HOT(i)
20 מפץ אתה לי כלי מלחמה ונפצתי בך גוים והשׁחתי בך ממלכות׃ 21 ונפצתי בך סוס ורכבו ונפצתי בך רכב ורכבו׃ 22 ונפצתי בך אישׁ ואשׁה ונפצתי בך זקן ונער ונפצתי בך בחור ובתולה׃ 23 ונפצתי בך רעה ועדרו ונפצתי בך אכר וצמדו ונפצתי בך פחות וסגנים׃ 24 ושׁלמתי לבבל ולכל יושׁבי כשׂדים את כל רעתם אשׁר עשׂו בציון לעיניכם נאם יהוה׃ 25 הנני אליך הר המשׁחית נאם יהוה המשׁחית את כל הארץ ונטיתי את ידי עליך וגלגלתיך מן הסלעים ונתתיך להר שׂרפה׃ 26 ולא יקחו ממך אבן לפנה ואבן למוסדות כי שׁממות עולם תהיה נאם יהוה׃ 27 שׂאו נס בארץ תקעו שׁופר בגוים קדשׁו עליה גוים השׁמיעו עליה ממלכות אררט מני ואשׁכנז פקדו עליה טפסר העלו סוס כילק סמר׃