2 Chronicles 34:3-8

HOT^{(i) 3} ובשׁמונה שׁנים למלכו והוא עודנו נער החל לדרושׁ לאלהי דויד אביו ובשׁתים עשׂרה שׁנה החל לטהר את יהודה וירושׁלם מן הבמות והאשׁרים והפסלים והמסכות׃ ⁴ וינתצו לפניו את מזבחות הבעלים והחמנים אשׁר למעלה מעליהם גדע והאשׁרים והפסלים והמסכות שׁבר והדק ויזרק על פני הקברים הזבחים׃ ⁵ ועצמות כהנים שׂרף על מזבחותים ויטהר את יהודה ואת ירושׁלם׃ ⁶ ובערי מנשׁה ואפרים ושׁמעון ועד נפתלי בהר בתיהם סביב׃ ⁷ וינתץ את המזבחות ואת האשׁרים והפסלים כתת להדק וכל החמנים גדע בכל ארץ ישׂראל וישׁב לירושׁלם׃ ⁸ ובשׁנת שׁמונה עשׂרה למלכו לטהר הארץ והבית שׁלח את שׁפן בן אצליהו ואת מעשׂיהו שׂר העיר ואת יואח בן יואחז המזכיר לחזק את בית יהוה אלהיו׃