Habakkuk

HOT^{(i) 1} המשׂא אשׁר חזה חבקוק הנביא׃ ² עד אנה יהוה שׁועתי ולא תשׁמע אזעק אליך חמס ולא תושׁיע׃ ³ למה תראני און ועמל תביט ושׁד וחמס לנגדי ויהי ריב ומדון ישׂא׃ ⁴ על כן תפוג תורה ולא יצא לנצח משׁפט כי רשׁע מכתיר את הצדיק על כן יצא משׁפט מעקל׃ ⁵ ראו בגוים והביטו והתמהו תמהו כי פעל פעל בימיכם לא תאמינו כי יספר׃ ⁶ כי הנני מקים את הכשׂדים הגוי המר והנמהר ההולך למרחבי ארץ לרשׁת משׁכנות לא׃ ⁷ אים ונורא הוא ממנו משׁפטו ושׂאתו יצא׃ ⁸ וקלו מנמרים סוסיו וחדו מזאבי ערב ופשׁו פרשׁיו ופרשׁיו מרחוק יבאו יעפו כנשׁר חשׁ לאכול׃ ⁹ כלה לחמס יבוא מגמת פניהם קדימה ויאסף כחול שׁבי׃ ¹⁰ והוא במלכים יתקלס ורזנים משׂחק לו הוא לכל מבצר ישׂחק ויצבר עפר וילכדה׃ ¹¹ אז חלף רוח ויעבר ואשׁם זו כחו לאלהו׃ ¹² הלוא אתה מקדם יהוה אלהי קדשׁי לא נמות יהוה למשׁפט שׂמתו וצור להוכיח יסדתו׃ ¹³ טהור עינים מראות רע והביט אל עמל לא תוכל למה תביט בוגדים תחרישׁ בבלע רשׁע צדיק ממנו׃ ¹⁴ ותעשׂה אדם כדגי הים כרמשׂ לא משׁל׃ ¹⁵ כלה בחכה העלה יגרהו בחרמו ויאספהו במכמרתו על כן ישׂמח ויגיל׃ ¹⁶ על כן יזבח לחרמו ויקטר למכמרתו כי בהמה שׁמן חלקו ומאכלו בראה׃ ¹⁷ העל כן יריק חרמו ותמיד להרג גוים לא יחמול׃