HOT(i)
12 ויאמר יהוה אלי קום רד מהר מזה כי שׁחת עמך אשׁר הוצאת ממצרים סרו מהר מן הדרך אשׁר צויתם עשׂו להם מסכה׃ 13 ויאמר יהוה אלי לאמר ראיתי את העם הזה והנה עם קשׁה ערף הוא׃ 14 הרף ממני ואשׁמידם ואמחה את שׁמם מתחת השׁמים ואעשׂה אותך לגוי עצום ורב ממנו׃ 15 ואפן וארד מן ההר וההר בער באשׁ ושׁני לוחת הברית על שׁתי ידי׃ 16 וארא והנה חטאתם ליהוה אלהיכם עשׂיתם לכם עגל מסכה סרתם מהר מן הדרך אשׁר צוה יהוה אתכם׃