אתו כל קהל עדת ישׂראל בין הערבים׃⁷ ולקחו מן הדם ונתנו על שׁתי המזוזת ועל המשׁקוף על הבתים אשׁר יאכלו אתו׃⁸ ואכלו את הבשׂר בלילה הזה צלי אשׁ ומצות על מררים יאכלהו׃⁹ אל תאכלו ממנו נא ובשׁל מבשׁל במים כי אם צלי אשׁ ראשׁו על כרעיו ועל קרבו׃¹⁰ ולא תותירו ממנו עד בקר והנתר ממנו עד בקר באשׁ תשׂרפו׃¹¹ וככה תאכלו אתו מתניכם חגרים נעליכם ברגליכם ומקלכם בידכם ואכלתם אתו בחפזון פסח הוא ליהוה׃¹² ועברתי בארץ מצרים בלילה הזה והכיתי כל בכור בארץ מצרים מאדם ועד בהמה ובכל אלהי מצרים אעשׂה שׁפטים אני יהוה׃¹³ והיה הדם לכם לאת על הבתים אשׁר אתם שׁם וראיתי את הדם ופסחתי עלכם ולא יהיה בכם נגף למשׁחית בהכתי בארץ מצרים׃¹⁴ והיה היום הזה לכם לזכרון וחגתם אתו חג ליהוה לדרתיכם חקת עולם תחגהו׃¹⁵ שׁבעת ימים מצות תאכלו אך ביום הראשׁון תשׁביתו שׂאר מבתיכם כי כל אכל חמץ ונכרתה הנפשׁ ההוא מישׂראל מיום הראשׁן עד יום השׁבעי׃¹⁶ וביום הראשׁון מקרא קדשׁ וביום השׁביעי מקרא קדשׁ יהיה לכם כל מלאכה לא יעשׂה בהם אך אשׁר יאכל לכל נפשׁ הוא לבדו יעשׂה׃¹⁷ ושׁמרתם את המצות כי בעצם היום הזה הוצאתי את צבאותיכם מארץ מצרים ושׁמרתם את היום הזה לדרתיכם חקת עולם׃¹⁸ בראשׁן בארבעה עשׂר יום לחדשׁ בערב תאכלו מצת עד יום האחד ועשׂרים לחדשׁ בערב׃¹⁹ שׁבעת ימים שׂאר לא ימצא בבתיכם כי כל אכל מחמצת ונכרתה הנפשׁ ההוא מעדת ישׂראל בגר ובאזרח הארץ׃²⁰ כל מחמצת לא תאכלו בכל מושׁבתיכם תאכלו מצות׃²¹ ויקרא משׁה לכל זקני ישׂראל ויאמר אלהם משׁכו וקחו לכם צאן למשׁפחתיכם ושׁחטו הפסח׃²² ולקחתם אגדת אזוב וטבלתם בדם אשׁר בסף והגעתם אל המשׁקוף ואל שׁתי המזוזת מן הדם אשׁר בסף ואתם לא תצאו אישׁ מפתח ביתו עד בקר׃²³ ועבר יהוה לנגף את מצרים וראה את הדם על המשׁקוף ועל שׁתי המזוזת ופסח יהוה על הפתח ולא יתן המשׁחית לבא אל בתיכם לנגף׃²⁴ ושׁמרתם את הדבר הזה לחק לך ולבניך עד עולם׃²⁵ והיה כי תבאו אל הארץ אשׁר יתן יהוה לכם כאשׁר דבר ושׁמרתם את העבדה הזאת׃²⁶ והיה כי יאמרו אליכם בניכם מה העבדה הזאת׃²⁷ ואמרתם זבח פסח הוא ליהוה אשׁר פסח על בתי בני ישׂראל במצרים בנגפו את מצרים ואת בתינו הציל ויקד העם וישׁתחוו׃²⁸ וילכו ויעשׂו בני ישׂראל כאשׁר צוה יהוה את משׁה ואהרן כן עשׂו׃²⁹ ויהי בחצי הלילה ויהוה הכה כל בכור בארץ מצרים מבכר פרעה הישׁב על כסאו עד בכור השׁבי אשׁר בבית הבור וכל בכור בהמה׃³⁰ ויקם פרעה לילה הוא וכל עבדיו וכל מצרים ותהי צעקה גדלה במצרים כי אין בית אשׁר אין שׁם מת׃³¹ ויקרא למשׁה ולאהרן לילה ויאמר קומו צאו מתוך עמי גם אתם גם בני ישׂראל ולכו עבדו את יהוה כדברכם׃³² גם צאנכם גם בקרכם קחו כאשׁר דברתם ולכו וברכתם גם אתי׃³³ ותחזק מצרים על העם למהר לשׁלחם מן הארץ כי אמרו כלנו מתים׃³⁴ וישׂא העם את בצקו טרם יחמץ משׁארתם צררת בשׂמלתם על שׁכמם׃³⁵ ובני ישׂראל עשׂו כדבר משׁה וישׁאלו ממצרים כלי כסף וכלי זהב ושׂמלת׃³⁶ ויהוה נתן את חן העם בעיני מצרים וישׁאלום וינצלו את מצרים׃³⁷ ויסעו בני ישׂראל מרעמסס סכתה כשׁשׁ מאות אלף רגלי הגברים לבד מטף׃³⁸ וגם ערב רב עלה אתם וצאן ובקר מקנה כבד מאד׃³⁹ ויאפו את הבצק אשׁר הוציאו ממצרים עגת מצות כי לא חמץ כי גרשׁו ממצרים ולא יכלו להתמהמה וגם צדה לא עשׂו׃⁴⁰ ומושׁב בני ישׂראל אשׁר ישׁבו במצרים שׁלשׁים שׁנה וארבע מאות שׁנה׃⁴¹ ויהי מקץ שׁלשׁים שׁנה וארבע מאות שׁנה ויהי בעצם היום הזה יצאו כל צבאות יהוה מארץ מצרים׃⁴² ליל שׁמרים הוא ליהוה להוציאם מארץ מצרים הוא הלילה הזה ליהוה שׁמרים לכל בני ישׂראל לדרתם׃⁴³ ויאמר יהוה אל משׁה ואהרן זאת חקת הפסח כל בן נכר לא יאכל׃⁴⁴ וכל עבד אישׁ מקנת כסף ומלתה אתו אז יאכל׃⁴⁵ תושׁב ושׂכיר לא יאכל׃⁴⁶ בבית אחד יאכל לא תוציא מן הבית מן הבשׂר חוצה ועצם לא תשׁברו׃⁴⁷ כל עדת ישׂראל יעשׂו אתו׃⁴⁸ וכי יגור אתך גר ועשׂה פסח ליהוה המול לו כל זכר ואז יקרב לעשׂתו והיה כאזרח הארץ וכל ערל לא יאכל׃⁴⁹ תורה אחת יהיה לאזרח ולגר הגר בתוככם׃⁵⁰ ויעשׂו כל בני ישׂראל כאשׁר צוה יהוה את משׁה ואת אהרן כן עשׂו׃⁵¹ ויהי בעצם היום הזה הוציא יהוה את בני ישׂראל מארץ מצרים על צבאתם׃

Numbers 13:22

²² ויעלו בנגב ויבא עד חברון ושׁם אחימן שׁשׁי ותלמי ילידי הענק וחברון שׁבע שׁנים נבנתה לפני צען מצרים׃

Deuteronomy 4:34

³⁴ או הנסה אלהים לבוא לקחת לו גוי מקרב גוי במסת באתת ובמופתים ובמלחמה וביד חזקה ובזרוע נטויה ובמוראים גדלים ככל אשׁר עשׂה לכם יהוה אלהיכם במצרים לעיניך׃

Deuteronomy 6:22

²² ויתן יהוה אותת ומפתים גדלים ורעים במצרים בפרעה ובכל ביתו לעינינו׃

Nehemiah 9:10

¹⁰ ותתן אתת ומפתים בפרעה ובכל עבדיו ובכל עם ארצו כי ידעת כי הזידו עליהם ותעשׂ לך שׁם כהיום הזה׃

Psalms 78:42-50

⁴² לא זכרו את ידו יום אשׁר פדם מני צר׃⁴³ אשׁר שׂם במצרים אתותיו ומופתיו בשׂדה צען׃⁴⁴ ויהפך לדם יאריהם ונזליהם בל ישׁתיון׃⁴⁵ ישׁלח בהם ערב ויאכלם וצפרדע ותשׁחיתם׃⁴⁶ ויתן לחסיל יבולם ויגיעם לארבה׃⁴⁷ יהרג בברד גפנם ושׁקמותם בחנמל׃⁴⁸ ויסגר לברד בעירם ומקניהם לרשׁפים׃⁴⁹ ישׁלח בם חרון אפו עברה וזעם וצרה משׁלחת מלאכי רעים׃⁵⁰ יפלס נתיב לאפו לא חשׂך ממות נפשׁם וחיתם לדבר הסגיר׃

Psalms 105:27-38

²⁷ שׂמו בם דברי אתותיו ומפתים בארץ חם׃²⁸ שׁלח חשׁך ויחשׁך ולא מרו את דברוו׃²⁹ הפך את מימיהם לדם וימת את דגתם׃³⁰ שׁרץ ארצם צפרדעים בחדרי מלכיהם׃³¹ אמר ויבא ערב כנים בכל גבולם׃³² נתן גשׁמיהם ברד אשׁ להבות בארצם׃³³ ויך גפנם ותאנתם וישׁבר עץ גבולם׃³⁴ אמר ויבא ארבה וילק ואין מספר׃³⁵ ויאכל כל עשׂב בארצם ויאכל פרי אדמתם׃³⁶ ויך כל בכור בארצם ראשׁית לכל אונם׃³⁷ ויוציאם בכסף וזהב ואין בשׁבטיו כושׁל׃³⁸ שׂמח מצרים בצאתם כי נפל פחדם עליהם׃

Psalms 78:12 Cross References - HOT

Genesis 32:3

Exodus 7:1-12:51

Exodus 8:1-12:51

Exodus 9:1-12:51

Exodus 10:1-12:51

Exodus 11:1-12:51

Exodus 12:1-51

Numbers 13:22

Deuteronomy 4:34

Deuteronomy 6:22

Nehemiah 9:10

Psalms 78:42-50

Psalms 105:27-38

Psalms 106:22

Psalms 135:9

Isaiah 19:11

Isaiah 19:13

Ezekiel 30:14