Job 17

HOT^{(i) 1} רוחי חבלה ימי נזעכו קברים׃ ² אם לא התלים עמדי ובהמרותם תלן עיני׃ ³ שׂימה נא ערבני עמך מי הוא לידי יתקע׃ ⁴ כי לבם צפנת משׂכל על כן לא תרמם׃ ⁵ לחלק יגיד רעים ועיני בניו תכלנה׃ ⁶ והצגני למשׁל עמים ותפת לפנים אהיה׃ ⁷ ותכה מכעשׂ עיני ויצרי כצל כלם׃ ⁸ ישׁמו ישׁרים על זאת ונקי על חנף יתערר׃ ⁹ ויאחז צדיק דרכו וטהר ידים יסיף אמץ׃ ¹⁰ ואולם כלם תשׁבו ובאו נא ולא אמצא בכם חכם׃ ¹¹ ימי עברו זמתי נתקו מורשׁי לבבי׃ ¹² לילה ליום ישׂימו אור קרוב מפני חשׁך׃ ¹³ אם אקוה שׁאול ביתי בחשׁך רפדתי יצועי׃ ¹⁴ לשׁחת קראתי אבי אתה אמי ואחתי לרמה׃ ¹⁵ ואיה אפו תקותי ותקותי מי ישׁורנה׃ ¹⁶ בדי שׁאל תרדנה אם יחד על עפר נחת׃