1 John 5:13-21 haec scripsi vobis ut sciatis quoniam vitam habetis aeternam qui creditis in nomine Filii Dei

Vulgate⁽ⁱ⁾ ¹³ haec scripsi vobis ut sciatis quoniam vitam habetis aeternam qui creditis in nomine Filii Dei ¹⁴ et haec est fiducia quam habemus ad eum quia quodcumque petierimus secundum voluntatem eius audit nos ¹⁵ et scimus quoniam audit nos quicquid petierimus scimus quoniam habemus petitiones quas postulavimus ab eo ¹⁶ qui scit fratrem suum peccare peccatum non ad mortem petet et dabit ei vitam peccantibus non ad mortem est peccatum ad mortem non pro illo dico ut roget ¹⁷ omnis iniquitas peccatum est et est peccatum non ad mortem ¹⁸ scimus quoniam omnis qui natus est ex Deo non peccat sed generatio Dei conservat eum et malignus non tangit eum ¹⁹ scimus quoniam ex Deo sumus et mundus totus in maligno positus est ²⁰ et scimus quoniam Filius Dei venit et dedit nobis sensum ut cognoscamus verum Deum et simus in vero Filio eius hic est verus Deus et vita aeterna ²¹ filioli custodite vos a simulacris