Lamentations 5

HOT^{(i) 1} זכר יהוה מה היה לנו הביט וראה את חרפתנו׃ ² נחלתנו נהפכה לזרים בתינו לנכרים׃ ³ יתומים היינו אין אב אמתינו כאלמנות׃ ⁴ מימינו בכסף שׁתינו עצינו במחיר יבאו׃ ⁵ על צוארנו נרדפנו יגענו לא הונח׃ ⁶ מצרים נתנו יד אשׁור לשׂבע לחם׃ ⁷ אבתינו חטאו אינם אנחנו עונתיהם סבלנו׃ ⁸ עבדים משׁלו בנו פרק אין מידם׃ ⁹ בנפשׁנו נביא לחמנו מפני חרב המדבר׃ ¹⁰ עורנו כתנור נכמרו מפני זלעפות רעב׃ ¹¹ נשׁים בציון ענו בתלת בערי יהודה׃ ¹² שׂרים בידם נתלו פני זקנים לא נהדרו׃ ¹³ בחורים טחון נשׂאו ונערים בעץ כשׁלו׃ ¹⁴ זקנים משׁער שׁבתו בחורים מנגינתם׃ ¹⁵ שׁבת משׂושׂ לבנו נהפך לאבל מחלנו׃ ¹⁶ נפלה עטרת ראשׁנו אוי נא לנו כי חטאנו׃ ¹⁷ על זה היה דוה לבנו על אלה חשׁכו עינינו׃ ¹⁸ על הר ציון שׁשׁמם שׁועלים הלכו׃ ¹⁹ אתה יהוה לעולם תשׁב כסאך לדר ודור׃ ²⁰ למה לנצח תשׁכחנו תעזבנו לארך ימים׃ ²¹ השׁיבנו יהוה אליך ונשׁוב חדשׁ ימינו כקדם׃ ²² כי אם מאס מאסתנו קצפת עלינו עד מאד׃