Psalms 135

HOT(i) 1 הללו יה הללו את שׁם יהוה הללו עבדי יהוה׃ 2 שׁעמדים בבית יהוה בחצרות בית אלהינו׃ 3 הללו יה כי טוב יהוה זמרו לשׁמו כי נעים׃ 4 כי יעקב בחר לו יה ישׂראל לסגלתו׃ 5 כי אני ידעתי כי גדול יהוה ואדנינו מכל אלהים׃ 6 כל אשׁר חפץ יהוה עשׂה בשׁמים ובארץ בימים וכל תהומות׃ 7 מעלה נשׂאים מקצה הארץ ברקים למטר עשׂה מוצא רוח מאוצרותיו׃ 8 שׁהכה בכורי מצרים מאדם עד בהמה׃ 9 שׁלח אתות ומפתים בתוככי מצרים בפרעה ובכל עבדיו׃ 10 שׁהכה גוים רבים והרג מלכים עצומים׃ 11 לסיחון מלך האמרי ולעוג מלך הבשׁן ולכל ממלכות כנען׃ 12 ונתן ארצם נחלה נחלה לישׂראל עמו׃ 13 יהוה שׁמך לעולם יהוה זכרך לדר ודר׃ 14 כי ידין יהוה עמו ועל עבדיו יתנחם׃ 15 עצבי הגוים כסף וזהב מעשׂה ידי אדם׃ 16 פה להם ולא ידברו עינים להם ולא יראו׃ 17 אזנים להם ולא יאזינו אף אין ישׁ רוח בפיהם׃ 18 כמוהם יהיו עשׂיהם כל אשׁר בטח׃ 19 בית ישׂראל ברכו את יהוה בית אהרן ברכו את יהוה׃ 20 בית הלוי ברכו את יהוה יראי יהוה ברכו את יהוה׃ 21 ברוך יהוה מציון שׁכן ירושׁלם הללו יה׃