John 13

Vulgate^{(i) 1} ante diem autem festum paschae sciens Iesus quia venit eius hora ut transeat ex hoc mundo ad Patrem cum dilexisset suos qui erant in mundo in finem dilexit eos ² et cena facta cum diabolus iam misisset in corde ut traderet eum Iudas Simonis Scariotis ³ sciens quia omnia dedit ei Pater in manus et quia a Deo exivit et ad Deum vadit ⁴ surgit a cena et ponit vestimenta sua et cum accepisset linteum praecinxit se ⁵ deinde mittit aquam in pelvem et coepit lavare pedes discipulorum et extergere linteo quo erat praecinctus ⁶ venit ergo ad Simonem Petrum et dicit ei Petrus Domine tu mihi lavas pedes ⁷ respondit Iesus et dicit ei quod ego facio tu nescis modo scies autem postea ⁸ dicit ei Petrus non lavabis mihi pedes in aeternum respondit Iesus ei si non lavero te non habes partem mecum ⁹ dicit ei Simon Petrus Domine non tantum pedes meos sed et manus et caput ¹⁰ dicit ei Iesus qui lotus est non indiget ut lavet sed est mundus totus et vos mundi estis sed non omnes ¹¹ sciebat enim quisnam esset qui traderet eum propterea dixit non estis mundi omnes ¹² postquam ergo lavit pedes eorum et accepit vestimenta sua cum recubuisset iterum dixit eis scitis quid fecerim vobis ¹³ vos vocatis me magister et Domine et bene dicitis sum etenim ¹⁴ si ergo ego lavi vestros pedes Dominus et magister et vos debetis alter alterius lavare pedes ¹⁵ exemplum enim dedi vobis ut quemadmodum ego feci vobis ita et vos faciatis ¹⁶ amen amen dico vobis non est servus maior domino suo neque apostolus maior eo qui misit illum ¹⁷ si haec scitis beati eritis si feceritis ea ¹⁸ non de omnibus vobis dico ego scio quos elegerim sed ut impleatur scriptura qui manducat mecum panem levavit contra me calcaneum suum ¹⁹ amodo dico vobis priusquam fiat ut credatis cum factum fuerit quia ego sum ²⁰ amen amen dico vobis qui accipit si quem misero me accipit qui autem me accipit accipit eum qui me misit ²¹ cum haec dixisset Iesus turbatus est spiritu et protestatus est et dixit amen amen dico vobis quia unus ex vobis tradet me ²² aspiciebant ergo ad invicem discipuli haesitantes de quo diceret ²³ erat ergo recumbens unus ex discipulis eius in sinu Iesu quem diligebat Iesus ²⁴ innuit ergo huic Simon Petrus et dicit ei quis est de quo dicit ²⁵ itaque cum recubuisset ille supra pectus Iesu dicit ei Domine quis est ²⁶ respondit Iesus ille est cui ego intinctum panem porrexero et cum intinxisset panem dedit Iudae Simonis Scariotis ²⁷ et post buccellam tunc introivit in illum Satanas dicit ei Iesus quod facis fac citius ²⁸ hoc autem nemo scivit discumbentium ad quid dixerit ei ²⁹ quidam enim putabant quia loculos habebat Iudas quia dicit ei Iesus eme ea quae opus sunt nobis ad diem festum aut egenis ut aliquid daret ³⁰ cum ergo accepisset ille buccellam exivit continuo erat autem nox ³¹ cum ergo exisset dicit Iesus nunc clarificatus est Filius hominis et Deus clarificatus est in eo ³² si Deus clarificatus est in eo et Deus clarificabit eum in semet ipso et continuo clarificabit eum ³³ filioli adhuc modicum vobiscum sum quaeretis me et sicut dixi Iudaeis quo ego vado vos non potestis venire et vobis dico modo ³⁴ mandatum novum do vobis ut diligatis invicem sicut dilexi vos ut et vos diligatis invicem ³⁵ in hoc cognoscent omnes quia mei discipuli estis si dilectionem habueritis ad invicem ³⁶ dicit ei Simon Petrus Domine quo vadis respondit Iesus quo ego vado non potes me modo sequi sequeris autem postea ³⁷ dicit ei Petrus quare non possum sequi te modo animam meam pro te ponam ³⁸ respondit Iesus animam tuam pro me ponis amen amen dico tibi non cantabit gallus donec me ter neges