Bible verses about "conformity" | HOT

¹ אשׁרי האישׁ אשׁר לא הלך בעצת רשׁעים ובדרך חטאים לא עמד ובמושׁב לצים לא ישׁב׃² כי אם בתורת יהוה חפצו ובתורתו יהגה יומם ולילה׃³ והיה כעץ שׁתול על פלגי מים אשׁר פריו יתן בעתו ועלהו לא יבול וכל אשׁר יעשׂה יצליח׃⁴ לא כן הרשׁעים כי אם כמץ אשׁר תדפנו רוח׃⁵ על כן לא יקמו רשׁעים במשׁפט וחטאים בעדת צדיקים׃⁶ כי יודע יהוה דרך צדיקים ודרך רשׁעים תאבד׃

¹ למה רגשׁו גוים ולאמים יהגו ריק׃² יתיצבו מלכי ארץ ורוזנים נוסדו יחד על יהוה ועל משׁיחו׃³ ננתקה את מוסרותימו ונשׁליכה ממנו עבתימו׃⁴ יושׁב בשׁמים ישׂחק אדני ילעג׃⁵ אז ידבר אלימו באפו ובחרונו יבהלמו׃⁶ ואני נסכתי מלכי על ציון הר קדשׁי׃⁷ אספרה אל חק יהוה אמר אלי בני אתה אני היום ילדתיך׃⁸ שׁאל ממני ואתנה גוים נחלתך ואחזתך אפסי ארץ׃⁹ תרעם בשׁבט ברזל ככלי יוצר תנפצם׃¹⁰ ועתה מלכים השׂכילו הוסרו שׁפטי ארץ׃¹¹ עבדו את יהוה ביראה וגילו ברעדה׃¹² נשׁקו בר פן יאנף ותאבדו דרך כי יבער כמעט אפו אשׁרי כל חוסי׃

¹ מזמור לדוד בברחו מפני אבשׁלום בנו׃ (3:2) יהוה מה רבו צרי רבים קמים עלי׃² (3:3) רבים אמרים לנפשׁי אין ישׁועתה לו באלהים סלה׃³ (3:4) ואתה יהוה מגן בעדי כבודי ומרים ראשׁי׃⁴ (3:5) קולי אל יהוה אקרא ויענני מהר קדשׁו סלה׃⁵ (3:6) אני שׁכבתי ואישׁנה הקיצותי כי יהוה יסמכני׃⁶ (3:7) לא אירא מרבבות עם אשׁר סביב שׁתו עלי׃⁷ (3:8) קומה יהוה הושׁיעני אלהי כי הכית את כל איבי לחי שׁני רשׁעים שׁברת׃⁸ (3:9) ליהוה הישׁועה על עמך ברכתך סלה׃

¹ למנצח בנגינות מזמור לדוד׃ (4:2) בקראי ענני אלהי צדקי בצר הרחבת לי חנני ושׁמע תפלתי׃² (4:3) בני אישׁ עד מה כבודי לכלמה תאהבון ריק תבקשׁו כזב סלה׃³ (4:4) ודעו כי הפלה יהוה חסיד לו יהוה ישׁמע בקראי אליו׃⁴ (4:5) רגזו ואל תחטאו אמרו בלבבכם על משׁכבכם ודמו סלה׃⁵ (4:6) זבחו זבחי צדק ובטחו אל יהוה׃⁶ (4:7) רבים אמרים מי יראנו טוב נסה עלינו אור פניך יהוה׃⁷ (4:8) נתתה שׂמחה בלבי מעת דגנם ותירושׁם רבו׃⁸ (4:9) בשׁלום יחדו אשׁכבה ואישׁן כי אתה יהוה לבדד לבטח תושׁיבני׃

¹ למנצח אל הנחילות מזמור לדוד׃ (5:2) אמרי האזינה יהוה בינה הגיגי׃² (5:3) הקשׁיבה לקול שׁועי מלכי ואלהי כי אליך אתפלל׃³ (5:4) יהוה בקר תשׁמע קולי בקר אערך לך ואצפה׃⁴ (5:5) כי לא אל חפץ רשׁע אתה לא יגרך רע׃⁵ (5:6) לא יתיצבו הוללים לנגד עיניך שׂנאת כל פעלי און׃⁶ (5:7) תאבד דברי כזב אישׁ דמים ומרמה יתעב יהוה׃⁷ (5:8) ואני ברב חסדך אבוא ביתך אשׁתחוה אל היכל קדשׁך ביראתך׃⁸ (5:9) יהוה נחני בצדקתך למען שׁוררי הושׁר לפני דרכך׃⁹ (5:10) כי אין בפיהו נכונה קרבם הוות קבר פתוח גרונם לשׁונם יחליקון׃¹⁰ (5:11) האשׁימם אלהים יפלו ממעצותיהם ברב פשׁעיהם הדיחמו כי מרו׃¹¹ (5:12) וישׂמחו כל חוסי בך לעולם ירננו ותסך עלימו ויעלצו בך אהבי שׁמך׃¹² (5:13) כי אתה תברך צדיק יהוה כצנה רצון תעטרנו׃

¹ למנצח בנגינות על השׁמינית מזמור לדוד׃ (6:2) יהוה אל באפך תוכיחני ואל בחמתך תיסרני׃² (6:3) חנני יהוה כי אמלל אני רפאני יהוה כי נבהלו עצמי׃³ (6:4) ונפשׁי נבהלה מאד ואת יהוה עד מתי׃⁴ (6:5) שׁובה יהוה חלצה נפשׁי הושׁיעני למען חסדך׃⁵ (6:6) כי אין במות זכרך בשׁאול מי יודה׃⁶ (6:7) יגעתי באנחתי אשׂחה בכל לילה מטתי בדמעתי ערשׂי אמסה׃⁷ (6:8) עשׁשׁה מכעס עיני עתקה בכל צוררי׃⁸ (6:9) סורו ממני כל פעלי און כי שׁמע יהוה קול בכיי׃⁹ (6:10) שׁמע יהוה תחנתי יהוה תפלתי יקח׃¹⁰ (6:11) יבשׁו ויבהלו מאד כל איבי ישׁבו יבשׁו רגע׃

¹ שׁגיון לדוד אשׁר שׁר ליהוה על דברי כושׁ בן\'ceימיני׃ (7:2) יהוה אלהי בך חסיתי הושׁיעני מכל רדפי והצילני׃² (7:3) פן יטרף כאריה נפשׁי פרק ואין מציל׃³ (7:4) יהוה אלהי אם עשׂיתי זאת אם ישׁ עול בכפי׃⁴ (7:5) אם גמלתי שׁולמי רע ואחלצה צוררי ריקם׃⁵ (7:6) ירדף אויב נפשׁי וישׂג וירמס לארץ חיי וכבודי לעפר ישׁכן סלה׃⁶ (7:7) קומה יהוה באפך הנשׂא בעברות צוררי ועורה אלי משׁפט צוית׃⁷ (7:8) ועדת לאמים תסובבך ועליה למרום שׁובה׃⁸ (7:9) יהוה ידין עמים שׁפטני יהוה כצדקי וכתמי עלי׃⁹ (7:10) יגמר נא רע רשׁעים ותכונן צדיק ובחן לבות וכליות אלהים צדיק׃¹⁰ (7:11) מגני על אלהים מושׁיע ישׁרי לב׃¹¹ (7:12) אלהים שׁופט צדיק ואל זעם בכל יום׃¹² (7:13) אם לא ישׁוב חרבו ילטושׁ קשׁתו דרך ויכוננה׃¹³ (7:14) ולו הכין כלי מות חציו לדלקים יפעל׃¹⁴ (7:15) הנה יחבל און והרה עמל וילד שׁקר׃¹⁵ (7:16) בור כרה ויחפרהו ויפל בשׁחת יפעל׃¹⁶ (7:17) ישׁוב עמלו בראשׁו ועל קדקדו חמסו ירד׃¹⁷ (7:18) אודה יהוה כצדקו ואזמרה שׁם יהוה עליון׃

¹ למנצח על הגתית מזמור לדוד׃ (8:2) יהוה אדנינו מה אדיר שׁמך בכל הארץ אשׁר תנה הודך על השׁמים׃² (8:3) מפי עוללים וינקים יסדת עז למען צורריך להשׁבית אויב ומתנקם׃³ (8:4) כי אראה שׁמיך מעשׂי אצבעתיך ירח וכוכבים אשׁר כוננתה׃⁴ (8:5) מה אנושׁ כי תזכרנו ובן אדם כי תפקדנו׃⁵ (8:6) ותחסרהו מעט מאלהים וכבוד והדר תעטרהו׃⁶ (8:7) תמשׁילהו במעשׂי ידיך כל שׁתה תחת רגליו׃⁷ (8:8) צנה ואלפים כלם וגם בהמות שׂדי׃⁸ (8:9) צפור שׁמים ודגי הים עבר ארחות ימים׃⁹ (8:10) יהוה אדנינו מה אדיר שׁמך בכל הארץ׃

¹ למנצח עלמות לבן מזמור לדוד׃ (9:2) אודה יהוה בכל לבי אספרה כל נפלאותיך׃² (9:3) אשׂמחה ואעלצה בך אזמרה שׁמך עליון׃³ (9:4) בשׁוב אויבי אחור יכשׁלו ויאבדו מפניך׃⁴ (9:5) כי עשׂית משׁפטי ודיני ישׁבת לכסא שׁופט צדק׃⁵ (9:6) גערת גוים אבדת רשׁע שׁמם מחית לעולם ועד׃⁶ (9:7) האויב תמו חרבות לנצח וערים נתשׁת אבד זכרם המה׃⁷ (9:8) ויהוה לעולם ישׁב כונן למשׁפט כסאו׃⁸ (9:9) והוא ישׁפט תבל בצדק ידין לאמים במישׁרים׃⁹ (9:10) ויהי יהוה משׂגב לדך משׂגב לעתות בצרה׃¹⁰ (9:11) ויבטחו בך יודעי שׁמך כי לא עזבת דרשׁיך יהוה׃¹¹ (9:12) זמרו ליהוה ישׁב ציון הגידו בעמים עלילותיו׃¹² (9:13) כי דרשׁ דמים אותם זכר לא שׁכח צעקת עניים׃¹³ (9:14) חננני יהוה ראה עניי משׂנאי מרוממי משׁערי מות׃¹⁴ (9:15) למען אספרה כל תהלתיך בשׁערי בת ציון אגילה בישׁועתך׃¹⁵ (9:16) טבעו גוים בשׁחת עשׂו ברשׁת זו טמנו נלכדה רגלם׃¹⁶ (9:17) נודע יהוה משׁפט עשׂה בפעל כפיו נוקשׁ רשׁע הגיון סלה׃¹⁷ (9:18) ישׁובו רשׁעים לשׁאולה כל גוים שׁכחי אלהים׃¹⁸ (9:19) כי לא לנצח ישׁכח אביון תקות ענוים תאבד לעד׃¹⁹ (9:20) קומה יהוה אל יעז אנושׁ ישׁפטו גוים על פניך׃²⁰ (9:21) שׁיתה יהוה מורה להם ידעו גוים אנושׁ המה סלה׃

¹ למה יהוה תעמד ברחוק תעלים לעתות בצרה׃² בגאות רשׁע ידלק עני יתפשׂו במזמות זו חשׁבו׃³ כי הלל רשׁע על תאות נפשׁו ובצע ברך נאץ יהוה׃⁴ רשׁע כגבה אפו בל ידרשׁ אין אלהים כל מזמותיו׃⁵ יחילו דרכו בכל עת מרום משׁפטיך מנגדו כל צורריו יפיח׃⁶ אמר בלבו בל אמוט לדר ודר אשׁר לא ברע׃⁷ אלה פיהו מלא ומרמות ותך תחת לשׁונו עמל ואון׃⁸ ישׁב במארב חצרים במסתרים יהרג נקי עיניו לחלכה יצפנו׃⁹ יארב במסתר כאריה בסכה יארב לחטוף עני יחטף עני במשׁכו ברשׁתו׃¹⁰ ודכה ישׁח ונפל בעצומיו חלכאים׃¹¹ אמר בלבו שׁכח אל הסתיר פניו בל ראה לנצח׃¹² קומה יהוה אל נשׂא ידך אל תשׁכח עניים׃¹³ על מה נאץ רשׁע אלהים אמר בלבו לא תדרשׁ׃¹⁴ ראתה כי אתה עמל וכעס תביט לתת בידך עליך יעזב חלכה יתום אתה היית עוזר׃¹⁵ שׁבר זרוע רשׁע ורע תדרושׁ רשׁעו בל תמצא׃¹⁶ יהוה מלך עולם ועד אבדו גוים מארצו׃¹⁷ תאות ענוים שׁמעת יהוה תכין לבם תקשׁיב אזנך׃¹⁸ לשׁפט יתום ודך בל יוסיף עוד לערץ אנושׁ מן הארץ׃

¹ למנצח לדוד ביהוה חסיתי איך תאמרו לנפשׁי נודו הרכם צפור׃² כי הנה הרשׁעים ידרכון קשׁת כוננו חצם על יתר לירות במו אפל לישׁרי לב׃³ כי השׁתות יהרסון צדיק מה פעל׃⁴ יהוה בהיכל קדשׁו יהוה בשׁמים כסאו עיניו יחזו עפעפיו יבחנו בני אדם׃⁵ יהוה צדיק יבחן ורשׁע ואהב חמס שׂנאה נפשׁו׃⁶ ימטר על רשׁעים פחים אשׁ וגפרית ורוח זלעפות מנת כוסם׃⁷ כי צדיק יהוה צדקות אהב ישׁר יחזו פנימו׃

¹ למנצח על השׁמינית מזמור לדוד׃ (12:2) הושׁיעה יהוה כי גמר חסיד כי פסו אמונים מבני אדם׃² (12:3) שׁוא ידברו אישׁ את רעהו שׂפת חלקות בלב ולב ידברו׃³ (12:4) יכרת יהוה כל שׂפתי חלקות לשׁון מדברת גדלות׃⁴ (12:5) אשׁר אמרו ללשׁננו נגביר שׂפתינו אתנו מי אדון׃⁵ (12:6) משׁד עניים מאנקת אביונים עתה אקום יאמר יהוה אשׁית בישׁע יפיח׃⁶ (12:7) אמרות יהוה אמרות טהרות כסף צרוף בעליל לארץ מזקק שׁבעתים׃⁷ (12:8) אתה יהוה תשׁמרם תצרנו מן הדור זו לעולם׃⁸ (12:9) סביב רשׁעים יתהלכון כרם זלות לבני אדם׃

¹ למנצח מזמור לדוד׃ (13:2) עד אנה יהוה תשׁכחני נצח עד אנה תסתיר את פניך ממני׃² (13:3) עד אנה אשׁית עצות בנפשׁי יגון בלבבי יומם עד אנה ירום איבי עלי׃³ (13:4) הביטה ענני יהוה אלהי האירה עיני פן אישׁן המות׃⁴ (13:5) פן יאמר איבי יכלתיו צרי יגילו כי אמוט׃⁵ (13:6) ואני בחסדך בטחתי יגל לבי בישׁועת׃⁶ (13:6) אשׁירה ליהוה כי גמל עלי׃

¹ למנצח לדוד אמר נבל בלבו אין אלהים השׁחיתו התעיבו עלילה אין עשׂה טוב׃² יהוה משׁמים השׁקיף על בני אדם לראות הישׁ משׂכיל דרשׁ את אלהים׃³ הכל סר יחדו נאלחו אין עשׂה טוב אין גם אחד׃⁴ הלא ידעו כל פעלי און אכלי עמי אכלו לחם יהוה לא קראו׃⁵ שׁם פחדו פחד כי אלהים בדור צדיק׃⁶ עצת עני תבישׁו כי יהוה מחסהו׃⁷ מי יתן מציון ישׁועת ישׂראל בשׁוב יהוה שׁבות עמו יגל יעקב ישׂמח ישׂראל׃

¹ מזמור לדוד יהוה מי יגור באהלך מי ישׁכן בהר קדשׁך׃² הולך תמים ופעל צדק ודבר אמת בלבבו׃³ לא רגל על לשׁנו לא עשׂה לרעהו רעה וחרפה לא נשׂא על קרבו׃⁴ נבזה בעיניו נמאס ואת יראי יהוה יכבד נשׁבע להרע ולא ימר׃⁵ כספו לא נתן בנשׁך ושׁחד על נקי לא לקח עשׂה אלה לא ימוט לעולם׃

¹ מכתם לדוד שׁמרני אל כי חסיתי׃² אמרת ליהוה אדני אתה טובתי בל עליך׃³ לקדושׁים אשׁר בארץ המה ואדירי כל חפצי׃⁴ ירבו עצבותם אחר מהרו בל אסיך נסכיהם מדם ובל אשׂא את שׁמותם על שׂפתי׃⁵ יהוה מנת חלקי וכוסי אתה תומיך גורלי׃⁶ חבלים נפלו לי בנעמים אף נחלת שׁפרה עלי׃⁷ אברך את יהוה אשׁר יעצני אף לילות יסרוני כליותי׃⁸ שׁויתי יהוה לנגדי תמיד כי מימיני בל אמוט׃⁹ לכן שׂמח לבי ויגל כבודי אף בשׂרי ישׁכן לבטח׃¹⁰ כי לא תעזב נפשׁי לשׁאול לא תתן חסידך לראות שׁחת׃¹¹ תודיעני ארח חיים שׂבע שׂמחות את פניך נעמות בימינך נצח׃

¹ תפלה לדוד שׁמעה יהוה צדק הקשׁיבה רנתי האזינה תפלתי בלא שׂפתי מרמה׃² מלפניך משׁפטי יצא עיניך תחזינה מישׁרים׃³ בחנת לבי פקדת לילה צרפתני בל תמצא זמתי בל יעבר פי׃⁴ לפעלות אדם בדבר שׂפתיך אני שׁמרתי ארחות פריץ׃⁵ תמך אשׁרי במעגלותיך בל נמוטו פעמי׃⁶ אני קראתיך כי תענני אל הט אזנך לי שׁמע אמרתי׃⁷ הפלה חסדיך מושׁיע חוסים ממתקוממים בימינך׃⁸ שׁמרני כאישׁון בת עין בצל כנפיך תסתירני׃⁹ מפני רשׁעים זו שׁדוני איבי בנפשׁ יקיפו עלי׃¹⁰ חלבמו סגרו פימו דברו בגאות׃¹¹ אשׁרינו עתה סבבוני עיניהם ישׁיתו לנטות בארץ׃¹² דמינו כאריה יכסוף לטרוף וככפיר ישׁב במסתרים׃¹³ קומה יהוה קדמה פניו הכריעהו פלטה נפשׁי מרשׁע חרבך׃¹⁴ ממתים ידך יהוה ממתים מחלד חלקם בחיים וצפינך תמלא בטנם ישׂבעו בנים והניחו יתרם לעולליהם׃¹⁵ אני בצדק אחזה פניך אשׂבעה בהקיץ תמונתך׃

² (18:3) יהוה סלעי ומצודתי ומפלטי אלי צורי אחסה בו מגני וקרן ישׁעי משׂגבי׃

¹ למנצח לעבד יהוה לדוד אשׁר דבר ליהוה את דברי השׁירה הזאת ביום הציל יהוה אותו מכף כל איביו ומיד שׁאול׃ (18:2) ויאמר ארחמך יהוה חזקי׃

³ (18:4) מהלל אקרא יהוה ומן איבי אושׁע׃⁴ (18:5) אפפוני חבלי מות ונחלי בליעל יבעתוני׃⁵ (18:6) חבלי שׁאול סבבוני קדמוני מוקשׁי מות׃⁶ (18:7) בצר לי אקרא יהוה ואל אלהי אשׁוע ישׁמע מהיכלו קולי ושׁועתי לפניו תבוא באזניו׃⁷ (18:8) ותגעשׁ ותרעשׁ הארץ ומוסדי הרים ירגזו ויתגעשׁו כי חרה׃⁸ (18:9) עלה עשׁן באפו ואשׁ מפיו תאכל גחלים בערו ממנו׃⁹ (18:10) ויט שׁמים וירד וערפל תחת רגליו׃¹⁰ (18:11) וירכב על כרוב ויעף וידא על כנפי רוח׃¹¹ (18:12) ישׁת חשׁך סתרו סביבותיו סכתו חשׁכת מים עבי שׁחקים׃¹² (18:13) מנגה נגדו עביו עברו ברד וגחלי אשׁ׃¹³ (18:14) וירעם בשׁמים יהוה ועליון יתן קלו ברד וגחלי אשׁ׃¹⁴ (18:15) וישׁלח חציו ויפיצם וברקים רב ויהמם׃¹⁵ (18:16) ויראו אפיקי מים ויגלו מוסדות תבל מגערתך יהוה מנשׁמת רוח אפך׃¹⁶ (18:17) ישׁלח ממרום יקחני ימשׁני ממים רבים׃¹⁷ (18:18) יצילני מאיבי עז ומשׂנאי כי אמצו ממני׃¹⁸ (18:19) יקדמוני ביום אידי ויהי יהוה למשׁען׃¹⁹ (18:20) ויוציאני למרחב יחלצני כי חפץ׃²⁰ (18:21) יגמלני יהוה כצדקי כבר ידי ישׁיב׃²¹ (18:22) כי שׁמרתי דרכי יהוה ולא רשׁעתי מאלהי׃²² (18:23) כי כל משׁפטיו לנגדי וחקתיו לא אסיר מני׃²³ (18:24) ואהי תמים עמו ואשׁתמר מעוני׃²⁴ (18:25) וישׁב יהוה לי כצדקי כבר ידי לנגד עיניו׃²⁵ (18:26) עם חסיד תתחסד עם גבר תמים תתמם׃²⁶ (18:27) עם נבר תתברר ועם עקשׁ תתפתל׃²⁷ (18:28) כי אתה עם עני תושׁיע ועינים רמות תשׁפיל׃²⁸ (18:29) כי אתה תאיר נרי יהוה אלהי יגיה חשׁכי׃²⁹ (18:30) כי בך ארץ גדוד ובאלהי אדלג שׁור׃³⁰ (18:31) האל תמים דרכו אמרת יהוה צרופה מגן הוא לכל החסים׃³¹ (18:32) כי מי אלוה מבלעדי יהוה ומי צור זולתי אלהינו׃³² (18:33) האל המאזרני חיל ויתן תמים דרכי׃³³ (18:34) משׁוה רגלי כאילות ועל במתי יעמידני׃³⁴ (18:35) מלמד ידי למלחמה ונחתה קשׁת נחושׁה זרועתי׃³⁵ (18:36) ותתן לי מגן ישׁעך וימינך תסעדני וענותך תרבני׃³⁶ (18:37) תרחיב צעדי תחתי ולא מעדו קרסלי׃³⁷ (18:38) ארדוף אויבי ואשׂיגם ולא אשׁוב עד כלותם׃³⁸ (18:39) אמחצם ולא יכלו קום יפלו תחת רגלי׃³⁹ (18:40) ותאזרני חיל למלחמה תכריע קמי תחתי׃⁴⁰ (18:41) ואיבי נתתה לי ערף ומשׂנאי אצמיתם׃⁴¹ (18:42) ישׁועו ואין מושׁיע על יהוה ולא ענם׃⁴² (18:43) ואשׁחקם כעפר על פני רוח כטיט חוצות אריקם׃⁴³ (18:44) תפלטני מריבי עם תשׂימני לראשׁ גוים עם לא ידעתי יעבדוני׃⁴⁴ (18:45) לשׁמע אזן ישׁמעו לי בני נכר יכחשׁו׃⁴⁵ (18:46) בני נכר יבלו ויחרגו ממסגרותיהם׃⁴⁶ (18:47) חי יהוה וברוך צורי וירום אלוהי ישׁעי׃⁴⁷ (18:48) האל הנותן נקמות לי וידבר עמים תחתי׃⁴⁸ (18:49) מפלטי מאיבי אף מן קמי תרוממני מאישׁ חמס תצילני׃⁴⁹ (18:50) על כן אודך בגוים יהוה ולשׁמך אזמרה׃⁵⁰ (18:51) מגדל ישׁועות מלכו ועשׂה חסד למשׁיחו לדוד ולזרעו עד עולם׃

¹ למנצח מזמור לדוד׃ (19:2) השׁמים מספרים כבוד אל ומעשׂה ידיו מגיד הרקיע׃² (19:3) יום ליום יביע אמר ולילה ללילה יחוה דעת׃³ (19:4) אין אמר ואין דברים בלי נשׁמע קולם׃⁴ (19:5) בכל הארץ יצא קום ובקצה תבל מליהם לשׁמשׁ שׂם אהל׃⁵ (19:6) והוא כחתן יצא מחפתו ישׂישׂ כגבור לרוץ ארח׃⁶ (19:7) מקצה השׁמים מוצאו ותקופתו על קצותם ואין נסתר מחמתו׃⁷ (19:8) תורת יהוה תמימה משׁיבת נפשׁ עדות יהוה נאמנה מחכימת פתי׃⁸ (19:9) פקודי יהוה ישׁרים משׂמחי לב מצות יהוה ברה מאירת עינים׃⁹ (19:10) יראת יהוה טהורה עומדת לעד משׁפטי יהוה אמת צדקו יחדו׃¹⁰ (19:11) הנחמדים מזהב ומפז רב ומתוקים מדבשׁ ונפת צופים׃¹¹ (19:12) גם עבדך נזהר בהם בשׁמרם עקב רב׃¹² (19:13) שׁגיאות מי יבין מנסתרות נקני׃¹³ (19:14) גם מזדים חשׂך עבדך אל ימשׁלו בי אז איתם ונקיתי מפשׁע רב׃¹⁴ (19:15) יהיו לרצון אמרי פי והגיון לבי לפניך יהוה צורי וגאלי׃

¹ למנצח מזמור לדוד׃ (20:2) יענך יהוה ביום צרה ישׂגבך שׁם אלהי יעקב׃² (20:3) ישׁלח עזרך מקדשׁ ומציון יסעדך׃³ (20:4) יזכר כל מנחתך ועולתך ידשׁנה סלה׃⁴ (20:5) יתן לך כלבבך וכל עצתך ימלא׃⁵ (20:6) נרננה בישׁועתך ובשׁם אלהינו נדגל ימלא יהוה כל משׁאלותיך׃⁶ (20:7) עתה ידעתי כי הושׁיע יהוה משׁיחו יענהו משׁמי קדשׁו בגברות ישׁע ימינו׃⁷ (20:8) אלה ברכב ואלה בסוסים ואנחנו בשׁם יהוה אלהינו נזכיר׃⁸ (20:9) המה כרעו ונפלו ואנחנו קמנו ונתעודד׃⁹ (20:10) יהוה הושׁיעה המלך יעננו ביום קראנו׃

¹ למנצח מזמור לדוד׃ (21:2) יהוה בעזך ישׂמח מלך ובישׁועתך מה יגיל מאד׃² (21:3) תאות לבו נתתה לו וארשׁת שׂפתיו בל מנעת סלה׃³ (21:4) כי תקדמנו ברכות טוב תשׁית לראשׁו עטרת פז׃⁴ (21:5) חיים שׁאל ממך נתתה לו ארך ימים עולם ועד׃⁵ (21:6) גדול כבודו בישׁועתך הוד והדר תשׁוה עליו׃⁶ (21:7) כי תשׁיתהו ברכות לעד תחדהו בשׂמחה את פניך׃⁷ (21:8) כי המלך בטח ביהוה ובחסד עליון בל ימוט׃⁸ (21:9) תמצא ידך לכל איביך ימינך תמצא שׂנאיך׃⁹ (21:10) תשׁיתמו כתנור אשׁ לעת פניך יהוה באפו יבלעם ותאכלם אשׁ׃¹⁰ (21:11) פרימו מארץ תאבד וזרעם מבני אדם׃¹¹ (21:12) כי נטו עליך רעה חשׁבו מזמה בל יוכלו׃¹² (21:13) כי תשׁיתמו שׁכם במיתריך תכונן על פניהם׃¹³ (21:14) רומה יהוה בעזך נשׁירה ונזמרה גבורתך׃

¹ למנצח על אילת השׁחר מזמור לדוד׃ (22:2) אלי אלי למה עזבתני רחוק מישׁועתי דברי שׁאגתי׃² (22:3) אלהי אקרא יומם ולא תענה ולילה ולא דומיה׃³ (22:4) ואתה קדושׁ יושׁב תהלות ישׂראל׃⁴ (22:5) בך בטחו אבתינו בטחו ותפלטמו׃⁵ (22:6) אליך זעקו ונמלטו בך בטחו ולא בושׁו׃⁶ (22:7) ואנכי תולעת ולא אישׁ חרפת אדם ובזוי עם׃⁷ (22:8) כל ראי ילעגו לי יפטירו בשׂפה יניעו ראשׁ׃⁸ (22:9) גל אל יהוה יפלטהו יצילהו כי חפץ׃⁹ (22:10) כי אתה גחי מבטן מבטיחי על שׁדי אמי׃¹⁰ (22:11) עליך השׁלכתי מרחם מבטן אמי אלי אתה׃¹¹ (22:12) אל תרחק ממני כי צרה קרובה כי אין עוזר׃¹² (22:13) סבבוני פרים רבים אבירי בשׁן כתרוני׃¹³ (22:14) פצו עלי פיהם אריה טרף ושׁאג׃¹⁴ (22:15) כמים נשׁפכתי והתפרדו כל עצמותי היה לבי כדונג נמס בתוך מעי׃¹⁵ (22:16) יבשׁ כחרשׂ כחי ולשׁוני מדבק מלקוחי ולעפר מות תשׁפתני׃¹⁶ (22:17) כי סבבוני כלבים עדת מרעים הקיפוני כארי ידי ורגלי׃¹⁷ (22:18) אספר כל עצמותי המה יביטו יראו׃¹⁸ (22:19) יחלקו בגדי להם ועל לבושׁי יפילו גורל׃¹⁹ (22:20) ואתה יהוה אל תרחק אילותי לעזרתי חושׁה׃²⁰ (22:21) הצילה מחרב נפשׁי מיד כלב יחידתי׃²¹ (22:22) הושׁיעני מפי אריה ומקרני רמים עניתני׃²² (22:23) אספרה שׁמך לאחי בתוך קהל אהללך׃²³ (22:24) יראי יהוה הללוהו כל זרע יעקב כבדוהו וגורו ממנו כל זרע ישׂראל׃²⁴ (22:25) כי לא בזה ולא שׁקץ ענות עני ולא הסתיר פניו ממנו ובשׁועו אליו שׁמע׃²⁵ (22:26) מאתך תהלתי בקהל רב נדרי אשׁלם נגד יראיו׃²⁶ (22:27) יאכלו ענוים וישׂבעו יהללו יהוה דרשׁיו יחי לבבכם לעד׃²⁷ (22:28) יזכרו וישׁבו אל יהוה כל אפסי ארץ וישׁתחוו לפניך כל משׁפחות גוים׃²⁸ (22:29) כי ליהוה המלוכה ומשׁל בגוים׃²⁹ (22:30) אכלו וישׁתחוו כל דשׁני ארץ לפניו יכרעו כל יורדי עפר ונפשׁו לא חיה׃³⁰ (22:31) זרע יעבדנו יספר לאדני לדור׃³¹ (22:32) יבאו ויגידו צדקתו לעם נולד כי עשׂה׃

¹ מזמור לדוד יהוה רעי לא אחסר׃² בנאות דשׁא ירביצני על מי מנחות ינהלני׃³ נפשׁי ישׁובב ינחני במעגלי צדק למען שׁמו׃⁴ גם כי אלך בגיא צלמות לא אירא רע כי אתה עמדי שׁבטך ומשׁענתך המה ינחמני׃⁵ תערך לפני שׁלחן נגד צררי דשׁנת בשׁמן ראשׁי כוסי רויה׃⁶ אך טוב וחסד ירדפוני כל ימי חיי ושׁבתי בבית יהוה לארך ימים׃

¹ לדוד מזמור ליהוה הארץ ומלואה תבל וישׁבי׃² כי הוא על ימים יסדה ועל נהרות יכוננה׃³ מי יעלה בהר יהוה ומי יקום במקום קדשׁו׃⁴ נקי כפים ובר לבב אשׁר לא נשׂא לשׁוא נפשׁי ולא נשׁבע למרמה׃⁵ ישׂא ברכה מאת יהוה וצדקה מאלהי ישׁעו׃⁶ זה דור דרשׁו מבקשׁי פניך יעקב סלה׃⁷ שׂאו שׁערים ראשׁיכם והנשׂאו פתחי עולם ויבוא מלך הכבוד׃⁸ מי זה מלך הכבוד יהוה עזוז וגבור יהוה גבור מלחמה׃⁹ שׂאו שׁערים ראשׁיכם ושׂאו פתחי עולם ויבא מלך הכבוד׃¹⁰ מי הוא זה מלך הכבוד יהוה צבאות הוא מלך הכבוד סלה׃

¹ לדוד אליך יהוה נפשׁי אשׂא׃² אלהי בך בטחתי אל אבושׁה אל יעלצו איבי׃³ גם כל קויך לא יבשׁו יבשׁו הבוגדים ריקם׃⁴ דרכיך יהוה הודיעני ארחותיך למדני׃⁵ הדריכני באמתך ולמדני כי אתה אלהי ישׁעי אותך קויתי כל היום׃⁶ זכר רחמיך יהוה וחסדיך כי מעולם המה׃⁷ חטאות נעורי ופשׁעי אל תזכר כחסדך זכר לי אתה למען טובך יהוה׃⁸ טוב וישׁר יהוה על כן יורה חטאים בדרך׃⁹ ידרך ענוים במשׁפט וילמד ענוים דרכו׃¹⁰ כל ארחות יהוה חסד ואמת לנצרי בריתו ועדתיו׃¹¹ למען שׁמך יהוה וסלחת לעוני כי רב הוא׃¹² מי זה האישׁ ירא יהוה יורנו בדרך יבחר׃¹³ נפשׁו בטוב תלין וזרעו יירשׁ ארץ׃¹⁴ סוד יהוה ליראיו ובריתו להודיעם׃¹⁵ עיני תמיד אל יהוה כי הוא יוציא מרשׁת רגלי׃¹⁶ פנה אלי וחנני כי יחיד ועני אני׃¹⁷ צרות לבבי הרחיבו ממצוקותי הוציאני׃¹⁸ ראה עניי ועמלי ושׂא לכל חטאותי׃¹⁹ ראה אויבי כי רבו ושׂנאת חמס שׂנאוני׃²⁰ שׁמרה נפשׁי והצילני אל אבושׁ כי חסיתי׃²¹ תם וישׁר יצרוני כי קויתיך׃²² פדה אלהים את ישׂראל מכל צרותיו׃

¹ לדוד שׁפטני יהוה כי אני בתמי הלכתי וביהוה בטחתי לא אמעד׃² בחנני יהוה ונסני צרופה כליותי ולבי׃³ כי חסדך לנגד עיני והתהלכתי באמתך׃⁴ לא ישׁבתי עם מתי שׁוא ועם נעלמים לא אבוא׃⁵ שׂנאתי קהל מרעים ועם רשׁעים לא אשׁב׃⁶ ארחץ בנקיון כפי ואסבבה את מזבחך יהוה׃⁷ לשׁמע בקול תודה ולספר כל נפלאותיך׃⁸ יהוה אהבתי מעון ביתך ומקום משׁכן כבודך׃⁹ אל תאסף עם חטאים נפשׁי ועם אנשׁי דמים חיי׃¹⁰ אשׁר בידיהם זמה וימינם מלאה שׁחד׃¹¹ ואני בתמי אלך פדני וחנני׃¹² רגלי עמדה במישׁור במקהלים אברך יהוה׃

¹ לדוד יהוה אורי וישׁעי ממי אירא יהוה מעוז חיי ממי אפחד׃² בקרב עלי מרעים לאכל את בשׂרי צרי ואיבי לי המה כשׁלו ונפלו׃³ אם תחנה עלי מחנה לא יירא לבי אם תקום עלי מלחמה בזאת אני בוטח׃⁴ אחת שׁאלתי מאת יהוה אותה אבקשׁ שׁבתי בבית יהוה כל ימי חיי לחזות בנעם יהוה ולבקר בהיכלו׃⁵ כי יצפנני בסכה ביום רעה יסתרני בסתר אהלו בצור ירוממני׃⁶ ועתה ירום ראשׁי על איבי סביבותי ואזבחה באהלו זבחי תרועה אשׁירה ואזמרה ליהוה׃⁷ שׁמע יהוה קולי אקרא וחנני וענני׃⁸ לך אמר לבי בקשׁו פני את פניך יהוה אבקשׁ׃⁹ אל תסתר פניך ממני אל תט באף עבדך עזרתי היית אל תטשׁני ואל תעזבני אלהי ישׁעי׃¹⁰ כי אבי ואמי עזבוני ויהוה יאספני׃¹¹ הורני יהוה דרכך ונחני בארח מישׁור למען שׁוררי׃¹² אל תתנני בנפשׁ צרי כי קמו בי עדי שׁקר ויפח חמס׃¹³ לולא האמנתי לראות בטוב יהוה בארץ חיים׃¹⁴ קוה אל יהוה חזק ויאמץ לבך וקוה אל יהוה׃

¹ לדוד אליך יהוה אקרא צורי אל תחרשׁ ממני פן תחשׁה ממני ונמשׁלתי עם יורדי בור׃² שׁמע קול תחנוני בשׁועי אליך בנשׂאי ידי אל דביר קדשׁך׃³ אל תמשׁכני עם רשׁעים ועם פעלי און דברי שׁלום עם רעיהם ורעה בלבבם׃⁴ תן להם כפעלם וכרע מעלליהם כמעשׂה ידיהם תן להם השׁב גמולם להם׃⁵ כי לא יבינו אל פעלת יהוה ואל מעשׂה ידיו יהרסם ולא יבנם׃⁶ ברוך יהוה כי שׁמע קול תחנוני׃⁷ יהוה עזי ומגני בו בטח לבי ונעזרתי ויעלז לבי ומשׁירי אהודנו׃⁸ יהוה עז למו ומעוז ישׁועות משׁיחו הוא׃⁹ הושׁיעה את עמך וברך את נחלתך ורעם ונשׂאם עד העולם׃

¹ מזמור לדוד הבו ליהוה בני אלים הבו ליהוה כבוד ועז׃² הבו ליהוה כבוד שׁמו השׁתחוו ליהוה בהדרת קדשׁ׃³ קול יהוה על המים אל הכבוד הרעים יהוה על מים רבים׃⁴ קול יהוה בכח קול יהוה בהדר׃⁵ קול יהוה שׁבר ארזים וישׁבר יהוה את ארזי הלבנון׃⁶ וירקידם כמו עגל לבנון ושׂרין כמו בן ראמים׃⁷ קול יהוה חצב להבות אשׁ׃⁸ קול יהוה יחיל מדבר יחיל יהוה מדבר קדשׁ׃⁹ קול יהוה יחולל אילות ויחשׂף יערות ובהיכלו כלו אמר כבוד׃¹⁰ יהוה למבול ישׁב וישׁב יהוה מלך לעולם׃¹¹ יהוה עז לעמו יתן יהוה יברך את עמו בשׁלום׃

¹ מזמור שׁיר חנכת הבית לדוד׃ (30:2) ארוממך יהוה כי דליתני ולא שׂמחת איבי² (30:3) יהוה אלהי שׁועתי אליך ותרפאני׃³ (30:4) יהוה העלית מן שׁאול נפשׁי חייתני מיורדי בור׃⁴ (30:5) זמרו ליהוה חסידיו והודו לזכר קדשׁו׃⁵ (30:6) כי רגע באפו חיים ברצונו בערב ילין בכי ולבקר רנה׃⁶ (30:7) ואני אמרתי בשׁלוי בל אמוט לעולם׃⁷ (30:8) יהוה ברצונך העמדתה להררי עז הסתרת פניך הייתי נבהל׃⁸ (30:9) אליך יהוה אקרא ואל אדני אתחנן׃⁹ (30:10) מה בצע בדמי ברדתי אל שׁחת היודך עפר היגיד אמתך׃¹⁰ (30:11) שׁמע יהוה וחנני יהוה היה עזר׃¹¹ (30:12) הפכת מספדי למחול לי פתחת שׂקי ותאזרני שׂמחה׃¹² (30:13) למען יזמרך כבוד ולא ידם יהוה אלהי לעולם אודך׃

¹ למנצח מזמור לדוד׃ (31:2) בך יהוה חסיתי אל אבושׁה לעולם בצדקתך פלטני׃² (31:3) הטה אלי אזנך מהרה הצילני היה לי לצור מעוז לבית מצודות להושׁיעני׃³ (31:4) כי סלעי ומצודתי אתה ולמען שׁמך תנחני ותנהלני׃⁴ (31:5) תוציאני מרשׁת זו טמנו לי כי אתה מעוזי׃⁵ (31:6) בידך אפקיד רוחי פדיתה אותי יהוה אל אמת׃⁶ (31:7) שׂנאתי השׁמרים הבלי שׁוא ואני אל יהוה בטחתי׃⁷ (31:8) אגילה ואשׂמחה בחסדך אשׁר ראית את עניי ידעת בצרות נפשׁי׃⁸ (31:9) ולא הסגרתני ביד אויב העמדת במרחב רגלי׃⁹ (31:10) חנני יהוה כי צר לי עשׁשׁה בכעס עיני נפשׁי ובטני׃¹⁰ (31:11) כי כלו ביגון חיי ושׁנותי באנחה כשׁל בעוני כחי ועצמי עשׁשׁו׃¹¹ (31:12) מכל צררי הייתי חרפה ולשׁכני מאד ופחד למידעי ראי בחוץ נדדו ממני׃¹² (31:13) נשׁכחתי כמת מלב הייתי ככלי אבד׃¹³ (31:14) כי שׁמעתי דבת רבים מגור מסביב בהוסדם יחד עלי לקחת נפשׁי זממו׃¹⁴ (31:15) ואני עליך בטחתי יהוה אמרתי אלהי אתה׃¹⁵ (31:16) בידך עתתי הצילני מיד אויבי ומרדפי׃¹⁶ (31:17) האירה פניך על עבדך הושׁיעני בחסדך׃¹⁷ (31:18) יהוה אל אבושׁה כי קראתיך יבשׁו רשׁעים ידמו לשׁאול׃¹⁸ (31:19) תאלמנה שׂפתי שׁקר הדברות על צדיק עתק בגאוה ובוז׃¹⁹ (31:20) מה רב טובך אשׁר צפנת ליראיך פעלת לחסים בך נגד בני אדם׃²⁰ (31:21) תסתירם בסתר פניך מרכסי אישׁ תצפנם בסכה מריב לשׁנות׃²¹ (31:22) ברוך יהוה כי הפליא חסדו לי בעיר מצור׃²² (31:23) ואני אמרתי בחפזי נגרזתי מנגד עיניך אכן שׁמעת קול תחנוני בשׁועי אליך׃²³ (31:24) אהבו את יהוה כל חסידיו אמונים נצר יהוה ומשׁלם על יתר עשׂה גאוה׃²⁴ (31:25) חזקו ויאמץ לבבכם כל המיחלים ליהוה׃

¹ לדוד משׂכיל אשׁרי נשׂוי פשׁע כסוי חטאה׃² אשׁרי אדם לא יחשׁב יהוה לו עון ואין ברוחו רמיה׃³ כי החרשׁתי בלו עצמי בשׁאגתי כל היום׃⁴ כי יומם ולילה תכבד עלי ידך נהפך לשׁדי בחרבני קיץ סלה׃⁵ חטאתי אודיעך ועוני לא כסיתי אמרתי אודה עלי פשׁעי ליהוה ואתה נשׂאת עון חטאתי סלה׃⁶ על זאת יתפלל כל חסיד אליך לעת מצא רק לשׁטף מים רבים אליו לא יגיעו׃⁷ אתה סתר לי מצר תצרני רני פלט תסובבני סלה׃⁸ אשׂכילך ואורך בדרך זו תלך איעצה עליך עיני׃⁹ אל תהיו כסוס כפרד אין הבין במתג ורסן עדיו לבלום בל קרב אליך׃¹⁰ רבים מכאובים לרשׁע והבוטח ביהוה חסד יסובבנו׃¹¹ שׂמחו ביהוה וגילו צדיקים והרנינו כל ישׁרי לב׃

¹ רננו צדיקים ביהוה לישׁרים נאוה תהלה׃² הודו ליהוה בכנור בנבל עשׂור זמרו׃³ שׁירו לו שׁיר חדשׁ היטיבו נגן בתרועה׃⁴ כי ישׁר דבר יהוה וכל מעשׂהו באמונה׃⁵ אהב צדקה ומשׁפט חסד יהוה מלאה הארץ׃⁶ בדבר יהוה שׁמים נעשׂו וברוח פיו כל צבאם׃⁷ כנס כנד מי הים נתן באצרות תהומות׃⁸ ייראו מיהוה כל הארץ ממנו יגורו כל ישׁבי תבל׃⁹ כי הוא אמר ויהי הוא צוה ויעמד׃¹⁰ יהוה הפיר עצת גוים הניא מחשׁבות עמים׃¹¹ עצת יהוה לעולם תעמד מחשׁבות לבו לדר ודר׃¹² אשׁרי הגוי אשׁר יהוה אלהיו העם בחר לנחלה׃¹³ משׁמים הביט יהוה ראה את כל בני האדם׃¹⁴ ממכון שׁבתו השׁגיח אל כל ישׁבי הארץ׃¹⁵ היצר יחד לבם המבין אל כל מעשׂיהם׃¹⁶ אין המלך נושׁע ברב חיל גבור לא ינצל ברב כח׃¹⁷ שׁקר הסוס לתשׁועה וברב חילו לא ימלט׃¹⁸ הנה עין יהוה אל יראיו למיחלים לחסדו׃¹⁹ להציל ממות נפשׁם ולחיותם ברעב׃²⁰ נפשׁנו חכתה ליהוה עזרנו ומגננו הוא׃²¹ כי בו ישׂמח לבנו כי בשׁם קדשׁו בטחנו׃²² יהי חסדך יהוה עלינו כאשׁר יחלנו׃

¹ לדוד בשׁנותו את טעמו לפני אבימלך ויגרשׁהו וילך׃ (34:2) אברכה את יהוה בכל עת תמיד תהלתו בפי׃² (34:3) ביהוה תתהלל נפשׁי ישׁמעו ענוים וישׂמחו׃³ (34:4) גדלו ליהוה אתי ונרוממה שׁמו יחדו׃⁴ (34:5) דרשׁתי את יהוה וענני ומכל מגורותי הצילני׃⁵ (34:6) הביטו אליו ונהרו ופניהם אל יחפרו׃⁶ (34:7) זה עני קרא ויהוה שׁמע ומכל צרותיו הושׁיעו׃⁷ (34:8) חנה מלאך יהוה סביב ליראיו ויחלצם׃⁸ (34:9) טעמו וראו כי טוב יהוה אשׁרי הגבר יחסה׃⁹ (34:10) יראו את יהוה קדשׁיו כי אין מחסור ליראיו׃¹⁰ (34:11) כפירים רשׁו ורעבו ודרשׁי יהוה לא יחסרו כל טוב׃¹¹ (34:12) לכו בנים שׁמעו לי יראת יהוה אלמדכם׃¹² (34:13) מי האישׁ החפץ חיים אהב ימים לראות טוב׃¹³ (34:14) נצר לשׁונך מרע ושׂפתיך מדבר מרמה׃¹⁴ (34:15) סור מרע ועשׂה טוב בקשׁ שׁלום ורדפהו׃¹⁵ (34:16) עיני יהוה אל צדיקים ואזניו אל שׁועתם׃¹⁶ (34:17) פני יהוה בעשׂי רע להכרית מארץ זכרם׃¹⁷ (34:18) צעקו ויהוה שׁמע ומכל צרותם הצילם׃¹⁸ (34:19) קרוב יהוה לנשׁברי לב ואת דכאי רוח יושׁיע׃¹⁹ (34:20) רבות רעות צדיק ומכלם יצילנו יהוה׃²⁰ (34:21) שׁמר כל עצמותיו אחת מהנה לא נשׁברה׃²¹ (34:22) תמותת רשׁע רעה ושׂנאי צדיק יאשׁמו׃²² (34:23) פודה יהוה נפשׁ עבדיו ולא יאשׁמו כל החסים׃

¹ לדוד ריבה יהוה את יריבי לחם את לחמי׃² החזק מגן וצנה וקומה בעזרתי׃³ והרק חנית וסגר לקראת רדפי אמר לנפשׁי ישׁעתך אני׃⁴ יבשׁו ויכלמו מבקשׁי נפשׁי יסגו אחור ויחפרו חשׁבי רעתי׃⁵ יהיו כמץ לפני רוח ומלאך יהוה דוחה׃⁶ יהי דרכם חשׁך וחלקלקות ומלאך יהוה רדפם׃⁷ כי חנם טמנו לי שׁחת רשׁתם חנם חפרו לנפשׁי׃⁸ תבואהו שׁואה לא ידע ורשׁתו אשׁר טמן תלכדו בשׁואה יפל׃⁹ ונפשׁי תגיל ביהוה תשׂישׂ בישׁועתו׃¹⁰ כל עצמותי תאמרנה יהוה מי כמוך מציל עני מחזק ממנו ועני ואביון מגזלו׃¹¹ יקומון עדי חמס אשׁר לא ידעתי ישׁאלוני׃¹² ישׁלמוני רעה תחת טובה שׁכול לנפשׁי׃¹³ ואני בחלותם לבושׁי שׂק עניתי בצום נפשׁי ותפלתי על חיקי תשׁוב׃¹⁴ כרע כאח לי התהלכתי כאבל אם קדר שׁחותי׃¹⁵ ובצלעי שׂמחו ונאספו נאספו עלי נכים ולא ידעתי קרעו ולא דמו׃¹⁶ בחנפי לעגי מעוג חרק עלי שׁנימו׃¹⁷ אדני כמה תראה השׁיבה נפשׁי משׁאיהם מכפירים יחידתי׃¹⁸ אודך בקהל רב בעם עצום אהללך׃¹⁹ אל ישׂמחו לי איבי שׁקר שׂנאי חנם יקרצו עין׃²⁰ כי לא שׁלום ידברו ועל רגעי ארץ דברי מרמות יחשׁבון׃²¹ וירחיבו עלי פיהם אמרו האח האח ראתה עינינו׃²² ראיתה יהוה אל תחרשׁ אדני אל תרחק ממני׃²³ העירה והקיצה למשׁפטי אלהי ואדני לריבי׃²⁴ שׁפטני כצדקך יהוה אלהי ואל ישׂמחו׃²⁵ אל יאמרו בלבם האח נפשׁנו אל יאמרו בלענוהו׃²⁶ יבשׁו ויחפרו יחדו שׂמחי רעתי ילבשׁו בשׁת וכלמה המגדילים עלי׃²⁷ ירנו וישׂמחו חפצי צדקי ויאמרו תמיד יגדל יהוה החפץ שׁלום עבדו׃²⁸ ולשׁוני תהגה צדקך כל היום תהלתך׃

¹ למנצח לעבד יהוה לדוד׃ (36:2) נאם פשׁע לרשׁע בקרב לבי אין פחד אלהים לנגד עיניו׃² (36:3) כי החליק אליו בעיניו למצא עונו לשׂנא׃³ (36:4) דברי פיו און ומרמה חדל להשׂכיל להיטיב׃⁴ (36:5) און יחשׁב על משׁכבו יתיצב על דרך לא טוב רע לא ימאס׃⁵ (36:6) יהוה בהשׁמים חסדך אמונתך עד שׁחקים׃⁶ (36:7) צדקתך כהררי אל משׁפטך תהום רבה אדם ובהמה תושׁיע יהוה׃⁷ (36:8) מה יקר חסדך אלהים ובני אדם בצל כנפיך יחסיון׃⁸ (36:9) ירוין מדשׁן ביתך ונחל עדניך תשׁקם׃⁹ (36:10) כי עמך מקור חיים באורך נראה אור׃¹⁰ (36:11) משׁך חסדך לידעיך וצדקתך לישׁרי לב׃¹¹ (36:12) אל תבואני רגל גאוה ויד רשׁעים אל תנדני׃¹² (36:13) שׁם נפלו פעלי און דחו ולא יכלו קום׃

¹ לדוד אל תתחר במרעים אל תקנא בעשׂי עולה׃² כי כחציר מהרה ימלו וכירק דשׁא יבולון׃³ בטח ביהוה ועשׂה טוב שׁכן ארץ ורעה אמונה׃⁴ והתענג על יהוה ויתן לך משׁאלת לבך׃⁵ גול על יהוה דרכך ובטח עליו והוא יעשׂה׃⁶ והוציא כאור צדקך ומשׁפטך כצהרים׃⁷ דום ליהוה והתחולל לו אל תתחר במצליח דרכו באישׁ עשׂה מזמות׃⁸ הרף מאף ועזב חמה אל תתחר אך להרע׃⁹ כי מרעים יכרתון וקוי יהוה המה יירשׁו ארץ׃¹⁰ ועוד מעט ואין רשׁע והתבוננת על מקומו ואיננו׃¹¹ וענוים יירשׁו ארץ והתענגו על רב שׁלום׃¹² זמם רשׁע לצדיק וחרק עליו שׁניו׃¹³ אדני ישׂחק לו כי ראה כי יבא יומו׃¹⁴ חרב פתחו רשׁעים ודרכו קשׁתם להפיל עני ואביון לטבוח ישׁרי דרך׃¹⁵ חרבם תבוא בלבם וקשׁתותם תשׁברנה׃¹⁶ טוב מעט לצדיק מהמון רשׁעים רבים׃¹⁷ כי זרועות רשׁעים תשׁברנה וסומך צדיקים יהוה׃¹⁸ יודע יהוה ימי תמימם ונחלתם לעולם תהיה׃¹⁹ לא יבשׁו בעת רעה ובימי רעבון ישׂבעו׃²⁰ כי רשׁעים יאבדו ואיבי יהוה כיקר כרים כלו בעשׁן כלו׃²¹ לוה רשׁע ולא ישׁלם וצדיק חונן ונותן׃²² כי מברכיו יירשׁו ארץ ומקלליו יכרתו׃²³ מיהוה מצעדי גבר כוננו ודרכו יחפץ׃²⁴ כי יפל לא יוטל כי יהוה סומך ידו׃²⁵ נער הייתי גם זקנתי ולא ראיתי צדיק נעזב וזרעו מבקשׁ לחם׃²⁶ כל היום חונן ומלוה וזרעו לברכה׃²⁷ סור מרע ועשׂה טוב ושׁכן לעולם׃²⁸ כי יהוה אהב משׁפט ולא יעזב את חסידיו לעולם נשׁמרו וזרע רשׁעים נכרת׃²⁹ צדיקים יירשׁו ארץ וישׁכנו לעד עליה׃³⁰ פי צדיק יהגה חכמה ולשׁונו תדבר משׁפט׃³¹ תורת אלהיו בלבו לא תמעד אשׁריו׃³² צופה רשׁע לצדיק ומבקשׁ להמיתו׃³³ יהוה לא יעזבנו בידו ולא ירשׁיענו בהשׁפטו׃³⁴ קוה אל יהוה ושׁמר דרכו וירוממך לרשׁת ארץ בהכרת רשׁעים תראה׃³⁵ ראיתי רשׁע עריץ ומתערה כאזרח רענן׃³⁶ ויעבר והנה איננו ואבקשׁהו ולא נמצא׃³⁷ שׁמר תם וראה ישׁר כי אחרית לאישׁ שׁלום׃³⁸ ופשׁעים נשׁמדו יחדו אחרית רשׁעים נכרתה׃³⁹ ותשׁועת צדיקים מיהוה מעוזם בעת צרה׃⁴⁰ ויעזרם יהוה ויפלטם יפלטם מרשׁעים ויושׁיעם כי חסו׃

¹ מזמור לדוד להזכיר׃ (38:2) יהוה אל בקצפך תוכיחני ובחמתך תיסרני׃² (38:3) כי חציך נחתו בי ותנחת עלי ידך׃³ (38:4) אין מתם בבשׂרי מפני זעמך אין שׁלום בעצמי מפני חטאתי׃⁴ (38:5) כי עונתי עברו ראשׁי כמשׂא כבד יכבדו ממני׃⁵ (38:6) הבאישׁו נמקו חבורתי מפני אולתי׃⁶ (38:7) נעויתי שׁחתי עד מאד כל היום קדר הלכתי׃⁷ (38:8) כי כסלי מלאו נקלה ואין מתם בבשׂרי׃⁸ (38:9) נפוגותי ונדכיתי עד מאד שׁאגתי מנהמת לבי׃⁹ (38:10) אדני נגדך כל תאותי ואנחתי ממך לא נסתרה׃¹⁰ (38:11) לבי סחרחר עזבני כחי ואור עיני גם הם אין אתי׃¹¹ (38:12) אהבי ורעי מנגד נגעי יעמדו וקרובי מרחק עמדו׃¹² (38:13) וינקשׁו מבקשׁי נפשׁי ודרשׁי רעתי דברו הוות ומרמות כל היום יהגו׃¹³ (38:14) ואני כחרשׁ לא אשׁמע וכאלם לא יפתח פיו׃¹⁴ (38:15) ואהי כאישׁ אשׁר לא שׁמע ואין בפיו תוכחות׃¹⁵ (38:16) כי לך יהוה הוחלתי אתה תענה אדני אלהי׃¹⁶ (38:17) כי אמרתי פן ישׂמחו לי במוט רגלי עלי הגדילו׃¹⁷ (38:18) כי אני לצלע נכון ומכאובי נגדי תמיד׃¹⁸ (38:19) כי עוני אגיד אדאג מחטאתי׃¹⁹ (38:20) ואיבי חיים עצמו ורבו שׂנאי שׁקר׃²⁰ (38:21) ומשׁלמי רעה תחת טובה ישׂטנוני תחת רדופי טוב׃²¹ (38:22) אל תעזבני יהוה אלהי אל תרחק ממני׃²² (38:23) חושׁה לעזרתי אדני תשׁועתי׃

¹ למנצח לידיתון מזמור לדוד׃ (39:2) אמרתי אשׁמרה דרכי מחטוא בלשׁוני אשׁמרה לפי מחסום בעד רשׁע לנגדי׃² (39:3) נאלמתי דומיה החשׁיתי מטוב וכאבי נעכר׃³ (39:4) חם לבי בקרבי בהגיגי תבער אשׁ דברתי בלשׁוני׃⁴ (39:5) הודיעני יהוה קצי ומדת ימי מה היא אדעה מה חדל אני׃⁵ (39:6) הנה טפחות נתתה ימי וחלדי כאין נגדך אך כל הבל כל אדם נצב סלה׃⁶ (39:7) אך בצלם יתהלך אישׁ אך הבל יהמיון יצבר ולא ידע מי אספם׃⁷ (39:8) ועתה מה קויתי אדני תוחלתי לך היא׃⁸ (39:9) מכל פשׁעי הצילני חרפת נבל אל תשׂימני׃⁹ (39:10) נאלמתי לא אפתח פי כי אתה עשׂית׃¹⁰ (39:11) הסר מעלי נגעך מתגרת ידך אני כליתי׃¹¹ (39:12) בתוכחות על עון יסרת אישׁ ותמס כעשׁ חמודו אך הבל כל אדם סלה׃¹² (39:13) שׁמעה תפלתי יהוה ושׁועתי האזינה אל דמעתי אל תחרשׁ כי גר אנכי עמך תושׁב ככל אבותי׃¹³ (39:14) השׁע ממני ואבליגה בטרם אלך ואינני׃

¹ למנצח לדוד מזמור׃ (40:2) קוה קויתי יהוה ויט אלי וישׁמע שׁועתי׃² (40:3) ויעלני מבור שׁאון מטיט היון ויקם על סלע רגלי כונן אשׁרי׃³ (40:4) ויתן בפי שׁיר חדשׁ תהלה לאלהינו יראו רבים וייראו ויבטחו ביהוה׃⁴ (40:5) אשׁרי הגבר אשׁר שׂם יהוה מבטחו ולא פנה אל רהבים ושׂטי כזב׃⁵ (40:6) רבות עשׂית אתה יהוה אלהי נפלאתיך ומחשׁבתיך אלינו אין ערך אליך אגידה ואדברה עצמו מספר׃⁶ (40:7) זבח ומנחה לא חפצת אזנים כרית לי עולה וחטאה לא שׁאלת׃⁷ (40:8) אז אמרתי הנה באתי במגלת ספר כתוב עלי׃⁸ (40:9) לעשׂות רצונך אלהי חפצתי ותורתך בתוך מעי׃⁹ (40:10) בשׂרתי צדק בקהל רב הנה שׂפתי לא אכלא יהוה אתה ידעת׃¹⁰ (40:11) צדקתך לא כסיתי בתוך לבי אמונתך ותשׁועתך אמרתי לא כחדתי חסדך ואמתך לקהל רב׃¹¹ (40:12) אתה יהוה לא תכלא רחמיך ממני חסדך ואמתך תמיד יצרוני׃¹² (40:13) כי אפפו עלי רעות עד אין מספר השׂיגוני עונתי ולא יכלתי לראות עצמו משׂערות ראשׁי ולבי עזבני׃¹³ (40:14) רצה יהוה להצילני יהוה לעזרתי חושׁה׃¹⁴ (40:15) יבשׁו ויחפרו יחד מבקשׁי נפשׁי לספותה יסגו אחור ויכלמו חפצי רעתי׃¹⁵ (40:16) ישׁמו על עקב בשׁתם האמרים לי האח האח׃¹⁶ (40:17) ישׂישׂו וישׂמחו בך כל מבקשׁיך יאמרו תמיד יגדל יהוה אהבי תשׁועתך׃¹⁷ (40:18) ואני עני ואביון אדני יחשׁב לי עזרתי ומפלטי אתה אלהי אל תאחר׃

¹ למנצח מזמור לדוד׃ (41:2) אשׁרי משׂכיל אל דל ביום רעה ימלטהו יהוה׃² (41:3) יהוה ישׁמרהו ויחיהו יאשׁר בארץ ואל תתנהו בנפשׁ איביו׃³ (41:4) יהוה יסעדנו על ערשׂ דוי כל משׁכבו הפכת בחליו׃⁴ (41:5) אני אמרתי יהוה חנני רפאה נפשׁי כי חטאתי׃⁵ (41:6) אויבי יאמרו רע לי מתי ימות ואבד שׁמו׃⁶ (41:7) ואם בא לראות שׁוא ידבר לבו יקבץ און לו יצא לחוץ ידבר׃⁷ (41:8) יחד עלי יתלחשׁו כל שׂנאי עלי יחשׁבו רעה׃⁸ (41:9) דבר בליעל יצוק בו ואשׁר שׁכב לא יוסיף לקום׃⁹ (41:10) גם אישׁ שׁלומי אשׁר בטחתי בו אוכל לחמי הגדיל עלי עקב׃¹⁰ (41:11) ואתה יהוה חנני והקימני ואשׁלמה להם׃¹¹ (41:12) בזאת ידעתי כי חפצת בי כי לא יריע איבי עלי׃¹² (41:13) ואני בתמי תמכת בי ותציבני לפניך לעולם׃¹³ (41:14) ברוך יהוה אלהי ישׂראל מהעולם ועד העולם אמן ואמן׃

¹ למנצח משׂכיל לבני קרח׃ (42:2) כאיל תערג על אפיקי מים כן נפשׁי תערג אליך אלהים׃² (42:3) צמאה נפשׁי לאלהים לאל חי מתי אבוא ואראה פני אלהים׃³ (42:4) היתה לי דמעתי לחם יומם ולילה באמר אלי כל היום איה אלהיך׃⁴ (42:5) אלה אזכרה ואשׁפכה עלי נפשׁי כי אעבר בסך אדדם עד בית אלהים בקול רנה ותודה המון חוגג׃⁵ (42:6) מה תשׁתוחחי נפשׁי ותהמי עלי הוחילי לאלהים כי עוד אודנו ישׁועות פניו׃⁶ (42:7) אלהי עלי נפשׁי תשׁתוחח על כן אזכרך מארץ ירדן וחרמונים מהר מצער׃⁷ (42:8) תהום אל תהום קורא לקול צנוריך כל משׁבריך וגליך עלי עברו׃⁸ (42:9) יומם יצוה יהוה חסדו ובלילה שׁירה עמי תפלה לאל חיי׃⁹ (42:10) אומרה לאל סלעי למה שׁכחתני למה קדר אלך בלחץ אויב׃¹⁰ (42:11) ברצח בעצמותי חרפוני צוררי באמרם אלי כל היום איה אלהיך׃¹¹ (42:12) מה תשׁתוחחי נפשׁי ומה תהמי עלי הוחילי לאלהים כי עוד אודנו ישׁועת פני ואלהי׃

¹ שׁפטני אלהים וריבה ריבי מגוי לא חסיד מאישׁ מרמה ועולה תפלטני׃² כי אתה אלהי מעוזי למה זנחתני למה קדר אתהלך בלחץ אויב׃³ שׁלח אורך ואמתך המה ינחוני יביאוני אל הר קדשׁך ואל משׁכנותיך׃⁴ ואבואה אל מזבח אלהים אל אל שׂמחת גילי ואודך בכנור אלהים אלהי׃⁵ מה תשׁתוחחי נפשׁי ומה תהמי עלי הוחילי לאלהים כי עוד אודנו ישׁועת פני ואלהי׃

¹ למנצח לבני קרח משׂכיל׃ (44:2) אלהים באזנינו שׁמענו אבותינו ספרו לנו פעל פעלת בימיהם בימי קדם׃² (44:3) אתה ידך גוים הורשׁת ותטעם תרע לאמים ותשׁלחם׃³ (44:4) כי לא בחרבם ירשׁו ארץ וזרועם לא הושׁיעה למו כי ימינך וזרועך ואור פניך כי רציתם׃⁴ (44:5) אתה הוא מלכי אלהים צוה ישׁועות יעקב׃⁵ (44:6) בך צרינו ננגח בשׁמך נבוס קמינו׃⁶ (44:7) כי לא בקשׁתי אבטח וחרבי לא תושׁיעני׃⁷ (44:8) כי הושׁעתנו מצרינו ומשׂנאינו הבישׁות׃⁸ (44:9) באלהים הללנו כל היום ושׁמך לעולם נודה סלה׃⁹ (44:10) אף זנחת ותכלימנו ולא תצא בצבאותינו׃¹⁰ (44:11) תשׁיבנו אחור מני צר ומשׂנאינו שׁסו׃¹¹ (44:12) תתננו כצאן מאכל ובגוים זריתנו׃¹² (44:13) תמכר עמך בלא הון ולא רבית במחיריהם׃¹³ (44:14) תשׂימנו חרפה לשׁכנינו לעג וקלס לסביבותינו׃¹⁴ (44:15) תשׂימנו משׁל בגוים מנוד ראשׁ בל אמים׃¹⁵ (44:16) כל היום כלמתי נגדי ובשׁת פני כסתני׃¹⁶ (44:17) מקול מחרף ומגדף מפני אויב ומתנקם׃¹⁷ (44:18) כל זאת באתנו ולא שׁכחנוך ולא שׁקרנו בבריתך׃¹⁸ (44:19) לא נסוג אחור לבנו ותט אשׁרינו מני ארחך׃¹⁹ (44:20) כי דכיתנו במקום תנים ותכס עלינו בצלמות׃²⁰ (44:21) אם שׁכחנו שׁם אלהינו ונפרשׂ כפינו לאל זר׃²¹ (44:22) הלא אלהים יחקר זאת כי הוא ידע תעלמות לב׃²² (44:23) כי עליך הרגנו כל היום נחשׁבנו כצאן טבחה׃²³ (44:24) עורה למה תישׁן אדני הקיצה אל תזנח לנצח׃²⁴ (44:25) למה פניך תסתיר תשׁכח ענינו ולחצנו׃²⁵ (44:26) כי שׁחה לעפר נפשׁנו דבקה לארץ בטננו׃²⁶ (44:27) קומה עזרתה לנו ופדנו למען חסדך׃

¹ למנצח על שׁשׁנים לבני קרח משׂכיל שׁיר ידידת׃ (45:2) רחשׁ לבי דבר טוב אני מעשׂי אמר למלך לשׁוני עט סופר מהיר׃² (45:3) יפיפית מבני אדם הוצק חן בשׂפתותיך על כן ברכך אלהים לעולם׃³ (45:4) חגור חרבך על ירך גבור הודך והדרך׃⁴ (45:5) והדרך צלח רכב על דבר אמת וענוה צדק ותורך נוראות ימינך׃⁵ (45:6) חציך שׁנונים עמים תחתיך יפלו בלב אויבי המלך׃⁶ (45:7) כסאך אלהים עולם ועד שׁבט מישׁר שׁבט מלכותך׃⁷ (45:8) אהבת צדק ותשׂנא רשׁע על כן משׁחך אלהים אלהיך שׁמן שׂשׂון מחבריך׃⁸ (45:9) מר ואהלות קציעות כל בגדתיך מן היכלי שׁן מני שׂמחוך׃⁹ (45:10) בנות מלכים ביקרותיך נצבה שׁגל לימינך בכתם אופיר׃¹⁰ (45:11) שׁמעי בת וראי והטי אזנך ושׁכחי עמך ובית אביך׃¹¹ (45:12) ויתאו המלך יפיך כי הוא אדניך והשׁתחוי׃¹² (45:13) ובת צר במנחה פניך יחלו עשׁירי עם׃¹³ (45:14) כל כבודה בת מלך פנימה ממשׁבצות זהב לבושׁה׃¹⁴ (45:15) לרקמות תובל למלך בתולות אחריה רעותיה מובאות׃¹⁵ (45:16) תובלנה בשׂמחת וגיל תבאינה בהיכל מלך׃¹⁶ (45:17) תחת אבתיך יהיו בניך תשׁיתמו לשׂרים בכל הארץ׃¹⁷ (45:18) אזכירה שׁמך בכל דר ודר על כן עמים יהודך לעלם ועד׃

¹ למנצח לבני קרח על עלמות שׁיר׃ (46:2) אלהים לנו מחסה ועז עזרה בצרות נמצא מאד׃² (46:3) על כן לא נירא בהמיר ארץ ובמוט הרים בלב ימים׃³ (46:4) יהמו יחמרו מימיו ירעשׁו הרים בגאותו סלה׃⁴ (46:5) נהר פלגיו ישׂמחו עיר אלהים קדשׁ משׁכני עליון׃⁵ (46:6) אלהים בקרבה בל תמוט יעזרה אלהים לפנות בקר׃⁶ (46:7) המו גוים מטו ממלכות נתן בקולו תמוג ארץ׃⁷ (46:8) יהוה צבאות עמנו משׂגב לנו אלהי יעקב סלה׃⁸ (46:9) לכו חזו מפעלות יהוה אשׁר שׂם שׁמות בארץ׃⁹ (46:10) משׁבית מלחמות עד קצה הארץ קשׁת ישׁבר וקצץ חנית עגלות ישׂרף באשׁ׃¹⁰ (46:11) הרפו ודעו כי אנכי אלהים ארום בגוים ארום בארץ׃¹¹ (46:12) יהוה צבאות עמנו משׂגב לנו אלהי יעקב סלה׃

¹ למנצח לבני קרח מזמור׃ (47:2) כל העמים תקעו כף הריעו לאלהים בקול רנה׃² (47:3) כי יהוה עליון נורא מלך גדול על כל הארץ׃³ (47:4) ידבר עמים תחתינו ולאמים תחת רגלינו׃⁴ (47:5) יבחר לנו את נחלתנו את גאון יעקב אשׁר אהב סלה׃⁵ (47:6) עלה אלהים בתרועה יהוה בקול שׁופר׃⁶ (47:7) זמרו אלהים זמרו זמרו למלכנו זמרו׃⁷ (47:8) כי מלך כל הארץ אלהים זמרו משׂכיל׃⁸ (47:9) מלך אלהים על גוים אלהים ישׁב על כסא קדשׁו׃⁹ (47:10) נדיבי עמים נאספו עם אלהי אברהם כי לאלהים מגני ארץ מאד נעלה׃

¹ שׁיר מזמור לבני קרח׃ (48:2) גדול יהוה ומהלל מאד בעיר אלהינו הר קדשׁו׃² (48:3) יפה נוף משׂושׂ כל הארץ הר ציון ירכתי צפון קרית מלך רב׃³ (48:4) אלהים בארמנותיה נודע למשׂגב׃⁴ (48:5) כי הנה המלכים נועדו עברו יחדו׃⁵ (48:6) המה ראו כן תמהו נבהלו נחפזו׃⁶ (48:7) רעדה אחזתם שׁם חיל כיולדה׃⁷ (48:8) ברוח קדים תשׁבר אניות תרשׁישׁ׃⁸ (48:9) כאשׁר שׁמענו כן ראינו בעיר יהוה צבאות בעיר אלהינו אלהים יכוננה עד עולם סלה׃⁹ (48:10) דמינו אלהים חסדך בקרב היכלך׃¹⁰ (48:11) כשׁמך אלהים כן תהלתך על קצוי ארץ צדק מלאה ימינך׃¹¹ (48:12) ישׂמח הר ציון תגלנה בנות יהודה למען משׁפטיך׃¹² (48:13) סבו ציון והקיפוה ספרו מגדליה׃¹³ (48:14) שׁיתו לבכם לחילה פסגו ארמנותיה למען תספרו לדור אחרון׃¹⁴ (48:15) כי זה אלהים אלהינו עולם ועד הוא ינהגנו על מות׃

¹ למנצח לבני קרח מזמור׃ (49:2) שׁמעו זאת כל העמים האזינו כל ישׁבי חלד׃² (49:3) גם בני אדם גם בני אישׁ יחד עשׁיר ואביון׃³ (49:4) פי ידבר חכמות והגות לבי תבונות׃⁴ (49:5) אטה למשׁל אזני אפתח בכנור חידתי׃⁵ (49:6) למה אירא בימי רע עון עקבי יסובני׃⁶ (49:7) הבטחים על חילם וברב עשׁרם יתהללו׃⁷ (49:8) אח לא פדה יפדה אישׁ לא יתן לאלהים כפרו׃⁸ (49:9) ויקר פדיון נפשׁם וחדל לעולם׃⁹ (49:10) ויחי עוד לנצח לא יראה השׁחת׃¹⁰ (49:11) כי יראה חכמים ימותו יחד כסיל ובער יאבדו ועזבו לאחרים חילם׃¹¹ (49:12) קרבם בתימו לעולם משׁכנתם לדר ודר קראו בשׁמותם עלי אדמות׃¹² (49:13) ואדם ביקר בל ילין נמשׁל כבהמות נדמו׃¹³ (49:14) זה דרכם כסל למו ואחריהם בפיהם ירצו סלה׃¹⁴ (49:15) כצאן לשׁאול שׁתו מות ירעם וירדו בם ישׁרים לבקר וצירם לבלות שׁאול מזבל׃¹⁵ (49:16) אך אלהים יפדה נפשׁי מיד שׁאול כי יקחני סלה׃¹⁶ (49:17) אל תירא כי יעשׁר אישׁ כי ירבה כבוד ביתו׃¹⁷ (49:18) כי לא במותו יקח הכל לא ירד אחריו כבודו׃¹⁸ (49:19) כי נפשׁו בחייו יברך ויודך כי תיטיב׃¹⁹ (49:20) תבוא עד דור אבותיו עד נצח לא יראו אור׃²⁰ (49:21) אדם ביקר ולא יבין נמשׁל כבהמות נדמו׃

¹ מזמור לאסף אל אלהים יהוה דבר ויקרא ארץ ממזרח שׁמשׁ עד מבאו׃² מציון מכלל יפי אלהים הופיע׃³ יבא אלהינו ואל יחרשׁ אשׁ לפניו תאכל וסביביו נשׂערה מאד׃⁴ יקרא אל השׁמים מעל ואל הארץ לדין עמו׃⁵ אספו לי חסידי כרתי בריתי עלי זבח׃⁶ ויגידו שׁמים צדקו כי אלהים שׁפט הוא סלה׃⁷ שׁמעה עמי ואדברה ישׂראל ואעידה בך אלהים אלהיך אנכי׃⁸ לא על זבחיך אוכיחך ועולתיך לנגדי תמיד׃⁹ לא אקח מביתך פר ממכלאתיך עתודים׃¹⁰ כי לי כל חיתו יער בהמות בהררי אלף׃¹¹ ידעתי כל עוף הרים וזיז שׂדי עמדי׃¹² אם ארעב לא אמר לך כי לי תבל ומלאה׃¹³ האוכל בשׂר אבירים ודם עתודים אשׁתה׃¹⁴ זבח לאלהים תודה ושׁלם לעליון נדריך׃¹⁵ וקראני ביום צרה אחלצך ותכבדני׃¹⁶ ולרשׁע אמר אלהים מה לך לספר חקי ותשׂא בריתי עלי פיך׃¹⁷ ואתה שׂנאת מוסר ותשׁלך דברי אחריך׃¹⁸ אם ראית גנב ותרץ עמו ועם מנאפים חלקך׃¹⁹ פיך שׁלחת ברעה ולשׁונך תצמיד מרמה׃²⁰ תשׁב באחיך תדבר בבן אמך תתן דפי׃²¹ אלה עשׂית והחרשׁתי דמית היות אהיה כמוך אוכיחך ואערכה לעיניך׃²² בינו נא זאת שׁכחי אלוה פן אטרף ואין מציל׃²³ זבח תודה יכבדנני ושׂם דרך אראנו בישׁע אלהים׃

¹ למנצח מזמור לדוד׃ (51:2) בבוא אליו נתן הנביא כאשׁר בא אל בת\'ceשׁבע׃ (51:3) חנני אלהים כחסדך כרב רחמיך מחה פשׁעי׃² (51:4) הרבה כבסני מעוני ומחטאתי טהרני׃³ (51:5) כי פשׁעי אני אדע וחטאתי נגדי תמיד׃⁴ (51:6) לך לבדך חטאתי והרע בעיניך עשׂיתי למען תצדק בדברך תזכה בשׁפטך׃⁵ (51:7) הן בעוון חוללתי ובחטא יחמתני אמי׃⁶ (51:8) הן אמת חפצת בטחות ובסתם חכמה תודיעני׃⁷ (51:9) תחטאני באזוב ואטהר תכבסני ומשׁלג אלבין׃⁸ (51:10) תשׁמיעני שׂשׂון ושׂמחה תגלנה עצמות דכית׃⁹ (51:11) הסתר פניך מחטאי וכל עונתי מחה׃¹⁰ (51:12) לב טהור ברא לי אלהים ורוח נכון חדשׁ בקרבי׃¹¹ (51:13) אל תשׁליכני מלפניך ורוח קדשׁך אל תקח ממני׃¹² (51:14) השׁיבה לי שׂשׂון ישׁעך ורוח נדיבה תסמכני׃¹³ (51:15) אלמדה פשׁעים דרכיך וחטאים אליך ישׁובו׃¹⁴ (51:16) הצילני מדמים אלהים אלהי תשׁועתי תרנן לשׁוני צדקתך׃¹⁵ (51:17) אדני שׂפתי תפתח ופי יגיד תהלתך׃¹⁶ (51:18) כי לא תחפץ זבח ואתנה עולה לא תרצה׃¹⁷ (51:19) זבחי אלהים רוח נשׁברה לב נשׁבר ונדכה אלהים לא תבזה׃¹⁸ (51:20) היטיבה ברצונך את ציון תבנה חומות ירושׁלם׃¹⁹ (51:21) אז תחפץ זבחי צדק עולה וכליל אז יעלו על מזבחך פרים׃

¹ למנצח משׂכיל לדוד׃ (52:2) בבוא דואג האדמי ויגד לשׁאול ויאמר לו בא דוד אל בית אחימלך׃ (52:3) מה תתהלל ברעה הגבור חסד אל כל היום׃² (52:4) הוות תחשׁב לשׁונך כתער מלטשׁ עשׂה רמיה׃³ (52:5) אהבת רע מטוב שׁקר מדבר צדק סלה׃⁴ (52:6) אהבת כל דברי בלע לשׁון מרמה׃⁵ (52:7) גם אל יתצך לנצח יחתך ויסחך מאהל ושׁרשׁך מארץ חיים סלה׃⁶ (52:8) ויראו צדיקים וייראו ועליו ישׂחקו׃⁷ (52:9) הנה הגבר לא ישׂים אלהים מעוזו ויבטח ברב עשׁרו יעז בהותו׃⁸ (52:10) ואני כזית רענן בבית אלהים בטחתי בחסד אלהים עולם ועד׃⁹ (52:11) אודך לעולם כי עשׂית ואקוה שׁמך כי טוב נגד חסידיך׃

¹ למנצח על מחלת משׂכיל לדוד׃ (53:2) אמר נבל בלבו אין אלהים השׁחיתו והתעיבו עול אין עשׂה טוב׃² (53:3) אלהים משׁמים השׁקיף על בני אדם לראות הישׁ משׂכיל דרשׁ את אלהים׃³ (53:4) כלו סג יחדו נאלחו אין עשׂה טוב אין גם אחד׃⁴ (53:5) הלא ידעו פעלי און אכלי עמי אכלו לחם אלהים לא קראו׃⁵ (53:6) שׁם פחדו פחד לא היה פחד כי אלהים פזר עצמות חנך הבשׁתה כי אלהים מאסם׃⁶ (53:7) מי יתן מציון ישׁעות ישׂראל בשׁוב אלהים שׁבות עמו יגל יעקב ישׂמח ישׂראל׃

¹ למנצח בנגינת משׂכיל לדוד׃ (54:2) בבוא הזיפים ויאמרו לשׁאול הלא דוד מסתתר עמנו׃ (54:3) אלהים בשׁמך הושׁיעני ובגבורתך תדינני׃² (54:4) אלהים שׁמע תפלתי האזינה לאמרי פי׃³ (54:5) כי זרים קמו עלי ועריצים בקשׁו נפשׁי לא שׂמו אלהים לנגדם סלה׃⁴ (54:6) הנה אלהים עזר לי אדני בסמכי נפשׁי׃⁵ (54:7) ישׁוב הרע לשׁררי באמתך הצמיתם׃⁶ (54:8) בנדבה אזבחה לך אודה שׁמך יהוה כי טוב׃⁷ (54:9) כי מכל צרה הצילני ובאיבי ראתה עיני׃

¹ למנצח בנגינת משׂכיל לדוד׃ (55:2) האזינה אלהים תפלתי ואל תתעלם מתחנתי׃² (55:3) הקשׁיבה לי וענני אריד בשׂיחי ואהימה׃³ (55:4) מקול אויב מפני עקת רשׁע כי ימיטו עלי און ובאף ישׂטמוני׃⁴ (55:5) לבי יחיל בקרבי ואימות מות נפלו עלי׃⁵ (55:6) יראה ורעד יבא בי ותכסני פלצות׃⁶ (55:7) ואמר מי יתן לי אבר כיונה אעופה ואשׁכנה׃⁷ (55:8) הנה ארחיק נדד אלין במדבר סלה׃⁸ (55:9) אחישׁה מפלט לי מרוח סעה מסער׃⁹ (55:10) בלע אדני פלג לשׁונם כי ראיתי חמס וריב בעיר׃¹⁰ (55:11) יומם ולילה יסובבה על חומתיה ואון ועמל בקרבה׃¹¹ (55:12) הוות בקרבה ולא ימישׁ מרחבה תך ומרמה׃¹² (55:13) כי לא אויב יחרפני ואשׂא לא משׂנאי עלי הגדיל ואסתר ממנו׃¹³ (55:14) ואתה אנושׁ כערכי אלופי ומידעי׃¹⁴ (55:15) אשׁר יחדו נמתיק סוד בבית אלהים נהלך ברגשׁ׃¹⁵ (55:16) ישׁימות עלימו ירדו שׁאול חיים כי רעות במגורם בקרבם׃¹⁶ (55:17) אני אל אלהים אקרא ויהוה יושׁיעני׃¹⁷ (55:18) ערב ובקר וצהרים אשׂיחה ואהמה וישׁמע קולי׃¹⁸ (55:19) פדה בשׁלום נפשׁי מקרב לי כי ברבים היו עמדי׃¹⁹ (55:20) ישׁמע אל ויענם וישׁב קדם סלה אשׁר אין חליפות למו ולא יראו אלהים׃²⁰ (55:21) שׁלח ידיו בשׁלמיו חלל בריתו׃²¹ (55:22) חלקו מחמאת פיו וקרב לבו רכו דבריו משׁמן והמה פתחות׃²² (55:23) השׁלך על יהוה יהבך והוא יכלכלך לא יתן לעולם מוט לצדיק׃²³ (55:24) ואתה אלהים תורדם לבאר שׁחת אנשׁי דמים ומרמה לא יחצו ימיהם ואני אבטח׃

¹ למנצח על יונת אלם רחקים לדוד מכתם באחז אתו פלשׁתים בגת׃ (56:2) חנני אלהים כי שׁאפני אנושׁ כל היום לחם ילחצני׃² (56:3) שׁאפו שׁוררי כל היום כי רבים לחמים לי מרום׃³ (56:4) יום אירא אני אליך אבטח׃⁴ (56:5) באלהים אהלל דברו באלהים בטחתי לא אירא מה יעשׂה בשׂר׃⁵ (56:6) כל היום דברי יעצבו עלי כל מחשׁבתם לרע׃⁶ (56:7) יגורו יצפינו המה עקבי ישׁמרו כאשׁר קוו נפשׁי׃⁷ (56:8) על און פלט למו באף עמים הורד אלהים׃⁸ (56:9) נדי ספרתה אתה שׂימה דמעתי בנאדך הלא בספרתך׃⁹ (56:10) אז ישׁובו אויבי אחור ביום אקרא זה ידעתי כי אלהים׃¹⁰ (56:11) באלהים אהלל דבר ביהוה אהלל דבר׃¹¹ (56:12) באלהים בטחתי לא אירא מה יעשׂה אדם׃¹² (56:13) עלי אלהים נדריך אשׁלם תודת׃¹³ (56:14) כי הצלת נפשׁי ממות הלא רגלי מדחי להתהלך לפני אלהים באור החיים׃

¹ למנצח אל תשׁחת לדוד מכתם בברחו מפני שׁאול במערה׃ (57:2) חנני אלהים חנני כי בך חסיה נפשׁי ובצל כנפיך אחסה עד יעבר הוות׃² (57:3) אקרא לאלהים עליון לאל גמר עלי׃³ (57:4) ישׁלח משׁמים ויושׁיעני חרף שׁאפי סלה ישׁלח אלהים חסדו ואמתו׃⁴ (57:5) נפשׁי בתוך לבאם אשׁכבה להטים בני אדם שׁניהם חנית וחצים ולשׁונם חרב חדה׃⁵ (57:6) רומה על השׁמים אלהים על כל הארץ כבודך׃⁶ (57:7) רשׁת הכינו לפעמי כפף נפשׁי כרו לפני שׁיחה נפלו בתוכה סלה׃⁷ (57:8) נכון לבי אלהים נכון לבי אשׁירה ואזמרה׃⁸ (57:9) עורה כבודי עורה הנבל וכנור אעירה שׁחר׃⁹ (57:10) אודך בעמים אדני אזמרך בל אמים׃¹⁰ (57:11) כי גדל עד שׁמים חסדך ועד שׁחקים אמתך׃¹¹ (57:12) רומה על שׁמים אלהים על כל הארץ כבודך׃

¹ למנצח אל תשׁחת לדוד מכתם׃ (58:2) האמנם אלם צדק תדברון מישׁרים תשׁפטו בני אדם׃² (58:3) אף בלב עולת תפעלון בארץ חמס ידיכם תפלסון׃³ (58:4) זרו רשׁעים מרחם תעו מבטן דברי כזב׃⁴ (58:5) חמת למו כדמות חמת נחשׁ כמו פתן חרשׁ יאטם אזנו׃⁵ (58:6) אשׁר לא ישׁמע לקול מלחשׁים חובר חברים מחכם׃⁶ (58:7) אלהים הרס שׁנימו בפימו מלתעות כפירים נתץ יהוה׃⁷ (58:8) ימאסו כמו מים יתהלכו למו ידרך חצו כמו יתמללו׃⁸ (58:9) כמו שׁבלול תמס יהלך נפל אשׁת בל חזו שׁמשׁ׃⁹ (58:10) בטרם יבינו סירתיכם אטד כמו חי כמו חרון ישׂערנו׃¹⁰ (58:11) ישׂמח צדיק כי חזה נקם פעמיו ירחץ בדם הרשׁע׃¹¹ (58:12) ויאמר אדם אך פרי לצדיק אך ישׁ אלהים שׁפטים בארץ׃

¹ למנצח אל תשׁחת לדוד מכתם בשׁלח שׁאול וישׁמרו את הבית להמיתו׃ (59:2) הצילני מאיבי אלהי ממתקוממי תשׂגבני׃² (59:3) הצילני מפעלי און ומאנשׁי דמים הושׁיעני׃³ (59:4) כי הנה ארבו לנפשׁי יגורו עלי עזים לא פשׁעי ולא חטאתי יהוה׃⁴ (59:5) בלי עון ירוצון ויכוננו עורה לקראתי וראה׃⁵ (59:6) ואתה יהוה אלהים צבאות אלהי ישׂראל הקיצה לפקד כל הגוים אל תחן כל בגדי און סלה׃⁶ (59:7) ישׁובו לערב יהמו ככלב ויסובבו עיר׃⁷ (59:8) הנה יביעון בפיהם חרבות בשׂפתותיהם כי מי שׁמע׃⁸ (59:9) ואתה יהוה תשׂחק למו תלעג לכל גוים׃⁹ (59:10) עזו אליך אשׁמרה כי אלהים משׂגבי׃¹⁰ (59:11) אלהי חסדו יקדמני אלהים יראני בשׁררי׃¹¹ (59:12) אל תהרגם פן ישׁכחו עמי הניעמו בחילך והורידמו מגננו אדני׃¹² (59:13) חטאת פימו דבר שׂפתימו וילכדו בגאונם ומאלה ומכחשׁ יספרו׃¹³ (59:14) כלה בחמה כלה ואינמו וידעו כי אלהים משׁל ביעקב לאפסי הארץ סלה׃¹⁴ (59:15) וישׁובו לערב יהמו ככלב ויסובבו עיר׃¹⁵ (59:16) המה ינועון לאכל אם לא ישׂבעו וילינו׃¹⁶ (59:17) ואני אשׁיר עזך וארנן 2'ecבקר חסדך כי היית משׂגב לי ומנוס ביום צר׃¹⁷ (59:18) עזי אליך אזמרה כי אלהים משׂגבי אלהי חסדי׃

¹ למנצח על שׁושׁן עדות מכתם לדוד ללמד׃ (60:2) בהצותו את ארם נהרים ואת ארם צובה וישׁב יואב ויך את אדום בגיא מלח שׁנים עשׂר אלף׃ (60:3) אלהים זנחתנו פרצתנו אנפת תשׁובב² (60:4) הרעשׁתה ארץ פצמתה רפה שׁבריה כי מטה׃³ (60:5) הראיתה עמך קשׁה השׁקיתנו יין תרעלה׃⁴ (60:6) נתתה ליראיך נס להתנוסס מפני קשׁט סלה׃⁵ (60:7) למען יחלצון ידידיך הושׁיעה ימינך ועננו׃⁶ (60:8) אלהים דבר בקדשׁו אעלזה אחלקה שׁכם ועמק סכות אמדד׃⁷ (60:9) לי גלעד ולי מנשׁה ואפרים מעוז ראשׁי יהודה מחקקי׃⁸ (60:10) מואב סיר רחצי על אדום אשׁליך נעלי עלי פלשׁת התרעעי׃⁹ (60:11) מי יבלני עיר מצור מי נחני עד אדום׃¹⁰ (60:12) הלא אתה אלהים זנחתנו ולא תצא אלהים בצבאותינו׃¹¹ (60:13) הבה לנו עזרת מצר ושׁוא תשׁועת אדם׃¹² (60:14) באלהים נעשׂה חיל והוא יבוס צרינו׃

¹ למנצח על נגינת לדוד׃ (61:2) שׁמעה אלהים רנתי הקשׁיבה תפלתי׃² (61:3) מקצה הארץ אליך אקרא בעטף לבי בצור ירום ממני תנחני׃³ (61:4) כי היית מחסה לי מגדל עז מפני אויב׃⁴ (61:5) אגורה באהלך עולמים אחסה בסתר כנפיך סלה׃⁵ (61:6) כי אתה אלהים שׁמעת לנדרי נתת ירשׁת יראי שׁמך׃⁶ (61:7) ימים על ימי מלך תוסיף שׁנותיו כמו דר ודר׃⁷ (61:8) ישׁב עולם לפני אלהים חסד ואמת מן ינצרהו׃⁸ (61:9) כן אזמרה שׁמך לעד לשׁלמי נדרי יום יום׃

¹ למנצח על ידותון מזמור לדוד׃ (62:2) אך אל אלהים דומיה נפשׁי ממנו ישׁועתי׃² (62:3) אך הוא צורי וישׁועתי משׂגבי לא אמוט רבה׃³ (62:4) עד אנה תהותתו על אישׁ תרצחו כלכם כקיר נטוי גדר הדחויה׃⁴ (62:5) אך משׂאתו יעצו להדיח ירצו כזב בפיו יברכו ובקרבם יקללו סלה׃⁵ (62:6) אך לאלהים דומי נפשׁי כי ממנו תקותי׃⁶ (62:7) אך הוא צורי וישׁועתי משׂגבי לא אמוט׃⁷ (62:8) על אלהים ישׁעי וכבודי צור עזי מחסי באלהים׃⁸ (62:9) בטחו בו בכל עת עם שׁפכו לפניו לבבכם אלהים מחסה לנו סלה׃⁹ (62:10) אך הבל בני אדם כזב בני אישׁ במאזנים לעלות המה מהבל יחד׃¹⁰ (62:11) אל תבטחו בעשׁק ובגזל אל תהבלו חיל כי ינוב אל תשׁיתו לב׃¹¹ (62:12) אחת דבר אלהים שׁתים זו שׁמעתי כי עז לאלהים׃¹² (62:13) ולך אדני חסד כי אתה תשׁלם לאישׁ כמעשׂהו׃

¹ מזמור לדוד בהיותו במדבר יהודה׃ (63:2) אלהים אלי אתה אשׁחרך צמאה לך נפשׁי כמה לך בשׂרי בארץ ציה ועיף בלי מים׃² (63:3) כן בקדשׁ חזיתיך לראות עזך וכבודך׃³ (63:4) כי טוב חסדך מחיים שׂפתי ישׁבחונך׃⁴ (63:5) כן אברכך בחיי בשׁמך אשׂא כפי׃⁵ (63:6) כמו חלב ודשׁן תשׂבע נפשׁי ושׂפתי רננות יהלל פי׃⁶ (63:7) אם זכרתיך על יצועי באשׁמרות אהגה׃⁷ (63:8) כי היית עזרתה לי ובצל כנפיך ארנן׃⁸ (63:9) דבקה נפשׁי אחריך בי תמכה ימינך׃⁹ (63:10) והמה לשׁואה יבקשׁו נפשׁי יבאו בתחתיות הארץ׃¹⁰ (63:11) יגירהו על ידי חרב מנת שׁעלים יהיו׃¹¹ (63:12) והמלך ישׂמח באלהים יתהלל כל הנשׁבע בו כי יסכר פי דוברי שׁקר׃

¹ למנצח מזמור לדוד׃ (64:2) שׁמע אלהים קולי בשׂיחי מפחד אויב תצר חיי׃² (64:3) תסתירני מסוד מרעים מרגשׁת פעלי און׃³ (64:4) אשׁר שׁננו כחרב לשׁונם דרכו חצם דבר מר׃⁴ (64:5) לירות במסתרים תם פתאם ירהו ולא ייראו׃⁵ (64:6) יחזקו למו דבר רע יספרו לטמון מוקשׁים אמרו מי יראה׃⁶ (64:7) יחפשׂו עולת תמנו חפשׂ מחפשׂ וקרב אישׁ ולב עמק׃⁷ (64:8) וירם אלהים חץ פתאום היו מכותם׃⁸ (64:9) ויכשׁילוהו עלימו לשׁונם יתנדדו כל ראה׃⁹ (64:10) וייראו כל אדם ויגידו פעל אלהים ומעשׂהו השׂכילו׃¹⁰ (64:11) ישׂמח צדיק ביהוה וחסה בו ויתהללו כל ישׁרי לב׃

¹ למנצח מזמור לדוד שׁיר׃ (65:2) לך דמיה תהלה אלהים בציון ולך ישׁלם נדר׃² (65:3) שׁמע תפלה עדיך כל בשׂר יבאו׃³ (65:4) דברי עונת גברו מני פשׁעינו אתה תכפרם׃⁴ (65:5) אשׁרי תבחר ותקרב ישׁכן חצריך נשׂבעה בטוב ביתך קדשׁ היכלך׃⁵ (65:6) נוראות בצדק תעננו אלהי ישׁענו מבטח כל קצוי ארץ וים רחקים׃⁶ (65:7) מכין הרים בכחו נאזר בגבורה׃⁷ (65:8) משׁביח שׁאון ימים שׁאון גליהם והמון לאמים׃⁸ (65:9) וייראו ישׁבי קצות מאותתיך מוצאי בקר וערב תרנין׃⁹ (65:10) פקדת הארץ ותשׁקקה רבת תעשׁרנה פלג אלהים מלא מים תכין דגנם כי כן תכינה׃¹⁰ (65:11) תלמיה רוה נחת גדודיה ברביבים תמגגנה צמחה תברך׃¹¹ (65:12) עטרת שׁנת טובתך ומעגליך ירעפון דשׁן׃¹² (65:13) ירעפו נאות מדבר וגיל גבעות תחגרנה׃¹³ (65:14) לבשׁו כרים הצאן ועמקים יעטפו בר יתרועעו אף ישׁירו׃

¹ למנצח שׁיר מזמור הריעו לאלהים כל הארץ׃² זמרו כבוד שׁמו שׂימו כבוד תהלתו׃³ אמרו לאלהים מה נורא מעשׂיך ברב עזך יכחשׁו לך איביך׃⁴ כל הארץ ישׁתחוו לך ויזמרו לך יזמרו שׁמך סלה׃⁵ לכו וראו מפעלות אלהים נורא עלילה על בני אדם׃⁶ הפך ים ליבשׁה בנהר יעברו ברגל שׁם נשׂמחה׃⁷ משׁל בגבורתו עולם עיניו בגוים תצפינה הסוררים אל ירימו למו סלה׃⁸ ברכו עמים אלהינו והשׁמיעו קול תהלתו׃⁹ השׂם נפשׁנו בחיים ולא נתן למוט רגלנו׃¹⁰ כי בחנתנו אלהים צרפתנו כצרף כסף׃¹¹ הבאתנו במצודה שׂמת מועקה במתנינו׃¹² הרכבת אנושׁ לראשׁנו באנו באשׁ ובמים ותוציאנו לרויה׃¹³ אבוא ביתך בעולות אשׁלם לך נדרי׃¹⁴ אשׁר פצו שׂפתי ודבר פי בצר׃¹⁵ עלות מחים אעלה לך עם קטרת אילים אעשׂה בקר עם עתודים סלה׃¹⁶ לכו שׁמעו ואספרה כל יראי אלהים אשׁר עשׂה לנפשׁי׃¹⁷ אליו פי קראתי ורומם תחת לשׁוני׃¹⁸ און אם ראיתי בלבי לא ישׁמע אדני׃¹⁹ אכן שׁמע אלהים הקשׁיב בקול תפלתי׃²⁰ ברוך אלהים אשׁר לא הסיר תפלתי וחסדו מאתי׃

¹ למנצח בנגינת מזמור שׁיר׃ (67:2) אלהים יחננו ויברכנו יאר פניו אתנו סלה׃² (67:3) לדעת בארץ דרכך בכל גוים ישׁועתך׃³ (67:4) יודוך עמים אלהים יודוך עמים כלם׃⁴ (67:5) ישׂמחו וירננו לאמים כי תשׁפט עמים מישׁור ולאמים בארץ תנחם סלה׃⁵ (67:6) יודוך עמים אלהים יודוך עמים כלם׃⁶ (67:7) ארץ נתנה יבולה יברכנו אלהים אלהינו׃⁷ (67:8) יברכנו אלהים וייראו אתו כל אפסי ארץ׃

¹ למנצח לדוד מזמור שׁיר׃ (68:2) יקום אלהים יפוצו אויביו וינוסו משׂנאיו מפניו׃² (68:3) כהנדף עשׁן תנדף כהמס דונג מפני אשׁ יאבדו רשׁעים מפני אלהים׃³ (68:4) וצדיקים ישׂמחו יעלצו לפני אלהים וישׂישׂו בשׂמחה׃⁴ (68:5) שׁירו לאלהים זמרו שׁמו סלו לרכב בערבות ביה שׁמו ועלזו לפניו׃⁵ (68:6) אבי יתומים ודין אלמנות אלהים במעון קדשׁו׃⁶ (68:7) אלהים מושׁיב יחידים ביתה מוציא אסירים בכושׁרות אך סוררים שׁכנו צחיחה׃⁷ (68:8) אלהים בצאתך לפני עמך בצעדך בישׁימון סלה׃⁸ (68:9) ארץ רעשׁה אף שׁמים נטפו מפני אלהים זה סיני מפני אלהים אלהי ישׂראל׃⁹ (68:10) גשׁם נדבות תניף אלהים נחלתך ונלאה אתה כוננתה׃¹⁰ (68:11) חיתך ישׁבו בה תכין בטובתך לעני אלהים׃¹¹ (68:12) אדני יתן אמר המבשׂרות צבא רב׃¹² (68:13) מלכי צבאות ידדון ידדון ונות בית תחלק שׁלל׃¹³ (68:14) אם תשׁכבון בין שׁפתים כנפי יונה נחפה בכסף ואברותיה בירקרק חרוץ׃¹⁴ (68:15) בפרשׂ שׁדי מלכים בה תשׁלג בצלמון׃¹⁵ (68:16) הר אלהים הר בשׁן הר גבננים הר בשׁן׃¹⁶ (68:17) למה תרצדון הרים גבננים ההר חמד אלהים לשׁבתו אף יהוה ישׁכן לנצח׃¹⁷ (68:18) רכב אלהים רבתים אלפי שׁנאן אדני בם סיני בקדשׁ׃¹⁸ (68:19) עלית למרום שׁבית שׁבי לקחת מתנות באדם ואף סוררים לשׁכן יה אלהים׃¹⁹ (68:20) ברוך אדני יום יום יעמס לנו האל ישׁועתנו סלה׃²⁰ (68:21) האל לנו אל למושׁעות וליהוה אדני למות תוצאות׃²¹ (68:22) אך אלהים ימחץ ראשׁ איביו קדקד שׂער מתהלך באשׁמיו׃²² (68:23) אמר אדני מבשׁן אשׁיב אשׁיב ממצלות ים׃²³ (68:24) למען תמחץ רגלך בדם לשׁון כלביך מאיבים מנהו׃²⁴ (68:25) ראו הליכותיך אלהים הליכות אלי מלכי בקדשׁ׃²⁵ (68:26) קדמו שׁרים אחר נגנים בתוך עלמות תופפות׃²⁶ (68:27) במקהלות ברכו אלהים יהוה ממקור ישׂראל׃²⁷ (68:28) שׁם בנימן צעיר רדם שׂרי יהודה רגמתם שׂרי זבלון שׂרי נפתלי׃²⁸ (68:29) צוה אלהיך עזך עוזה אלהים זו פעלת׃²⁹ (68:30) מהיכלך על ירושׁלם לך יובילו מלכים שׁי׃³⁰ (68:31) גער חית קנה עדת אבירים בעגלי עמים מתרפס ברצי כסף בזר עמים קרבות יחפצו׃³¹ (68:32) יאתיו חשׁמנים מני מצרים כושׁ תריץ ידיו לאלהים׃³² (68:33) ממלכות הארץ שׁירו לאלהים זמרו אדני סלה׃³³ (68:34) לרכב בשׁמי שׁמי קדם הן יתן בקולו קול עז׃³⁴ (68:35) תנו עז לאלהים על ישׂראל גאותו ועזו בשׁחקים׃³⁵ (68:36) נורא אלהים ממקדשׁיך אל ישׂראל הוא נתן עז ותעצמות לעם ברוך אלהים׃

¹ למנצח על שׁושׁנים לדוד׃ (69:2) הושׁיעני אלהים כי באו מים עד נפשׁ׃² (69:3) טבעתי ביון מצולה ואין מעמד באתי במעמקי מים ושׁבלת שׁטפתני׃³ (69:4) יגעתי בקראי נחר גרוני כלו עיני מיחל לאלהי׃⁴ (69:5) רבו משׂערות ראשׁי שׂנאי חנם עצמו מצמיתי איבי שׁקר אשׁר לא גזלתי אז אשׁיב׃⁵ (69:6) אלהים אתה ידעת לאולתי ואשׁמותי ממך לא נכחדו׃⁶ (69:7) אל יבשׁו בי קויך אדני יהוה צבאות אל יכלמו בי מבקשׁיך אלהי ישׂראל׃⁷ (69:8) כי עליך נשׂאתי חרפה כסתה כלמה פני׃⁸ (69:9) מוזר הייתי לאחי ונכרי לבני אמי׃⁹ (69:10) כי קנאת ביתך אכלתני וחרפות חורפיך נפלו עלי׃¹⁰ (69:11) ואבכה בצום נפשׁי ותהי לחרפות׃¹¹ (69:12) ואתנה לבושׁי שׂק ואהי להם למשׁל׃¹² (69:13) ישׂיחו בי ישׁבי שׁער ונגינות שׁותי שׁכר׃¹³ (69:14) ואני תפלתי לך יהוה עת רצון אלהים ברב חסדך ענני באמת ישׁעך׃¹⁴ (69:15) הצילני מטיט ואל אטבעה אנצלה משׂנאי וממעמקי מים׃¹⁵ (69:16) אל תשׁטפני שׁבלת מים ואל תבלעני מצולה ואל תאטר עלי באר פיה׃¹⁶ (69:17) ענני יהוה כי טוב חסדך כרב רחמיך פנה אלי׃¹⁷ (69:18) ואל תסתר פניך מעבדך כי צר לי מהר ענני׃¹⁸ (69:19) קרבה אל נפשׁי גאלה למען איבי פדני׃¹⁹ (69:20) אתה ידעת חרפתי ובשׁתי וכלמתי נגדך כל צוררי׃²⁰ (69:21) חרפה שׁברה לבי ואנושׁה ואקוה לנוד ואין ולמנחמים ולא מצאתי׃²¹ (69:22) ויתנו בברותי ראשׁ ולצמאי ישׁקוני חמץ׃²² (69:23) יהי שׁלחנם לפניהם לפח ולשׁלומים למוקשׁ׃²³ (69:24) תחשׁכנה עיניהם מראות ומתניהם תמיד המעד׃²⁴ (69:25) שׁפך עליהם זעמך וחרון אפך ישׂיגם׃²⁵ (69:26) תהי טירתם נשׁמה באהליהם אל יהי ישׁב׃²⁶ (69:27) כי אתה אשׁר הכית רדפו ואל מכאוב חלליך יספרו׃²⁷ (69:28) תנה עון על עונם ואל יבאו בצדקתך׃²⁸ (69:29) ימחו מספר חיים ועם צדיקים אל יכתבו׃²⁹ (69:30) ואני עני וכואב ישׁועתך אלהים תשׂגבני׃³⁰ (69:31) אהללה שׁם אלהים בשׁיר ואגדלנו בתודה׃³¹ (69:32) ותיטב ליהוה משׁור פר מקרן מפריס׃³² (69:33) ראו ענוים ישׂמחו דרשׁי אלהים ויחי לבבכם׃³³ (69:34) כי שׁמע אל אביונים יהוה ואת אסיריו לא בזה׃³⁴ (69:35) יהללוהו שׁמים וארץ ימים וכל רמשׂ׃³⁵ (69:36) כי אלהים יושׁיע ציון ויבנה ערי יהודה וישׁבו שׁם וירשׁוה׃³⁶ (69:37) וזרע עבדיו ינחלוה ואהבי שׁמו ישׁכנו׃

¹ למנצח לדוד להזכיר׃ (70:2) אלהים להצילני יהוה לעזרתי חושׁה׃² (70:3) יבשׁו ויחפרו מבקשׁי נפשׁי יסגו אחור ויכלמו חפצי רעתי׃³ (70:4) ישׁובו על עקב בשׁתם האמרים האח האח׃⁴ (70:5) ישׂישׂו וישׂמחו בך כל מבקשׁיך ויאמרו תמיד יגדל אלהים אהבי ישׁועתך׃⁵ (70:6) ואני עני ואביון אלהים חושׁה לי עזרי ומפלטי אתה יהוה אל תאחר׃

¹ בך יהוה חסיתי אל אבושׁה לעולם׃² בצדקתך תצילני ותפלטני הטה אלי אזנך והושׁיעני׃³ היה לי לצור מעון לבוא תמיד צוית להושׁיעני כי סלעי ומצודתי אתה׃⁴ אלהי פלטני מיד רשׁע מכף מעול וחומץ׃⁵ כי אתה תקותי אדני יהוה מבטחי מנעורי׃⁶ עליך נסמכתי מבטן ממעי אמי אתה גוזי בך תהלתי תמיד׃⁷ כמופת הייתי לרבים ואתה מחסי עז׃⁸ ימלא פי תהלתך כל היום תפארתך׃⁹ אל תשׁליכני לעת זקנה ככלות כחי אל תעזבני׃¹⁰ כי אמרו אויבי לי ושׁמרי נפשׁי נועצו יחדו׃¹¹ לאמר אלהים עזבו רדפו ותפשׂוהו כי אין מציל׃¹² אלהים אל תרחק ממני אלהי לעזרתי חישׁה׃¹³ יבשׁו יכלו שׂטני נפשׁי יעטו חרפה וכלמה מבקשׁי רעתי׃¹⁴ ואני תמיד איחל והוספתי על כל תהלתך׃¹⁵ פי יספר צדקתך כל היום תשׁועתך כי לא ידעתי ספרות׃¹⁶ אבוא בגברות אדני יהוה אזכיר צדקתך לבדך׃¹⁷ אלהים למדתני מנעורי ועד הנה אגיד נפלאותיך׃¹⁸ וגם עד זקנה ושׂיבה אלהים אל תעזבני עד אגיד זרועך לדור לכל יבוא גבורתך׃¹⁹ וצדקתך אלהים עד מרום אשׁר עשׂית גדלות אלהים מי כמוך׃²⁰ אשׁר הראיתנו צרות רבות ורעות תשׁוב תחיינו ומתהמות הארץ תשׁוב תעלני׃²¹ תרב גדלתי ותסב תנחמני׃²² גם אני אודך בכלי נבל אמתך אלהי אזמרה לך בכנור קדושׁ ישׂראל׃²³ תרננה שׂפתי כי אזמרה לך ונפשׁי אשׁר פדית׃²⁴ גם לשׁוני כל היום תהגה צדקתך כי בשׁו כי חפרו מבקשׁי רעתי׃

¹ לשׁלמה אלהים משׁפטיך למלך תן וצדקתך לבן מלך׃² ידין עמך בצדק וענייך במשׁפט׃³ ישׂאו הרים שׁלום לעם וגבעות בצדקה׃⁴ ישׁפט עניי עם יושׁיע לבני אביון וידכא עושׁק׃⁵ ייראוך עם שׁמשׁ ולפני ירח דור דורים׃⁶ ירד כמטר על גז כרביבים זרזיף ארץ׃⁷ יפרח בימיו צדיק ורב שׁלום עד בלי ירח׃⁸ וירד מים עד ים ומנהר עד אפסי ארץ׃⁹ לפניו יכרעו ציים ואיביו עפר ילחכו׃¹⁰ מלכי תרשׁישׁ ואיים מנחה ישׁיבו מלכי שׁבא וסבא אשׁכר יקריבו׃¹¹ וישׁתחוו לו כל מלכים כל גוים יעבדוהו׃¹² כי יציל אביון משׁוע ועני ואין עזר׃¹³ יחס על דל ואביון ונפשׁות אביונים יושׁיע׃¹⁴ מתוך ומחמס יגאל נפשׁם וייקר דמם בעיניו׃¹⁵ ויחי ויתן לו מזהב שׁבא ויתפלל בעדו תמיד כל היום יברכנהו׃¹⁶ יהי פסת בר בארץ בראשׁ הרים ירעשׁ כלבנון פריו ויציצו מעיר כעשׂב הארץ׃¹⁷ יהי שׁמו לעולם לפני שׁמשׁ ינין שׁמו ויתברכו בו כל גוים יאשׁרוהו׃¹⁸ ברוך יהוה אלהים אלהי ישׂראל עשׂה נפלאות לבדו׃¹⁹ וברוך שׁם כבודו לעולם וימלא כבודו את כל הארץ אמן ואמן׃²⁰ כלו תפלות דוד בן ישׁי׃

¹ מזמור לאסף אך טוב לישׂראל אלהים לברי לבב׃² ואני כמעט נטוי רגלי כאין שׁפכה אשׁרי׃³ כי קנאתי בהוללים שׁלום רשׁעים אראה׃⁴ כי אין חרצבות למותם ובריא אולם׃⁵ בעמל אנושׁ אינמו ועם אדם לא ינגעו׃⁶ לכן ענקתמו גאוה יעטף שׁית חמס׃⁷ יצא מחלב עינמו עברו משׂכיות לבב׃⁸ ימיקו וידברו ברע עשׁק ממרום ידברו׃⁹ שׁתו בשׁמים פיהם ולשׁונם תהלך בארץ׃¹⁰ לכן ישׁיב עמו הלם ומי מלא ימצו׃¹¹ ואמרו איכה ידע אל וישׁ דעה בעליון׃¹² הנה אלה רשׁעים ושׁלוי עולם השׂגו חיל׃¹³ אך ריק זכיתי לבבי וארחץ בנקיון כפי׃¹⁴ ואהי נגוע כל היום ותוכחתי לבקרים׃¹⁵ אם אמרתי אספרה כמו הנה דור בניך בגדתי׃¹⁶ ואחשׁבה לדעת זאת עמל היא בעיני׃¹⁷ עד אבוא אל מקדשׁי אל אבינה לאחריתם׃¹⁸ אך בחלקות תשׁית למו הפלתם למשׁואות׃¹⁹ איך היו לשׁמה כרגע ספו תמו מן בלהות׃²⁰ כחלום מהקיץ אדני בעיר צלמם תבזה׃²¹ כי יתחמץ לבבי וכליותי אשׁתונן׃²² ואני בער ולא אדע בהמות הייתי עמך׃²³ ואני תמיד עמך אחזת ביד ימיני׃²⁴ בעצתך תנחני ואחר כבוד תקחני׃²⁵ מי לי בשׁמים ועמך לא חפצתי בארץ׃²⁶ כלה שׁארי ולבבי צור לבבי וחלקי אלהים לעולם׃²⁷ כי הנה רחקיך יאבדו הצמתה כל זונה ממך׃²⁸ ואני קרבת אלהים לי טוב שׁתי באדני יהוה מחסי לספר כל מלאכותיך׃

¹ משׂכיל לאסף למה אלהים זנחת לנצח יעשׁן אפך בצאן מרעיתך׃² זכר עדתך קנית קדם גאלת שׁבט נחלתך הר ציון זה שׁכנת׃³ הרימה פעמיך למשׁאות נצח כל הרע אויב בקדשׁ׃⁴ שׁאגו צרריך בקרב מועדך שׂמו אותתם אתות׃⁵ יודע כמביא למעלה בסבך עץ קרדמות׃⁶ ועת פתוחיה יחד בכשׁיל וכילפת יהלמון׃⁷ שׁלחו באשׁ מקדשׁך לארץ חללו משׁכן שׁמך׃⁸ אמרו בלבם נינם יחד שׂרפו כל מועדי אל בארץ׃⁹ אותתינו לא ראינו אין עוד נביא ולא אתנו ידע עד מה׃¹⁰ עד מתי אלהים יחרף צר ינאץ אויב שׁמך לנצח׃¹¹ למה תשׁיב ידך וימינך מקרב חוקך כלה׃¹² ואלהים מלכי מקדם פעל ישׁועות בקרב הארץ׃¹³ אתה פוררת בעזך ים שׁברת ראשׁי תנינים על המים׃¹⁴ אתה רצצת ראשׁי לויתן תתננו מאכל לעם לציים׃¹⁵ אתה בקעת מעין ונחל אתה הובשׁת נהרות איתן׃¹⁶ לך יום אף לך לילה אתה הכינות מאור ושׁמשׁ׃¹⁷ אתה הצבת כל גבולות ארץ קיץ וחרף אתה יצרתם׃¹⁸ זכר זאת אויב חרף יהוה ועם נבל נאצו שׁמך׃¹⁹ אל תתן לחית נפשׁ תורך חית ענייך אל תשׁכח לנצח׃²⁰ הבט לברית כי מלאו מחשׁכי ארץ נאות חמס׃²¹ אל ישׁב דך נכלם עני ואביון יהללו שׁמך׃²² קומה אלהים ריבה ריבך זכר חרפתך מני נבל כל היום׃²³ אל תשׁכח קול צרריך שׁאון קמיך עלה תמיד׃

¹ למנצח אל תשׁחת מזמור לאסף שׁיר׃ (75:2) הודינו לך אלהים הודינו וקרוב שׁמך ספרו נפלאותיך׃² (75:3) כי אקח מועד אני מישׁרים אשׁפט׃³ (75:4) נמגים ארץ וכל ישׁביה אנכי תכנתי עמודיה סלה׃⁴ (75:5) אמרתי להוללים אל תהלו ולרשׁעים אל תרימו קרן׃⁵ (75:6) אל תרימו למרום קרנכם תדברו בצואר עתק׃⁶ (75:7) כי לא ממוצא וממערב ולא ממדבר הרים׃⁷ (75:8) כי אלהים שׁפט זה ישׁפיל וזה ירים׃⁸ (75:9) כי כוס ביד יהוה ויין חמר מלא מסך ויגר מזה אך שׁמריה ימצו ישׁתו כל רשׁעי ארץ׃⁹ (75:10) ואני אגיד לעלם אזמרה לאלהי יעקב׃¹⁰ (75:11) וכל קרני רשׁעים אגדע תרוממנה קרנות צדיק׃

¹ למנצח בנגינת מזמור לאסף שׁיר׃ (76:2) נודע ביהודה אלהים בישׂראל גדול שׁמו׃² (76:3) ויהי בשׁלם סכו ומעונתו בציון׃³ (76:4) שׁמה שׁבר רשׁפי קשׁת מגן וחרב ומלחמה סלה׃⁴ (76:5) נאור אתה אדיר מהררי טרף׃⁵ (76:6) אשׁתוללו אבירי לב נמו שׁנתם ולא מצאו כל אנשׁי חיל ידיהם׃⁶ (76:7) מגערתך אלהי יעקב נרדם ורכב וסוס׃⁷ (76:8) אתה נורא אתה ומי יעמד לפניך מאז אפך׃⁸ (76:9) משׁמים השׁמעת דין ארץ יראה ושׁקטה׃⁹ (76:10) בקום למשׁפט אלהים להושׁיע כל ענוי ארץ סלה׃¹⁰ (76:11) כי חמת אדם תודך שׁארית חמת תחגר׃¹¹ (76:12) נדרו ושׁלמו ליהוה אלהיכם כל סביביו יובילו שׁי למורא׃¹² (76:13) יבצר רוח נגידים נורא למלכי ארץ׃

¹ למנצח על ידיתון לאסף מזמור׃ (77:2) קולי אל אלהים ואצעקה קולי אל אלהים והאזין אלי׃² (77:3) ביום צרתי אדני דרשׁתי ידי לילה נגרה ולא תפוג מאנה הנחם נפשׁי׃³ (77:4) אזכרה אלהים ואהמיה אשׂיחה ותתעטף רוחי סלה׃⁴ (77:5) אחזת שׁמרות עיני נפעמתי ולא אדבר׃⁵ (77:6) חשׁבתי ימים מקדם שׁנות עולמים׃⁶ (77:7) אזכרה נגינתי בלילה עם לבבי אשׂיחה ויחפשׂ רוחי׃⁷ (77:8) הלעולמים יזנח אדני ולא יסיף לרצות עוד׃⁸ (77:9) האפס לנצח חסדו גמר אמר לדר ודר׃⁹ (77:10) השׁכח חנות אל אם קפץ באף רחמיו סלה׃¹⁰ (77:11) ואמר חלותי היא שׁנות ימין עליון׃¹¹ (77:12) אזכיר מעללי יה כי אזכרה מקדם פלאך׃¹² (77:13) והגיתי בכל פעלך ובעלילותיך אשׂיחה׃¹³ (77:14) אלהים בקדשׁ דרכך מי אל גדול כאלהים׃¹⁴ (77:15) אתה האל עשׂה פלא הודעת בעמים עזך׃¹⁵ (77:16) גאלת בזרוע עמך בני יעקב ויוסף סלה׃¹⁶ (77:17) ראוך מים אלהים ראוך מים יחילו אף ירגזו תהמות׃¹⁷ (77:18) זרמו מים עבות קול נתנו שׁחקים אף חצציך יתהלכו׃¹⁸ (77:19) קול רעמך בגלגל האירו ברקים תבל רגזה ותרעשׁ הארץ׃¹⁹ (77:20) בים דרכך ושׁביליך במים רבים ועקבותיך לא נדעו׃²⁰ (77:21) נחית כצאן עמך ביד משׁה ואהרן׃

¹ משׂכיל לאסף האזינה עמי תורתי הטו אזנכם לאמרי פי׃² אפתחה במשׁל פי אביעה חידות מני קדם׃³ אשׁר שׁמענו ונדעם ואבותינו ספרו׃⁴ לא נכחד מבניהם לדור אחרון מספרים תהלות יהוה ועזוזו ונפלאותיו אשׁר עשׂה׃⁵ ויקם עדות ביעקב ותורה שׂם בישׂראל אשׁר צוה את אבותינו להודיעם לבניהם׃⁶ למען ידעו דור אחרון בנים יולדו יקמו ויספרו לבניהם׃⁷ וישׂימו באלהים כסלם ולא ישׁכחו מעללי אל ומצותיו ינצרו׃⁸ ולא יהיו כאבותם דור סורר ומרה דור לא הכין לבו ולא נאמנה את אל רוחו׃⁹ בני אפרים נושׁקי רומי קשׁת הפכו ביום קרב׃¹⁰ לא שׁמרו ברית אלהים ובתורתו מאנו ללכת׃¹¹ וישׁכחו עלילותיו ונפלאותיו אשׁר הראם׃¹² נגד אבותם עשׂה פלא בארץ מצרים שׂדה צען׃¹³ בקע ים ויעבירם ויצב מים כמו נד׃¹⁴ וינחם בענן יומם וכל הלילה באור אשׁ׃¹⁵ יבקע צרים במדבר וישׁק כתהמות רבה׃¹⁶ ויוצא נוזלים מסלע ויורד כנהרות מים׃¹⁷ ויוסיפו עוד לחטא לו למרות עליון בציה׃¹⁸ וינסו אל בלבבם לשׁאל אכל לנפשׁם׃¹⁹ וידברו באלהים אמרו היוכל אל לערך שׁלחן במדבר׃²⁰ הן הכה צור ויזובו מים ונחלים ישׁטפו הגם לחם יוכל תת אם יכין שׁאר לעמו׃²¹ לכן שׁמע יהוה ויתעבר ואשׁ נשׂקה ביעקב וגם אף עלה בישׂראל׃²² כי לא האמינו באלהים ולא בטחו בישׁועתו׃²³ ויצו שׁחקים ממעל ודלתי שׁמים פתח׃²⁴ וימטר עליהם מן לאכל ודגן שׁמים נתן׃²⁵ לחם אבירים אכל אישׁ צידה שׁלח להם לשׂבע׃²⁶ יסע קדים בשׁמים וינהג בעזו תימן׃²⁷ וימטר עליהם כעפר שׁאר וכחול ימים עוף כנף׃²⁸ ויפל בקרב מחנהו סביב למשׁכנתיו׃²⁹ ויאכלו וישׂבעו מאד ותאותם יבא להם׃³⁰ לא זרו מתאותם עוד אכלם בפיהם׃³¹ ואף אלהים עלה בהם ויהרג במשׁמניהם ובחורי ישׂראל הכריע׃³² בכל זאת חטאו עוד ולא האמינו בנפלאותיו׃³³ ויכל בהבל ימיהם ושׁנותם בבהלה׃³⁴ אם הרגם ודרשׁוהו ושׁבו ושׁחרו אל׃³⁵ ויזכרו כי אלהים צורם ואל עליון גאלם׃³⁶ ויפתוהו בפיהם ובלשׁונם יכזבו׃³⁷ ולבם לא נכון עמו ולא נאמנו בבריתו׃³⁸ והוא רחום יכפר עון ולא ישׁחית והרבה להשׁיב אפו ולא יעיר כל חמתו׃³⁹ ויזכר כי בשׂר המה רוח הולך ולא ישׁוב׃⁴⁰ כמה ימרוהו במדבר יעציבוהו בישׁימון׃⁴¹ וישׁובו וינסו אל וקדושׁ ישׂראל התוו׃⁴² לא זכרו את ידו יום אשׁר פדם מני צר׃⁴³ אשׁר שׂם במצרים אתותיו ומופתיו בשׂדה צען׃⁴⁴ ויהפך לדם יאריהם ונזליהם בל ישׁתיון׃⁴⁵ ישׁלח בהם ערב ויאכלם וצפרדע ותשׁחיתם׃⁴⁶ ויתן לחסיל יבולם ויגיעם לארבה׃⁴⁷ יהרג בברד גפנם ושׁקמותם בחנמל׃⁴⁸ ויסגר לברד בעירם ומקניהם לרשׁפים׃⁴⁹ ישׁלח בם חרון אפו עברה וזעם וצרה משׁלחת מלאכי רעים׃⁵⁰ יפלס נתיב לאפו לא חשׂך ממות נפשׁם וחיתם לדבר הסגיר׃⁵¹ ויך כל בכור במצרים ראשׁית אונים באהלי חם׃⁵² ויסע כצאן עמו וינהגם כעדר במדבר׃⁵³ וינחם לבטח ולא פחדו ואת אויביהם כסה הים׃⁵⁴ ויביאם אל גבול קדשׁו הר זה קנתה ימינו׃⁵⁵ ויגרשׁ מפניהם גוים ויפילם בחבל נחלה וישׁכן באהליהם שׁבטי ישׂראל׃⁵⁶ וינסו וימרו את אלהים עליון ועדותיו לא שׁמרו׃⁵⁷ ויסגו ויבגדו כאבותם נהפכו כקשׁת רמיה׃⁵⁸ ויכעיסוהו בבמותם ובפסיליהם יקניאוהו׃⁵⁹ שׁמע אלהים ויתעבר וימאס מאד בישׂראל׃⁶⁰ ויטשׁ משׁכן שׁלו אהל שׁכן באדם׃⁶¹ ויתן לשׁבי עזו ותפארתו ביד צר׃⁶² ויסגר לחרב עמו ובנחלתו התעבר׃⁶³ בחוריו אכלה אשׁ ובתולתיו לא הוללו׃⁶⁴ כהניו בחרב נפלו ואלמנתיו לא תבכינה׃⁶⁵ ויקץ כישׁן אדני כגבור מתרונן מיין׃⁶⁶ ויך צריו אחור חרפת עולם נתן׃⁶⁷ וימאס באהל יוסף ובשׁבט אפרים לא בחר׃⁶⁸ ויבחר את שׁבט יהודה את הר ציון אשׁר אהב׃⁶⁹ ויבן כמו רמים מקדשׁו כארץ יסדה לעולם׃⁷⁰ ויבחר בדוד עבדו ויקחהו ממכלאת צאן׃⁷¹ מאחר עלות הביאו לרעות ביעקב עמו ובישׂראל נחלתו׃⁷² וירעם כתם לבבו ובתבונות כפיו ינחם׃

¹ מזמור לאסף אלהים באו גוים בנחלתך טמאו את היכל קדשׁך שׂמו את ירושׁלם לעיים׃² נתנו את נבלת עבדיך מאכל לעוף השׁמים בשׂר חסידיך לחיתו ארץ׃³ שׁפכו דמם כמים סביבות ירושׁלם ואין קובר׃⁴ היינו חרפה לשׁכנינו לעג וקלס לסביבותינו׃⁵ עד מה יהוה תאנף לנצח תבער כמו אשׁ קנאתך׃⁶ שׁפך חמתך אל הגוים אשׁר לא ידעוך ועל ממלכות אשׁר בשׁמך לא קראו׃⁷ כי אכל את יעקב ואת נוהו השׁמו׃⁸ אל תזכר לנו עונת ראשׁנים מהר יקדמונו רחמיך כי דלונו מאד׃⁹ עזרנו אלהי ישׁענו על דבר כבוד שׁמך והצילנו וכפר על חטאתינו למען שׁמך׃¹⁰ למה יאמרו הגוים איה אלהיהם יודע בגיים לעינינו נקמת דם עבדיך השׁפוך׃¹¹ תבוא לפניך אנקת אסיר כגדל זרועך הותר בני תמותה׃¹² והשׁב לשׁכנינו שׁבעתים אל חיקם חרפתם אשׁר חרפוך אדני׃¹³ ואנחנו עמך וצאן מרעיתך נודה לך לעולם לדר ודר נספר תהלתך׃

¹ למנצח אל שׁשׁנים עדות לאסף מזמור׃ (80:2) רעה ישׂראל האזינה נהג כצאן יוסף ישׁב הכרובים הופיעה׃² (80:3) לפני אפרים ובנימן ומנשׁה עוררה את גבורתך ולכה לישׁעתה׃³ (80:4) אלהים השׁיבנו והאר פניך ונושׁעה׃⁴ (80:5) יהוה אלהים צבאות עד מתי עשׁנת בתפלת עמך׃⁵ (80:6) האכלתם לחם דמעה ותשׁקמו בדמעות שׁלישׁ׃⁶ (80:7) תשׂימנו מדון לשׁכנינו ואיבינו ילעגו׃⁷ (80:8) אלהים צבאות השׁיבנו והאר פניך ונושׁעה׃⁸ (80:9) גפן ממצרים תסיע תגרשׁ גוים ותטעה׃⁹ (80:10) פנית לפניה ותשׁרשׁ שׁרשׁיה ותמלא ארץ׃¹⁰ (80:11) כסו הרים צלה וענפיה ארזי אל׃¹¹ (80:12) תשׁלח קצירה עד ים ואל נהר יונקותיה׃¹² (80:13) למה פרצת גדריה וארוה כל עברי דרך׃¹³ (80:14) יכרסמנה חזיר מיער וזיז שׂדי ירענה׃¹⁴ (80:15) אלהים צבאות שׁוב נא הבט משׁמים וראה ופקד גפן זאת׃¹⁵ (80:16) וכנה אשׁר נטעה ימינך ועל בן אמצתה׃¹⁶ (80:17) שׂרפה באשׁ כסוחה מגערת פניך יאבדו׃¹⁷ (80:18) תהי ידך על אישׁ ימינך על בן אדם אמצת׃¹⁸ (80:19) ולא נסוג ממך תחינו ובשׁמך נקרא׃¹⁹ (80:20) יהוה אלהים צבאות השׁיבנו האר פניך ונושׁעה׃

¹ למנצח על הגתית לאסף׃ (81:2) הרנינו לאלהים עוזנו הריעו לאלהי יעקב׃² (81:3) שׂאו זמרה ותנו תף כנור נעים עם נבל׃³ (81:4) תקעו בחדשׁ שׁופר בכסה ליום חגנו׃⁴ (81:5) כי חק לישׂראל הוא משׁפט לאלהי יעקב׃⁵ (81:6) עדות ביהוסף שׂמו בצאתו על ארץ מצרים שׂפת לא ידעתי אשׁמע׃⁶ (81:7) הסירותי מסבל שׁכמו כפיו מדוד תעברנה׃⁷ (81:8) בצרה קראת ואחלצך אענך בסתר רעם אבחנך על מי מריבה סלה׃⁸ (81:9) שׁמע עמי ואעידה בך ישׂראל אם תשׁמע׃⁹ (81:10) לא יהיה בך אל זר ולא תשׁתחוה לאל נכר׃¹⁰ (81:11) אנכי יהוה אלהיך המעלך מארץ מצרים הרחב פיך ואמלאהו׃¹¹ (81:12) ולא שׁמע עמי לקולי וישׂראל לא אבה׃¹² (81:13) ואשׁלחהו בשׁרירות לבם ילכו במועצותיהם׃¹³ (81:14) לו עמי שׁמע לי ישׂראל בדרכי יהלכו׃¹⁴ (81:15) כמעט אויביהם אכניע ועל צריהם אשׁיב ידי׃¹⁵ (81:16) משׂנאי יהוה יכחשׁו לו ויהי עתם לעולם׃¹⁶ (81:17) ויאכילהו מחלב חטה ומצור דבשׁ אשׂביעך׃

¹ מזמור לאסף אלהים נצב בעדת אל בקרב אלהים ישׁפט׃² עד מתי תשׁפטו עול ופני רשׁעים תשׂאו סלה׃³ שׁפטו דל ויתום עני ורשׁ הצדיקו׃⁴ פלטו דל ואביון מיד רשׁעים הצילו׃⁵ לא ידעו ולא יבינו בחשׁכה יתהלכו ימוטו כל מוסדי ארץ׃⁶ אני אמרתי אלהים אתם ובני עליון כלכם׃⁷ אכן כאדם תמותון וכאחד השׂרים תפלו׃⁸ קומה אלהים שׁפטה הארץ כי אתה תנחל בכל הגוים׃

¹ שׁיר מזמור לאסף׃ (83:2) אלהים אל דמי לך אל תחרשׁ ואל תשׁקט אל׃² (83:3) כי הנה אויביך יהמיון ומשׂנאיך נשׂאו ראשׁ׃³ (83:4) על עמך יערימו סוד ויתיעצו על צפוניך׃⁴ (83:5) אמרו לכו ונכחידם מגוי ולא יזכר שׁם ישׂראל עוד׃⁵ (83:6) כי נועצו לב יחדו עליך ברית יכרתו׃⁶ (83:7) אהלי אדום וישׁמעאלים מואב והגרים׃⁷ (83:8) גבל ועמון ועמלק פלשׁת עם ישׁבי צור׃⁸ (83:9) גם אשׁור נלוה עמם היו זרוע לבני לוט סלה׃⁹ (83:10) עשׂה להם כמדין כסיסרא כיבין בנחל קישׁון׃¹⁰ (83:11) נשׁמדו בעין דאר היו דמן לאדמה׃¹¹ (83:12) שׁיתמו נדיבמו כערב וכזאב וכזבח וכצלמנע כל נסיכמו׃¹² (83:13) אשׁר אמרו נירשׁה לנו את נאות אלהים׃¹³ (83:14) אלהי שׁיתמו כגלגל כקשׁ לפני רוח׃¹⁴ (83:15) כאשׁ תבער יער וכלהבה תלהט הרים׃¹⁵ (83:16) כן תרדפם בסערך ובסופתך תבהלם׃¹⁶ (83:17) מלא פניהם קלון ויבקשׁו שׁמך יהוה׃¹⁷ (83:18) יבשׁו ויבהלו עדי עד ויחפרו ויאבדו׃¹⁸ (83:19) וידעו כי אתה שׁמך יהוה לבדך עליון על כל הארץ׃

¹ למנצח על הגתית לבני קרח מזמור׃ (84:2) מה ידידות משׁכנותיך יהוה צבאות׃² (84:3) נכספה וגם כלתה נפשׁי לחצרות יהוה לבי ובשׂרי ירננו אל אל חי׃³ (84:4) גם צפור מצאה בית ודרור קן לה אשׁר שׁתה אפרחיה את מזבחותיך יהוה צבאות מלכי ואלהי׃⁴ (84:5) אשׁרי יושׁבי ביתך עוד יהללוך סלה׃⁵ (84:6) אשׁרי אדם עוז לו בך מסלות בלבבם׃⁶ (84:7) עברי בעמק הבכא מעין ישׁיתוהו גם ברכות יעטה מורה׃⁷ (84:8) ילכו מחיל אל חיל יראה אל אלהים בציון׃⁸ (84:9) יהוה אלהים צבאות שׁמעה תפלתי האזינה אלהי יעקב סלה׃⁹ (84:10) מגננו ראה אלהים והבט פני משׁיחך׃¹⁰ (84:11) כי טוב יום בחצריך מאלף בחרתי הסתופף בבית אלהי מדור באהלי רשׁע׃¹¹ (84:12) כי שׁמשׁ ומגן יהוה אלהים חן וכבוד יתן יהוה לא ימנע טוב להלכים בתמים׃¹² (84:13) יהוה צבאות אשׁרי אדם בטח׃

¹ למנצח לבני קרח מזמור׃ (85:2) רצית יהוה ארצך שׁבת שׁבות יעקב׃² (85:3) נשׂאת עון עמך כסית כל חטאתם סלה׃³ (85:4) אספת כל עברתך השׁיבות מחרון אפך׃⁴ (85:5) שׁובנו אלהי ישׁענו והפר כעסך עמנו׃⁵ (85:6) הלעולם תאנף בנו תמשׁך אפך לדר ודר׃⁶ (85:7) הלא אתה תשׁוב תחינו ועמך ישׂמחו׃⁷ (85:8) הראנו יהוה חסדך וישׁעך תתן׃⁸ (85:9) אשׁמעה מה ידבר האל יהוה כי ידבר שׁלום אל עמו ואל חסידיו ואל ישׁובו לכסלה׃⁹ (85:10) אך קרוב ליראיו ישׁעו לשׁכן כבוד בארצנו׃¹⁰ (85:11) חסד ואמת נפגשׁו צדק ושׁלום נשׁקו׃¹¹ (85:12) אמת מארץ תצמח וצדק משׁמים נשׁקף׃¹² (85:13) גם יהוה יתן הטוב וארצנו תתן יבולה׃¹³ (85:14) צדק לפניו יהלך וישׂם לדרך פעמיו׃

¹ תפלה לדוד הטה יהוה אזנך ענני כי עני ואביון אני׃² שׁמרה נפשׁי כי חסיד אני הושׁע עבדך אתה אלהי הבוטח אליך׃³ חנני אדני כי אליך אקרא כל היום׃⁴ שׂמח נפשׁ עבדך כי אליך אדני נפשׁי אשׂא׃⁵ כי אתה אדני טוב וסלח ורב חסד לכל קראיך׃⁶ האזינה יהוה תפלתי והקשׁיבה בקול תחנונותי׃⁷ ביום צרתי אקראך כי תענני׃⁸ אין כמוך באלהים אדני ואין כמעשׂיך׃⁹ כל גוים אשׁר עשׂית יבואו וישׁתחוו לפניך אדני ויכבדו לשׁמך׃¹⁰ כי גדול אתה ועשׂה נפלאות אתה אלהים לבדך׃¹¹ הורני יהוה דרכך אהלך באמתך יחד לבבי ליראה שׁמך׃¹² אודך אדני אלהי בכל לבבי ואכבדה שׁמך לעולם׃¹³ כי חסדך גדול עלי והצלת נפשׁי משׁאול תחתיה׃¹⁴ אלהים זדים קמו עלי ועדת עריצים בקשׁו נפשׁי ולא שׂמוך לנגדם׃¹⁵ ואתה אדני אל רחום וחנון ארך אפים ורב חסד ואמת׃¹⁶ פנה אלי וחנני תנה עזך לעבדך והושׁיעה לבן אמתך׃¹⁷ עשׂה עמי אות לטובה ויראו שׂנאי ויבשׁו כי אתה יהוה עזרתני ונחמתני׃

¹ לבני קרח מזמור שׁיר יסודתו בהררי קדשׁ׃² אהב יהוה שׁערי ציון מכל משׁכנות יעקב׃³ נכבדות מדבר בך עיר האלהים סלה׃⁴ אזכיר רהב ובבל לידעי הנה פלשׁת וצור עם כושׁ זה ילד שׁם׃⁵ ולציון יאמר אישׁ ואישׁ ילד בה והוא יכוננה עליון׃⁶ יהוה יספר בכתוב עמים זה ילד שׁם סלה׃⁷ ושׁרים כחללים כל מעיני׃

¹ שׁיר מזמור לבני קרח למנצח על מחלת לענות משׂכיל להימן האזרחי׃ (88:2) יהוה אלהי ישׁועתי יום צעקתי בלילה נגדך׃² (88:3) תבוא לפניך תפלתי הטה אזנך לרנתי׃³ (88:4) כי שׂבעה ברעות נפשׁי וחיי לשׁאול הגיעו׃⁴ (88:5) נחשׁבתי עם יורדי בור הייתי כגבר אין איל׃⁵ (88:6) במתים חפשׁי כמו חללים שׁכבי קבר אשׁר לא זכרתם עוד והמה מידך נגזרו׃⁶ (88:7) שׁתני בבור תחתיות במחשׁכים במצלות׃⁷ (88:8) עלי סמכה חמתך וכל משׁבריך ענית סלה׃⁸ (88:9) הרחקת מידעי ממני שׁתני תועבות למו כלא ולא אצא׃⁹ (88:10) עיני דאבה מני עני קראתיך יהוה בכל יום שׁטחתי אליך כפי׃¹⁰ (88:11) הלמתים תעשׂה פלא אם רפאים יקומו יודוך סלה׃¹¹ (88:12) היספר בקבר חסדך אמונתך באבדון׃¹² (88:13) היודע בחשׁך פלאך וצדקתך בארץ נשׁיה׃¹³ (88:14) ואני אליך יהוה שׁועתי ובבקר תפלתי תקדמך׃¹⁴ (88:15) למה יהוה תזנח נפשׁי תסתיר פניך ממני׃¹⁵ (88:16) עני אני וגוע מנער נשׂאתי אמיך אפונה׃¹⁶ (88:17) עלי עברו חרוניך בעותיך צמתותני׃¹⁷ (88:18) סבוני כמים כל היום הקיפו עלי יחד׃¹⁸ (88:19) הרחקת ממני אהב ורע מידעי מחשׁך׃

¹ משׂכיל לאיתן האזרחי׃ (89:2) חסדי יהוה עולם אשׁירה לדר ודר אודיע אמונתך בפי׃² (89:3) כי אמרתי עולם חסד יבנה שׁמים תכן אמונתך׃³ (89:4) כרתי ברית לבחירי נשׁבעתי לדוד עבדי׃⁴ (89:5) עד עולם אכין זרעך ובניתי לדר ודור כסאך סלה׃⁵ (89:6) ויודו שׁמים פלאך יהוה אף אמונתך בקהל קדשׁים׃⁶ (89:7) כי מי בשׁחק יערך ליהוה ידמה ליהוה בבני אלים׃⁷ (89:8) אל נערץ בסוד קדשׁים רבה ונורא על כל סביביו׃⁸ (89:9) יהוה אלהי צבאות מי כמוך חסין יה ואמונתך סביבותיך׃⁹ (89:10) אתה מושׁל בגאות הים בשׂוא גליו אתה תשׁבחם׃¹⁰ (89:11) אתה דכאת כחלל רהב בזרוע עזך פזרת אויביך׃¹¹ (89:12) לך שׁמים אף לך ארץ תבל ומלאה אתה יסדתם׃¹² (89:13) צפון וימין אתה בראתם תבור וחרמון בשׁמך ירננו׃¹³ (89:14) לך זרוע עם גבורה תעז ידך תרום ימינך׃¹⁴ (89:15) צדק ומשׁפט מכון כסאך חסד ואמת יקדמו פניך׃¹⁵ (89:16) אשׁרי העם יודעי תרועה יהוה באור פניך יהלכון׃¹⁶ (89:17) בשׁמך יגילון כל היום ובצדקתך ירומו׃¹⁷ (89:18) כי תפארת עזמו אתה וברצנך תרים קרננו׃¹⁸ (89:19) כי ליהוה מגננו ולקדושׁ ישׂראל מלכנו׃¹⁹ (89:20) אז דברת בחזון לחסידיך ותאמר שׁויתי עזר על גבור הרימותי בחור מעם׃²⁰ (89:21) מצאתי דוד עבדי בשׁמן קדשׁי משׁחתיו׃²¹ (89:22) אשׁר ידי תכון עמו אף זרועי תאמצנו׃²² (89:23) לא ישׁא אויב בו ובן עולה לא יעננו׃²³ (89:24) וכתותי מפניו צריו ומשׂנאיו אגוף׃²⁴ (89:25) ואמונתי וחסדי עמו ובשׁמי תרום קרנו׃²⁵ (89:26) ושׂמתי בים ידו ובנהרות ימינו׃²⁶ (89:27) הוא יקראני אבי אתה אלי וצור ישׁועתי׃²⁷ (89:28) אף אני בכור אתנהו עליון למלכי ארץ׃²⁸ (89:29) לעולם אשׁמור לו חסדי ובריתי נאמנת׃²⁹ (89:30) ושׂמתי לעד זרעו וכסאו כימי שׁמים׃³⁰ (89:31) אם יעזבו בניו תורתי ובמשׁפטי לא ילכון׃³¹ (89:32) אם חקתי יחללו ומצותי לא ישׁמרו׃³² (89:33) ופקדתי בשׁבט פשׁעם ובנגעים עונם׃³³ (89:34) וחסדי לא אפיר מעמו ולא אשׁקר באמונתי׃³⁴ (89:35) לא אחלל בריתי ומוצא שׂפתי לא אשׁנה׃³⁵ (89:36) אחת נשׁבעתי בקדשׁי אם לדוד אכזב׃³⁶ (89:37) זרעו לעולם יהיה וכסאו כשׁמשׁ נגדי׃³⁷ (89:38) כירח יכון עולם ועד בשׁחק נאמן סלה׃³⁸ (89:39) ואתה זנחת ותמאס התעברת עם משׁיחך׃³⁹ (89:40) נארתה ברית עבדך חללת לארץ נזרו׃⁴⁰ (89:41) פרצת כל גדרתיו שׂמת מבצריו מחתה׃⁴¹ (89:42) שׁסהו כל עברי דרך היה חרפה לשׁכניו׃⁴² (89:43) הרימות ימין צריו השׂמחת כל אויביו׃⁴³ (89:44) אף תשׁיב צור חרבו ולא הקימתו במלחמה׃⁴⁴ (89:45) השׁבת מטהרו וכסאו לארץ מגרתה׃⁴⁵ (89:46) הקצרת ימי עלומיו העטית עליו בושׁה סלה׃⁴⁶ (89:47) עד מה יהוה תסתר לנצח תבער כמו אשׁ חמתך׃⁴⁷ (89:48) זכר אני מה חלד על מה שׁוא בראת כל בני אדם׃⁴⁸ (89:49) מי גבר יחיה ולא יראה מות ימלט נפשׁו מיד שׁאול סלה׃⁴⁹ (89:50) איה חסדיך הראשׁנים אדני נשׁבעת לדוד באמונתך׃⁵⁰ (89:51) זכר אדני חרפת עבדיך שׂאתי בחיקי כל רבים עמים׃⁵¹ (89:52) אשׁר חרפו אויביך יהוה אשׁר חרפו עקבות משׁיחך׃⁵² (89:53) ברוך יהוה לעולם אמן ואמן׃

¹ תפלה למשׁה אישׁ האלהים אדני מעון אתה היית לנו בדר ודר׃² בטרם הרים ילדו ותחולל ארץ ותבל ומעולם עד עולם אתה אל׃³ תשׁב אנושׁ עד דכא ותאמר שׁובו בני אדם׃⁴ כי אלף שׁנים בעיניך כיום אתמול כי יעבר ואשׁמורה בלילה׃⁵ זרמתם שׁנה יהיו בבקר כחציר יחלף׃⁶ בבקר יציץ וחלף לערב ימולל ויבשׁ׃⁷ כי כלינו באפך ובחמתך נבהלנו׃⁸ שׁת עונתינו לנגדך עלמנו למאור פניך׃⁹ כי כל ימינו פנו בעברתך כלינו שׁנינו כמו הגה׃¹⁰ ימי שׁנותינו בהם שׁבעים שׁנה ואם בגבורת שׁמונים שׁנה ורהבם עמל ואון כי גז חישׁ ונעפה׃¹¹ מי יודע עז אפך וכיראתך עברתך׃¹² למנות ימינו כן הודע ונבא לבב חכמה׃¹³ שׁובה יהוה עד מתי והנחם על עבדיך׃¹⁴ שׂבענו בבקר חסדך ונרננה ונשׂמחה בכל ימינו׃¹⁵ שׂמחנו כימות עניתנו שׁנות ראינו רעה׃¹⁶ יראה אל עבדיך פעלך והדרך על בניהם׃¹⁷ ויהי נעם אדני אלהינו עלינו ומעשׂה ידינו כוננה עלינו ומעשׂה ידינו כוננהו׃

¹ ישׁב בסתר עליון בצל שׁדי יתלונן׃² אמר ליהוה מחסי ומצודתי אלהי אבטח׃³ כי הוא יצילך מפח יקושׁ מדבר הוות׃⁴ באברתו יסך לך ותחת כנפיו תחסה צנה וסחרה אמתו׃⁵ לא תירא מפחד לילה מחץ יעוף יומם׃⁶ מדבר באפל יהלך מקטב ישׁוד צהרים׃⁷ יפל מצדך אלף ורבבה מימינך אליך לא יגשׁ׃⁸ רק בעיניך תביט ושׁלמת רשׁעים תראה׃⁹ כי אתה יהוה מחסי עליון שׂמת מעונך׃¹⁰ לא תאנה אליך רעה ונגע לא יקרב באהלך׃¹¹ כי מלאכיו יצוה לך לשׁמרך בכל דרכיך׃¹² על כפים ישׂאונך פן תגף באבן רגלך׃¹³ על שׁחל ופתן תדרך תרמס כפיר ותנין׃¹⁴ כי בי חשׁק ואפלטהו אשׂגבהו כי ידע שׁמי׃¹⁵ יקראני ואענהו עמו אנכי בצרה אחלצהו ואכבדהו׃¹⁶ ארך ימים אשׂביעהו ואראהו בישׁועתי׃

¹ מזמור שׁיר ליום השׁבת׃ (92:2) טוב להדות ליהוה ולזמר לשׁמך עליון׃² (92:3) להגיד בבקר חסדך ואמונתך בלילות׃³ (92:4) עלי עשׂור ועלי נבל עלי הגיון בכנור׃⁴ (92:5) כי שׂמחתני יהוה בפעלך במעשׂי ידיך ארנן׃⁵ (92:6) מה גדלו מעשׂיך יהוה מאד עמקו מחשׁבתיך׃⁶ (92:7) אישׁ בער לא ידע וכסיל לא יבין את זאת׃⁷ (92:8) בפרח רשׁעים כמו עשׂב ויציצו כל פעלי און להשׁמדם עדי עד׃⁸ (92:9) ואתה מרום לעלם יהוה׃⁹ (92:10) כי הנה איביך יהוה כי הנה איביך יאבדו יתפרדו כל פעלי און׃¹⁰ (92:11) ותרם כראים קרני בלתי בשׁמן רענן׃¹¹ (92:12) ותבט עיני בשׁורי בקמים עלי מרעים תשׁמענה אזני׃¹² (92:13) צדיק כתמר יפרח כארז בלבנון ישׂגה׃¹³ (92:14) שׁתולים בבית יהוה בחצרות אלהינו יפריחו׃¹⁴ (92:15) עוד ינובון בשׂיבה דשׁנים ורעננים יהיו׃¹⁵ (92:16) להגיד כי ישׁר יהוה צורי ולא עלתה׃

¹ יהוה מלך גאות לבשׁ לבשׁ יהוה עז התאזר אף תכון תבל בל תמוט׃² נכון כסאך מאז מעולם אתה׃³ נשׂאו נהרות יהוה נשׂאו נהרות קולם ישׂאו נהרות דכים׃⁴ מקלות מים רבים אדירים משׁברי ים אדיר במרום יהוה׃⁵ עדתיך נאמנו מאד לביתך נאוה קדשׁ יהוה לארך ימים׃

¹ אל נקמות יהוה אל נקמות הופיע׃² הנשׂא שׁפט הארץ השׁב גמול על גאים׃³ עד מתי רשׁעים יהוה עד מתי רשׁעים יעלזו׃⁴ יביעו ידברו עתק יתאמרו כל פעלי און׃⁵ עמך יהוה ידכאו ונחלתך יענו׃⁶ אלמנה וגר יהרגו ויתומים ירצחו׃⁷ ויאמרו לא יראה יה ולא יבין אלהי יעקב׃⁸ בינו בערים בעם וכסילים מתי תשׂכילו׃⁹ הנטע אזן הלא ישׁמע אם יצר עין הלא יביט׃¹⁰ היסר גוים הלא יוכיח המלמד אדם דעת׃¹¹ יהוה ידע מחשׁבות אדם כי המה הבל׃¹² אשׁרי הגבר אשׁר תיסרנו יה ומתורתך תלמדנו׃¹³ להשׁקיט לו מימי רע עד יכרה לרשׁע שׁחת׃¹⁴ כי לא יטשׁ יהוה עמו ונחלתו לא יעזב׃¹⁵ כי עד צדק ישׁוב משׁפט ואחריו כל ישׁרי לב׃¹⁶ מי יקום לי עם מרעים מי יתיצב לי עם פעלי און׃¹⁷ לולי יהוה עזרתה לי כמעט שׁכנה דומה נפשׁי׃¹⁸ אם אמרתי מטה רגלי חסדך יהוה יסעדני׃¹⁹ ברב שׂרעפי בקרבי תנחומיך ישׁעשׁעו נפשׁי׃²⁰ היחברך כסא הוות יצר עמל עלי חק׃²¹ יגודו על נפשׁ צדיק ודם נקי ירשׁיעו׃²² ויהי יהוה לי למשׂגב ואלהי לצור מחסי׃²³ וישׁב עליהם את אונם וברעתם יצמיתם יצמיתם יהוה אלהינו׃

¹ לכו נרננה ליהוה נריעה לצור ישׁענו׃² נקדמה פניו בתודה בזמרות נריע׃³ כי אל גדול יהוה ומלך גדול על כל אלהים׃⁴ אשׁר בידו מחקרי ארץ ותועפות הרים׃⁵ אשׁר לו הים והוא עשׂהו ויבשׁת ידיו יצרו׃⁶ באו נשׁתחוה ונכרעה נברכה לפני יהוה עשׂנו׃⁷ כי הוא אלהינו ואנחנו עם מרעיתו וצאן ידו היום אם בקלו תשׁמעו׃⁸ אל תקשׁו לבבכם כמריבה כיום מסה במדבר׃⁹ אשׁר נסוני אבותיכם בחנוני גם ראו פעלי׃¹⁰ ארבעים שׁנה אקוט בדור ואמר עם תעי לבב הם והם לא ידעו דרכי׃¹¹ אשׁר נשׁבעתי באפי אם יבאון אל מנוחתי׃

¹ שׁירו ליהוה שׁיר חדשׁ שׁירו ליהוה כל הארץ׃² שׁירו ליהוה ברכו שׁמו בשׂרו מיום ליום ישׁועתו׃³ ספרו בגוים כבודו בכל העמים נפלאותיו׃⁴ כי גדול יהוה ומהלל מאד נורא הוא על כל אלהים׃⁵ כי כל אלהי העמים אלילים ויהוה שׁמים עשׂה׃⁶ הוד והדר לפניו עז ותפארת במקדשׁו׃⁷ הבו ליהוה משׁפחות עמים הבו ליהוה כבוד ועז׃⁸ הבו ליהוה כבוד שׁמו שׂאו מנחה ובאו לחצרותיו׃⁹ השׁתחוו ליהוה בהדרת קדשׁ חילו מפניו כל הארץ׃¹⁰ אמרו בגוים יהוה מלך אף תכון תבל בל תמוט ידין עמים במישׁרים׃¹¹ ישׂמחו השׁמים ותגל הארץ ירעם הים ומלאו׃¹² יעלז שׂדי וכל אשׁר בו אז ירננו כל עצי יער׃¹³ לפני יהוה כי בא כי בא לשׁפט הארץ ישׁפט תבל בצדק ועמים באמונתו׃

¹ יהוה מלך תגל הארץ ישׂמחו איים רבים׃² ענן וערפל סביביו צדק ומשׁפט מכון כסאו׃³ אשׁ לפניו תלך ותלהט סביב צריו׃⁴ האירו ברקיו תבל ראתה ותחל הארץ׃⁵ הרים כדונג נמסו מלפני יהוה מלפני אדון כל הארץ׃⁶ הגידו השׁמים צדקו וראו כל העמים כבודו׃⁷ יבשׁו כל עבדי פסל המתהללים באלילים השׁתחוו לו כל אלהים׃⁸ שׁמעה ותשׂמח ציון ותגלנה בנות יהודה למען משׁפטיך יהוה׃⁹ כי אתה יהוה עליון על כל הארץ מאד נעלית על כל אלהים׃¹⁰ אהבי יהוה שׂנאו רע שׁמר נפשׁות חסידיו מיד רשׁעים יצילם׃¹¹ אור זרע לצדיק ולישׁרי לב שׂמחה׃¹² שׂמחו צדיקים ביהוה והודו לזכר קדשׁו׃

¹ מזמור שׁירו ליהוה שׁיר חדשׁ כי נפלאות עשׂה הושׁיעה לו ימינו וזרוע קדשׁו׃² הודיע יהוה ישׁועתו לעיני הגוים גלה צדקתו׃³ זכר חסדו ואמונתו לבית ישׂראל ראו כל אפסי ארץ את ישׁועת אלהינו׃⁴ הריעו ליהוה כל הארץ פצחו ורננו וזמרו׃⁵ זמרו ליהוה בכנור בכנור וקול זמרה׃⁶ בחצצרות וקול שׁופר הריעו לפני המלך יהוה׃⁷ ירעם הים ומלאו תבל וישׁבי׃⁸ נהרות ימחאו כף יחד הרים ירננו׃⁹ לפני יהוה כי בא לשׁפט הארץ ישׁפט תבל בצדק ועמים במישׁרים׃

¹ יהוה מלך ירגזו עמים ישׁב כרובים תנוט הארץ׃² יהוה בציון גדול ורם הוא על כל העמים׃³ יודו שׁמך גדול ונורא קדושׁ הוא׃⁴ ועז מלך משׁפט אהב אתה כוננת מישׁרים משׁפט וצדקה ביעקב אתה עשׂית׃⁵ רוממו יהוה אלהינו והשׁתחוו להדם רגליו קדושׁ הוא׃⁶ משׁה ואהרן בכהניו ושׁמואל בקראי שׁמו קראים אל יהוה והוא יענם׃⁷ בעמוד ענן ידבר אליהם שׁמרו עדתיו וחק נתן׃⁸ יהוה אלהינו אתה עניתם אל נשׂא היית להם ונקם על עלילותם׃⁹ רוממו יהוה אלהינו והשׁתחוו להר קדשׁו כי קדושׁ יהוה אלהינו׃

¹ מזמור לתודה הריעו ליהוה כל הארץ׃² עבדו את יהוה בשׂמחה באו לפניו ברננה׃³ דעו כי יהוה הוא אלהים הוא עשׂנו ולא אנחנו עמו וצאן מרעיתו׃⁴ באו שׁעריו בתודה חצרתיו בתהלה הודו לו ברכו שׁמו׃⁵ כי טוב יהוה לעולם חסדו ועד דר ודר אמונתו׃

¹ לדוד מזמור חסד ומשׁפט אשׁירה לך יהוה אזמרה׃² אשׂכילה בדרך תמים מתי תבוא אלי אתהלך בתם לבבי בקרב ביתי׃³ לא אשׁית לנגד עיני דבר בליעל עשׂה סטים שׂנאתי לא ידבק׃⁴ לבב עקשׁ יסור ממני רע לא אדע׃⁵ מלושׁני בסתר רעהו אותו אצמית גבה עינים ורחב לבב אתו לא אוכל׃⁶ עיני בנאמני ארץ לשׁבת עמדי הלך בדרך תמים הוא ישׁרתני׃⁷ לא ישׁב בקרב ביתי עשׂה רמיה דבר שׁקרים לא יכון לנגד עיני׃⁸ לבקרים אצמית כל רשׁעי ארץ להכרית מעיר יהוה כל פעלי און׃

¹ תפלה לעני כי יעטף ולפני יהוה ישׁפך שׂיחו׃ (102:2) יהוה שׁמעה תפלתי ושׁועתי אליך תבוא׃² (102:3) אל תסתר פניך ממני ביום צר לי הטה אלי אזנך ביום אקרא מהר ענני׃³ (102:4) כי כלו בעשׁן ימי ועצמותי כמו קד נחרו׃⁴ (102:5) הוכה כעשׂב ויבשׁ לבי כי שׁכחתי מאכל לחמי׃⁵ (102:6) מקול אנחתי דבקה עצמי לבשׂרי׃⁶ (102:7) דמיתי לקאת מדבר הייתי ככוס חרבות׃⁷ (102:8) שׁקדתי ואהיה כצפור בודד על גג׃⁸ (102:9) כל היום חרפוני אויבי מהוללי בי נשׁבעו׃⁹ (102:10) כי אפר כלחם אכלתי ושׁקוי בבכי מסכתי׃¹⁰ (102:11) מפני זעמך וקצפך כי נשׂאתני ותשׁליכני׃¹¹ (102:12) ימי כצל נטוי ואני כעשׂב איבשׁ׃¹² (102:13) ואתה יהוה לעולם תשׁב וזכרך לדר ודר׃¹³ (102:14) אתה תקום תרחם ציון כי עת לחננה כי בא מועד׃¹⁴ (102:15) כי רצו עבדיך את אבניה ואת עפרה יחננו׃¹⁵ (102:16) וייראו גוים את שׁם יהוה וכל מלכי הארץ את כבודך׃¹⁶ (102:17) כי בנה יהוה ציון נראה בכבודו׃¹⁷ (102:18) פנה אל תפלת הערער ולא בזה את תפלתם׃¹⁸ (102:19) תכתב זאת לדור אחרון ועם נברא יהלל יה׃¹⁹ (102:20) כי השׁקיף ממרום קדשׁו יהוה משׁמים אל ארץ הביט׃²⁰ (102:21) לשׁמע אנקת אסיר לפתח בני תמותה׃²¹ (102:22) לספר בציון שׁם יהוה ותהלתו בירושׁלם׃²² (102:23) בהקבץ עמים יחדו וממלכות לעבד את יהוה׃²³ (102:24) ענה בדרך כחו קצר ימי׃²⁴ (102:25) אמר אלי אל תעלני בחצי ימי בדור דורים שׁנותיך׃²⁵ (102:26) לפנים הארץ יסדת ומעשׂה ידיך שׁמים׃²⁶ (102:27) המה יאבדו ואתה תעמד וכלם כבגד יבלו כלבושׁ תחליפם ויחלפו׃²⁷ (102:28) ואתה הוא ושׁנותיך לא יתמו׃²⁸ (102:29) בני עבדיך ישׁכונו וזרעם לפניך יכון׃

¹ לדוד ברכי נפשׁי את יהוה וכל קרבי את שׁם קדשׁו׃² ברכי נפשׁי את יהוה ואל תשׁכחי כל גמוליו׃³ הסלח לכל עונכי הרפא לכל תחלאיכי׃⁴ הגואל משׁחת חייכי המעטרכי חסד ורחמים׃⁵ המשׂביע בטוב עדיך תתחדשׁ כנשׁר נעוריכי׃⁶ עשׂה צדקות יהוה ומשׁפטים לכל עשׁוקים׃⁷ יודיע דרכיו למשׁה לבני ישׂראל עלילותיו׃⁸ רחום וחנון יהוה ארך אפים ורב חסד׃⁹ לא לנצח יריב ולא לעולם יטור׃¹⁰ לא כחטאינו עשׂה לנו ולא כעונתינו גמל עלינו׃¹¹ כי כגבה שׁמים על הארץ גבר חסדו על יראיו׃¹² כרחק מזרח ממערב הרחיק ממנו את פשׁעינו׃¹³ כרחם אב על בנים רחם יהוה על יראיו׃¹⁴ כי הוא ידע יצרנו זכור כי עפר אנחנו׃¹⁵ אנושׁ כחציר ימיו כציץ השׂדה כן יציץ׃¹⁶ כי רוח עברה בו ואיננו ולא יכירנו עוד מקומו׃¹⁷ וחסד יהוה מעולם ועד עולם על יראיו וצדקתו לבני בנים׃¹⁸ לשׁמרי בריתו ולזכרי פקדיו לעשׂותם׃¹⁹ יהוה בשׁמים הכין כסאו ומלכותו בכל משׁלה׃²⁰ ברכו יהוה מלאכיו גברי כח עשׂי דברו לשׁמע בקול דברו׃²¹ ברכו יהוה כל צבאיו משׁרתיו עשׂי רצונו׃²² ברכו יהוה כל מעשׂיו בכל מקמות ממשׁלתו ברכי נפשׁי את יהוה׃

¹ ברכי נפשׁי את יהוה יהוה אלהי גדלת מאד הוד והדר לבשׁת׃² עטה אור כשׂלמה נוטה שׁמים כיריעה׃³ המקרה במים עליותיו השׂם עבים רכובו המהלך על כנפי רוח׃⁴ עשׂה מלאכיו רוחות משׁרתיו אשׁ להט׃⁵ יסד ארץ על מכוניה בל תמוט עולם ועד׃⁶ תהום כלבושׁ כסיתו על הרים יעמדו מים׃⁷ מן גערתך ינוסון מן קול רעמך יחפזון׃⁸ יעלו הרים ירדו בקעות אל מקום זה יסדת להם׃⁹ גבול שׂמת בל יעברון בל ישׁובון לכסות הארץ׃¹⁰ המשׁלח מעינים בנחלים בין הרים יהלכון׃¹¹ ישׁקו כל חיתו שׂדי ישׁברו פראים צמאם׃¹² עליהם עוף השׁמים ישׁכון מבין עפאים יתנו קול׃¹³ משׁקה הרים מעליותיו מפרי מעשׂיך תשׂבע הארץ׃¹⁴ מצמיח חציר לבהמה ועשׂב לעבדת האדם להוציא לחם מן הארץ׃¹⁵ ויין ישׂמח לבב אנושׁ להצהיל פנים משׁמן ולחם לבב אנושׁ יסעד׃¹⁶ ישׂבעו עצי יהוה ארזי לבנון אשׁר נטע׃¹⁷ אשׁר שׁם צפרים יקננו חסידה ברושׁים ביתה׃¹⁸ הרים הגבהים ליעלים סלעים מחסה לשׁפנים׃¹⁹ עשׂה ירח למועדים שׁמשׁ ידע מבואו׃²⁰ תשׁת חשׁך ויהי לילה בו תרמשׂ כל חיתו יער׃²¹ הכפירים שׁאגים לטרף ולבקשׁ מאל אכלם׃²² תזרח השׁמשׁ יאספון ואל מעונתם ירבצון׃²³ יצא אדם לפעלו ולעבדתו עדי ערב׃²⁴ מה רבו מעשׂיך יהוה כלם בחכמה עשׂית מלאה הארץ קנינך׃²⁵ זה הים גדול ורחב ידים שׁם רמשׂ ואין מספר חיות קטנות עם גדלות׃²⁶ שׁם אניות יהלכון לויתן זה יצרת לשׂחק׃²⁷ כלם אליך ישׂברון לתת אכלם בעתו׃²⁸ תתן להם ילקטון תפתח ידך ישׂבעון טוב׃²⁹ תסתיר פניך יבהלון תסף רוחם יגועון ואל עפרם ישׁובון׃³⁰ תשׁלח רוחך יבראון ותחדשׁ פני אדמה׃³¹ יהי כבוד יהוה לעולם ישׂמח יהוה במעשׂיו׃³² המביט לארץ ותרעד יגע בהרים ויעשׁנו׃³³ אשׁירה ליהוה בחיי אזמרה לאלהי בעודי׃³⁴ יערב עליו שׂיחי אנכי אשׂמח ביהוה׃³⁵ יתמו חטאים מן הארץ ורשׁעים עוד אינם ברכי נפשׁי את יהוה הללו יה׃

¹ הודו ליהוה קראו בשׁמו הודיעו בעמים עלילותיו׃² שׁירו לו זמרו לו שׂיחו בכל נפלאותיו׃³ התהללו בשׁם קדשׁו ישׂמח לב מבקשׁי יהוה׃⁴ דרשׁו יהוה ועזו בקשׁו פניו תמיד׃⁵ זכרו נפלאותיו אשׁר עשׂה מפתיו ומשׁפטי פיו׃⁶ זרע אברהם עבדו בני יעקב בחיריו׃⁷ הוא יהוה אלהינו בכל הארץ משׁפטיו׃⁸ זכר לעולם בריתו דבר צוה לאלף דור׃⁹ אשׁר כרת את אברהם ושׁבועתו לישׂחק׃¹⁰ ויעמידה ליעקב לחק לישׂראל ברית עולם׃¹¹ לאמר לך אתן את ארץ כנען חבל נחלתכם׃¹² בהיותם מתי מספר כמעט וגרים׃¹³ ויתהלכו מגוי אל גוי מממלכה אל עם אחר׃¹⁴ לא הניח אדם לעשׁקם ויוכח עליהם מלכים׃¹⁵ אל תגעו במשׁיחי ולנביאי אל תרעו׃¹⁶ ויקרא רעב על הארץ כל מטה לחם שׁבר׃¹⁷ שׁלח לפניהם אישׁ לעבד נמכר יוסף׃¹⁸ ענו בכבל רגליו ברזל באה נפשׁו׃¹⁹ עד עת בא דברו אמרת יהוה צרפתהו׃²⁰ שׁלח מלך ויתירהו משׁל עמים ויפתחהו׃²¹ שׂמו אדון לביתו ומשׁל בכל קנינו׃²² לאסר שׂריו בנפשׁו וזקניו יחכם׃²³ ויבא ישׂראל מצרים ויעקב גר בארץ חם׃²⁴ ויפר את עמו מאד ויעצמהו מצריו׃²⁵ הפך לבם לשׂנא עמו להתנכל בעבדיו׃²⁶ שׁלח משׁה עבדו אהרן אשׁר בחר׃²⁷ שׂמו בם דברי אתותיו ומפתים בארץ חם׃²⁸ שׁלח חשׁך ויחשׁך ולא מרו את דברוו׃²⁹ הפך את מימיהם לדם וימת את דגתם׃³⁰ שׁרץ ארצם צפרדעים בחדרי מלכיהם׃³¹ אמר ויבא ערב כנים בכל גבולם׃³² נתן גשׁמיהם ברד אשׁ להבות בארצם׃³³ ויך גפנם ותאנתם וישׁבר עץ גבולם׃³⁴ אמר ויבא ארבה וילק ואין מספר׃³⁵ ויאכל כל עשׂב בארצם ויאכל פרי אדמתם׃³⁶ ויך כל בכור בארצם ראשׁית לכל אונם׃³⁷ ויוציאם בכסף וזהב ואין בשׁבטיו כושׁל׃³⁸ שׂמח מצרים בצאתם כי נפל פחדם עליהם׃³⁹ פרשׂ ענן למסך ואשׁ להאיר לילה׃⁴⁰ שׁאל ויבא שׂלו ולחם שׁמים ישׂביעם׃⁴¹ פתח צור ויזובו מים הלכו בציות נהר׃⁴² כי זכר את דבר קדשׁו את אברהם עבדו׃⁴³ ויוצא עמו בשׂשׂון ברנה את בחיריו׃⁴⁴ ויתן להם ארצות גוים ועמל לאמים יירשׁו׃⁴⁵ בעבור ישׁמרו חקיו ותורתיו ינצרו הללו יה׃

¹ הללויה הודו ליהוה כי טוב כי לעולם חסדו׃² מי ימלל גבורות יהוה ישׁמיע כל תהלתו׃³ אשׁרי שׁמרי משׁפט עשׂה צדקה בכל עת׃⁴ זכרני יהוה ברצון עמך פקדני בישׁועתך׃⁵ לראות בטובת בחיריך לשׂמח בשׂמחת גויך להתהלל עם נחלתך׃⁶ חטאנו עם אבותינו העוינו הרשׁענו׃⁷ אבותינו במצרים לא השׂכילו נפלאותיך לא זכרו את רב חסדיך וימרו על ים בים סוף׃⁸ ויושׁיעם למען שׁמו להודיע את גבורתו׃⁹ ויגער בים סוף ויחרב ויוליכם בתהמות כמדבר׃¹⁰ ויושׁיעם מיד שׂונא ויגאלם מיד אויב׃¹¹ ויכסו מים צריהם אחד מהם לא נותר׃¹² ויאמינו בדבריו ישׁירו תהלתו׃¹³ מהרו שׁכחו מעשׂיו לא חכו לעצתו׃¹⁴ ויתאוו תאוה במדבר וינסו אל בישׁימון׃¹⁵ ויתן להם שׁאלתם וישׁלח רזון בנפשׁם׃¹⁶ ויקנאו למשׁה במחנה לאהרן קדושׁ יהוה׃¹⁷ תפתח ארץ ותבלע דתן ותכס על עדת אבירם׃¹⁸ ותבער אשׁ בעדתם להבה תלהט רשׁעים׃¹⁹ יעשׂו עגל בחרב וישׁתחוו למסכה׃²⁰ וימירו את כבודם בתבנית שׁור אכל עשׂב׃²¹ שׁכחו אל מושׁיעם עשׂה גדלות במצרים׃²² נפלאות בארץ חם נוראות על ים סוף׃²³ ויאמר להשׁמידם לולי משׁה בחירו עמד בפרץ לפניו להשׁיב חמתו מהשׁחית׃²⁴ וימאסו בארץ חמדה לא האמינו לדברו׃²⁵ וירגנו באהליהם לא שׁמעו בקול יהוה׃²⁶ וישׂא ידו להם להפיל אותם במדבר׃²⁷ ולהפיל זרעם בגוים ולזרותם בארצות׃²⁸ ויצמדו לבעל פעור ויאכלו זבחי מתים׃²⁹ ויכעיסו במעלליהם ותפרץ בם מגפה׃³⁰ ויעמד פינחס ויפלל ותעצר המגפה׃³¹ ותחשׁב לו לצדקה לדר ודר עד עולם׃³² ויקציפו על מי מריבה וירע למשׁה בעבורם׃³³ כי המרו את רוחו ויבטא בשׂפתיו׃³⁴ לא השׁמידו את העמים אשׁר אמר יהוה להם׃³⁵ ויתערבו בגוים וילמדו מעשׂיהם׃³⁶ ויעבדו את עצביהם ויהיו להם למוקשׁ׃³⁷ ויזבחו את בניהם ואת בנותיהם לשׁדים׃³⁸ וישׁפכו דם נקי דם בניהם ובנותיהם אשׁר זבחו לעצבי כנען ותחנף הארץ בדמים׃³⁹ ויטמאו במעשׂיהם ויזנו במעלליהם׃⁴⁰ ויחר אף יהוה בעמו ויתעב את נחלתו׃⁴¹ ויתנם ביד גוים וימשׁלו בהם שׂנאיהם׃⁴² וילחצום אויביהם ויכנעו תחת ידם׃⁴³ פעמים רבות יצילם והמה ימרו בעצתם וימכו בעונם׃⁴⁴ וירא בצר להם בשׁמעו את רנתם׃⁴⁵ ויזכר להם בריתו וינחם כרב חסדו׃⁴⁶ ויתן אותם לרחמים לפני כל שׁוביהם׃⁴⁷ הושׁיענו יהוה אלהינו וקבצנו מן הגוים להדות לשׁם קדשׁך להשׁתבח בתהלתך׃⁴⁸ ברוך יהוה אלהי ישׂראל מן העולם ועד העולם ואמר כל העם אמן הללו יה׃

¹ הדו ליהוה כי טוב כי לעולם חסדו׃² יאמרו גאולי יהוה אשׁר גאלם מיד צר׃³ ומארצות קבצם ממזרח וממערב מצפון ומים׃⁴ תעו במדבר בישׁימון דרך עיר מושׁב לא מצאו׃⁵ רעבים גם צמאים נפשׁם בהם תתעטף׃⁶ ויצעקו אל יהוה בצר להם ממצוקותיהם יצילם׃⁷ וידריכם בדרך ישׁרה ללכת אל עיר מושׁב׃⁸ יודו ליהוה חסדו ונפלאותיו לבני אדם׃⁹ כי השׂביע נפשׁ שׁקקה ונפשׁ רעבה מלא טוב׃¹⁰ ישׁבי חשׁך וצלמות אסירי עני וברזל׃¹¹ כי המרו אמרי אל ועצת עליון נאצו׃¹² ויכנע בעמל לבם כשׁלו ואין עזר׃¹³ ויזעקו אל יהוה בצר להם ממצקותיהם יושׁיעם׃¹⁴ יוציאם מחשׁך וצלמות ומוסרותיהם ינתק׃¹⁵ יודו ליהוה חסדו ונפלאותיו לבני אדם׃¹⁶ כי שׁבר דלתות נחשׁת ובריחי ברזל גדע׃¹⁷ אולים מדרך פשׁעם ומעונתיהם יתענו׃¹⁸ כל אכל תתעב נפשׁם ויגיעו עד שׁערי מות׃¹⁹ ויזעקו אל יהוה בצר להם ממצקותיהם יושׁיעם׃²⁰ ישׁלח דברו וירפאם וימלט משׁחיתותם׃²¹ יודו ליהוה חסדו ונפלאותיו לבני אדם׃²² ויזבחו זבחי תודה ויספרו מעשׂיו ברנה׃²³ יורדי הים באניות עשׂי מלאכה במים רבים׃²⁴ המה ראו מעשׂי יהוה ונפלאותיו במצולה׃²⁵ ויאמר ויעמד רוח סערה ותרומם גליו׃²⁶ יעלו שׁמים ירדו תהומות נפשׁם ברעה תתמוגג׃²⁷ יחוגו וינועו כשׁכור וכל חכמתם תתבלע׃²⁸ ויצעקו אל יהוה בצר להם וממצוקתיהם יוציאם׃²⁹ יקם סערה לדממה ויחשׁו גליהם׃³⁰ וישׂמחו כי ישׁתקו וינחם אל מחוז חפצם׃³¹ יודו ליהוה חסדו ונפלאותיו לבני אדם׃³² וירממוהו בקהל עם ובמושׁב זקנים יהללוהו׃³³ ישׂם נהרות למדבר ומצאי מים לצמאון׃³⁴ ארץ פרי למלחה מרעת ישׁבי׃³⁵ ישׂם מדבר לאגם מים וארץ ציה למצאי מים׃³⁶ ויושׁב שׁם רעבים ויכוננו עיר מושׁב׃³⁷ ויזרעו שׂדות ויטעו כרמים ויעשׂו פרי תבואה׃³⁸ ויברכם וירבו מאד ובהמתם לא ימעיט׃³⁹ וימעטו וישׁחו מעצר רעה ויגון׃⁴⁰ שׁפך בוז על נדיבים ויתעם בתהו לא דרך׃⁴¹ וישׂגב אביון מעוני וישׂם כצאן משׁפחות׃⁴² יראו ישׁרים וישׂמחו וכל עולה קפצה פיה׃⁴³ מי חכם וישׁמר אלה ויתבוננו חסדי יהוה׃

¹ שׁיר מזמור לדוד׃ (108:2) נכון לבי אלהים אשׁירה ואזמרה אף כבודי׃² (108:3) עורה הנבל וכנור אעירה שׁחר׃³ (108:4) אודך בעמים יהוה ואזמרך בל אמים׃⁴ (108:5) כי גדול מעל שׁמים חסדך ועד שׁחקים אמתך׃⁵ (108:6) רומה על שׁמים אלהים ועל כל הארץ כבודך׃⁶ (108:7) למען יחלצון ידידיך הושׁיעה ימינך וענני׃⁷ (108:8) אלהים דבר בקדשׁו אעלזה אחלקה שׁכם ועמק סכות אמדד׃⁸ (108:9) לי גלעד לי מנשׁה ואפרים מעוז ראשׁי יהודה מחקקי׃⁹ (108:10) מואב סיר רחצי על אדום אשׁליך נעלי עלי פלשׁת אתרועע׃¹⁰ (108:11) מי יבלני עיר מבצר מי נחני עד אדום׃¹¹ (108:12) הלא אלהים זנחתנו ולא תצא אלהים בצבאתינו׃¹² (108:13) הבה לנו עזרת מצר ושׁוא תשׁועת אדם׃¹³ (108:14) באלהים נעשׂה חיל והוא יבוס צרינו׃

¹ למנצח לדוד מזמור אלהי תהלתי אל תחרשׁ׃² כי פי רשׁע ופי מרמה עלי פתחו דברו אתי לשׁון שׁקר׃³ ודברי שׂנאה סבבוני וילחמוני חנם׃⁴ תחת אהבתי ישׂטנוני ואני תפלה׃⁵ וישׂימו עלי רעה תחת טובה ושׂנאה תחת אהבתי׃⁶ הפקד עליו רשׁע ושׂטן יעמד על ימינו׃⁷ בהשׁפטו יצא רשׁע ותפלתו תהיה לחטאה׃⁸ יהיו ימיו מעטים פקדתו יקח אחר׃⁹ יהיו בניו יתומים ואשׁתו אלמנה׃¹⁰ ונוע ינועו בניו ושׁאלו ודרשׁו מחרבותיהם׃¹¹ ינקשׁ נושׁה לכל אשׁר לו ויבזו זרים יגיעו׃¹² אל יהי לו משׁך חסד ואל יהי חונן ליתומיו׃¹³ יהי אחריתו להכרית בדור אחר ימח שׁמם׃¹⁴ יזכר עון אבתיו אל יהוה וחטאת אמו אל תמח׃¹⁵ יהיו נגד יהוה תמיד ויכרת מארץ זכרם׃¹⁶ יען אשׁר לא זכר עשׂות חסד וירדף אישׁ עני ואביון ונכאה לבב למותת׃¹⁷ ויאהב קללה ותבואהו ולא חפץ בברכה ותרחק ממנו׃¹⁸ וילבשׁ קללה כמדו ותבא כמים בקרבו וכשׁמן בעצמותיו׃¹⁹ תהי לו כבגד יעטה ולמזח תמיד יחגרה׃²⁰ זאת פעלת שׂטני מאת יהוה והדברים רע על נפשׁי׃²¹ ואתה יהוה אדני עשׂה אתי למען שׁמך כי טוב חסדך הצילני׃²² כי עני ואביון אנכי ולבי חלל בקרבי׃²³ כצל כנטותו נהלכתי ננערתי כארבה׃²⁴ ברכי כשׁלו מצום ובשׂרי כחשׁ משׁמן׃²⁵ ואני הייתי חרפה להם יראוני יניעון ראשׁם׃²⁶ עזרני יהוה אלהי הושׁיעני כחסדך׃²⁷ וידעו כי ידך זאת אתה יהוה עשׂיתה׃²⁸ יקללו המה ואתה תברך קמו ויבשׁו ועבדך ישׂמח׃²⁹ ילבשׁו שׂוטני כלמה ויעטו כמעיל בשׁתם׃³⁰ אודה יהוה מאד בפי ובתוך רבים אהללנו׃³¹ כי יעמד לימין אביון להושׁיע משׁפטי נפשׁו׃

¹ לדוד מזמור נאם יהוה לאדני שׁב לימיני עד אשׁית איביך הדם לרגליך׃² מטה עזך ישׁלח יהוה מציון רדה בקרב איביך׃³ עמך נדבת ביום חילך בהדרי קדשׁ מרחם משׁחר לך טל ילדתיך׃⁴ נשׁבע יהוה ולא ינחם אתה כהן לעולם על דברתי מלכי צדק׃⁵ אדני על ימינך מחץ ביום אפו מלכים׃⁶ ידין בגוים מלא גויות מחץ ראשׁ על ארץ רבה׃⁷ מנחל בדרך ישׁתה על כן ירים ראשׁ׃

¹ הללו יה אודה יהוה בכל לבב בסוד ישׁרים ועדה׃² גדלים מעשׂי יהוה דרושׁים לכל חפציהם׃³ הוד והדר פעלו וצדקתו עמדת לעד׃⁴ זכר עשׂה לנפלאתיו חנון ורחום יהוה׃⁵ טרף נתן ליראיו יזכר לעולם בריתו׃⁶ כח מעשׂיו הגיד לעמו לתת להם נחלת גוים׃⁷ מעשׂי ידיו אמת ומשׁפט נאמנים כל פקודיו׃⁸ סמוכים לעד לעולם עשׂוים באמת וישׁר׃⁹ פדות שׁלח לעמו צוה לעולם בריתו קדושׁ ונורא שׁמו׃¹⁰ ראשׁית חכמה יראת יהוה שׂכל טוב לכל עשׂיהם תהלתו עמדת לעד׃

¹ הללו יה אשׁרי אישׁ ירא את יהוה במצותיו חפץ מאד׃² גבור בארץ יהיה זרעו דור ישׁרים יברך׃³ הון ועשׁר בביתו וצדקתו עמדת לעד׃⁴ זרח בחשׁך אור לישׁרים חנון ורחום וצדיק׃⁵ טוב אישׁ חונן ומלוה יכלכל דבריו במשׁפט׃⁶ כי לעולם לא ימוט לזכר עולם יהיה צדיק׃⁷ משׁמועה רעה לא יירא נכון לבו בטח ביהוה׃⁸ סמוך לבו לא יירא עד אשׁר יראה בצריו׃⁹ פזר נתן לאביונים צדקתו עמדת לעד קרנו תרום בכבוד׃¹⁰ רשׁע יראה וכעס שׁניו יחרק ונמס תאות רשׁעים תאבד׃

¹ הללו יה הללו עבדי יהוה הללו את שׁם יהוה׃² יהי שׁם יהוה מברך מעתה ועד עולם׃³ ממזרח שׁמשׁ עד מבואו מהלל שׁם יהוה׃⁴ רם על כל גוים יהוה על השׁמים כבודו׃⁵ מי כיהוה אלהינו המגביהי לשׁבת׃⁶ המשׁפילי לראות בשׁמים ובארץ׃⁷ מקימי מעפר דל מאשׁפת ירים אביון׃⁸ להושׁיבי עם נדיבים עם נדיבי עמו׃⁹ מושׁיבי עקרת הבית אם הבנים שׂמחה הללו יה׃

¹ בצאת ישׂראל ממצרים בית יעקב מעם לעז׃² היתה יהודה לקדשׁו ישׂראל ממשׁלותיו׃³ הים ראה וינס הירדן יסב לאחור׃⁴ ההרים רקדו כאילים גבעות כבני צאן׃⁵ מה לך הים כי תנוס הירדן תסב לאחור׃⁶ ההרים תרקדו כאילים גבעות כבני צאן׃⁷ מלפני אדון חולי ארץ מלפני אלוה יעקב׃⁸ ההפכי הצור אגם מים חלמישׁ למעינו מים׃

¹ לא לנו יהוה לא לנו כי לשׁמך תן כבוד על חסדך על אמתך׃² למה יאמרו הגוים איה נא אלהיהם׃³ ואלהינו בשׁמים כל אשׁר חפץ עשׂה׃⁴ עצביהם כסף וזהב מעשׂה ידי אדם׃⁵ פה להם ולא ידברו עינים להם ולא יראו׃⁶ אזנים להם ולא ישׁמעו אף להם ולא יריחון׃⁷ ידיהם ולא ימישׁון רגליהם ולא יהלכו לא יהגו בגרונם׃⁸ כמוהם יהיו עשׂיהם כל אשׁר בטח׃⁹ ישׂראל בטח ביהוה עזרם ומגנם הוא׃¹⁰ בית אהרן בטחו ביהוה עזרם ומגנם הוא׃¹¹ יראי יהוה בטחו ביהוה עזרם ומגנם הוא׃¹² יהוה זכרנו יברך יברך את בית ישׂראל יברך את בית אהרן׃¹³ יברך יראי יהוה הקטנים עם הגדלים׃¹⁴ יסף יהוה עליכם עליכם ועל בניכם׃¹⁵ ברוכים אתם ליהוה עשׂה שׁמים וארץ׃¹⁶ השׁמים שׁמים ליהוה והארץ נתן לבני אדם׃¹⁷ לא המתים יהללו יה ולא כל ירדי דומה׃¹⁸ ואנחנו נברך יה מעתה ועד עולם הללו יה׃

¹ אהבתי כי ישׁמע יהוה את קולי תחנוני׃² כי הטה אזנו לי ובימי אקרא׃³ אפפוני חבלי מות ומצרי שׁאול מצאוני צרה ויגון אמצא׃⁴ ובשׁם יהוה אקרא אנה יהוה מלטה נפשׁי׃⁵ חנון יהוה וצדיק ואלהינו מרחם׃⁶ שׁמר פתאים יהוה דלותי ולי יהושׁיע׃⁷ שׁובי נפשׁי למנוחיכי כי יהוה גמל עליכי׃⁸ כי חלצת נפשׁי ממות את עיני מן דמעה את רגלי מדחי׃⁹ אתהלך לפני יהוה בארצות החיים׃¹⁰ האמנתי כי אדבר אני עניתי מאד׃¹¹ אני אמרתי בחפזי כל האדם כזב׃¹² מה אשׁיב ליהוה כל תגמולוהי עלי׃¹³ כוס ישׁועות אשׂא ובשׁם יהוה אקרא׃¹⁴ נדרי ליהוה אשׁלם נגדה נא לכל עמו׃¹⁵ יקר בעיני יהוה המותה לחסידיו׃¹⁶ אנה יהוה כי אני עבדך אני עבדך בן אמתך פתחת למוסרי׃¹⁷ לך אזבח זבח תודה ובשׁם יהוה אקרא׃¹⁸ נדרי ליהוה אשׁלם נגדה נא לכל עמו׃¹⁹ בחצרות בית יהוה בתוככי ירושׁלם הללו יה׃

¹ הללו את יהוה כל גוים שׁבחוהו כל האמים׃² כי גבר עלינו חסדו ואמת יהוה לעולם הללו יה׃

¹ הודו ליהוה כי טוב כי לעולם חסדו׃² יאמר נא ישׂראל כי לעולם חסדו׃³ יאמרו נא בית אהרן כי לעולם חסדו׃⁴ יאמרו נא יראי יהוה כי לעולם חסדו׃⁵ מן המצר קראתי יה ענני במרחב יה׃⁶ יהוה לי לא אירא מה יעשׂה לי אדם׃⁷ יהוה לי בעזרי ואני אראה בשׂנאי׃⁸ טוב לחסות ביהוה מבטח באדם׃⁹ טוב לחסות ביהוה מבטח בנדיבים׃¹⁰ כל גוים סבבוני בשׁם יהוה כי אמילם׃¹¹ סבוני גם סבבוני בשׁם יהוה כי אמילם׃¹² סבוני כדבורים דעכו כאשׁ קוצים בשׁם יהוה כי אמילם׃¹³ דחה דחיתני לנפל ויהוה עזרני׃¹⁴ עזי וזמרת יה ויהי לי לישׁועה׃¹⁵ קול רנה וישׁועה באהלי צדיקים ימין יהוה עשׂה חיל׃¹⁶ ימין יהוה רוממה ימין יהוה עשׂה חיל׃¹⁷ לא אמות כי אחיה ואספר מעשׂי יה׃¹⁸ יסר יסרני יה ולמות לא נתנני׃¹⁹ פתחו לי שׁערי צדק אבא בם אודה יה׃²⁰ זה השׁער ליהוה צדיקים יבאו׃²¹ אודך כי עניתני ותהי לי לישׁועה׃²² אבן מאסו הבונים היתה לראשׁ פנה׃²³ מאת יהוה היתה זאת היא נפלאת בעינינו׃²⁴ זה היום עשׂה יהוה נגילה ונשׂמחה׃²⁵ אנא יהוה הושׁיעה נא אנא יהוה הצליחה נא׃²⁶ ברוך הבא בשׁם יהוה ברכנוכם מבית יהוה׃²⁷ אל יהוה ויאר לנו אסרו חג בעבתים עד קרנות המזבח׃²⁸ אלי אתה ואודך אלהי ארוממך׃²⁹ הודו ליהוה כי טוב כי לעולם חסדו׃

¹ אשׁרי תמימי דרך ההלכים בתורת יהוה׃² אשׁרי נצרי עדתיו בכל לב ידרשׁוהו׃³ אף לא פעלו עולה בדרכיו הלכו׃⁴ אתה צויתה פקדיך לשׁמר מאד׃⁵ אחלי יכנו דרכי לשׁמר חקיך׃⁶ אז לא אבושׁ בהביטי אל כל מצותיך׃⁷ אודך בישׁר לבב בלמדי משׁפטי צדקך׃⁸ את חקיך אשׁמר אל תעזבני עד מאד׃⁹ במה יזכה נער את ארחו לשׁמר כדברך׃¹⁰ בכל לבי דרשׁתיך אל תשׁגני ממצותיך׃¹¹ בלבי צפנתי אמרתך למען לא אחטא׃¹² ברוך אתה יהוה למדני חקיך׃¹³ בשׂפתי ספרתי כל משׁפטי פיך׃¹⁴ בדרך עדותיך שׂשׂתי כעל כל הון׃¹⁵ בפקדיך אשׂיחה ואביטה ארחתיך׃¹⁶ בחקתיך אשׁתעשׁע לא אשׁכח דברך׃¹⁷ גמל על עבדך אחיה ואשׁמרה דברך׃¹⁸ גל עיני ואביטה נפלאות מתורתך׃¹⁹ גר אנכי בארץ אל תסתר ממני מצותיך׃²⁰ גרסה נפשׁי לתאבה אל משׁפטיך בכל עת׃²¹ גערת זדים ארורים השׁגים ממצותיך׃²² גל מעלי חרפה ובוז כי עדתיך נצרתי׃²³ גם ישׁבו שׂרים בי נדברו עבדך ישׂיח בחקיך׃²⁴ גם עדתיך שׁעשׁעי אנשׁי עצתי׃²⁵ דבקה לעפר נפשׁי חיני כדברך׃²⁶ דרכי ספרתי ותענני למדני חקיך׃²⁷ דרך פקודיך הבינני ואשׂיחה בנפלאותיך׃²⁸ דלפה נפשׁי מתוגה קימני כדברך׃²⁹ דרך שׁקר הסר ממני ותורתך חנני׃³⁰ דרך אמונה בחרתי משׁפטיך שׁויתי׃³¹ דבקתי בעדותיך יהוה אל תבישׁני׃³² דרך מצותיך ארוץ כי תרחיב לבי׃³³ הורני יהוה דרך חקיך ואצרנה עקב׃³⁴ הבינני ואצרה תורתך ואשׁמרנה בכל לב׃³⁵ הדריכני בנתיב מצותיך כי בו חפצתי׃³⁶ הט לבי אל עדותיך ואל אל בצע׃³⁷ העבר עיני מראות שׁוא בדרכך חיני׃³⁸ הקם לעבדך אמרתך אשׁר ליראתך׃³⁹ העבר חרפתי אשׁר יגרתי כי משׁפטיך טובים׃⁴⁰ הנה תאבתי לפקדיך בצדקתך חיני׃⁴¹ ויבאני חסדך יהוה תשׁועתך כאמרתך׃⁴² ואענה חרפי דבר כי בטחתי בדברך׃⁴³ ואל תצל מפי דבר אמת עד מאד כי למשׁפטך יחלתי׃⁴⁴ ואשׁמרה תורתך תמיד לעולם ועד׃⁴⁵ ואתהלכה ברחבה כי פקדיך דרשׁתי׃⁴⁶ ואדברה בעדתיך נגד מלכים ולא אבושׁ׃⁴⁷ ואשׁתעשׁע במצותיך אשׁר אהבתי׃⁴⁸ ואשׂא כפי אל מצותיך אשׁר אהבתי ואשׂיחה בחקיך׃⁴⁹ זכר דבר לעבדך על אשׁר יחלתני׃⁵⁰ זאת נחמתי בעניי כי אמרתך חיתני׃⁵¹ זדים הליצני עד מאד מתורתך לא נטיתי׃⁵² זכרתי משׁפטיך מעולם יהוה ואתנחם׃⁵³ זלעפה אחזתני מרשׁעים עזבי תורתך׃⁵⁴ זמרות היו לי חקיך בבית מגורי׃⁵⁵ זכרתי בלילה שׁמך יהוה ואשׁמרה תורתך׃⁵⁶ זאת היתה לי כי פקדיך נצרתי׃⁵⁷ חלקי יהוה אמרתי לשׁמר דבריך׃⁵⁸ חליתי פניך בכל לב חנני כאמרתך׃⁵⁹ חשׁבתי דרכי ואשׁיבה רגלי אל עדתיך׃⁶⁰ חשׁתי ולא התמהמהתי לשׁמר מצותיך׃⁶¹ חבלי רשׁעים עודני תורתך לא שׁכחתי׃⁶² חצות לילה אקום להודות לך על משׁפטי צדקך׃⁶³ חבר אני לכל אשׁר יראוך ולשׁמרי פקודיך׃⁶⁴ חסדך יהוה מלאה הארץ חקיך למדני׃⁶⁵ טוב עשׂית עם עבדך יהוה כדברך׃⁶⁶ טוב טעם ודעת למדני כי במצותיך האמנתי׃⁶⁷ טרם אענה אני שׁגג ועתה אמרתך שׁמרתי׃⁶⁸ טוב אתה ומטיב למדני חקיך׃⁶⁹ טפלו עלי שׁקר זדים אני בכל לב אצר פקודיך׃⁷⁰ טפשׁ כחלב לבם אני תורתך שׁעשׁעתי׃⁷¹ טוב לי כי עניתי למען אלמד חקיך׃⁷² טוב לי תורת פיך מאלפי זהב וכסף׃⁷³ ידיך עשׂוני ויכוננוני הבינני ואלמדה מצותיך׃⁷⁴ יראיך יראוני וישׂמחו כי לדברך יחלתי׃⁷⁵ ידעתי יהוה כי צדק משׁפטיך ואמונה עניתני׃⁷⁶ יהי נא חסדך לנחמני כאמרתך לעבדך׃⁷⁷ יבאוני רחמיך ואחיה כי תורתך שׁעשׁעי׃⁷⁸ יבשׁו זדים כי שׁקר עותוני אני אשׂיח בפקודיך׃⁷⁹ ישׁובו לי יראיך וידעו עדתיך׃⁸⁰ יהי לבי תמים בחקיך למען לא אבושׁ׃⁸¹ כלתה לתשׁועתך נפשׁי לדברך יחלתי׃⁸² כלו עיני לאמרתך לאמר מתי תנחמני׃⁸³ כי הייתי כנאד בקיטור חקיך לא שׁכחתי׃⁸⁴ כמה ימי עבדך מתי תעשׂה ברדפי משׁפט׃⁸⁵ כרו לי זדים שׁיחות אשׁר לא כתורתך׃⁸⁶ כל מצותיך אמונה שׁקר רדפוני עזרני׃⁸⁷ כמעט כלוני בארץ ואני לא עזבתי פקודיך׃⁸⁸ כחסדך חיני ואשׁמרה עדות פיך׃⁸⁹ לעולם יהוה דברך נצב בשׁמים׃⁹⁰ לדר ודר אמונתך כוננת ארץ ותעמד׃⁹¹ למשׁפטיך עמדו היום כי הכל עבדיך׃⁹² לולי תורתך שׁעשׁעי אז אבדתי בעניי׃⁹³ לעולם לא אשׁכח פקודיך כי בם חייתני׃⁹⁴ לך אני הושׁיעני כי פקודיך דרשׁתי׃⁹⁵ לי קוו רשׁעים לאבדני עדתיך אתבונן׃⁹⁶ לכל תכלה ראיתי קץ רחבה מצותך מאד׃⁹⁷ מה אהבתי תורתך כל היום היא שׂיחתי׃⁹⁸ מאיבי תחכמני מצותך כי לעולם היא׃⁹⁹ מכל מלמדי השׂכלתי כי עדותיך שׂיחה׃¹⁰⁰ מזקנים אתבונן כי פקודיך נצרתי׃¹⁰¹ מכל ארח רע כלאתי רגלי למען אשׁמר דברך׃¹⁰² ממשׁפטיך לא סרתי כי אתה הורתני׃¹⁰³ מה נמלצו לחכי אמרתך מדבשׁ לפי׃¹⁰⁴ מפקודיך אתבונן על כן שׂנאתי כל ארח שׁקר׃¹⁰⁵ נר לרגלי דברך ואור לנתיבתי׃¹⁰⁶ נשׁבעתי ואקימה לשׁמר משׁפטי צדקך׃¹⁰⁷ נעניתי עד מאד יהוה חיני כדברך׃¹⁰⁸ נדבות פי רצה נא יהוה ומשׁפטיך למדני׃¹⁰⁹ נפשׁי בכפי תמיד ותורתך לא שׁכחתי׃¹¹⁰ נתנו רשׁעים פח לי ומפקודיך לא תעיתי׃¹¹¹ נחלתי עדותיך לעולם כי שׂשׂון לבי המה׃¹¹² נטיתי לבי לעשׂות חקיך לעולם עקב׃¹¹³ סעפים שׂנאתי ותורתך אהבתי׃¹¹⁴ סתרי ומגני אתה לדברך יחלתי׃¹¹⁵ סורו ממני מרעים ואצרה מצות אלהי׃¹¹⁶ סמכני כאמרתך ואחיה ואל תבישׁני משׂברי׃¹¹⁷ סעדני ואושׁעה ואשׁעה בחקיך תמיד׃¹¹⁸ סלית כל שׁוגים מחקיך כי שׁקר תרמיתם׃¹¹⁹ סגים השׁבת כל רשׁעי ארץ לכן אהבתי עדתיך׃¹²⁰ סמר מפחדך בשׂרי וממשׁפטיך יראתי׃¹²¹ עשׂיתי משׁפט וצדק בל תניחני לעשׁקי׃¹²² ערב עבדך לטוב אל יעשׁקני זדים׃¹²³ עיני כלו לישׁועתך ולאמרת צדקך׃¹²⁴ עשׂה עם עבדך כחסדך וחקיך למדני׃¹²⁵ עבדך אני הבינני ואדעה עדתיך׃¹²⁶ עת לעשׂות ליהוה הפרו תורתך׃¹²⁷ על כן אהבתי מצותיך מזהב ומפז׃¹²⁸ על כן כל פקודי כל ישׁרתי כל ארח שׁקר שׂנאתי׃¹²⁹ פלאות עדותיך על כן נצרתם נפשׁי׃¹³⁰ פתח דבריך יאיר מבין פתיים׃¹³¹ פי פערתי ואשׁאפה כי למצותיך יאבתי׃¹³² פנה אלי וחנני כמשׁפט לאהבי שׁמך׃¹³³ פעמי הכן באמרתך ואל תשׁלט בי כל און׃¹³⁴ פדני מעשׁק אדם ואשׁמרה פקודיך׃¹³⁵ פניך האר בעבדך ולמדני את חקיך׃¹³⁶ פלגי מים ירדו עיני על לא שׁמרו תורתך׃¹³⁷ צדיק אתה יהוה וישׁר משׁפטיך׃¹³⁸ צוית צדק עדתיך ואמונה מאד׃¹³⁹ צמתתני קנאתי כי שׁכחו דבריך צרי׃¹⁴⁰ צרופה אמרתך מאד ועבדך אהבה׃¹⁴¹ צעיר אנכי ונבזה פקדיך לא שׁכחתי׃¹⁴² צדקתך צדק לעולם ותורתך אמת׃¹⁴³ צר ומצוק מצאוני מצותיך שׁעשׁעי׃¹⁴⁴ צדק עדותיך לעולם הבינני ואחיה׃¹⁴⁵ קראתי בכל לב ענני יהוה חקיך אצרה׃¹⁴⁶ קראתיך הושׁיעני ואשׁמרה עדתיך׃¹⁴⁷ קדמתי בנשׁף ואשׁועה לדבריך יחלתי׃¹⁴⁸ קדמו עיני אשׁמרות לשׂיח באמרתך׃¹⁴⁹ קולי שׁמעה כחסדך יהוה כמשׁפטך חיני׃¹⁵⁰ קרבו רדפי זמה מתורתך רחקו׃¹⁵¹ קרוב אתה יהוה וכל מצותיך אמת׃¹⁵² קדם ידעתי מעדתיך כי לעולם יסדתם׃¹⁵³ ראה עניי וחלצני כי תורתך לא שׁכחתי׃¹⁵⁴ ריבה ריבי וגאלני לאמרתך חיני׃¹⁵⁵ רחוק מרשׁעים ישׁועה כי חקיך לא דרשׁו׃¹⁵⁶ רחמיך רבים יהוה כמשׁפטיך חיני׃¹⁵⁷ רבים רדפי וצרי מעדותיך לא נטיתי׃¹⁵⁸ ראיתי בגדים ואתקוטטה אשׁר אמרתך לא שׁמרו׃¹⁵⁹ ראה כי פקודיך אהבתי יהוה כחסדך חיני׃¹⁶⁰ ראשׁ דברך אמת ולעולם כל משׁפט צדקך׃¹⁶¹ שׂרים רדפוני חנם ומדבריך פחד לבי׃¹⁶² שׂשׂ אנכי על אמרתך כמוצא שׁלל רב׃¹⁶³ שׁקר שׂנאתי ואתעבה תורתך אהבתי׃¹⁶⁴ שׁבע ביום הללתיך על משׁפטי צדקך׃¹⁶⁵ שׁלום רב לאהבי תורתך ואין למו מכשׁול׃¹⁶⁶ שׂברתי לישׁועתך יהוה ומצותיך עשׂיתי׃¹⁶⁷ שׁמרה נפשׁי עדתיך ואהבם מאד׃¹⁶⁸ שׁמרתי פקודיך ועדתיך כי כל דרכי נגדך׃¹⁶⁹ תקרב רנתי לפניך יהוה כדברך הבינני׃¹⁷⁰ תבוא תחנתי לפניך כאמרתך הצילני׃¹⁷¹ תבענה שׂפתי תהלה כי תלמדני חקיך׃¹⁷² תען לשׁוני אמרתך כי כל מצותיך צדק׃¹⁷³ תהי ידך לעזרני כי פקודיך בחרתי׃¹⁷⁴ תאבתי לישׁועתך יהוה ותורתך שׁעשׁעי׃¹⁷⁵ תחי נפשׁי ותהללך ומשׁפטך יעזרני׃¹⁷⁶ תעיתי כשׂה אבד בקשׁ עבדך כי מצותיך לא שׁכחתי׃

¹ אשׁרי תמימי דרך ההלכים בתורת יהוה׃² אשׁרי נצרי עדתיו בכל לב ידרשׁוהו׃³ אף לא פעלו עולה בדרכיו הלכו׃⁴ אתה צויתה פקדיך לשׁמר מאד׃⁵ אחלי יכנו דרכי לשׁמר חקיך׃⁶ אז לא אבושׁ בהביטי אל כל מצותיך׃⁷ אודך בישׁר לבב בלמדי משׁפטי צדקך׃⁸ את חקיך אשׁמר אל תעזבני עד מאד׃⁹ במה יזכה נער את ארחו לשׁמר כדברך׃¹⁰ בכל לבי דרשׁתיך אל תשׁגני ממצותיך׃¹¹ בלבי צפנתי אמרתך למען לא אחטא׃¹² ברוך אתה יהוה למדני חקיך׃¹³ בשׂפתי ספרתי כל משׁפטי פיך׃¹⁴ בדרך עדותיך שׂשׂתי כעל כל הון׃¹⁵ בפקדיך אשׂיחה ואביטה ארחתיך׃¹⁶ בחקתיך אשׁתעשׁע לא אשׁכח דברך׃¹⁷ גמל על עבדך אחיה ואשׁמרה דברך׃¹⁸ גל עיני ואביטה נפלאות מתורתך׃¹⁹ גר אנכי בארץ אל תסתר ממני מצותיך׃²⁰ גרסה נפשׁי לתאבה אל משׁפטיך בכל עת׃²¹ גערת זדים ארורים השׁגים ממצותיך׃²² גל מעלי חרפה ובוז כי עדתיך נצרתי׃²³ גם ישׁבו שׂרים בי נדברו עבדך ישׂיח בחקיך׃²⁴ גם עדתיך שׁעשׁעי אנשׁי עצתי׃²⁵ דבקה לעפר נפשׁי חיני כדברך׃²⁶ דרכי ספרתי ותענני למדני חקיך׃²⁷ דרך פקודיך הבינני ואשׂיחה בנפלאותיך׃²⁸ דלפה נפשׁי מתוגה קימני כדברך׃²⁹ דרך שׁקר הסר ממני ותורתך חנני׃³⁰ דרך אמונה בחרתי משׁפטיך שׁויתי׃³¹ דבקתי בעדותיך יהוה אל תבישׁני׃³² דרך מצותיך ארוץ כי תרחיב לבי׃³³ הורני יהוה דרך חקיך ואצרנה עקב׃³⁴ הבינני ואצרה תורתך ואשׁמרנה בכל לב׃³⁵ הדריכני בנתיב מצותיך כי בו חפצתי׃³⁶ הט לבי אל עדותיך ואל אל בצע׃³⁷ העבר עיני מראות שׁוא בדרכך חיני׃³⁸ הקם לעבדך אמרתך אשׁר ליראתך׃³⁹ העבר חרפתי אשׁר יגרתי כי משׁפטיך טובים׃⁴⁰ הנה תאבתי לפקדיך בצדקתך חיני׃⁴¹ ויבאני חסדך יהוה תשׁועתך כאמרתך׃⁴² ואענה חרפי דבר כי בטחתי בדברך׃⁴³ ואל תצל מפי דבר אמת עד מאד כי למשׁפטך יחלתי׃⁴⁴ ואשׁמרה תורתך תמיד לעולם ועד׃⁴⁵ ואתהלכה ברחבה כי פקדיך דרשׁתי׃⁴⁶ ואדברה בעדתיך נגד מלכים ולא אבושׁ׃⁴⁷ ואשׁתעשׁע במצותיך אשׁר אהבתי׃⁴⁸ ואשׂא כפי אל מצותיך אשׁר אהבתי ואשׂיחה בחקיך׃⁴⁹ זכר דבר לעבדך על אשׁר יחלתני׃⁵⁰ זאת נחמתי בעניי כי אמרתך חיתני׃⁵¹ זדים הליצני עד מאד מתורתך לא נטיתי׃⁵² זכרתי משׁפטיך מעולם יהוה ואתנחם׃⁵³ זלעפה אחזתני מרשׁעים עזבי תורתך׃⁵⁴ זמרות היו לי חקיך בבית מגורי׃⁵⁵ זכרתי בלילה שׁמך יהוה ואשׁמרה תורתך׃⁵⁶ זאת היתה לי כי פקדיך נצרתי׃⁵⁷ חלקי יהוה אמרתי לשׁמר דבריך׃⁵⁸ חליתי פניך בכל לב חנני כאמרתך׃⁵⁹ חשׁבתי דרכי ואשׁיבה רגלי אל עדתיך׃⁶⁰ חשׁתי ולא התמהמהתי לשׁמר מצותיך׃⁶¹ חבלי רשׁעים עודני תורתך לא שׁכחתי׃⁶² חצות לילה אקום להודות לך על משׁפטי צדקך׃⁶³ חבר אני לכל אשׁר יראוך ולשׁמרי פקודיך׃⁶⁴ חסדך יהוה מלאה הארץ חקיך למדני׃⁶⁵ טוב עשׂית עם עבדך יהוה כדברך׃⁶⁶ טוב טעם ודעת למדני כי במצותיך האמנתי׃⁶⁷ טרם אענה אני שׁגג ועתה אמרתך שׁמרתי׃⁶⁸ טוב אתה ומטיב למדני חקיך׃⁶⁹ טפלו עלי שׁקר זדים אני בכל לב אצר פקודיך׃⁷⁰ טפשׁ כחלב לבם אני תורתך שׁעשׁעתי׃⁷¹ טוב לי כי עניתי למען אלמד חקיך׃⁷² טוב לי תורת פיך מאלפי זהב וכסף׃⁷³ ידיך עשׂוני ויכוננוני הבינני ואלמדה מצותיך׃⁷⁴ יראיך יראוני וישׂמחו כי לדברך יחלתי׃⁷⁵ ידעתי יהוה כי צדק משׁפטיך ואמונה עניתני׃⁷⁶ יהי נא חסדך לנחמני כאמרתך לעבדך׃⁷⁷ יבאוני רחמיך ואחיה כי תורתך שׁעשׁעי׃⁷⁸ יבשׁו זדים כי שׁקר עותוני אני אשׂיח בפקודיך׃⁷⁹ ישׁובו לי יראיך וידעו עדתיך׃⁸⁰ יהי לבי תמים בחקיך למען לא אבושׁ׃⁸¹ כלתה לתשׁועתך נפשׁי לדברך יחלתי׃⁸² כלו עיני לאמרתך לאמר מתי תנחמני׃⁸³ כי הייתי כנאד בקיטור חקיך לא שׁכחתי׃⁸⁴ כמה ימי עבדך מתי תעשׂה ברדפי משׁפט׃⁸⁵ כרו לי זדים שׁיחות אשׁר לא כתורתך׃⁸⁶ כל מצותיך אמונה שׁקר רדפוני עזרני׃⁸⁷ כמעט כלוני בארץ ואני לא עזבתי פקודיך׃⁸⁸ כחסדך חיני ואשׁמרה עדות פיך׃⁸⁹ לעולם יהוה דברך נצב בשׁמים׃⁹⁰ לדר ודר אמונתך כוננת ארץ ותעמד׃⁹¹ למשׁפטיך עמדו היום כי הכל עבדיך׃⁹² לולי תורתך שׁעשׁעי אז אבדתי בעניי׃⁹³ לעולם לא אשׁכח פקודיך כי בם חייתני׃⁹⁴ לך אני הושׁיעני כי פקודיך דרשׁתי׃⁹⁵ לי קוו רשׁעים לאבדני עדתיך אתבונן׃⁹⁶ לכל תכלה ראיתי קץ רחבה מצותך מאד׃⁹⁷ מה אהבתי תורתך כל היום היא שׂיחתי׃⁹⁸ מאיבי תחכמני מצותך כי לעולם היא׃⁹⁹ מכל מלמדי השׂכלתי כי עדותיך שׂיחה׃¹⁰⁰ מזקנים אתבונן כי פקודיך נצרתי׃¹⁰¹ מכל ארח רע כלאתי רגלי למען אשׁמר דברך׃¹⁰² ממשׁפטיך לא סרתי כי אתה הורתני׃¹⁰³ מה נמלצו לחכי אמרתך מדבשׁ לפי׃¹⁰⁴ מפקודיך אתבונן על כן שׂנאתי כל ארח שׁקר׃¹⁰⁵ נר לרגלי דברך ואור לנתיבתי׃¹⁰⁶ נשׁבעתי ואקימה לשׁמר משׁפטי צדקך׃¹⁰⁷ נעניתי עד מאד יהוה חיני כדברך׃¹⁰⁸ נדבות פי רצה נא יהוה ומשׁפטיך למדני׃¹⁰⁹ נפשׁי בכפי תמיד ותורתך לא שׁכחתי׃¹¹⁰ נתנו רשׁעים פח לי ומפקודיך לא תעיתי׃¹¹¹ נחלתי עדותיך לעולם כי שׂשׂון לבי המה׃¹¹² נטיתי לבי לעשׂות חקיך לעולם עקב׃¹¹³ סעפים שׂנאתי ותורתך אהבתי׃¹¹⁴ סתרי ומגני אתה לדברך יחלתי׃¹¹⁵ סורו ממני מרעים ואצרה מצות אלהי׃¹¹⁶ סמכני כאמרתך ואחיה ואל תבישׁני משׂברי׃¹¹⁷ סעדני ואושׁעה ואשׁעה בחקיך תמיד׃¹¹⁸ סלית כל שׁוגים מחקיך כי שׁקר תרמיתם׃¹¹⁹ סגים השׁבת כל רשׁעי ארץ לכן אהבתי עדתיך׃¹²⁰ סמר מפחדך בשׂרי וממשׁפטיך יראתי׃¹²¹ עשׂיתי משׁפט וצדק בל תניחני לעשׁקי׃¹²² ערב עבדך לטוב אל יעשׁקני זדים׃¹²³ עיני כלו לישׁועתך ולאמרת צדקך׃¹²⁴ עשׂה עם עבדך כחסדך וחקיך למדני׃¹²⁵ עבדך אני הבינני ואדעה עדתיך׃¹²⁶ עת לעשׂות ליהוה הפרו תורתך׃¹²⁷ על כן אהבתי מצותיך מזהב ומפז׃¹²⁸ על כן כל פקודי כל ישׁרתי כל ארח שׁקר שׂנאתי׃¹²⁹ פלאות עדותיך על כן נצרתם נפשׁי׃¹³⁰ פתח דבריך יאיר מבין פתיים׃¹³¹ פי פערתי ואשׁאפה כי למצותיך יאבתי׃¹³² פנה אלי וחנני כמשׁפט לאהבי שׁמך׃¹³³ פעמי הכן באמרתך ואל תשׁלט בי כל און׃¹³⁴ פדני מעשׁק אדם ואשׁמרה פקודיך׃¹³⁵ פניך האר בעבדך ולמדני את חקיך׃¹³⁶ פלגי מים ירדו עיני על לא שׁמרו תורתך׃¹³⁷ צדיק אתה יהוה וישׁר משׁפטיך׃¹³⁸ צוית צדק עדתיך ואמונה מאד׃¹³⁹ צמתתני קנאתי כי שׁכחו דבריך צרי׃¹⁴⁰ צרופה אמרתך מאד ועבדך אהבה׃¹⁴¹ צעיר אנכי ונבזה פקדיך לא שׁכחתי׃¹⁴² צדקתך צדק לעולם ותורתך אמת׃¹⁴³ צר ומצוק מצאוני מצותיך שׁעשׁעי׃¹⁴⁴ צדק עדותיך לעולם הבינני ואחיה׃¹⁴⁵ קראתי בכל לב ענני יהוה חקיך אצרה׃¹⁴⁶ קראתיך הושׁיעני ואשׁמרה עדתיך׃¹⁴⁷ קדמתי בנשׁף ואשׁועה לדבריך יחלתי׃¹⁴⁸ קדמו עיני אשׁמרות לשׂיח באמרתך׃¹⁴⁹ קולי שׁמעה כחסדך יהוה כמשׁפטך חיני׃¹⁵⁰ קרבו רדפי זמה מתורתך רחקו׃¹⁵¹ קרוב אתה יהוה וכל מצותיך אמת׃¹⁵² קדם ידעתי מעדתיך כי לעולם יסדתם׃¹⁵³ ראה עניי וחלצני כי תורתך לא שׁכחתי׃¹⁵⁴ ריבה ריבי וגאלני לאמרתך חיני׃¹⁵⁵ רחוק מרשׁעים ישׁועה כי חקיך לא דרשׁו׃¹⁵⁶ רחמיך רבים יהוה כמשׁפטיך חיני׃¹⁵⁷ רבים רדפי וצרי מעדותיך לא נטיתי׃¹⁵⁸ ראיתי בגדים ואתקוטטה אשׁר אמרתך לא שׁמרו׃¹⁵⁹ ראה כי פקודיך אהבתי יהוה כחסדך חיני׃¹⁶⁰ ראשׁ דברך אמת ולעולם כל משׁפט צדקך׃¹⁶¹ שׂרים רדפוני חנם ומדבריך פחד לבי׃¹⁶² שׂשׂ אנכי על אמרתך כמוצא שׁלל רב׃¹⁶³ שׁקר שׂנאתי ואתעבה תורתך אהבתי׃¹⁶⁴ שׁבע ביום הללתיך על משׁפטי צדקך׃¹⁶⁵ שׁלום רב לאהבי תורתך ואין למו מכשׁול׃¹⁶⁶ שׂברתי לישׁועתך יהוה ומצותיך עשׂיתי׃¹⁶⁷ שׁמרה נפשׁי עדתיך ואהבם מאד׃¹⁶⁸ שׁמרתי פקודיך ועדתיך כי כל דרכי נגדך׃¹⁶⁹ תקרב רנתי לפניך יהוה כדברך הבינני׃¹⁷⁰ תבוא תחנתי לפניך כאמרתך הצילני׃¹⁷¹ תבענה שׂפתי תהלה כי תלמדני חקיך׃¹⁷² תען לשׁוני אמרתך כי כל מצותיך צדק׃¹⁷³ תהי ידך לעזרני כי פקודיך בחרתי׃¹⁷⁴ תאבתי לישׁועתך יהוה ותורתך שׁעשׁעי׃¹⁷⁵ תחי נפשׁי ותהללך ומשׁפטך יעזרני׃¹⁷⁶ תעיתי כשׂה אבד בקשׁ עבדך כי מצותיך לא שׁכחתי׃

¹⁵ פתי יאמין לכל דבר וערום יבין לאשׁרו׃

² לא תהיה אחרי רבים לרעת ולא תענה על רב לנטת אחרי רבים להטת׃

³ כמעשׂה ארץ מצרים אשׁר ישׁבתם בה לא תעשׂו וכמעשׂה ארץ כנען אשׁר אני מביא אתכם שׁמה לא תעשׂו ובחקתיהם לא תלכו׃

¹ אשׁרי האישׁ אשׁר לא הלך בעצת רשׁעים ובדרך חטאים לא עמד ובמושׁב לצים לא ישׁב׃² כי אם בתורת יהוה חפצו ובתורתו יהגה יומם ולילה׃³ והיה כעץ שׁתול על פלגי מים אשׁר פריו יתן בעתו ועלהו לא יבול וכל אשׁר יעשׂה יצליח׃⁴ לא כן הרשׁעים כי אם כמץ אשׁר תדפנו רוח׃⁵ על כן לא יקמו רשׁעים במשׁפט וחטאים בעדת צדיקים׃⁶ כי יודע יהוה דרך צדיקים ודרך רשׁעים תאבד׃