HOT(i)
4 כה אמר יהוה על שׁלשׁה פשׁעי יהודה ועל ארבעה לא אשׁיבנו על מאסם את תורת יהוה וחקיו לא שׁמרו ויתעום כזביהם אשׁר הלכו אבותם אחריהם׃ 5 ושׁלחתי אשׁ ביהודה ואכלה ארמנות ירושׁלם׃ 6 כה אמר יהוה על שׁלשׁה פשׁעי ישׂראל ועל ארבעה לא אשׁיבנו על מכרם בכסף צדיק ואביון בעבור נעלים׃ 7 השׁאפים על עפר ארץ בראשׁ דלים ודרך ענוים יטו ואישׁ ואביו ילכו אל הנערה למען חלל את שׁם קדשׁי׃ 8 ועל בגדים חבלים יטו אצל כל מזבח ויין ענושׁים ישׁתו בית אלהיהם׃