Joshua 21:20-42 ולמשׁפחות בני קהת הלוים הנותרים מבני קהת ויהי ערי גורלם ממטה אפרים׃

HOT⁽ⁱ⁾ ²⁰ ולמשׁפחות בני קהת הלוים הנותרים מבני קהת ויהי ערי גורלם ממטה אפרים׃ ²¹ ויתנו להם את עיר מקלט הרצח את שׁכם ואת מגרשׁה בהר אפרים ואת גזר ואת מגרשׁה׃ ²² ואת קבצים ואת מגרשׁה ואת בית חורן ואת מגרשׁה ערים ארבע׃ ²³ וממטה דן את אלתקא ואת מגרשׁה את גבתון ואת מגרשׁה׃ ²⁴ את אילון ואת מגרשׁה את גת רמון ואת מגרשׁה ערים ארבע׃ ²⁵ וממחצית מטה מנשׁה את תענך ואת מגרשׁה ואת גת רמון ואת מגרשׁה ערים שׁתים׃ ²⁶ כל ערים עשׂר ומגרשׁיהן למשׁפחות בני קהת הנותרים׃ ²⁷ ולבני גרשׁון ממשׁפחת הלוים מחצי מטה מנשׁה את עיר מקלט הרצח את גלון בבשׁן ואת מגרשׁה ואת בעשׁתרה ואת מגרשׁה ערים שׁתים׃ ²⁸ וממטה ישׂשכר את קשׁיון ואת מגרשׁה את דברת ואת מגרשׁה׃ ²⁹ את ירמות ואת מגרשׁה את עין גנים ואת מגרשׁה ערים ארבע׃ ³⁰ וממטה אשׁר את משׁאל ואת מגרשׁה את עבדון ואת מגרשׁה׃ ³¹ את חלקת ואת מגרשׁה ואת רחב ואת מגרשׁה ערים ארבע׃ ³² וממטה נפתלי את עיר מקלט הרצח את קדשׁ בגליל ואת מגרשׁה ואת חמת דאר ואת מגרשׁה ואת קרתן ואת מגרשׁה ערים שׁלשׁ׃ ³³ כל ערי הגרשׁני למשׁפחתם שׁלשׁ עשׂרה עיר ומגרשׁיהן׃ ³⁴ ולמשׁפחות בני מררי הלוים הנותרים מאת מטה זבולן את יקנעם ואת מגרשׁה את קרתה ואת מגרשׁה׃ ³⁵ את דמנה ואת מגרשׁה את נהלל ואת מגרשׁה ערים ארבע׃ ³⁶ וממטה ראובן את בצר ואת מגרשׁה ואת יהצה ואת מגרשׁה׃ ³⁷ את קדמות ואת מגרשׁה ואת מיפעת ואת מגרשׁה ערים ארבע׃ ³⁸ וממטה גד את עיר מקלט הרצח את רמת בגלעד ואת מגרשׁה ואת מחנים ואת מגרשׁה׃ ³⁹ את חשׁבון ואת מגרשׁה את יעזר ואת מגרשׁה כל ערים ארבע׃ ⁴⁰ כל הערים לבני מררי למשׁפחתם הנותרים ממשׁפחות הלוים ויהי גורלם ערים שׁתים עשׂרה׃ ⁴¹ כל ערי הלוים בתוך אחזת בני ישׂראל ערים ארבעים ושׁמנה ומגרשׁיהן׃ ⁴² תהיינה הערים האלה עיר עיר ומגרשׁיה סביבתיה כן לכל הערים האלה׃