Jeremiah 4 אם תשׁוב ישׂראל נאם יהוה אלי תשׁוב ואם תסיר שׁקוציך מפני ולא תנוד׃

HOT⁽ⁱ⁾ ¹ אם תשׁוב ישׂראל נאם יהוה אלי תשׁוב ואם תסיר שׁקוציך מפני ולא תנוד׃ ² ונשׁבעת חי יהוה באמת במשׁפט ובצדקה והתברכו בו גוים ובו יתהללו׃ ³ כי כה אמר יהוה לאישׁ יהודה ולירושׁלם נירו לכם ניר ואל תזרעו אל קוצים׃ ⁴ המלו ליהוה והסרו ערלות לבבכם אישׁ יהודה וישׁבי ירושׁלם פן תצא כאשׁ חמתי ובערה ואין מכבה מפני רע מעלליכם׃ ⁵ הגידו ביהודה ובירושׁלם השׁמיעו ואמרו ותקעו שׁופר בארץ קראו מלאו ואמרו האספו ונבואה אל ערי המבצר׃ ⁶ שׂאו נס ציונה העיזו אל תעמדו כי רעה אנכי מביא מצפון ושׁבר גדול׃ ⁷ עלה אריה מסבכו ומשׁחית גוים נסע יצא ממקמו לשׂום ארצך לשׁמה עריך תצינה מאין יושׁב׃ ⁸ על זאת חגרו שׂקים ספדו והילילו כי לא שׁב חרון אף יהוה ממנו׃ ⁹ והיה ביום ההוא נאם יהוה יאבד לב המלך ולב השׂרים ונשׁמו הכהנים והנביאים יתמהו׃ ¹⁰ ואמר אהה אדני יהוה אכן השׁא השׁאת לעם הזה ולירושׁלם לאמר שׁלום יהיה לכם ונגעה חרב עד הנפשׁ׃ ¹¹ בעת ההיא יאמר לעם הזה ולירושׁלם רוח צח שׁפיים במדבר דרך בת עמי לוא לזרות ולוא להבר׃ ¹² רוח מלא מאלה יבוא לי עתה גם אני אדבר משׁפטים אותם׃ ¹³ הנה כעננים יעלה וכסופה מרכבותיו קלו מנשׁרים סוסיו אוי לנו כי שׁדדנו׃ ¹⁴ כבסי מרעה לבך ירושׁלם למען תושׁעי עד מתי תלין בקרבך מחשׁבות אונך׃ ¹⁵ כי קול מגיד מדן ומשׁמיע און מהר אפרים׃ ¹⁶ הזכירו לגוים הנה השׁמיעו על ירושׁלם נצרים באים מארץ המרחק ויתנו על ערי יהודה קולם׃ ¹⁷ כשׁמרי שׂדי היו עליה מסביב כי אתי מרתה נאם יהוה׃ ¹⁸ דרכך ומעלליך עשׂו אלה לך זאת רעתך כי מר כי נגע עד לבך׃ ¹⁹ מעי מעי אחולה קירות לבי המה לי לבי לא אחרישׁ כי קול שׁופר שׁמעתי נפשׁי תרועת מלחמה׃ ²⁰ שׁבר על שׁבר נקרא כי שׁדדה כל הארץ פתאם שׁדדו אהלי רגע יריעתי׃ ²¹ עד מתי אראה נס אשׁמעה קול שׁופר׃ ²² כי אויל עמי אותי לא ידעו בנים סכלים המה ולא נבונים המה חכמים המה להרע ולהיטיב לא ידעו׃ ²³ ראיתי את הארץ והנה תהו ובהו ואל השׁמים ואין אורם׃ ²⁴ ראיתי ההרים והנה רעשׁים וכל הגבעות התקלקלו׃ ²⁵ ראיתי והנה אין האדם וכל עוף השׁמים נדדו׃ ²⁶ ראיתי והנה הכרמל המדבר וכל עריו נתצו מפני יהוה מפני חרון אפו׃ ²⁷ כי כה אמר יהוה שׁממה תהיה כל הארץ וכלה לא אעשׂה׃ ²⁸ על זאת תאבל הארץ וקדרו השׁמים ממעל על כי דברתי זמתי ולא נחמתי ולא אשׁוב ממנה׃ ²⁹ מקול פרשׁ ורמה קשׁת ברחת כל העיר באו בעבים ובכפים עלו כל העיר עזובה ואין יושׁב בהן אישׁ׃ ³⁰ ואתי שׁדוד מה תעשׂי כי תלבשׁי שׁני כי תעדי עדי זהב כי תקרעי בפוך עיניך לשׁוא תתיפי מאסו בך עגבים נפשׁך יבקשׁו׃ ³¹ כי קול כחולה שׁמעתי צרה כמבכירה קול בת ציון תתיפח תפרשׂ כפיה אוי נא לי כי עיפה נפשׁי להרגים׃