Exodus 20 וידבר אלהים את כל הדברים האלה לאמר׃

HOT⁽ⁱ⁾ ¹ וידבר אלהים את כל הדברים האלה לאמר׃ ² אנכי יהוה אלהיך אשׁר הוצאתיך מארץ מצרים מבית עבדים׃ ³ לא יהיה לך אלהים אחרים על פני׃ ⁴ לא תעשׂה לך פסל וכל תמונה אשׁר בשׁמים ממעל ואשׁר בארץ מתחת ואשׁר במים מתחת לארץ׃ ⁵ לא תשׁתחוה להם ולא תעבדם כי אנכי יהוה אלהיך אל קנא פקד עון אבת על בנים על שׁלשׁים ועל רבעים לשׂנאי׃ ⁶ ועשׂה חסד לאלפים לאהבי ולשׁמרי מצותי׃ ⁷ לא תשׂא את שׁם יהוה אלהיך לשׁוא כי לא ינקה יהוה את אשׁר ישׂא את שׁמו לשׁוא׃ ⁸ זכור את יום השׁבת לקדשׁו׃ ⁹ שׁשׁת ימים תעבד ועשׂית כל מלאכתך׃ ¹⁰ ויום השׁביעי שׁבת ליהוה אלהיך לא תעשׂה כל מלאכה אתה ובנך ובתך עבדך ואמתך ובהמתך וגרך אשׁר בשׁעריך׃ ¹¹ כי שׁשׁת ימים עשׂה יהוה את השׁמים ואת הארץ את הים ואת כל אשׁר בם וינח ביום השׁביעי על כן ברך יהוה את יום השׁבת ויקדשׁהו׃ ¹² כבד את אביך ואת אמך למען יארכון ימיך על האדמה אשׁר יהוה אלהיך נתן׃ ¹³ לא תרצח׃ ¹⁴ לא תנאף׃ ¹⁵ לא תגנב׃ ¹⁶ לא תענה ברעך עד שׁקר׃ ¹⁷ לא תחמד בית רעך לא תחמד אשׁת רעך ועבדו ואמתו ושׁורו וחמרו וכל אשׁר לרעך׃ ¹⁸ וכל העם ראים את הקולת ואת הלפידם ואת קול השׁפר ואת ההר עשׁן וירא העם וינעו ויעמדו מרחק׃ ¹⁹ ויאמרו אל משׁה דבר אתה עמנו ונשׁמעה ואל ידבר עמנו אלהים פן נמות׃ ²⁰ ויאמר משׁה אל העם אל תיראו כי לבעבור נסות אתכם בא האלהים ובעבור תהיה יראתו על פניכם לבלתי תחטאו׃ ²¹ ויעמד העם מרחק ומשׁה נגשׁ אל הערפל אשׁר שׁם האלהים׃ ²² ויאמר יהוה אל משׁה כה תאמר אל בני ישׂראל אתם ראיתם כי מן השׁמים דברתי עמכם׃ ²³ לא תעשׂון אתי אלהי כסף ואלהי זהב לא תעשׂו׃ ²⁴ מזבח אדמה תעשׂה לי וזבחת עליו את עלתיך ואת שׁלמיך את צאנך ואת בקרך בכל המקום אשׁר אזכיר את שׁמי אבוא אליך וברכתיך׃ ²⁵ ואם מזבח אבנים תעשׂה לי לא תבנה אתהן גזית כי חרבך הנפת עליה ותחללה׃ ²⁶ ולא תעלה במעלת על מזבחי אשׁר לא תגלה ערותך עליו׃