Numbers 29:1-40 ובחדשׁ השׁביעי באחד לחדשׁ מקרא קדשׁ יהיה לכם כל מלאכת עבדה לא תעשׂו יום תרועה יהיה׃

HOT⁽ⁱ⁾ ¹ ובחדשׁ השׁביעי באחד לחדשׁ מקרא קדשׁ יהיה לכם כל מלאכת עבדה לא תעשׂו יום תרועה יהיה׃ ² ועשׂיתם עלה לריח ניחח ליהוה פר בן בקר אחד איל אחד כבשׂים בני שׁנה שׁבעה תמימם׃ ³ ומנחתם סלת בלולה בשׁמן שׁלשׁה עשׂרנים לפר שׁני עשׂרנים לאיל׃ ⁴ ועשׂרון אחד לכבשׂ האחד לשׁבעת הכבשׂים׃ ⁵ ושׂעיר עזים אחד חטאת לכפר עליכם׃ ⁶ מלבד עלת החדשׁ ומנחתה ועלת התמיד ומנחתה ונסכיהם כמשׁפטם לריח ניחח אשׁה ליהוה׃ ⁷ ובעשׂור לחדשׁ השׁביעי הזה מקרא קדשׁ יהיה לכם ועניתם את נפשׁתיכם כל מלאכה לא תעשׂו׃ ⁸ והקרבתם עלה ליהוה ריח ניחח פר בן בקר אחד איל אחד כבשׂים בני שׁנה שׁבעה תמימם יהיו׃ ⁹ ומנחתם סלת בלולה בשׁמן שׁלשׁה עשׂרנים לפר שׁני עשׂרנים לאיל האחד׃ ¹⁰ עשׂרון עשׂרון לכבשׂ האחד לשׁבעת הכבשׂים׃ ¹¹ שׂעיר עזים אחד חטאת מלבד חטאת הכפרים ועלת התמיד ומנחתה ונסכיהם׃ ¹² ובחמשׁה עשׂר יום לחדשׁ השׁביעי מקרא קדשׁ יהיה לכם כל מלאכת עבדה לא תעשׂו וחגתם חג ליהוה שׁבעת ימים׃ ¹³ והקרבתם עלה אשׁה ריח ניחח ליהוה פרים בני בקר שׁלשׁה עשׂר אילם שׁנים כבשׂים בני שׁנה ארבעה עשׂר תמימם יהיו׃ ¹⁴ ומנחתם סלת בלולה בשׁמן שׁלשׁה עשׂרנים לפר האחד לשׁלשׁה עשׂר פרים שׁני עשׂרנים לאיל האחד לשׁני האילם׃ ¹⁵ ועשׂרון עשׂרון לכבשׂ האחד לארבעה עשׂר כבשׂים׃ ¹⁶ ושׂעיר עזים אחד חטאת מלבד עלת התמיד מנחתה ונסכה׃ ¹⁷ וביום השׁני פרים בני בקר שׁנים עשׂר אילם שׁנים כבשׂים בני שׁנה ארבעה עשׂר תמימם׃ ¹⁸ ומנחתם ונסכיהם לפרים לאילם ולכבשׂים במספרם כמשׁפט׃ ¹⁹ ושׂעיר עזים אחד חטאת מלבד עלת התמיד ומנחתה ונסכיהם׃ ²⁰ וביום השׁלישׁי פרים עשׁתי עשׂר אילם שׁנים כבשׂים בני שׁנה ארבעה עשׂר תמימם׃ ²¹ ומנחתם ונסכיהם לפרים לאילם ולכבשׂים במספרם כמשׁפט׃ ²² ושׂעיר חטאת אחד מלבד עלת התמיד ומנחתה ונסכה׃ ²³ וביום הרביעי פרים עשׂרה אילם שׁנים כבשׂים בני שׁנה ארבעה עשׂר תמימם׃ ²⁴ מנחתם ונסכיהם לפרים לאילם ולכבשׂים במספרם כמשׁפט׃ ²⁵ ושׂעיר עזים אחד חטאת מלבד עלת התמיד מנחתה ונסכה׃ ²⁶ וביום החמישׁי פרים תשׁעה אילם שׁנים כבשׂים בני שׁנה ארבעה עשׂר תמימם׃ ²⁷ ומנחתם ונסכיהם לפרים לאילם ולכבשׂים במספרם כמשׁפט׃ ²⁸ ושׂעיר חטאת אחד מלבד עלת התמיד ומנחתה ונסכה׃ ²⁹ וביום השׁשׁי פרים שׁמנה אילם שׁנים כבשׂים בני שׁנה ארבעה עשׂר תמימם׃ ³⁰ ומנחתם ונסכיהם לפרים לאילם ולכבשׂים במספרם כמשׁפט׃ ³¹ ושׂעיר חטאת אחד מלבד עלת התמיד מנחתה ונסכיה׃ ³² וביום השׁביעי פרים שׁבעה אילם שׁנים כבשׂים בני שׁנה ארבעה עשׂר תמימם׃ ³³ ומנחתם ונסכהם לפרים לאילם ולכבשׂים במספרם כמשׁפטם׃ ³⁴ ושׂעיר חטאת אחד מלבד עלת התמיד מנחתה ונסכה׃ ³⁵ ביום השׁמיני עצרת תהיה לכם כל מלאכת עבדה לא תעשׂו׃ ³⁶ והקרבתם עלה אשׁה ריח ניחח ליהוה פר אחד איל אחד כבשׂים בני שׁנה שׁבעה תמימם׃ ³⁷ מנחתם ונסכיהם לפר לאיל ולכבשׂים במספרם כמשׁפט׃ ³⁸ ושׂעיר חטאת אחד מלבד עלת התמיד ומנחתה ונסכה׃ ³⁹ אלה תעשׂו ליהוה במועדיכם לבד מנדריכם ונדבתיכם לעלתיכם ולמנחתיכם ולנסכיכם ולשׁלמיכם׃ ⁴⁰ (30:1) ויאמר משׁה אל בני ישׂראל ככל אשׁר צוה יהוה את משׁה׃