Job 23

HOT(i) 1 ויען איוב ויאמר׃ 2 גם היום מרי שׂחי ידי כבדה על אנחתי׃ 3 מי יתן ידעתי ואמצאהו אבוא עד תכונתו׃ 4 אערכה לפניו משׁפט ופי אמלא תוכחות׃ 5 אדעה מלים יענני ואבינה מה יאמר׃ 6 הברב כח יריב עמדי לא אך הוא ישׂם׃ 7 שׁם ישׁר נוכח עמו ואפלטה לנצח משׁפטי׃ 8 הן קדם אהלך ואיננו ואחור ולא אבין׃ 9 שׂמאול בעשׂתו ולא אחז יעטף ימין ולא אראה׃ 10 כי ידע דרך עמדי בחנני כזהב אצא׃ 11 באשׁרו אחזה רגלי דרכו שׁמרתי ולא אט׃ 12 מצות שׂפתיו ולא אמישׁ מחקי צפנתי אמרי פיו׃ 13 והוא באחד ומי ישׁיבנו ונפשׁו אותה ויעשׂ׃ 14 כי ישׁלים חקי וכהנה רבות עמו׃ 15 על כן מפניו אבהל אתבונן ואפחד ממנו׃ 16 ואל הרך לבי ושׁדי הבהילני׃ 17 כי לא נצמתי מפני חשׁך ומפני כסה אפל׃