Nehemiah 13:29 Cross References - HOT

²⁹ זכרה להם אלהי על גאלי הכהנה וברית הכהנה והלוים׃

Leviticus 21:1-7

¹ ויאמר יהוה אל משׁה אמר אל הכהנים בני אהרן ואמרת אלהם לנפשׁ לא יטמא בעמיו׃² כי אם לשׁארו הקרב אליו לאמו ולאביו ולבנו ולבתו ולאחיו׃³ ולאחתו הבתולה הקרובה אליו אשׁר לא היתה לאישׁ לה יטמא׃⁴ לא יטמא בעל בעמיו להחלו׃⁵ לא יקרחה קרחה בראשׁם ופאת זקנם לא יגלחו ובבשׂרם לא ישׂרטו שׂרטת׃⁶ קדשׁים יהיו לאלהיהם ולא יחללו שׁם אלהיהם כי את אשׁי יהוה לחם אלהיהם הם מקריבם והיו קדשׁ׃⁷ אשׁה זנה וחללה לא יקחו ואשׁה גרושׁה מאישׁה לא יקחו כי קדשׁ הוא לאלהיו׃

Numbers 16:9-10

⁹ המעט מכם כי הבדיל אלהי ישׂראל אתכם מעדת ישׂראל להקריב אתכם אליו לעבד את עבדת משׁכן יהוה ולעמד לפני העדה לשׁרתם׃¹⁰ ויקרב אתך ואת כל אחיך בני לוי אתך ובקשׁתם גם כהנה׃

Numbers 25:12-13

¹² לכן אמר הנני נתן לו את בריתי שׁלום׃¹³ והיתה לו ולזרעו אחריו ברית כהנת עולם תחת אשׁר קנא לאלהיו ויכפר על בני ישׂראל׃

1 Samuel 2:30

³⁰ לכן נאם יהוה אלהי ישׂראל אמור אמרתי ביתך ובית אביך יתהלכו לפני עד עולם ועתה נאם יהוה חלילה לי כי מכבדי אכבד ובזי יקלו׃

Nehemiah 6:14

¹⁴ זכרה אלהי לטוביה ולסנבלט כמעשׂיו אלה וגם לנועדיה הנביאה וליתר הנביאים אשׁר היו מיראים אותי׃

Psalms 59:5-13

⁵ (59:6) ואתה יהוה אלהים צבאות אלהי ישׂראל הקיצה לפקד כל הגוים אל תחן כל בגדי און סלה׃⁶ (59:7) ישׁובו לערב יהמו ככלב ויסובבו עיר׃⁷ (59:8) הנה יביעון בפיהם חרבות בשׂפתותיהם כי מי שׁמע׃⁸ (59:9) ואתה יהוה תשׂחק למו תלעג לכל גוים׃⁹ (59:10) עזו אליך אשׁמרה כי אלהים משׂגבי׃¹⁰ (59:11) אלהי חסדו יקדמני אלהים יראני בשׁררי׃¹¹ (59:12) אל תהרגם פן ישׁכחו עמי הניעמו בחילך והורידמו מגננו אדני׃¹² (59:13) חטאת פימו דבר שׂפתימו וילכדו בגאונם ומאלה ומכחשׁ יספרו׃¹³ (59:14) כלה בחמה כלה ואינמו וידעו כי אלהים משׁל ביעקב לאפסי הארץ סלה׃

Malachi 2:4-8

⁴ וידעתם כי שׁלחתי אליכם את המצוה הזאת להיות בריתי את לוי אמר יהוה צבאות׃⁵ בריתי היתה אתו החיים והשׁלום ואתנם לו מורא וייראני ומפני שׁמי נחת הוא׃⁶ תורת אמת היתה בפיהו ועולה לא נמצא בשׂפתיו בשׁלום ובמישׁור הלך אתי ורבים השׁיב מעון׃⁷ כי שׂפתי כהן ישׁמרו דעת ותורה יבקשׁו מפיהו כי מלאך יהוה צבאות הוא׃⁸ ואתם סרתם מן הדרך הכשׁלתם רבים בתורה שׁחתם ברית הלוי אמר יהוה צבאות׃

Malachi 2:10-12

¹⁰ הלוא אב אחד לכלנו הלוא אל אחד בראנו מדוע נבגד אישׁ באחיו לחלל ברית אבתינו׃¹¹ בגדה יהודה ותועבה נעשׂתה בישׂראל ובירושׁלם כי חלל יהודה קדשׁ יהוה אשׁר אהב ובעל בת אל נכר׃¹² יכרת יהוה לאישׁ אשׁר יעשׂנה ער וענה מאהלי יעקב ומגישׁ מנחה ליהוה צבאות׃