Ezekiel 16:15-63 ותבטחי ביפיך ותזני על שׁמך ותשׁפכי את תזנותיך על כל עובר לו יהי׃

HOT⁽ⁱ⁾ ¹⁵ ותבטחי ביפיך ותזני על שׁמך ותשׁפכי את תזנותיך על כל עובר לו יהי׃ ¹⁶ ותקחי מבגדיך ותעשׂי לך במות טלאות ותזני עליהם לא באות ולא יהיה׃ ¹⁷ ותקחי כלי תפארתך מזהבי ומכספי אשׁר נתתי לך ותעשׂי לך צלמי זכר ותזני׃ ¹⁸ ותקחי את בגדי רקמתך ותכסים ושׁמני וקטרתי נתתי לפניהם׃ ¹⁹ ולחמי אשׁר נתתי לך סלת ושׁמן ודבשׁ האכלתיך ונתתיהו לפניהם לריח ניחח ויהי נאם אדני יהוה׃ ²⁰ ותקחי את בניך ואת בנותיך אשׁר ילדת לי ותזבחים להם לאכול המעט מתזנתך׃ ²¹ ותשׁחטי את בני ותתנים בהעביר אותם׃ ²² ואת כל תועבתיך ותזנתיך לא זכרתי את ימי נעוריך בהיותך ערם ועריה מתבוססת בדמך היית׃ ²³ ויהי אחרי כל רעתך אוי אוי לך נאם אדני יהוה׃ ²⁴ ותבני לך גב ותעשׂי לך רמה בכל רחוב׃ ²⁵ אל כל ראשׁ דרך בנית רמתך ותתעבי את יפיך ותפשׂקי את רגליך לכל עובר ותרבי את תזנתך׃ ²⁶ ותזני אל בני מצרים שׁכניך גדלי בשׂר ותרבי את תזנתך להכעיסני׃ ²⁷ והנה נטיתי ידי עליך ואגרע חקך ואתנך בנפשׁ שׂנאותיך בנות פלשׁתים הנכלמות מדרכך זמה׃ ²⁸ ותזני אל בני אשׁור מבלתי שׂבעתך ותזנים וגם לא שׂבעת׃ ²⁹ ותרבי את תזנותך אל ארץ כנען כשׂדימה וגם בזאת לא שׂבעת׃ ³⁰ מה אמלה לבתך נאם אדני יהוה בעשׂותך את כל אלה מעשׂה אשׁה זונה שׁלטת׃ ³¹ בבנותיך גבך בראשׁ כל דרך ורמתך עשׂיתי בכל רחוב ולא הייתי כזונה לקלס אתנן׃ ³² האשׁה המנאפת תחת אישׁה תקח את זרים׃ ³³ לכל זנות יתנו נדה ואת נתת את נדניך לכל מאהביך ותשׁחדי אותם לבוא אליך מסביב בתזנותיך׃ ³⁴ ויהי בך הפך מן הנשׁים בתזנותיך ואחריך לא זונה ובתתך אתנן ואתנן לא נתן לך ותהי להפך׃ ³⁵ לכן זונה שׁמעי דבר יהוה׃ ³⁶ כה אמר אדני יהוה יען השׁפך נחשׁתך ותגלה ערותך בתזנותיך על מאהביך ועל כל גלולי תועבותיך וכדמי בניך אשׁר נתת׃ ³⁷ לכן הנני מקבץ את כל מאהביך אשׁר ערבת עליהם ואת כל אשׁר אהבת על כל אשׁר שׂנאת וקבצתי אתם עליך מסביב וגליתי ערותך אלהם וראו את כל ערותך׃ ³⁸ ושׁפטתיך משׁפטי נאפות ושׁפכת דם ונתתיך דם חמה וקנאה׃ ³⁹ ונתתי אותך בידם והרסו גבך ונתצו רמתיך והפשׁיטו אותך בגדיך ולקחו כלי תפארתך והניחוך עירם ועריה׃ ⁴⁰ והעלו עליך קהל ורגמו אותך באבן ובתקוך בחרבותם׃ ⁴¹ ושׂרפו בתיך באשׁ ועשׂו בך שׁפטים לעיני נשׁים רבות והשׁבתיך מזונה וגם אתנן לא תתני עוד׃ ⁴² והנחתי חמתי בך וסרה קנאתי ממך ושׁקטתי ולא אכעס עוד׃ ⁴³ יען אשׁר לא זכרתי את ימי נעוריך ותרגזי לי בכל אלה וגם אני הא דרכך בראשׁ נתתי נאם אדני יהוה ולא עשׂיתי את הזמה על כל תועבתיך׃ ⁴⁴ הנה כל המשׁל עליך ימשׁל לאמר כאמה בתה׃ ⁴⁵ בת אמך את געלת אישׁה ובניה ואחות אחותך את אשׁר געלו אנשׁיהן ובניהן אמכן חתית ואביכן אמרי׃ ⁴⁶ ואחותך הגדולה שׁמרון היא ובנותיה היושׁבת על שׂמאולך ואחותך הקטנה ממך היושׁבת מימינך סדם ובנותיה׃ ⁴⁷ ולא בדרכיהן הלכת ובתועבותיהן עשׂיתי כמעט קט ותשׁחתי מהן בכל דרכיך׃ ⁴⁸ חי אני נאם אדני יהוה אם עשׂתה סדם אחותך היא ובנותיה כאשׁר עשׂית את ובנותיך׃ ⁴⁹ הנה זה היה עון סדם אחותך גאון שׂבעת לחם ושׁלות השׁקט היה לה ולבנותיה ויד עני ואביון לא החזיקה׃ ⁵⁰ ותגבהינה ותעשׂינה תועבה לפני ואסיר אתהן כאשׁר ראיתי׃ ⁵¹ ושׁמרון כחצי חטאתיך לא חטאה ותרבי את תועבותיך מהנה ותצדקי את אחותך בכל תועבותיך אשׁר עשׂיתי׃ ⁵² גם את שׂאי כלמתך אשׁר פללת לאחותך בחטאתיך אשׁר התעבת מהן תצדקנה ממך וגם את בושׁי ושׂאי כלמתך בצדקתך אחיותך׃ ⁵³ ושׁבתי את שׁביתהן את שׁבית סדם ובנותיה ואת שׁבית שׁמרון ובנותיה ושׁבית שׁביתיך בתוכהנה׃ ⁵⁴ למען תשׂאי כלמתך ונכלמת מכל אשׁר עשׂית בנחמך אתן׃ ⁵⁵ ואחותיך סדם ובנותיה תשׁבן לקדמתן ושׁמרון ובנותיה תשׁבן לקדמתן ואת ובנותיך תשׁבינה לקדמתכן׃ ⁵⁶ ולוא היתה סדם אחותך לשׁמועה בפיך ביום גאוניך׃ ⁵⁷ בטרם תגלה רעתך כמו עת חרפת בנות ארם וכל סביבותיה בנות פלשׁתים השׁאטות אותך מסביב׃ ⁵⁸ את זמתך ואת תועבותיך את נשׂאתים נאם יהוה׃ ⁵⁹ כי כה אמר אדני יהוה ועשׂית אותך כאשׁר עשׂית אשׁר בזית אלה להפר ברית׃ ⁶⁰ וזכרתי אני את בריתי אותך בימי נעוריך והקמותי לך ברית עולם׃ ⁶¹ וזכרת את דרכיך ונכלמת בקחתך את אחותיך הגדלות ממך אל הקטנות ממך ונתתי אתהן לך לבנות ולא מבריתך׃ ⁶² והקימותי אני את בריתי אתך וידעת כי אני יהוה׃ ⁶³ למען תזכרי ובשׁת ולא יהיה לך עוד פתחון פה מפני כלמתך בכפרי לך לכל אשׁר עשׂית נאם אדני יהוה׃