Deuteronomy 5:6-21

Vulgate^{(i) 6} ego Dominus Deus tuus qui eduxi te de terra Aegypti de domo servitutis ⁷ non habebis deos alienos in conspectu meo ⁸ non facies tibi sculptile nec similitudinem omnium quae in caelo sunt desuper et quae in terra deorsum et quae versantur in aquis sub terra ⁹ non adorabis ea et non coles ego enim sum Dominus Deus tuus Deus aemulator reddens iniquitatem patrum super filios in tertiam et quartam generationem his qui oderunt me ¹⁰ et faciens misericordiam in multa milia diligentibus me et custodientibus praecepta mea ¹¹ non usurpabis nomen Domini Dei tui frustra quia non erit inpunitus qui super re vana nomen eius adsumpserit ¹² observa diem sabbati ut sanctifices eum sicut praecepit tibi Dominus Deus tuus ¹³ sex diebus operaberis et facies omnia opera tua ¹⁴ septimus dies sabbati est id est requies Domini Dei tui non facies in eo quicquam operis tu et filius tuus et filia servus et ancilla et bos et asinus et omne iumentum tuum et peregrinus qui est intra portas tuas ut requiescat servus et ancilla tua sicut et tu ¹⁵ memento quod et ipse servieris in Aegypto et eduxerit te inde Dominus Deus tuus in manu forti et brachio extento idcirco praecepit tibi ut observares diem sabbati ¹⁶ honora patrem tuum et matrem sicut praecepit tibi Dominus Deus tuus ut longo vivas tempore et bene sit tibi in terra quam Dominus Deus tuus daturus est tibi ¹⁷ non occides ¹⁸ neque moechaberis ¹⁹ furtumque non facies ²⁰ nec loqueris contra proximum tuum falsum testimonium ²¹ non concupisces uxorem proximi tui non domum non agrum non servum non ancillam non bovem non asinum et universa quae illius sunt